អ្នកឃ្លាំមើលសង្គមអះអាងថា ប្រសិនបើសហរដ្ឋអាមេរិកមិនដាក់ទណ្ឌកម្មទៅលើប្រទេសថៃនោះទេ ទោះបីសហរដ្ឋអាមេរិកព្យាយាមយ៉ាងណា ក៏ប្រទេសថៃនឹងមិនងាកមកចរចាជាមួយកម្ពុជាដែរ បន្ទាប់ពីសហរដ្ឋអាមេរិកបានបញ្ជាក់ជាថ្មីម្តងទៀតថា បានត្រៀមខ្លួនជាស្រេចក្នុងការជួយសម្របសម្រួលការពិភាក្សា ដើម្បីធានានូវសន្តិភាព និងស្ថិរភាពរវាងប្រទេសកម្ពុជា និងថៃ ទៅតាមបំណងប្រាថ្នារបស់លោកប្រធានាធិបតី ដូណាល់ ត្រាំ (Donald Trump)។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវលោកបណ្ឌិត សេក សុជាតិ បានលើកឡើងថា ការជួយសម្របសម្រួលរបស់សហរដ្ឋអាមេរិកគឺជារឿងមួយល្អ ដែលធ្វើឲ្យការអនុវត្តបទឈប់បាញ់ និងការអនុវត្តកិច្ចព្រមព្រៀងសន្តិភាពដែលបានឯកភាព អាចប្រព្រឹត្តទៅបានរលូន។ ប៉ុន្តែអ្វីដែលលោកមើលឃើញប្រទេសធំៗ ក៏ដូចជា លោក អានវ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រីនៃប្រទេសម៉ាឡេស៊ីដែលជាសាក្សីនៅក្នុងកិច្ចព្រមព្រៀងសន្តិភាព គ្រាន់តែធ្វើការសម្របសម្រួលតាមរយៈការទូតប៉ុណ្ណោះ ពុំមានឥទ្ធិពលអ្វីទៅលើប្រទេសថៃដែលរំលោភបំពានមកលើកម្ពុជានោះទេ។
លោក សេក សុជាតិ បានបន្ថែមទៀតថា សហរដ្ឋអាមេរិកកំពុងធ្វើការសំឡឹងមើលផ្នែកពាណិជ្ជកម្មអាវុធជាមួយប្រទេសថៃ។ លោកថា ប្រសិនបើសហរដ្ឋអាមេរិកដាក់ទណ្ឌកម្មទៅលើប្រទេសថៃនោះទើបប្រទេសថៃងាកមករកផ្លូវចរចាជាមួយកម្ពុជា និងអនុវត្តកិច្ចព្រមព្រៀងវិញ។
លោក សេក សុជាតិ៖ «ប្រទេសថៃប្រើប្រាស់យន្តហោះF16 បំពានលើកម្ពុជាអីចឹងកាលណាយន្តហោះទាំងអស់នោះចូលទៅក្នុងដែនអធិបតេយ្យរបស់កម្ពុជា គឺលេខកូដបិទដោយស្វ័យប្រវត្ត ខ្ញុំជឿជាក់ថា ពេលនោះហើយ ជាពេលដែលថៃងាកមកធ្វើការចរចាហើយ និងអនុវត្តកិច្ចព្រមព្រៀងវិញ ហើយបើសិនគ្មានមធ្យោបាយណាមួយដែលអាចរឹតបន្តឹងទៅលើបញ្ហាទាំងអស់នោះទេ ខ្ញុំជឿជាក់ថា ទោះបីសហរដ្ឋអាមេរិកព្យាយាម ៥ឆ្នាំទៀតក៏ពិបាកនឹងធ្វើឲ្យថៃគោរពណាស់ ព្រោះថៃបានក្លាយទៅជាប្រទេសមួយដែលរំលោភបំពានកិច្ចព្រមព្រៀង និងបំផ្លាញសណ្ដាប់ធ្នាប់សកលលោក ក៏ដូចជាធ្វើឲ្យច្បាប់អន្តរជាតិចុះថយរួចបាត់ហើយ» ។
ស្ថានទូតអាមេរិកប្រចាំនៅប្រទេសកម្ពុជាបានបង្ហោះសារនៅលើហ្វេសប៊ុកនៅថ្ងៃនេះថារដ្ឋមន្ត្រីការបរទេសអាមេរិក លោក ម៉ាកូ រ៉ូប៊ីអូ (Marco Rubio) បានជួបពិភាក្សាជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត ដើម្បីបង្ហាញការព្រួយបារម្ភ អំពីអំពើហិង្សាដែលកំពុងបន្តកើតមានរវាងប្រទេសកម្ពុជា និងថៃ។ លោករដ្ឋមន្ត្រី រ៉ូប៊ីអូ បានបញ្ជាក់ឡើងវិញអំពីបំណងប្រាថ្នារបស់លោកប្រធានាធិបតីអាមេរិក ដូណាល់ ត្រាំ សម្រាប់សន្តិភាព និងតម្រូវឲ្យអនុវត្តពេញលេញនូវកិច្ចព្រមព្រៀងសន្តិភាពទីក្រុងកូឡាឡាំពួរ។
លោក រ៉ូប៊ីអូ ក៏បានបញ្ជាក់ឡើងវិញថា «សហរដ្ឋអាមេរិក ត្រៀមខ្លួនជាស្រេចក្នុងការជួយសម្របសម្រួលការពិភាក្សា ដើម្បីធានានូវសន្តិភាព និងស្ថិរភាពរវាងប្រទេសកម្ពុជា និងថៃ»។
រីឯនាយករដ្ឋមន្ត្រីកម្ពុជាលោក ហ៊ុន ម៉ាណែត បានសរសេរនៅលើហ្វេសប៊ុករបស់លោកនៅយប់ថ្ងៃទី២៥ ធ្នូ ថា លោកបានជួបពិភាក្សាតាមទូរសព្ទជាមួយ លោក រ៉ូប៊ីអូ អំពីការវិវត្តសភាពការណ៍តាមបណ្តោយព្រំដែនកម្ពុជា-ថៃ ក្នុងគោលបំណងជំរុញឱ្យមានបទឈប់បាញ់ឱ្យបានឆាប់រហ័ស និងការអនុវត្តកិច្ចព្រមព្រៀងសន្តិភាព ដើម្បីស្វែងរកសន្តិភាពយូរអង្វែងសម្រាប់កម្ពុជា និងថៃ។
លោក ហ៊ុន ម៉ាណែត បញ្ជាក់ថា «ខ្ញុំបានបញ្ជាក់ជាថ្មីអំពីការប្រកាន់ខ្ជាប់យ៉ាងម៉ឺងម៉ាត់របស់កម្ពុជា ក្នុងការបន្តអនុវត្តតាមស្មារតីសេចក្ដីថ្លែងការណ៍រួមទីក្រុងកូឡាឡាំពួរ និងសង្ឃឹមថា ភាគីទាំងពីរនឹងបន្តធ្វើការជាមួយគ្នាស្របតាមកិច្ចព្រមព្រៀងដែលមាន។ កម្ពុជាបន្តរក្សាជំហរក្នុងការដោះស្រាយបញ្ហាព្រំដែនដោយសន្តិវិធី ដោយអនុលោមតាមកិច្ចព្រមព្រៀង និងយន្តការដែលបានឯកភាពគ្នានាពេលកន្លងមក»។
ទាក់ទងនឹងសង្គ្រាមឈ្លានពានរបស់ថៃមកលើកម្ពុជានេះដែរ រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន ថ្លែងនៅអាកាសយានដ្ឋានអន្តរជាតិតេជោ បន្ទាប់ពីដឹកនាំប្រតិភូទៅចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ាននៅក្រុងកូឡាឡាំពួរ កាលពីថ្ងៃទី២២ ខែធ្នូ ថា កម្ពុជាបានទទួលយកភ្លាមៗនូវសំណើឱ្យមានការវិលត្រឡប់ទៅរកបទឈប់បាញ់ ដែលត្រូវបានស្នើដោយម៉ាឡេស៊ីចំនួន ៣លើក និងលោក ដូណាល់ ត្រាំ មួយលើក ក្រោយការផ្ទះអាវុធជាលើកទី២រវាងកម្ពុជា និងថៃ កាលពីថ្ងៃទី៧ ខែធ្នូ ប៉ុន្តែថៃបានបដិសេធមិនទទួលយក។ ផ្ទុយទៅវិញ ថៃបានព្យាយាមដាក់លក្ខខណ្ឌឱ្យកម្ពុជាប្រកាសបទឈប់បាញ់មុន និងអនុវត្តឱ្យបានជាក់លាក់នឹងស្មោះត្រង់ បើទោះជាថៃជាអ្នកឈ្លានពានកម្ពុជាមុនក៏ដោយ៕
