តុលាការជាន់ខ្ពស់ មិនត្រឹមតែមិនដោះលែងឪពុក របស់អ្នកអត្ថាធិប្បាយបញ្ហានយោបាយនិងសង្គម លើបណ្តាញសង្គមលោក ស៊ន តារា ទេ ប៉ុន្តែបែរជាតុលាការដាក់បន្ថែមពិន័យជាប្រាក់ថែមទៀត។ គ្រួសារ និងមន្ត្រីសិទ្ធិមនុស្ស ចាត់ទុកការសម្រេចក្តីនេះ គឺជារឿងអយុត្តិធម៌។
ចៅក្រមសាលាឧទ្ធរណ៍ភ្នំពេញ លោក អ៊ិត សុធា បានប្រកាសសាលដីកានៅព្រឹកថ្ងៃទី២៩ មករា ដោយសម្រេចបន្តឃុំខ្លួនអតីតមន្ត្រីយោធាលោក សុខ ស៊ុនណារ៉េត និងជាឪពុករបស់លោក ស៊ន តារ៉ា ចំនួន ៤ ឆ្នាំ ដូចសាលាក្រមសាលាដំបូងខេត្តកំពង់ស្ពឺ និងបានបន្ថែមពិន័យជាប្រាក់ចំនួន៥លានរៀលឬស្មើ ១២៥០ ដុល្លារ។ ការប្រកាសសាលដីកានេះ ធ្វើឡើងដោយកំបាំងមុខ ដោយសារមន្ត្រីពន្ធនាគារ មិនបានបញ្ចូនលោក សុខ សុណារ៉េត មកតុលាការនោះទេ។
កូនប្រុសលោក សុខ ស៊ុនណារ៉េត គឺលោក ស៊ន សារ៉ាត់ ប្រាប់ទូរទស្សន៍អាស៊ីសេរីថា សេចក្តីសម្រេចរបស់តុលាការ គឺជារឿងអយុត្តិធម៌បំផុតសម្រាប់ឪពុករបស់លោកដែលគ្មានកំហុសអ្វីសោះ។ លោក សង្កត់ធ្ងន់ថា ឪពុករបស់លោក ធ្លាប់បម្រើការងារជាកងទ័ពជាង៣០ឆ្នាំ ដូច្នេះមិនគួរដាក់ទោសគាត់ទាំងដែលគាត់ មិនបានប្រព្រឹត្តអំពើឧក្រិដ្ឋអ្វីនោះទេ។ កូនប្រុសជនជាប់ជាប់ឃុំក្រោមហេតុផល នយោបាយរូបនេះ បន្តថា លោកនឹងជជែកជាមួយមេធាវីការពារក្តីដើម្បីដាក់បណ្តឹងជំទាស់ទៅតុលាការកំពូលទៀត។
លោក សុខ ស៊ុនណារ៉េត ត្រូវបានតុលាការខេត្តកំពង់ស្ពឺ កាត់ទោសជាប់ពន្ធនាគារ ៤ឆ្នាំក្រោមបទចោទរក្សាទុកដោយខុសច្បាប់នូវសារធាតុញៀន ដែលលោកតែងតែ បដិសេធការចោទប្រកាន់នេះ។ គិតមកដល់បច្ចុប្បន្ន លោក ជាប់ពន្ធនាគារ ជាង ១ឆ្នាំហើយ។
មន្ត្រីសមាគមការពារសិទ្ធិមនុស្សអាដហុក (Adhoc) លោក យី សុខសាន្ត ចាត់ទុកករណីនេះ ថាជាការធ្វើទុកបុកម្នេញទៅលើក្រុមគ្រួសារដែលមានសមាជិកហ៊ានបញ្ចេញមតិ អំពីបញ្ហាសង្គម និងនយោបាយ ខណៈកូនប្រុសរបស់លោក គឺលោក ស៊ន តារា នៅតែបន្តរិះគន់រដ្ឋាភិបាល លើបញ្ហារំលោភសិទ្ធិមនុស្ស និង ការបំផ្លាញលទ្ធិប្រជាធិបតេយ្យនៅប្រទេសកម្ពុជា។
លោក យី សុខសាន្ត បន្តថា សមត្ថកិច្ច និងអ្នកស្រុករបស់លោក សុខ ស៊ុនណារ៉េត សុទ្ធតែដឹងថា លោកគ្មានកំហុស ដូច្នេះលោកជឿថា ករណីលោក សុខ ស៊ុន ណារ៉េត មានគេបង្កើតបទល្មើសឱ្យគាត់ទទួលទណ្ឌកម្ម។
លោក យី សុខសាន្ត៖ «អ្វីដែលយើងសោកស្ដាយនោះ គឺយកមនុស្ស ដែលគ្មានកំហុសហើយបង្កើតបទល្មើសឲ្យគាត់ ហើយសព្វថ្ងៃមានច្រើនរឿងរបៀប អ៊ីចឹង។ យើងក្នុងនាមជាអង្គការសង្គមស៊ីវិល យើងស្នើសុំដ៏ទទូចទៅរដ្ឋាភិបាល ក៏ ដូចជាស្ថាប័នតុលាការបើសិនជាយើងយកមនុស្សគ្មានកំហុស ហើយយកទៅកាត់ ទោសឲ្យជាប់ពន្ធនាគារ ហើយដាក់ទោសទណ្ឌជាពិសេស ឪពុកលោក ស៊ន តារា នេះ ដែលគាត់មិនមានគេហៅថា គាត់អត់បានប្រព្រឹត្តអ្វីខុសផង កន្លងមក ដែល គាត់ឡើងឆ្លើយឡើងអី គាត់នៅតែប្រកាន់យកជំហររបស់គាត់ថា គាត់មិនបានធ្វើខុសហើយគាត់ក៏មិនដឹងថា អាហ្នឹងជារបស់អ្នកណាទៀត ហើយមានឆែកគាត់ទេ ថានៅក្នុងខ្លួនគាត់មានសារធាតុញៀនអត់ គឺអត់មានទៀត»។
លោក សុខ ស៊ុនណារ៉េត ត្រូវបានមន្ត្រីកងរាជអាវុធហត្ថចាប់ខ្លួន ក្រោយពីលោក ហ៊ុន សែន ព្រមានដកតំណែង និងបណ្ដេញចេញពីក្របខណ្ឌការងាររដ្ឋ ប្រសិនបើលោក ស៊ន តារា ជាកូន ដែលកំពុងរស់នៅប្រទេសបារាំង បន្តរិះគន់ អំពើផ្ដាច់ការ និងរំលោភសិទ្ធិមនុស្សរបស់លោក ហ៊ុន សែន និង ក្រុមគ្រួសារត្រកូលហ៊ុន ។ លោក សុខ ស៊ុនណារ៉េត គឺជាអតីតមន្ត្រីយោធាសឹករង ខេត្តកំពង់ស្ពឺ និងបានចូលនិវត្តន៍នៅឆ្នាំ២០២២។
មជ្ឈដ្ឋានទូទៅមើលឃើញករណីនេះថា ជាការធ្វើទុក្ខបុកម្នេញផ្នែកនយោបាយ ដោយសារប្រធានគណបក្សប្រជាជនកម្ពុជា លោក ហ៊ុន សែន បានប្រឌិតរឿងនេះឡើងដើម្បីចាប់ឃុំឪពុករបស់លោក ស៊ន តារា ធ្វើជាចំណាប់ខ្មាំង ក្នុងបំណងបំបិទមាត់លោក ស៊ន តារា មិនឲ្យនិយាយពីបញ្ហាសង្គម និងភាពអសកម្មក្រោមការដឹកនាំរបស់រដ្ឋាភិបាលត្រកូល ហ៊ុន។
មន្ត្រីគណបក្សប្រឆាំង និងអង្គការសិទ្ធិមនុស្សអន្តរជាតិ តែងតែថ្កោលទោស និងចាត់ទុកករណីនេះថា ជាអំពើឧក្រិដ្ឋគាបសង្កត់ឆ្លងដែន ហើយទាមទារឱ្យរដ្ឋាភិបាល ដោះលែងលោក សុខ ស៊ុនណារ៉េត ឱ្យមានសេរីភាពឡើងវិញ ដោយឥតលក្ខខណ្ឌ៕
