គ្រួសារ និង មន្ត្រីបក្សប្រឆាំង ចាត់ទុកការចាប់ខ្លួនប្រធានគណៈកម្មាធិការប្រតិបត្តិបណ្ដោះអាសន្នរបស់គណបក្សកម្លាំងជាតិ លោក ខឿន វីរ៉ាត់ ជាលើកទី២ ពីសំណាក់សមត្ថកិច្ចក្រុងភ្នំពេញ នៅថ្ងៃទី០៧ ខែមេសានេះ ថាជារឿងមិនសមហេតុផល និងជាការរឹតត្បិតផ្នែកនយោបាយ មកលើមន្ត្រីគណបក្សប្រឆាំង។ ពួកគាត់ស្នើឱ្យរដ្ឋាភិបាល និងអាជ្ញាធរពាក់ព័ន្ធដោះលែង លោក ខឿន វីរ៉ាត់ ឱ្យមានសេរីភាពឡើងវិញ។
ថ្វីត្បិត កម្ពុជាកំពុងរងការឈ្លានពានទឹកដីពីសំណាក់យោធាថៃក្ដី អាជ្ញាធរក្រុងភ្នំពេញពុំបានបន្ធូរដៃក្នុងការបង្ក្រាប និងចាប់ខ្លួនមន្ត្រី បក្សប្រឆាំង និងពលរដ្ឋដាក់ពន្ធនាគារនោះទេ។
ប្រពន្ធលោក ខឿន វីរ៉ាត់ គឺលោកស្រី ថាច់ ចន្ធូ បានប្រាប់ទូរទស្សន៍អាស៊ីសេរី នៅថ្ងៃទី០៧ ខែមេសាថា ប្ដីលោកស្រី គឺ លោក ខឿន វីរ៉ាត់ ដែលជាប្រធានគណៈកម្មាធិការប្រតិបត្តិបណ្ដោះអាសន្ន ប្រចាំខេត្តព្រៃវែង នៃគណបក្សកម្លាំងជាតិ ត្រូវបានសមត្ថកិច្ចជាច្រើននាក់មកចាប់រុញចូលឡានកាលពីវេលាម៉ោង៩ព្រឹកពេលលោកកំពុងតែអង្គុយនៅក្នុងហាងកាហ្វេមួយកន្លែង ស្ថិត នៅផ្សារឈូកវ៉ា១ ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ។
លោកស្រីថាការចាប់ខ្លួននេះ គឺសមត្ថកិច្ច ពុំមានដីកាត្រឹមត្រូវនោះទេ ហើយក៏មិនដឹងថា បញ្ជូនទៅណានោះដែរ។ លោកស្រីចាត់ទុកការចាប់ខ្លួននេះថា ជារឿងមិនត្រឹមត្រូវ ព្រោះប្ដីលោកស្រី ពុំបានធ្វើអ្វីខុសនោះទេ ខណៈដែលលោកស្រី និងប្ដីទើបតែមកពីព្យាបាលជំងឺនៅប្រទេសវៀតណាមបាន៥ថ្ងៃប៉ុណ្ណោះ។ ទន្ទឹមគ្នានោះ លោកស្រីថាលោក ខឿន វីរ៉ាត់ ក៏ពុំដែលបានបង្ហោះសារលើបណ្ដាញសង្គមហ្វេសប៊ុក រិះគន់ នរណានោះដែរ។ លោកស្រីស្នើឱ្យអាជ្ញាធរដោះលែង លោក ខឿន វីរ៉ាត់ ឱ្យមានសេរីភាពវិញ ដោយឥតលក្ខខណ្ឌ។
លោកស្រី ថាច់ ចន្ធូ៖ «ខ្ញុំឃើញថាវាអយុត្តិធម៌សម្រាប់គាត់ ព្រោះមកចាប់ទាំងមិនដឹងថាខ្លួនឯងខុសអ្វីផង ហើយមកចាប់ទាំងដល់គ្មានដីកាសោះ។ មកវាយខ្នោះគាត់ ដូចជាចាប់ចោរអ៊ីចឹង។ចុងក្រោយ ខ្ញុំសូមសំណូមពរឱ្យរដ្ឋាភិបាលពិចារណាឡើងវិញ ហើយដោះលែងប្ដីខ្ញុំឱ្យមានសេរីភាពវិញ»។
លោក ខឿន វីរ៉ាត់ មានដើមកំណើតជាខ្មែរក្រោម ហើយលោកជាអតីតចៅសង្កាត់រងទី១នៅរាជធានីភ្នំពេញ របស់គណបក្សសង្គ្រោះជាតិ។ លោកត្រូវបានអាជ្ញាធរចាប់ខ្លួនដាក់ពន្ធនាគារ ជាលើកទី១ កាលពីថ្ងៃទី២៤ ខែមីនា ឆ្នាំ២០២៣ ពីបទក្លែងបន្លំឯកសារ ក្នុងការបង្កើតគណបក្សបេះដូងជាតិកាលពីឆ្នាំ២០២១។ កាលនោះលោកត្រូវតុលាការក្រុងភ្នំពេញកាត់ទោសឱ្យជាប់ពន្ធនាគារ២ឆ្នាំហើយក្រោយអនុវត្តទោសចប់សព្វគ្រប់លោកក៏ត្រូវបានដោះលែងវិញ។ បន្ទាប់មកទៀត លោកក៏បានចូលរួមជីវភាពនយោបាយជាមួយគណបក្សកម្លាំងជាតិ រហូតមកទល់សព្វថ្ងៃ ហើយ មានតួនាទីជាប្រធានគណៈកម្មាធិការប្រតិបត្តិបណ្ដោះអាសន្ន ប្រចាំខេត្តព្រៃវែង។
ទីប្រឹក្សាគណបក្សកម្លាំងជាតិ លោក រ៉ុង ឈុន យល់ឃើញថា ការចាប់ខ្លួន លោក ខឿន វីរ៉ាត់ ជាលើកទី២នេះ គឺជាការរឹតត្បិតសិទ្ធិសេរីភាព អ្នកនយោបាយបក្សប្រឆាំង។ លោកថា ការចាប់ខ្លួននេះ ពុំផ្ដល់ផលចំណេញអ្វីដល់ ប្រទេសជាតិនោះទេ ក្រៅតែពី ធ្វើឱ្យប្រទេសជាតិ បន្តបែកបាក់ខណៈដែលប្រទេសជាតិ កំពុងតែរងការឈ្លានពានពីសំណាក់ប្រទេសថៃ ហើយពលរដ្ឋជាច្រើន កំពុងជួបទុក្ខលំបាកព្រោះ វិបត្តិសេដ្ឋកិច្ច។
លោក រ៉ុង ឈុន៖ «ធ្វើបែបនេះវាមិនផ្ដល់ផលចំណេញអ្វីដល់ប្រទេសជាតិនោះទេ បានត្រឹមបង្ហាញពីការបែកបាក់ មិនបានបង្ហាញពីការសាមគ្គីគ្នា និងឯកភាពជាតិ។ ជារឿងមួយដែលមិនចំណេញដល់ប្រទេសជាតិ។ យើងចង់ឃើញសង្គមមួយមានឯកភាពជាតិ សាមគ្គីគ្នាដើម្បីខ្មែរខ្លាំង»។
ទូរទស្សន៍អាស៊ីសេរី មិនអាចទាក់ទង អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ និងអគ្គស្នងការរង និងជាស្នងការនគរបាលរាជធានីភ្នំពេញ លោក ជួន ណារិន្ទ ដើម្បីឆ្លើយតបជុំវិញរឿងនេះ បានទេ នៅថ្ងៃទី៧ ខែមេសា ដោយហៅទូរស័ព្ទចូលតែគ្មានអ្នកទទួល។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក លោក នី សុខា ថា ជារឿងគួរឱ្យសោកស្ដាយ ដែលប៉ុន្មានខែចុងក្រោយនេះ មានអ្នកនយោបាយ ពលរដ្ឋ និងអ្នកសារព័ត៌មាន បន្តទទួលរងការធ្វើទុក្ខបុកម្នេញ និងចាប់ខ្លួនដាក់ពន្ធនាគារជាបន្តបន្ទាប់។ លោកថា ករណីនេះ កម្ពុជានឹងទទួលរង នូវការរិះគន់បន្ថែមទៀតពីសហគមន៍ អន្តរជាតិ ជុំវិញការរឹតត្បិតសេរីភាពអ្នកនយោបាយ និងពលរដ្ឋ។ ក្នុងនាមជាអង្គការសង្គមស៊ីវិល លោកទទូចឱ្យរដ្ឋាភិបាលពិចារណាឡើងវិញក្នុងការបើកលំហ សិទ្ធិសេរីភាព និងផ្សះផ្សា ជាតិឱ្យរឹងមាំ។
លោក នី សុខា៖ «ប្រទេសកម្ពុជាយើងកំពុងទទួលរងការរិះគន់ និងទទួលរងការមើលឃើញពីសហគមន៍ជាតិ និងអន្តរជាតិថា សេរីភាពបញ្ចេញមតិ ក៏ដូចជាសេរីភាពជាមូលដ្ឋាន និងនយោបាយនៅកម្ពុជាដែលកំពុងរងការរឹតត្បិតនោះ ឥឡូវវាកាន់តែមានបញ្ហា ដែលធ្វើឱ្យមតិជាតិ និងអន្តរជាតិបន្តរិះគន់រដ្ឋាភិបាល»។
ទាក់ទិននឹងការចាប់ខ្លួននេះដែរ អ្នកជំនាញផ្នែកភូមិសាស្ត្រនយោបាយ លោក សេង វណ្ណលី បានបង្ហោះសារនៅលើគណនីហ្វេសប៊ុក នៅថ្ងៃទី៧ ខែមេសាថា ការចាប់ខ្លួនលោក ខឿន វីរ៉ាត់ សាជាថ្មី បន្ទាប់ពី លោកត្រឡប់មកពីព្យាបាលជំងឺនៅប្រទេសវៀតណាម បង្ហាញយ៉ាងច្បាស់ពី ចេតនាគំរាមកំហែងផ្នែកស្មារតី និងការខ្វះខាតនូវទិដ្ឋភាពមនុស្សធម៌ក្នុងនីតិវិធីច្បាប់ ខណៈដែលអំណាចរដ្ឋគួរតែត្រូវបានប្រើប្រាស់ដើម្បីការពារពលរដ្ឋ មិនមែនដើម្បីដាក់សម្ពាធលើអ្នកដែលហ៊ាននិយាយការពិត ពីសង្គម និងមាននិន្នាការ នយោបាយផ្សេងនោះទេ។
លោកថា នេះជាយុទ្ធសាស្ត្របំបិទមាត់តាមរយៈការចោទប្រកាន់ដដែលៗ ដែលមិនត្រឹមតែធ្វើឱ្យប៉ះពាល់ដល់កិត្តិយសរបស់កម្ពុជានៅលើឆាកអន្តរជាតិប៉ុណ្ណោះទេថែមទាំងរុញច្រានសង្គមកម្ពុជាឱ្យធ្លាក់ក្នុងស្ថានភាពភ័យខ្លាច ដែលជាឧបសគ្គដល់ការអភិវឌ្ឍធនធានមនុស្ស និងការកសាងឯកភាពជាតិ។ លោកថា រដ្ឋាភិបាលលោក ហ៊ុន ម៉ាណែត គួរតែបើកលំហសេរីភាព និងដោះស្រាយ បញ្ហាប្រឈម តាមរយៈការសន្ទនា ជាជាងការប្រើប្រាស់ ប្រព័ន្ធតុលាការដើម្បីបង្ក្រាបសំឡេងរិះគន់៕
