អ្នកឃ្លាំមើលលើកឡើងថា សាររបស់លោកនាយករដ្ឋមន្ត្រី ហ៊ុន ម៉ាណែត មិនអាចស្ដារជំនឿសាធារណជនលើការអនុវត្តច្បាប់ស្មើភាពគ្នាក្នុងករណីកូនប្រុសមេប៉ូលិសផ្កាយ១ ម្នាក់បើកឡានទំនើបបុករះបណ្ដាលឱ្យមនុស្ស ៦នាក់ស្លាប់នៅបាត់ដំបងបានឡើយ។ ផ្ទុយទៅវិញ មហាជនកាន់តែអស់ជំនឿលើប្រព័ន្ធយុត្តិធម៌ ព្រោះច្បាប់ត្រូវបានអ្នកមានអំណាចជាន់ឈ្លីតាមការប្រព្រឹត្តពុករលួយ និងបក្ខពួកនិយម។ ប្រតិកម្មនេះ កើតឡើងបន្ទាប់ពីលោក ហ៊ុន ម៉ាណែត អំពាវនាវឱ្យស្ថាប័នពាក់ព័ន្ធតាមចាប់ជនបង្កយកមកផ្ដន្ទាទោសតាមច្បាប់ ក្រោយមហាជនរិះគន់ការអនុវត្តច្បាប់ស្តង់ដារពីរ។
ការផ្ទុះកំហឹងរបស់សាធារណជននៅតាមបណ្ដាញសង្គមនៅតែបន្តកើនឡើងក្ដៅគគុកលើកូនចៅអ្នកមានអំណាចដែលអាងខ្សែ អាងខ្នង បើកបរឡានទំនើបប្រមាថអាយុជីវិតប្រជាពលរដ្ឋតាមដងផ្លូវ។ ទន្ទឹមនឹងការផ្ទុះកំហឹងនេះ មហាជនក៏ព្រួយបារម្ភចំពោះការអនុវត្តច្បាប់ស្ដង់ដារពីរលើកូនប្រុសស្នងការរងនគរបាលខេត្តបន្ទាយមានជ័យលោក ស៊ីវ សុជាតិ គឺឈ្មោះ ស៊ីវ ជ័យសិដ្ឋ ដែលជាជនបង្កបើកបរឡានបុករះបណ្ដាលឱ្យមនុស្ស ៦នាក់ក្នុងនោះរួមទាំងទារកក្នុងផ្ទៃម្ដាយម្នាក់ផងបានស្លាប់ក្នុងថ្លុកឈាមនៅក្នុងខេត្តបាត់ដំបង។
អ្នកឃ្លាំមើលយល់ថា សារអំពាវនាវ និងកំហឹងរបស់មហាជននាពេលនេះគឺដោយសារតែពួកគាត់លែងមានជំនឿលើការអនុវត្តច្បាប់ទៀតហើយព្រោះតែប្រព័ន្ធយុត្តិធម៌គ្មានភាពស្មើគ្នា និងត្រូវបានអ្នកមានអំណាចជាន់ឈ្លីតាមរបៀបការឃុបឃិតប្រព្រឹត្តអំពើពុករលួយ និងបក្ខពួកនិយម។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី ប្រាប់វិទ្យុអាស៊ីសេរីថា ច្បាប់នៅកម្ពុជាសព្វថ្ងៃហាក់ត្រូវបានបង្កើតឡើងសម្រាប់ធ្វើជាឧបករណ៍នយោបាយ បង្ក្រាបពលរដ្ឋក្រីក្រស្លូតត្រង់ ឬជាកន្លែងដោះដូរផលប្រយោជន៍នៃក្រុមអ្នកមានអំណាចតែប៉ុណ្ណោះ។ លោកបន្ថែមថា ករណីសោកនាដកម្មពលរដ្ឋជាច្រើនករណីដែលបានស្លាប់ក្នុងករណីគ្រោះថ្នាក់ចរាចរណ៍នាពេលកន្លងមកគឺអ្នកអនុវត្តច្បាប់តែងយឺតយ៉ាវ និងស្ទាក់ស្ទើរក្នុងការចាត់វិធានការ ឬរង់ចាំទាល់តែមានបញ្ជាពីអ្នកមានអំណាចកំពូល។
លោក សេង វណ្ណលី លើកឡើងទៀតថា សាររបស់លោកនាយរដ្ឋមន្ត្រី ហ៊ុន ម៉ាណែត ប្រកាសប្ដេជ្ញាចិត្តចាប់ជនបង្កបើកឡានទំនើបបុកពលរដ្ឋ ៦នាក់បណ្ដាលឱ្យស្លាប់នៅខេត្តបាត់ដំបងនាពេលនេះគ្រាន់តែធ្វើឡើងដើម្បីរំងាប់ចិត្តខឹងសម្បារនៃក្រុមគ្រួសាររងគ្រោះ និងមហាជនតែប៉ុណ្ណោះប៉ុន្តែការអនុវត្តច្បាប់ស្ដង់ដារពីរនៅតែបន្តដដែល។
ប្រតិកម្មរបស់អ្នកឃ្លាំមើលរូបនេះបន្ទាប់ពីលោកនាយករដ្ឋមន្ត្រី ហ៊ុន ម៉ាណែត នៅថ្ងៃទី៣១ ខែមីនា បានបញ្ជាឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធ និងអគ្គស្នងការនគរបាលជាតិលោក ស ថេត ត្រូវតែស្រាវជ្រាវរកឱ្យឃើញអ្នកដែលបើកឡានបុករះមនុស្ស ៦នាក់ស្លាប់យកមកអនុវត្តច្បាប់ឱ្យបានម៉ឺងម៉ាត់ និងដើម្បីផ្ដល់យុត្តិធម៌ដល់ជនរងគ្រោះ។ លោកអះអាងតាមហ្វេកប៊ុកថា អ្នកដែលបើកបរមិនគោរពច្បាប់ជាពិសេសស្ថិតក្រោមស្ថានភាពស្រវឹងបង្កឱ្យអ្នកដទៃស្លាប់នឹងត្រូវទទួលខុសទោសតាមផ្លូវច្បាប់តឹងរ៉ឹងបំផុតដោយគ្មានការលើកលែងឡើយ។
ទន្ទឹមគ្នានេះ រដ្ឋមន្ត្រីក្រសួងមហាផ្ទៃ លោក ស សុខា បានបញ្ជាឱ្យស្នងការរងនគរបាលខេត្តបន្ទាយមានជ័យគឺលោក ស៊ីវ សុជាតិ សហការជាមួយសមត្ថកិច្ច នាំខ្លួនកូនប្រុស ឈ្មោះ ស៊ីវ ជ័យសិដ្ឋ ដែលជាជនបង្កមកទទួលខុសត្រូវចំពោះមុខច្បាប់។ លោក ស សុខា ក៏បានដាក់បញ្ជាឱ្យអគ្គនាយកដ្ឋានអន្តោប្រវេសន៍ដាក់ឈ្មោះជនបង្កក្នុងបញ្ជីខ្មៅមិនឱ្យចាកចេញពីប្រទេសផង។
ការចេញសារធានារបស់ក្រុមប្រមុខដឹកនាំរបបក្រុងភ្នំពេញទាំងនេះក្រោយពេលដែលមហាជនផ្ទុះការរិះគន់កាន់តែខ្លាំងឡើងនៅតាមបណ្ដាញសង្គមចំពោះការយឺតយ៉ាវតាមចាប់ខ្លួនជនបង្កដែលជាកូនអ្នកធំមានអំណាចយកមកអនុទោសតាមផ្លូវច្បាប់។
ជនបង្កឈ្មោះ ស៊ីវ ជ័យសិដ្ឋ មានអាយុ ២០ឆ្នាំគឺជាកូនប្រុសស្នងការរងនគរបាលខេត្តបន្ទាយមានជ័យគឺលោក ស៊ីវ សុជាតិ មានរថយន្តសេរីទំនើបម៉ាក (MERCEDES BENZ AMG GT53) ក្នុងតម្លៃរាប់សិបម៉ឺនដុល្លារបើកបរក្នុងល្បឿនលឿនបុករះពីក្រោយម៉ូតូពីរគ្រឿងពេញទំហឹងនៅស្រុកមោងឫស្សី ខេត្តបាត់ដំបងកាលពីយប់ថ្ងៃទី២៧ ខែមីនា។ គ្រោះថ្នាក់នេះបណ្ដាលឱ្យមនុស្ស ៦នាក់ក្នុងនោះរួមទាំងកូនក្នុងផ្ទៃម្ដាយម្នាក់ផងបានស្លាប់យ៉ាងអាណោចអាធម៌ រីឯជនបង្កបានរត់គេចខ្លួនភ្លាមៗតាមរថយន្តសេរីទំនើបមួយទៀតរហូតមកពេលនេះសមត្ថកិច្ចមិនទាន់ចាប់ខ្លួនបាននៅឡើយ។
ទាក់ទងនឹងរឿងនេះ ឪពុកជនបង្កដែលជាមេប៉ូលិសពាក់ផ្កាយ១គឺលោក ស៊ីវ សុជាតិ ចេញមុខការពារកូនប្រុសរបស់ខ្លួនថា ករណីកូនប្រុសរបស់ខ្លួនរងការចោទប្រកាន់បើកឡានបុករះពលរដ្ឋ ៦នាក់បណ្ដាលឱ្យបាត់បង់ជីវិតនោះមិនមានការបញ្ជាក់ច្បាស់លាស់នៅឡើយ។ សារព័ត៌មានក្នុងស្រុកបានរាយការណ៍ថាស្នងការរងនគរបាលខេត្តបន្ទាយមានជ័យលោក ស៊ីវ សុជាតិ បានបញ្ជាក់ថា នៅយប់កើតហេតុថ្ងៃទី២៧ ខែមីនា លោកដឹងត្រឹមថា ប្រពន្ធ និងកូនប្រុសធ្វើដំណើរពីភ្នំពេញមកកាន់ខេត្តបន្ទាយមានជ័យតាមរថយន្តពីរផ្សេងគ្នាហើយនៅពេលជួបគ្រោះថ្នាក់ចរាចរណ៍លោកក៏ពុំបានដឹងភ្លាមៗនោះទេ។
ទន្ទឹមនឹងសមត្ថកិច្ចតាមចាប់ខ្លួនកូនប្រុសដែលជាជនបង្ក លោក ស៊ីវ សុជាតិ ក៏ចាប់ផ្ដើមល្បីឈ្មោះចំពោះការរិះគន់ខាងរកស៊ីបែបខុសច្បាប់ និងនាំចូលទំនិញពីប្រទេសថៃចូលកម្ពុជាដោយគេចពន្ធ។ ឪពុកជនបង្កលោក ស៊ីវ សុជាតិ គឺជាស្នងនគរបាលរងទទួលបន្ទុកផែនការងារភស្តុភារ និងហិរញ្ញវត្ថុ និងជាប្រធានក្រុមការងារគណបក្សប្រជាជនកម្ពុជាខេត្តចុះជួយ ឃុំគយម៉ែង ខេត្តបន្ទាយមានជ័យ និងជាទីប្រឹក្សារបស់លោក ហ៊ុន សែន ថែមទៀតផង។ ចំណែក ភរិយារបស់លោក ស៊ីវ សុជាតិ និងត្រូវជាម្តាយរបស់លោក ស៊ីវ ជ័យសិដ្ឋ គឺអ្នកស្រី ខា អ៊ាង គឺជាម្ចាស់អាជីវកម្ម ទៀ ណាំហាក់ និងជាសមាជិកគ្រួសារ (CEO Master Club) និងជាអនុប្រធានសភាពាណិជ្ជកម្មប្រចាំខេត្តបន្ទាយមានជ័យ។ មេប៉ូលិសផ្ដាយ១ រូបនេះ ក៏រងការចោទប្រកាន់ថា ជាអ្នកកាងទំនិញខុសច្បាប់ និងទំនិញគេចពន្ធដែលឈ្មួញនាំចូលពីបរទេសចូលកម្ពុជាទៀតផង៕
