ប្រពន្ធរបស់លោក ភុន យុទ្ធ ស្នើឲ្យតុលាការដោះលែងប្ដីវិញ ដោយថា ការចាប់ និងឃុំខ្លួនប្ដីរបស់លោកស្រីជាលើកទី៣ នេះធ្វើឲ្យប៉ះពាល់ដល់ជីវភាពគ្រួសារនិងការសិក្សារបស់កូន។ សង្គមស៊ីវិល សង្ឃឹមថា តុលាការនឹងដោះលែងលោក ភុន យុទ្ធ ឲ្យមានសេរីភាពនៅចុងខែមេសាខាងមុខ។
សាលាដំបូងខេត្តតាកែវ សម្រេចប្រកាសសាលក្រមសំណុំរឿងរបស់ជនពិការ លោក ភុន យុទ្ធ នៅថ្ងៃទី២៨ ខែមេសា ខាងមុខ បន្ទាប់ពីបញ្ចប់សវនាការ សួរដេញដោល នៅថ្ងៃទី៣០ ខែមីនានេះ។
ប្រពន្ធរបស់លោក ភន យុទ្ធ គឺលោកស្រី វ៉ិត មុំ ប្រាប់ទូរទស្សន៍អាស៊ីសេរី នៅថ្ងៃទី៣០ ខែមីនា ថា គ្រួសារលោកស្រីជួបបញ្ហាជីវភាព ប៉ះពាល់ដល់ការសិក្សារបស់កូន ខណៈ លោកស្រីក៏ជាជនពិការ។ លោកស្រីស្នើឲ្យតុលាការដោះលែង ប្ដីឲ្យមានសេរីភាពវិញ ដើម្បីបានជួបជុំគ្រួសារ ដោយថា ប្ដីលោកស្រី មិនមាន កំហុសទេ។
លោកស្រី វ៉ិត មុំ៖ «កូនរៀនផង ណាមួយលុយប្រចាំថ្ងៃប្រចាំខែវាអត់មានចំណូលចូលអ៊ីចឹង ហើយណាមួយយើងចិញ្ចឹមទា ចិញ្ចឹមមាន់ មិនបានលុយថ្ងៃណា ថ្ងៃណាបានៗ ថ្ងៃណាអត់ៗ គឺអត់ខ្លាំង ណាមួយប្ដីខ្ញុំជាជនពិការផង ខ្ញុំជាជនពិការផង វាអត់មានជំហរបង្គោល បើប្ដីខ្ញុំនៅទៅវា មានប្ដីខ្ញុំរកចំណូល គាត់មេគ្រួសារ គាត់អាចរកដោះស្រាយបានក្រុមគ្រួសារ ដល់អត់ពីគាត់លំបាកខ្លាំង»។
បុរសមានពិការភាព លោក ភុន យុទ្ធ ត្រូវសមត្ថកិច្ចចាប់ខ្លួន លើកទី ៣ នៅថ្ងៃ ២៩ ខែតុលា ឆ្នាំ២០២៥ ដោយតុលាការចោទប្រកាន់ពីបទ«ញុះញង់ឱ្យប្រព្រឹត្ត បទឧក្រិដ្ឋជាអាទិ » ពាក់ព័ន្ធនឹងការបញ្ចេញមតិនៅលើបណ្តាញសង្គមហ្វេសប៊ុក។ ការចាប់ខ្លួនលើកទី ៣ នេះ បន្ទាប់ពីលោកត្រូវបានដោះលែងឲ្យមានសេរីភាពវិញ នៅខែកញ្ញា ឆ្នាំ ២០២៥ បន្ទាប់ពីបានអនុវត្តទោស រយៈពេល ១ឆ្នាំ ៦ខែ។
នាយកទទួលបន្ទុកកិច្ចការទូទៅ នៃអង្គការការពារ សិទ្ធិ មនុស្ស លីកាដូ (LICAHDO) លោក អំ សំអាត សង្ឃឹមថាតុលាការ នឹងដោះលែងលោក ភុន យុទ្ធ ឲ្យមានសេរីភាព ខណៈតុលាការ ប្រកាសសាលក្រមបសំណុំរឿងនេះ នៅថ្ងៃទី២៨ ខែមេសា ខាងមុខ។
លោក អំ សំអាត៖ «យើងសង្ឃឹមថា តុលាការនិងមានការដោះលែងឲ្យលោក ភុន យុទ្ធ មានសេរីភាពវិញ ដោយសារតែលោក ភុន យុទ្ធ ជាជនពិការ ហើយជីវភាពក្រីក្រ លោកមានកូន មានប្រពន្ធដែលត្រូវចិញ្ចឹមទៅទៀត។ អ៊ីចឹងផលលំបាកកន្លងមក ដែលលោកជាប់ពន្ធនាគារ ២ទៅ ៣ដងមកនេះ មានផលលំបាកខ្លាំងណាស់សម្រាប់ជីវភាពគ្រួសារ។ អ៊ីចឹងសង្ឃឹមថា តុលាការលោកនឹងធ្វើការដោះលែងលោក ភុន យុទ្ធ ឲ្យមានសេរីភាពឡើងវិញ»។
លោក ភុន យុទ្ធ ជាជនពិការ ត្រូវបានសមត្ថកិច្ចចាប់ខ្លួនកាលពីចុងខែតុលា ឆ្នាំ២០១៩ ដោយតុលាការខេត្តសៀមរាប ផ្ដន្ទាទោសលោកឲ្យជាប់ពន្ធនាគារចំនួន ១៨ខែ ពីបទ«ញុះញង់បង្កឲ្យមានការរើសអើង» និង បទ «ជេរប្រមាថជាសាធារណៈ» ខណៈការចាប់ ខ្លួនលើកទី២ កាលពីថ្ងៃទី១៩ ខែ មីនា ឆ្នាំ២០២៤ ដោយតុលាការខេត្តតាកែវ សម្រេចផ្ដន្ទាទោសលោក ភុន យុទ្ធ ឲ្យជាប់ពន្ធនាគាររ ១ឆ្នាំ ៦ខែ ពីបទ«ញុះញង់ឲ្យមានការរើសអើង» នៅថ្ងៃទី១២ ខែវិច្ឆិកា ២០២៤ ពាក់ព័ន្ធនឹងការបញ្ចេញមតិ និងរិះគន់រដ្ឋាភិបាល លើបណ្ដាញសង្គម៕
