យោធាថៃបានពង្រីកការវាយប្រហារតាមផ្លូវអាកាសឈ្លានពានចូលទឹកដីកម្ពុជាកាន់តែជ្រៅឡើងៗនៅតាម ទីប្រជុំជន និងបាញ់ប្រហារមកលើពលរដ្ឋខ្មែរ បណ្ដាលឱ្យស្លាប់ និងរបួសជាច្រើននាក់។ ការវាយប្រហារនេះ គឺបន្ទាប់ពីយោធាថៃ បានចូលកាន់កាប់លេណដ្ឋានរបស់យោធាខ្មែរ ក្នុងតំបន់មួយចំនួននៅតាមព្រំដែន និងសន្ធប់បាញ់ផ្លោងចូលក្នុងតំបន់ទីប្រជុំក្នុងក្រុងប៉ោយប៉ែត។
ទោះបីជាភាគីកម្ពុជា បានទទូចឱ្យមានការចរចា និងអនុវត្តតាមលក្ខខណ្ឌនៃបទឈប់បាញ់ក្ដី ក៏ក្រុមយោធាថៃនៅតែបន្តវាយប្រហារមកលើកម្ពុជា ដោយឆ្លងខ្សែបន្ទាត់ព្រំដែនកាន់តែឆ្ងាយ ដែលធ្វើឱ្យប្រជាពលរដ្ឋខ្មែររស់នៅក្នុងខេត្តជាប់ព្រំដែនថៃ ភ័យខ្លាច និងជួបទុក្ខលំបាក។
ក្រសួងការពារជាតិកម្ពុជា បានចេញសេចក្ដីថ្លែងការណ៍ នៅថ្ងៃទី២៤ ខែធ្នូ ថា យោធាថៃបានបើកការវាយលុក ដោយប្រើប្រាស់កាំភ្លើងយន្ត ដែលបំពាក់លើរថក្រោះ និងរថពាសដែក ចូលបាញ់ប្រហារមកលើទីតាំងជនស៊ីវិល អាគារពាណិជ្ជកម្មឯកជន និងហេដ្ឋារចនាសម្ព័ន្ធ នៅក្នុងភូមិសាស្ត្រអូរស្មាច់ ក្រុងសំរោង ខេត្តឧត្តរមានជ័យ។
ពលរដ្ឋនៅច្រកអូរស្មាច់ បានអះអាងប្រាប់ទូរទស្សន៍អាស៊ីសេរី ក្នុងលក្ខខ័ណ្ឌមិនបញ្ចេញឈ្មោះ ថា ការវាយប្រហារទាំងកម្រោលនេះ បានបណ្ដាលឱ្យប្រជាពលរដ្ឋខ្មែរ រត់ភៀសខ្លួនចោលផ្ទះសម្បែង និងទ្រព្យសម្បត្តិ ទាំងមិនបានត្រៀមខ្លួនទុកជាមុន ក្នុងនោះ មានមន្ត្រីនគរបាលម្នាក់ ត្រូវយោធាថៃបាញ់ប្រហារចំក្បាល ក្នុងពេលចេញល្បាត និងជួយជម្លៀសពលរដ្ឋ បណ្ដាលឱ្យស្លាប់ពេលបញ្ជូនទៅមន្ទីរពេទ្យ។
អ្នកនៅអូរស្មាច់ គេជម្លៀសចេញមកអស់ហើយ គេអត់ហ៊ាននៅទៀតទេ ព្រោះទាហានថៃនៅតាមក្រវាត់ព្រំដែនអស់ហើយ ដូច្នេះយើងមិនអាចចូលទៅផ្ដេសផ្ដាសបានទេ វាអាចនាំគ្រោះថ្នាក់ដល់ជីវិត។ យូរៗគេលួចទៅមើលផ្ទះសម្បែងម្ដង
ងាកមកខាងសមរភូមិខេត្តព្រះវិហារ វិញ យោធាថៃបានបន្តបាញ់កាំភ្លើងធំផ្លោងពីចម្ងាយ ចូលក្នុងភូមិសាស្ត្រប្រាសាទព្រះវិហារ តាំងពីម៉ោង ១២យប់រំលងអាធ្រាត្រ រហូតដល់មេឃភ្លឺ យោធាថៃបានបន្តវាយសន្ធប់ ដោយបានប្រើប្រាស់ដ្រូនអត្តឃាត កាំភ្លើងប្រភេទ155 mm កាំជ្រួចហ្វូងDTI 1G រថយន្តបំពាក់កាំភ្លើងចល័ត DK 106 និងផ្សែងពុល ចូលក្នុងភូមិសាស្ត្រប្រាសាទ ព្រះវិហារ នៅតំបន់ចាន់ក្រហម ភ្នំខ្មោច តាថាវ គោលប្រាំបី ភ្នំត្រងោល វាលឥន្ទ្រី និងបន្តបាញ់ផ្លោងកាំភ្លើងធំ ចូលក្នុងតំបន់ប្រាសាទតាមាន់ធំ ផងដែរ។
ដោយឡែកនៅឯខេត្តបន្ទាយមានជ័យ វិញ កម្លាំងថ្មើរជើងរបស់យោធាថៃ អមដោយរថពាសដែក បានសម្រុកចូលវាយលុកក្នុងភូមិសាស្ត្រភូមិជោគជ័យ និងបឹងត្រកួន ខណៈមួយផ្លូវទៀត យោធាថៃបានបាញ់ផ្លោងចំនួន ២គ្រាប់ចូលក្នុងភូមិសាស្ត្រក្រុងប៉ោយប៉ែត ដោយចំនួន ១គ្រាប់ធ្លាក់នៅជិតរង្វង់មូល៥៨ និង១គ្រាប់ទៀតធ្លាក់នៅសង្កាត់និមិត្ត។ ជាមួយគ្នានេះ យោធាថៃបានបាញ់ផ្លោង គ្រាប់ចូលតំបន់ស៊ីវិលកម្ពុជា ក្នុងភូមិកូនត្រី ក្បែរផ្លូវជាតិលេខ៥ ឃុំកូប ស្រុកអូរជ្រៅ បណ្ដាលឱ្យពលរដ្ឋ ចំនួន២នាក់ រងរបួសធ្ងន់ ក្នុងនោះមានម្នាក់ជាកុមារ។
ចំណែកនៅលើអាកាសវិញ យោធាថៃបានប្រើប្រាស់យន្តហោះចម្បាំងT-50 ទម្លាក់គ្រាប់បែកចង្កោម នៅភូមិសាស្ត្រឃុំស្លក្រាម ស្រុកស្វាយចេក ដែលមានប្រជាជនស៊ីវិលកំពុងរស់នៅ ខណៈនៅខេត្តសៀមរាប យន្តហោះចម្បាំងថៃ បានទម្លាក់គ្រាប់បែកចំនួន ៤គ្រាប់ចូលភូមិសាស្ត្រស្រុកស្រីស្នំ។
នៅឯខេត្តបាត់ដំបង វិញ នៅព្រឹកថ្ងៃទី២៤ ខែធ្នូ ដដែលនេះ យោធាថៃបានបាញ់ផ្លោងចំនួន ២៦គ្រាប់ ចូលភូមិសាស្ត្រឃុំសំពៅលូន ស្រុកសំពៅលូន ខេត្តបាត់ដំបង ក្នុងនោះក៏មានគ្រាប់បានផ្លោងចូលវត្តចាន់ដែង ផងដែរ។ ក្រោយមកយោធាថៃ បានពង្រីកគោលដៅវាយប្រហារកាន់តែជ្រៅ ដោយប្រើប្រាស់យន្តហោះចម្បាំងប្រភេទ T-50 ទម្លាក់គ្រាប់បែកចំនួន ៤គ្រាប់ ចូលក្នុងភូមិភ្នំតូច ក្បែរភ្នំសំពៅ ស្ថិតក្នុងស្រុកបាណន់ ខេត្តបាត់ដំបង ដែលទីតាំងនេះគឺជារមណីយដ្ឋានទេសចរណ៍ នៅកៀកនឹងសាលារៀន និងមានប្រជាជនកំពុងរស់នៅច្រើនកុះករ។
ការទម្លាក់គ្រាប់បែករបស់កងទ័ពអាកាសថៃនេះ បានធ្វើឱ្យសិស្សសាលា ដែលមានទាំងកុមារតូចៗ យំស្រែក ផ្អើលរត់ប្រសាច និងទាញកង់ ម៉ូតូជិះភៀសខ្លួន និងមានកុមារមួយចំនួន បានវង្វេងផ្លូវ និងយំស្រែករកឪពុកម្ដាយ ខណៈមនុស្សចាស់ បានរត់ចោលផ្ទះ កន្លែងធ្វើការ និងតូបលក់ដូរ។ រដ្ឋបាលស្រុកបាណន់សម្រេចបិទសាលា៨៣ខ្នងភ្លាមៗ ក្រោយយន្តហោះចម្បាំងថៃទម្លាក់គ្រាប់ចូលភូមិសាស្ត្រស្រុកបាណន់។
នេះជាលើកទី១ហើយ ដែលកងទ័ពអាកាសថៃ ប្រើប្រាស់យន្តហោះចម្បាំងT-50 ដែលជាផលិតផលរបស់កូរ៉េខាងត្បូង មកទម្លាក់គ្រាប់បែកឈ្លានពានកម្ពុជា។ ក៏ប៉ុន្តែ យោធាថៃតាមរយៈទំព័រហ្វេសប៊ុករបស់ខ្លួន បានអះអាងថា ការវាយប្រហារមកលើទីតាំងស្រុកបាណន់ នេះ មានទាំងយន្តហោះចម្បាំងF-16និងT-50។
យ៉ាងណាមិញ មកដល់ពេលនេះ ក្រសួងការពារជាតិ មិនបានបញ្ជាក់ពីស្ថានភាពនៅសមរភូមិប្រាសាទតាក្របី ច្រកអានសេះ និងតំបន់អូរភ្លុកដំរី ក្នុងស្រុកវាលវែង ខេត្តពោធិ៍សាត់ នោះទេ ដោយក្រសួងបានបង្ហើបថា តំបន់ផ្សេងទៀត ដែលក្រសួងមិនបានលើកយកមកបង្ហាញ គឺមានសភាពស្ងប់ស្ងាត់។ ទោះជាយ៉ាងណា ភាគីយោធាថៃ បានអះអាងថា ពួកគេកំពុងកាន់កាប់តំបន់ទាំងនោះ។
ជុំវិញរឿងនេះ ប្រមុខដឹកនាំស្ថាប័ន អធិបតេយ្យជាតិ ព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន យល់ឃើញថា ការវាយលុករបស់យោធាថៃ បានរំលងផុតតំបន់ត្រួតស៊ីគ្នាទៅហើយ ដោយសង្គ្រាមលើកនេះ យោធាថៃហាក់មានបំណងវាយកាន់កាប់ទឹកដីកម្ពុជាកាន់តែជ្រៅ តាមដែលអាចធ្វើទៅបាន។
តំបន់ខ្លះគេចូលឈ្លានពានត្រឹមផែនទីខ្នាត ១លើ៥០ពាន់របស់ថៃ ប៉ុន្តែកន្លែងខ្លះ គេចូលលើសនឹងទៅទៀត ដូចជានៅច្រកអានសេះជាដើម។ ប្រសិនបើអន្តរជាតិ នៅតែមិនរារាំងថៃទេ ថៃនឹងធ្វើដូចរុស្សី ដែរ ដើម្បីកាន់កាប់ទឹកដីកម្ពុជា ដូចដែលរុស្សីច្បាមយកទឹកដីអ៊ុយក្រែន បានស្រេចតែនឹងចិត្ត
គិតមកដល់ពេលនេះ សង្គ្រាមឈ្លានពានរបស់ថៃ មកលើកម្ពុជា បានឈានចូល ១៨ថ្ងៃហើយ ដែលបង្ខំឱ្យប្រជាពលរដ្ឋខ្មែរភៀសសឹកមានចំនួនកើនដល់ជាង ៦សែននាក់ ក្នុងនោះមាន ៨៤ភាគរយ ជាកុមារនិងស្ត្រី ខណៈ ជនស៊ីវិលបានបាត់បង់ជីវិត មានចំនួន ២១នាក់ និងរបួស៨៣នាក់។
ទោះជាបែបនេះក្ដី ក្នុងសមរភូមិប្រយុទ្ធនេះ ក្រុមយោធាថៃ បានបង្ហាញអារម្មណ៍សប្បាយរីករាយ នៅលើបណ្ដាញសង្គមរបស់ពួកគេ ដោយមិនខ្វល់ពីការអំពាវនាវរបស់អន្តរជាតិនោះឡើយ ស្របពេលដែលពលរដ្ឋខ្មែរកំពុងរងទឹកភ្នែក ដោយសារភៀសសឹក និងរស់នៅទាំងលំបាកវេទនា និងបាត់បង់សមាជិកគ្រួសារជាដើម៕
