ជនជាតិឥណ្ឌូណេស៊ី (Indonesia) និងជនជាតិចិន (Chinese) រាប់សិបនាក់ដែលបានរត់ចេញពីអគារឆបោកតាមអនឡាញបាននាំគ្នាសម្រុកទៅស្ថានទូតនៃប្រទេសរបស់ពួកគេក្នុងគោលបំណងរៀបចំឯកសារត្រឡប់ទៅប្រទេសកំណើតវិញ។ អ្នកឃ្លាំមើលយល់ថា ការចាកចេញរបស់ជនបរទេសទាំងនេះដោយសារតែពួកគេភ័យខ្លាចនឹងអំពើឧក្រិដ្ឋកម្ម ប៉ុន្តែវាធ្វើឱ្យប៉ះពាល់ដល់មុខមាត់កម្ពុជាជាពិសេសលើវិស័យទេសចរណ៍។
ស្ថានទូតឥណ្ឌូណេស៊ី និងស្ថានទូតចិនប្រចាំកម្ពុជាកំពុងពន្លឿននីតិវិធីបញ្ជូនពលរដ្ឋរបស់ខ្លួនដែលរងគ្រោះដោយអំពើឆបោកតាមអនឡាញរាប់រយនាក់ទៅប្រទេសកំណើតវិញ។
ជនជាតិឥណ្ឌូណេស៊ី និងចិនរាប់រយនាក់បាននាំគ្នាឈរតម្រង់ជួរដៃកាន់វ៉ាលីនៅខាងមុខស្ថានទូតខ្លួនកាលពីថ្ងៃទី១៩ ខែមករា ដើម្បីធ្វើឯកសារទៅប្រទេសកំណើតវិញបន្ទាប់ពីពួកគេនាំគ្នារត់គេចចេញពីការបង្ក្រាបរបស់សមត្ថកិច្ចនៅតាមទីតាំងអគារឆបោកតាមអនឡាញ។
ឯកអគ្គរដ្ឋទូតឥណ្ឌូណេស៊ីប្រចាំកម្ពុជាលោក សាន់តូ ដាម៉ូស៊ូម៉ាតូ (Santo Darmosumarto) ឱ្យដឹងតាមរយៈវីដេអូផ្សព្វផ្សាយតាមបណ្ដាញសង្គមរបស់លោកថា ចាប់តាំងពីថ្ងៃទី១ ដល់ថ្ងៃទី១៨ ខែមករា មានជនជាតិឥណ្ឌូណេស៊ីជាង ៤រយនាក់ (៤៤០) បានមកដល់ស្ថានទូតក្រោយពីបណ្ដាញឧក្រិដ្ឋជនបានដោះលែងពួកគេចេញពីអគារឆបោកតាមអនឡាញនៅតាមបណ្ដាខេត្តផ្សេងៗនៃប្រទេសកម្ពុជា។ លោកបញ្ជាក់ថា ពលរដ្ឋឥណ្ឌូណេស៊ីទាំងនោះជាប់ពាក់ព័ន្ធនឹងអំពើឆបោកតាមអនឡាញនៅកម្ពុជារាប់ខែឆ្នាំ ហើយអ្នកខ្លះទៀតត្រូវបានថៅកែចិនដកហូតលិខិតឆ្លងដែន។
ក្រៅពីជនជាតិឥណ្ឌូណេស៊ីក៏មានជនជាតិចិនរាប់រយនាក់នាំគ្នាសម្រុកទៅស្ថានទូតរបស់ខ្លួន ក្នុងគោលបំណងរៀបចំឯកសារទៅប្រទេសចិនវិញដែរ។ ស្ថានទូតចិនបានប្រកាសអំពីការសម្របសម្រួលនីតិវិធី និងជំរុញឱ្យអាជ្ញាធរកម្ពុជាបង្ក្រាបឆបោកតាមអនឡាញឱ្យមានប្រសិទ្ធភាព ដើម្បីធានាសុវត្ថិភាពជនជាតិចិនដែលរស់នៅលើទឹកដីកម្ពុជា។
កន្លងទៅសមត្ថកិច្ចក៏បានឃាត់ខ្លួន និងជួយសង្គ្រោះបរទេសចម្រុះជាតិសាសន៍ផ្សេងទៀតចេញពីអគារឆបោកតាមអនឡាញដែរក្នុងនោះដូចជា ជនជាតិវៀតណាម (Vietnam) ឥណ្ឌា (India) បង់ក្លាដេស (Bangladesh) ថៃ (Thailand) កូរ៉េ (Korea) ជប៉ុន (Japan) ម៉ាឡេស៊ី (Malaysia) ហ្វីលីពីន (Philippines) ឡាវ (Laos) នីហ្សេរីយ៉ា (Nigeria) និងមីយ៉ាន់ម៉ា (Myanmar) ជាដើម។
ការចលាចលនៃជនបរទេសចម្រុះជាតិសាសន៍នាំគ្នាសម្រុកចេញពីអគារនៅតាមតំបន់ផ្សេងៗជាបន្តបន្ទាប់ កើតឡើងក្រោយពេលឧក្រិដ្ឋជន ចេន ហ្ស៊ី និងមេខ្លោងនៃអំពើឆបោកតាមអនឡាញគឺអតីតអ្នកឧកញ៉ា លី គួង ត្រូវបានចាប់ខ្លួន និងចោទប្រកាន់ពាក់ព័ន្ធនឹងអំពើលាងលុយកខ្វក់។
ប្រធានចលនាខ្មែរដើម្បីប្រជាធិបតេយ្យ (KMD) អ្នកស្រី មូរ សុខហួរ លើកឡើងថា ជនបរទេសដែលនាំគ្នាសម្រុកទៅស្ថានទូតរបស់ខ្លួននោះដោយសារតែពួកគេភ័យខ្លាចនឹងអំពើឧក្រិដ្ឋកម្ម និងគ្មានជំនឿទទួលបានការការពារសុវត្ថិភាពពីសំណាក់រដ្ឋាភិបាលក្រុមគ្រួសារត្រកូល ហ៊ុន។ អ្នកស្រីថា រូបភាពនៃជនបរទេសទាំងនេះក៏ឆ្លុះបញ្ចាំងពីសង្គមកម្ពុជាគ្មានសុវត្ថិភាព និងធ្វើឱ្យប៉ះពាល់ដល់សេដ្ឋកិច្ច ជាពិសេសវិស័យទេសចរណ៍កម្ពុជាធ្ងន់ធ្ងរ។
អ្នកស្រី មូរ សុខហួរ៖ «ប្រទេសកម្ពុជា គឺជាប្រទេសដែលអត់មានច្បាប់ជនបរទេសដែលជាជនរងគ្រោះដោយសារ scam online (ឆបោកតាមអនឡាញ) នេះអាចរំពឹងបាន ហ្នឹងទី១! ទី២scam online (ឆបោកតាមអនឡាញ) នេះមិនមែនជាអ្វីដែលកើតដោយឯងៗទេ នេះគឺជាការរៀបចំមួយដែលមានការការពារគឺរដ្ឋាភិបាលខ្លួនឯង ពីព្រោះscam online (ឆបោកតាមអនឡាញ) ដែលកើតឡើងរហូតដល់ទំហំប៉ុននេះមិនអាចថា ក្រសួងមហាផ្ទៃ ក្រសួងពាក់ព័ន្ធ រហូតទៅនាយករដ្ឋមន្ត្រីមិនដឹងទេ ព្រោះអ្នកដឹកនាំគឺពាក់ព័ន្ធបានផលប្រយោជន៍ពី scam online (ឆបោកតាមអនឡាញ) ដល់ចុងក្រោយធ្វើឲ្យមានការប៉ះពាល់ធំដុំណាស់ដល់ប្រទេសជាតិយើង»។
ទូរទស្សន៍អាស៊ីសេរីមិនអាចទាក់ទងអ្នកនាំពាក្យរងនៃក្រសួងមហាផ្ទៃលោក ទូច សុឃៈ ដើម្បីសាកសួរបន្ថែមជុំវិញបញ្ហានេះបានទេនៅថ្ងៃទី២០ ខែមករា។
អ្នកស្រី មូរ សុខហួរ លើកឡើងថា សេដ្ឋកិច្ច និងកេរ្តិ៍ឈ្មោះកម្ពុជាកំពុងខ្ទេចខ្ទាំ និងរងភាពអាម៉ាស់នៅលើឆាកអន្តរជាតិដោយសារតែអំពើឧក្រិដ្ឋកម្មឆបោកតាមអនឡាញដែលជាដើមចមសំខាន់គឺកើតចេញពីការដឹកនាំបែបផ្ដាច់ការគ្រួសារបក្ខពួកនិយមរបស់គ្រួសារត្រកូល ហ៊ុន ដែលបានសម្លាប់ប្រជាធិបតេយ្យ បំបិទសំឡេងអ្នករិះគន់ និងស្ថាប័នសារព័ត៌មានឯករាជ្យ។ អ្នកស្រីថា នៅពេលក្រុមគ្រួសារត្រកូល ហ៊ុន បំបិទសំឡេងស្ថាប័នឯករាជ្យ ពួកគេក៏មានឱកាសបង្កើតទំនាក់ទំនងជាមួយឧក្រិដ្ឋជនឱ្យរកស៊ីអំពើខ្មៅងងឹត ដើម្បីចិញ្ចឹមអំណាចរបស់ខ្លួន ប៉ុន្តែអ្នកដែលរងគ្រោះគឺជាពលរដ្ឋខ្មែរ៕
