ក្រុមអ្នកវិភាគលើកឡើងថា ជោគជ័យនៃការបង្កើតរណសិរ្ស ២ធ្នូ និងជោគជ័យថ្ងៃ៧មករា គឺជាជោគជ័យរបស់វៀតណាម ព្រោះវៀតណាមប្រើរចនាសម្ព័ន្ធ២ធ្នូ ចងក្រងកម្លាំងទុកក្នុងគណបក្សប្រជាជនកម្ពុជា ខណៈមេដឹកនាំបក្សកាន់អំណាច ដែលវៀតណាមលើកបន្តុប លោក ហ៊ុន សែន អះអាងថា បើគ្មានថ្ងៃកំណើតរណសិរ្ស២ធ្នូ និងថ្ងៃជ័យជម្នះ ៧មករា ក្រោមជំនួយ ពីកងទ័ពស្ម័គ្រចិត្តវៀតណាមទេ នោះកម្ពុជាក៏គ្មានអ្វីៗដូចថ្ងៃនេះដែរ។
ក្រុមអ្នកវិភាគនយោបាយកម្ពុជា លើកឡើងថា ជោគជ័យនៃការបង្កើតរណសិរ្ស ២ធ្នូ និងជោគជ័យថ្ងៃ៧មករា គឺជាជោគជ័យរបស់វៀតណាម ព្រោះវៀតណាមប្រើរចនាសម្ព័ន្ធដែលបង្កើតកាលពីថ្ងៃ២ ធ្នូ ១៩៧៨ នេះ ចងក្រងកម្លាំងទុកក្នុងគណបក្សប្រជាជនកម្ពុជា។
ក្រុមអ្នកវិភាគអះអាងថា ការជួយជ្រោមជ្រែងពីកងទ័ពវៀតណាម រំដោះប្រជាពលរដ្ឋខ្មែរពីរបបប៉ុល ពត នៅថ្ងៃ៧ មករា ឆ្នាំ១៩៧៩ គឺជាការពិត ប៉ុន្តែការជួយនៅពេលនោះគឺបង្កប់មហិច្ឆតានៅពីក្រោយដើម្បីគ្រប់គ្រងប្រទេសកម្ពុជា។
លោក ហ៊ុន សែន សរសេរលើទំព័រហ្វេសប៊ុករបស់ខ្លួន នៅថ្ងៃទី២ ធ្នូ ថា រណសិរ្សសាមគ្គីសង្គ្រោះជាតិកម្ពុជា ដែលសព្វថ្ងៃ ត្រូវបានប្តូរឈ្មោះជា «រណសិរ្សសាមគ្គី អភិវឌ្ឍន៍មាតុភូមិកម្ពុជា» គឺជាអង្គការចាត់តាំងមហាជនមួយឈានមុខ របស់គណបក្សប្រជាជនកម្ពុជា ដែលត្រូវបានបដិសន្ធិឡើងនៅក្នុងតំបន់រំដោះ នាភូមិជើងឃ្លូ ឃុំ២ធ្នូ ស្រុកស្នួល ខេត្ដក្រចេះ នៅថ្ងៃទី២ ខែធ្នូ ឆ្នាំ១៩៧៨ ដែលមានលោក ហេង សំរិន លោក ជា ស៊ីម និងរូបលោកផ្ទាល់ រួមទាំងវីរជនស្នេហាជាតិជាច្រើនរូបទៀតចូលរួម។
លោកអះអាងថា ប្រជាជនគ្រប់ទិសទីបានក្រោកឈររួបរួមគ្នា ជាកម្លាំងមហាសាមគ្គីជាតិ ដោយបានទទួលការជួយឧបត្ថម្ភយ៉ាងធំធេង ពីកងទ័ពស្ម័គ្រចិត្តវៀតណាម និងការគាំទ្រពីមិត្រភក្ដិជិតឆ្ងាយលើសកលលោក ដើម្បីផ្ដួលរំលំរបបកម្ពុជាប្រជាធិបតេយ្យ រហូតដល់ទទួលបានជ័យជម្នះដ៏ត្រចះត្រចង់នៅថ្ងៃ៧ ខែមករា ឆ្នាំ១៩៧៩។
ស្ថានទូតវៀតណាម ប្រចាំនៅកម្ពុជា ធ្លាប់លើកឡើងថា ការជួយជ្រោមជ្រែងពីសំណាក់កងទ័ពវៀតណាមដល់រណសិរ្សសាមគ្គីសង្គ្រោះជាតិកម្ពុជា កាលពីថ្ងៃ២ ធ្នូ ឆ្នាំ១៩៧៨ រហូតទទួលបានជ័យជម្នះនៅថ្ងៃទី៧ ខែមករា ឆ្នាំ១៩៧៩ គឺដោយសារបក្សកុម្មុយនីស្តវៀតណាម ជាមួយកងទ័ព និងប្រជាជនវៀតណាម បានអនុវត្តសិទ្ធិស្របច្បាប់ជួយសង្គ្រោះប្រជាជនកម្ពុជានៅពេលនោះ៕
