ចៅក្រមសាលាឧទ្ធរណ៍ភ្នំពេញ បានតម្កល់សាលក្រមផ្ដន្ទាទោសសាលាដំបូងខេត្ត កំពង់ស្ពឺលើអតីតមន្ត្រីយោធាលោក សុខ ស៊ុនណារ៉េត និងជាឪពុករបស់លោក ស៊ន តារ៉ា ចំនួន ៤ឆ្នាំ និងបានបន្ថែមទោសពិន័យប្រាក់ ចំនួន ៥លានរៀល ឬស្មើ ១២៥០ដុល្លារ។
ប្រធានក្រុមប្រឹក្សាជំនុំជម្រះសាលាឧទ្ធរណ៍ភ្នំពេញ បានប្រកាសសាលដីកា នៅ ថ្ងៃទី២៩ ខែមករា ថា ការពិន័យប្រាក់ជាង ១ពាន់ដុល្លារ បន្ថែមលើទោសជាប់ ពន្ធនាគារចំនួន៤ ឆ្នាំ ពីបទ«រក្សាទុកដោយខុសច្បាប់នូវសារធាតុញៀន»នេះ ធ្វើឡើងបន្ទាប់ពីមានសំណើរបស់តំណាងអយ្យការសាលាឧទ្ធរណ៍ អំឡុងពេលសវនាការ។
លោក សុខ ស៊ុនណារ៉េត ត្រូវបានតុលាការខេត្តកំពង់ស្ពឺ កាត់ទោសជាប់ពន្ធនាគារ ៤ ឆ្នាំ ក្រោមបទចោទរក្សាទុកដោយខុសច្បាប់នូវសារធាតុញៀន ដែលលោកតែងតែបដិសេធការចោទប្រកាន់នេះ។ លោកត្រូវបានបញ្ជូនទៅឃុំឃាំងនៅពន្ធនាគារខេត្តកំពង់ស្ពឺ កាលពីថ្ងៃទី១៣ ខែវិច្ឆិកា ឆ្នាំ២០២៤។ គិតមកដល់បច្ចុប្បន្ន លោក ជាប់ពន្ធនាគារជាង ១ ឆ្នាំហើយ។
លោក សុខ ស៊ុនណារ៉េត ត្រូវបានមន្ត្រីកងរាជអាវុធហត្ថចាប់ខ្លួន ក្រោយពីលោក ហ៊ុន សែន ព្រមានដកតំណែង និងបណ្ដេញចេញពីក្របខណ្ឌការងាររដ្ឋ ប្រសិនបើលោក ស៊ន តារា ជាកូន ដែលកំពុងរស់នៅប្រទេសបារាំង បន្តរិះគន់អំពើផ្ដាច់ការ និងរំលោភសិទ្ធិមនុស្សរបស់លោក ហ៊ុន សែន និង ក្រុមគ្រួសារត្រកូលហ៊ុន ។ លោក សុខ ស៊ុនណារ៉េត គឺជាអតីតមន្ត្រីយោធាសឹករងខេត្តកំពង់ស្ពឺ និងបានចូលនិវត្តន៍នៅឆ្នាំ២០២២៕
