ទីប្រឹក្សាគណបក្សកម្លាំងជាតិ ចាត់ទុកការសម្រេចកម្កល់សាលក្រម របស់សាលាឧទ្ធរណ៍ដកហូតសិទ្ធិមិនឲ្យលោកធ្វើនយោបាយជាអចិន្ត្រៃយ៍ ជារឿងអយុត្តិធម៌ និងរិតត្បិតសិទ្ធិសេរីភាពផ្នែកនយោបាយ។ ការលើកឡើងនេះ ធ្វើឡើងបន្ទាប់ពីសាលាឧទ្ធរណ៍ភ្នំពេញ សម្រេចបន្ថែមការផ្តន្ទាទោសទៅលើលោក រ៉ុង ឈុន ដោយបានដកហូតសិទ្ធិនយោបាយជាអចិន្ត្រៃយ៍ តាមបញ្ញត្តិមាត្រា៤៩៨ នៃក្រមព្រហ្មទណ្ឌ។
ក្នុងសន្និសីទសារព័ត៌មាន នៅថ្ងៃទី១ ខែមេសា ទីប្រឹក្សាគណបក្សកម្លាំងជាតិ លោក រ៉ុង ឈុន បានចាត់ទុកការផ្តន្ទាទោសបន្ថែមរបស់សាលាឧទ្ធរណ៍ក្រុងភ្នំពេញ ទៅលើរូបលោកថា ជារឿងអយុត្តិធម៌ និងជាការរិតត្បិតសិទ្ធិសេរីភាពផ្នែកនយោបាយ។ លើសពីនោះលោកថា ការសម្រេចរបស់តុលាការ គឺជារឿងនយោបាយ ធ្វើតាមតម្រូវចិត្តរបស់អ្នកមានអំណាច មិនមែនជាការអនុវត្តច្បាប់នោះឡើយ។
លោក រ៉ុង ឈុន បានស្នើឲ្យស្ថាប័នពាក់ព័ន្ធគួរតែធ្វើវិសោធនកម្មច្បាប់ ដើម្បីកែសម្រួលបទចោទ «ញុះញង់» ពីព្រោះលោកថាបទចោទមួយនេះ តែងតែធ្វើទុក្ខបុកម្នេញទៅលើ ពលរដ្ឋស្លូតត្រង់ អ្នកនយោបាយប្រឆាំង សកម្មជនសង្គម ដែលពួកគាត់គ្រាន់តែប្រើប្រាស់សិទ្ធិ និងរិះគន់កែលម្អរដ្ឋាភិបាល ឬអ្នកកាន់អំណាចបច្ចុប្បន្ន។ លោកថា ការផ្ដន្ទាទោសបន្ថែមទៅលើរូបលោក គ្មានផលចំណេញដល់ប្រទេសជាតិ និងពលរដ្ឋនោះទេ ផ្ទុយទៅវិញ ធ្វើឲ្យកម្ពុជាមានកេរ្តិ៍ឈ្មោះអាក្រក់ នៅលើឆាកអន្តរជាតិ នឹងរងការរិះគន់ពីមតិជាតិ និងអន្តរជាតិប៉ុណ្ណោះ។
លោក រ៉ុង ឈុន៖ «បើសិនមានផលចំណេញអ្វីដល់សង្គមដោយសារតែចាប់ និងមានវិធានការមកលើរូបខ្ញុំ ខ្ញុំមិនធ្វើសន្និសីទកាសែតនោះទេ ប៉ុន្តែវាមិនមានផលចំណេញអ្វីដល់ប្រទេសជាតិ ហើយយើងដឹងហើយ ប្រព័ន្ធច្បាប់នៅស្រុកយើង គ្មានយុត្តិធម៌សម្រាប់អ្នកប្រឆាំងនោះទេ និយាយឲ្យត្រង់ទៅ គេគ្រាន់តែជួយ ដើម្បីធ្វើយ៉ាងម៉េចផាត់ពណ៌ជាលក្ខណៈស្របទៅតាមការចង់បានរបស់អ្នកមានអំណាច»។
គណបក្សកម្លាំងជាតិ សោយស្ដាយ និងថា ការដាក់ទោសបន្ថែមនេះ មិនស្របតាមរដ្ឋធម្មនុញ្ញ និងសេចក្ដីប្រកាសជាសាកលស្ដីពីសិទ្ធិមនុស្ស របស់អង្គការសហប្រជាជាតិ និងជាការគំរាមកំហែងនយោបាយធ្ងន់ធ្ងរ និងផ្ទុយពីការអំពាវនាវរបស់រដ្ឋាភិបាលកន្លងទៅទៀតផង។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទងអ្នកនាំពាក្យក្រសួងយុត្តិធម៌ លោក សេង ឌីណា ដើម្បីសុំការបកស្រាយបានទេ នៅថ្ងៃទី១ ខែមេសា។
ទោះជាយ៉ាងណា កាលពីថ្ងៃទី៣១ ខែមីនា សាលាឧទ្ធរណ៍ភ្នំពេញបានសម្រេចតម្កល់សាលក្រមរបស់សាលាដំបូងរាជធានីភ្នំពេញ ដោយផ្ដន្ទាទោសលោក រ៉ុង ឈុន ឲ្យជាប់ពន្ធនាគាររយៈពេល៤ឆ្នាំ ពិន័យជាប្រាក់៤លានរៀន និងដកហូតសិទ្ធិធ្វើនយោបាយ ពាក់ព័ន្ធការចោទប្រកាន់ពីបទ «មិនរាងចាល» ក្នុងសំណុំរឿង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» កាលពីខែឧសភា ឆ្នាំ ២០២៥ ដោយសារលោកបានធ្វើអត្ថាធិប្បាយពាក់ព័ន្ធនឹងបញ្ហាព្រំដែនកម្ពុជា-វៀតណាម។ បន្ថែមពីនោះសាលាឧទ្ធរណ៍ភ្នំពេញក៏បានផ្ដន្ទាទោសលោក រ៉ុង ឈុន ដោយដកហូតសិទ្ធិនយោបាយជាអចិន្ត្រៃយ៍ តាមបញ្ញត្តិមាត្រា៤៩៨នៃក្រមព្រហ្មទណ្ឌ។
ទាក់ទិននឹងបញ្ហានេះ ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា យល់ឃើញថា ការផ្ដន្ទាទោសបន្ថែមទៅលើលោក រ៉ុង ឈុន បង្ហាញឲ្យឃើញថា សិទ្ធិសេរីភាពផ្នែកនយោបាយនៅកម្ពុជា កាន់តែរួមតូចទៅៗ ហើយមិនធ្វើឲ្យកម្ពុជាមានមុខមាត់ល្អនៅលើឆាកអន្តរជាតិនោះឡើយ។ លោកជំរុញឲ្យអ្នកនយោបាយទាំងអស់ស្វែងរកដំណោះស្រាយ ដើម្បីពង្រឹងសាមគ្គីជាតិឡើងវិញ។
លោក នី សុខា៖ «ដូច្នេះនេះជាការបង្ហាញឃើញថា យើងមិនបានមានឆន្ទៈនូវក្នុងការដោះស្រាយបញ្ហានេះឲ្យធូរស្រាលនោះទេ ផ្ទុយទៅវិញហាក់បីកាន់តែបង្ហាញពីសញ្ញាបង្កើននៃការទៅលើស្ថានភាពសេរីភាពខាងនយោបាយថែមទៀតផង»។
តុលាការក្រុងភ្នំពេញ ធ្លាប់បានផ្ដន្ទាទោសឲ្យលោក រ៉ុង ឈុន ជាប់ពន្ធនាគារ២ឆ្នាំ កាលពីឆ្នាំ២០២០ និងឆ្នាំ២០២១ ក្រោមបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ បន្ទាប់ពីលោកបានចុះទៅពិនិត្យបង្គោលព្រំដែន និងបានជួបប្រជាកសិករដែលអះអាងថា បានបាត់បង់ដីស្រែទៅប្រទេសវៀតណាម នៅស្រុកពញ្ញាក្រែក ខេត្តត្បូងឃ្មុំ។ លោកក៏ធ្លាប់ជាប់ពន្ធនាគារពាក់ព័ន្ធរឿងព្រំដែនមុនម្ដងរួចហើយដែរ កាលពីខែតុលា ឆ្នាំ២០០៥ តែលោកជាប់ពន្ធនាគារបានជាង៣ខែ ត្រូវបានរដ្ឋាភិបាលដោះលែងវិញ ក្រោយពេលមានប្រតិកម្មពីប្រជាពលរដ្ឋ អង្គការជាតិ និងអន្តរជាតិ។
បើទោះជាលោក រ៉ុង ឈុន រងការចោទប្រកាន់ជាបន្តបន្ទាប់ក្ដី តែឆន្ទៈរបស់លោកនៅដដែល។ លោកក៏បានផ្ដាំផ្ញើទៅអ្នកគាំទ្រគណបក្សកម្លាំងជាតិ កុំឱ្យបាក់ទឹកចិត្ត ហើយត្រូវរឹងមាំ ដើម្បីឆ្ពោះទៅគោលដៅគឺការបោះឆ្នោតនៅឆ្នាំ២០២៧ និងឆ្នាំ២០២៨ខាងមុខ៕
