ពលរដ្ឋរងគ្រោះដីធ្លីនៅស្រុកសំបូរ ខេត្តក្រចេះថា សាលាឧទ្ធរណ៍ខេត្តត្បូងឃ្មុំ មិនព្រមដោះលែងឲ្យលោក ភេន ឡៃ រស់នៅក្រៅឃុំបណ្ដោះអាសន្នតាមការសន្យានោះឡើយ ។ ពលរដ្ឋរងគ្រោះដីធ្លីនៅខេត្តក្រចេះ ចាត់ទុកការបន្តឃុំខ្លួន លោក ភេន ឡៃ គឺជាការគំរាមកំហែង ទៅដល់ពលរដ្ឋដ៏ទៃ ដែលមានជម្លោះដីធ្លីជាមួយក្រុមហ៊ុនវៀតណាម។
ពលរដ្ឋរងគ្រោះដីធ្លីនៅឃុំកោះខ្ញែរ ស្រុកសំបូរ ខេត្តក្រចេះ អះអាងថា សាលាឧទ្ធរណ៍ខេត្តត្បូងឃ្មុំ នៅក្នុងសវនាការបណ្ដឹងសុំនៅក្រៅឃុំរបស់ លោក ភេន ឡៃ កាលពីថ្ងៃទី១៩ ខែមីនា បានសន្យាថា នឹងដោះលែង លោក ភេន ឡៃ ឲ្យនៅក្រៅឃុំបណ្ដោះអាសន្ន នៅថ្ងៃទី២៥ ខែមីនា ប៉ុន្តែរហូតមកដល់ថ្ងៃទី២៦ ខែមីនានេះ សាលាឧទ្ធរណ៍ខេត្តត្បូងឃ្មុំ មិនព្រមដោះលែងតាមការសន្យានោះឡើយ។
តំណាងពលរដ្ឋរងគ្រោះដីធ្លី លោកស្រី អែល រ៉ូស្សា អះអាងប្រាប់ទូរទស្សន៍អាស៊ីសេរី នៅថ្ងៃទី២៦ ខែមីនាថា ការបន្តឃុំខ្លួនបែបនេះ គឺជាការបំបាក់ស្មារតី និងគំរាមកំហែងទៅលើពលរដ្ឋរងគ្រោះដីធ្លីដ៏ទៃទៀត កុំឲ្យចេញតវ៉ា ឬទាមទារពាក់ព័ន្ធនឹងបញ្ហាដីធ្លីជាមួយក្រុមហ៊ុនវៀតណាម។
លោកស្រី អែល រ៉ូស្សា៖ «គិតថាអាជ្ញាធរពន្យារពេលហើយមកសន្យាជាមួយប្រជាពលរដ្ឋថា ច្បាស់លាស់អស់ហើយ ដល់ពេលពន្យារពេលអត់ប្រាប់ដែរ ខ្ញុំមិនដឹងដែរដល់ពេលអញ្ចឹង ខ្ញុំសោកស្ដាយណាស់ដែលមន្ត្រីសន្យាជាមួយប្រជាពលរដ្ឋ ខ្ញុំចូលទៅសាលាឧទ្ធរណ៍ផ្ទាល់ បែរជាគាត់និយាយមកអត់ពិតប្រាកដជាមួយប្រជាពលរដ្ឋ»។
លោក ភេន ឡៃ ត្រូវបានមន្ត្រីបរិស្ថានចាប់ខ្លួនកាលពីថ្ងៃទី៩ ខែមករា និងត្រូវបានតុលាការខេត្តក្រចេះសម្រេចឃុំខ្លួនបណ្ដោះអាសន្ននៅថ្ងៃបន្ទាប់ដោយចោទពីបទកាប់រុករានទន្ទ្រានដីព្រៃដោយខុសច្បាប់ ក្រោយតំណាងពលរដ្ឋរូបនេះ បានដឹកនាំពលរដ្ឋក្នុងសហគមន៍តវ៉ារកដំណោះស្រាយជម្លោះដីធ្លីជាមួយក្រុមហ៊ុនវៀតណាម។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (ADHOC) លោក យិន ម៉េងលី មានប្រសាសន៍ថា ប្រសិនបើករណីនេះ ពាក់ព័ន្ធជាមួយនឹងបញ្ហាដីធ្លី ជាមួយក្រុមហ៊ុន អាជ្ញាធរគួរតែដោះលែងតំណាងពលរដ្ឋ និងស្វែងរកដំណោះស្រាយបញ្ចប់វិវាទដីធ្លីមួយនេះ មិនគួរចាប់ចង និងធ្វើបាបពលរដ្ឋខ្លួនឯងបែបនេះឡើយ។
លោក យិន ម៉េងលី៖ «បទល្មើសដែលចោទប្រកាន់ទៅលើរូបគាត់មិនមែនជាបទល្មើសអ្វីធ្ងន់ធ្ងរនោះទេ មិនមែនជាបទល្មើសឧក្រិដ្ឋនោះទេ គ្រាន់តែពាក់ព័ន្ធទៅនឹងបញ្ហារឿងជម្លោះដីធ្លី ប្រសិនបើថាគាត់រំលោភយកដីរបស់រដ្ឋ ឲ្យគាត់ប្រគល់ដីរបស់រដ្ឋឲ្យទៅរដ្ឋវិញទៅ វាល្អជាង ពីព្រោះបើយើងនៅតែបន្តឃុំខ្លួនគាត់ ដោយសារតែជម្លោះដីធ្លីក៏វាមិនល្អដែរ»។
កាលពីឆ្នាំ២០២៤ សាលាដំបូងខេត្តក្រចេះ បានកោះហៅលោក ភេន ឡៃ និងតំណាងពលរដ្ឋចំនួន ៥នាក់ផ្សេងទៀតឲ្យចូលបំភ្លឺ ពាក់ព័ន្ធនឹងការរំលោភកាន់កាប់ទ្រព្យសម្បត្តិរដ្ឋដោយខុសច្បាប់ និងបានប្រើប្រាស់អំពើហិង្សាទៅលើអ្នកកាន់កាប់អចលវត្ថុដោយសុចរិត។ ការប្រើប្រាស់វិធានការច្បាប់នេះគឺក្រោយពីលោកដឹកនាំពលរដ្ឋរងគ្រោះដីធ្លី ចេញតវ៉ាទាមទារឲ្យអាជ្ញាធរថ្នាក់ជាតិ ជួយរកដំណោះស្រាយឲ្យបានសមរម្យដល់ពលរដ្ឋ និងកាត់ឆ្វៀលដីធ្លី ផ្ទះសម្បែង និងស្រែចម្ការរបស់ពលរដ្ឋចេញពីបរិវេណ ក្រុមហ៊ុនវៀតណាម កាម៉ាដេនូ វេនឈ័រ និងក្រុមហ៊ុន កសិកម្ម យុវជន ស្វាយរៀង បន្ទាប់ពីក្រុមហ៊ុនបានឈូសឆាយបំផ្លាញផលដំណាំ ផ្ទះសម្បែង និងហ៊ុមព័ទ្ធយកដីស្រែចម្ការរបស់ពលរដ្ឋជាង៣០០គ្រួសារ។ ប៉ុន្តែរហូតមកដល់ពេលនេះ អាជ្ញាធរពាក់ព័ន្ធមិនបានស្វែងរកដំណោះស្រាយឲ្យពលរដ្ឋនោះឡើយ ក្រៅពីចាប់ចងពលរដ្ឋខ្លួនដាក់ពន្ធនាគារ៕
