មន្ត្រីជាន់ខ្ពស់កម្ពុជាអះអាងថា អាជ្ញាធរបានបង្កកទ្រព្យសម្បត្តិដែលពាក់ព័ន្ធនឹងបណ្ដាញក្រុមហ៊ុន ព្រីនស៍ គ្រុប (Prince Group) របស់លោក ចេន ហ្ស៊ី (Chen Zhi) ដែលមានតម្លៃជិត ១ពាន់លានដុល្លារ និងបានចេញដីកាចាប់ខ្លួនជនសង្ស័យដែលជាមេខ្លោងចំនួន ៣២នាក់។ ទោះជាយ៉ាងណា អ្នកឃ្លាំមើលយល់ថា ការប្រកាសតួលេខទាំងនេះមិនទាន់អាចបង្កើតទំនុកចិត្តដល់សហគមន៍អន្តរជាតិបាននៅឡើយទេ ដរាបណាប្រព័ន្ធដឹកនាំនៅកម្ពុជាខ្វះតម្លាភាព និងមិនមានការអនុញ្ញាតឱ្យស្ថាប័នអន្តរជាតិជំនាញចូលរួមពិនិត្យភស្តុតាងដោយឯករាជ្យ ដើម្បីផ្ទៀងផ្ទាត់ការអះអាងរបស់អាជ្ញាធរ។
មន្ត្រីជាន់ខ្ពស់កម្ពុជាអះអាងថា អាជ្ញាធរបានស្រាវជ្រាវ និងស៊ើបអង្កេតលើបណ្ដាញដែលពាក់ព័ន្ធនឹងក្រុមហ៊ុន ព្រីនស៍ គ្រុប (Prince Group) របស់លោក ចេន ហ្ស៊ី (Chen Zhi) អស់រយៈពេលជាច្រើនខែ ដោយសារតែមានលក្ខណៈស្មុគស្មាញពាក់ព័ន្ធនឹងបណ្ដាញក្រុមហ៊ុនធំៗជាច្រើនទាំងក្នុងស្រុក និងក្រៅប្រទេស។
ប្រធានគណៈកម្មការចំពោះកិច្ចប្រយុទ្ធប្រឆាំងការឆបោកតាមអនឡាញលោក ឆៃ ស៊ីណារិទ្ធ អះអាងថា ក្រោយបានស្រាវជ្រាវស៊ើបអង្កេត អាជ្ញាធរបានរកឃើញក្រុមហ៊ុនចំនួនជិត ២រយក្រុមហ៊ុន (១៩៨) ដែលជាប់ពាក់ព័ន្ធនឹងក្រុមហ៊ុន ព្រីនស៍ ដំណើរការមជ្ឈមណ្ឌលឆបោកតាមអនឡាញ។ ក្នុងនោះ ក្រុមហ៊ុនចំនួន ៩៨ ក្រុមហ៊ុនបានចុះបញ្ជីនៅកម្ពុជា និង ១០០ក្រុមហ៊ុនទៀតបានប្រតិបត្តិការឆបោកតាមអនឡាញនៅក្រៅប្រទេស។
លោក ឆៃ ស៊ីណារិទ្ធ បញ្ជាក់ថា ប្រធានក្រុមហ៊ុន លោក ចេន ហ្ស៊ី និងបក្ខពួកត្រូវអាជ្ញាធរកំណត់ជាមេខ្លោងសំខាន់ក្នុងសំណុំរឿងនេះ។ អាជ្ញាធរក៏រកឃើញថា បណ្ដាញក្រុមហ៊ុនពាក់ព័ន្ធនឹងក្រុមហ៊ុន ចេន ហ្ស៊ី នៅកម្ពុជាបានប្រើប្រាស់សណ្ឋាគារ និងអគារកាស៊ីណូដែលដំណើរការក្រោមឈ្មោះក្រុមហ៊ុនពាក់ព័ន្ធនឹងក្រុមហ៊ុន ព្រីន គ្រុប ដើម្បីបិទបាំងរបរទុច្ចរិតពួកគេសម្រាប់ប្រតិបត្តិការឆបោកតាមអនឡាញ។
លោក ឆៃ ស៊ីណារិទ្ធ អះអាងទៀតថា តុលាការកម្ពុជាក៏បានចេញដីកាចាប់ខ្លួនជនជាប់ចោទ ៣២នាក់ ពាក់ព័ន្ធនឹងសំណុំរឿងលាងលុយកខ្វក់ និងឧក្រិដ្ឋកម្មឆបោកតាមអនឡាញទាំងនេះ។ ក្នុងចំណោមជនសង្ស័យសំខាន់ៗមួយចំនួនក៏ត្រូវអាជ្ញាធរចាប់ខ្លួនបញ្ជូនទៅតុលាការកម្ពុជា និងធ្វើបត្យាប័នបញ្ជូនទៅប្រទេសចិនដូចជា លោក ចេន ហ្ស៊ី លោក លី សុង (Li Xong) លោក លីវ អ៊ីន (Liu Yin) លោក ហួង រ៉ុង (Huang Ron) លោក អេង ដារ៉ា (Eng Dara) និងលោក អៀង សុខលីម (Eang Soklim)។
មន្ត្រីជាន់ខ្ពស់រូបនេះ ឱ្យដឹងទៀតថា ទ្រព្យសម្បត្តិដែលជាប់ពាក់ព័ន្ធបណ្ដាញក្រុមហ៊ុន ចេន ហ្ស៊ី តុលាការបានបញ្ជាឱ្យបង្កកប្រាក់ក្នុងតម្លៃជាង ៣រយលានដុល្លារក្នុងគណនីធនាគារ ព្រមទាំងរឹបអូសអគារ កាស៊ីណូ និងអចលនទ្រព្យរាប់ពាន់កន្លែងផ្សេងទៀតនៅកម្ពុជាដែលមានតម្លៃជិត ១ពាន់លានដុល្លារ។
លោក ឆៃ ស៊ីណារិទ្ធ បង្ហាញតួលេខទាំងនេះក្នុងពេលដែលលោកផ្ដល់បទសម្ភាសន៍ជាមួយកាសែតក្នុងស្រុកភ្នំពេញប៉ុស្តិ៍ (Phnom Penh Post) កាលពីថ្ងៃទី២១ ខែតុលា។
ក្រៅពីបង្កកទ្រព្យសម្បត្តិរបស់មេខ្លោងឧក្រិដ្ឋជន ចេន ហ្ស៊ី លោក លោក ឆៃ ស៊ីណារិទ្ធ អះអាងថា កម្ពុជាក៏កំពុងស្នើសុំអង្គការនគរបាលព្រហ្មទណ្ឌអន្តរជាតិ ប៉ូលិសអាំងទែប៉ូល (INTERPOL) ដើម្បីតាមចាប់ជនសង្ស័យ ២៩នាក់ដែលបានរត់គេចខ្លួនទៅក្រៅប្រទេស ពាក់ព័ន្ធនឹងអំពើឆបោកតាមអនឡាញ និងការលាងលុយកខ្វក់នៅកម្ពុជា។
ទាក់ទងនឹងរឿងនេះ ភ្នាក់ប៉ូលិសអាំងទែប៉ូលមិនបានបញ្ជាក់ថា ខ្លួនបានទទួល ឬមិនបានទទួលសំណើពីភាគីកម្ពុជាចេញនិវេទក្រហមតាមចាប់ជនសង្ស័យទាំង ២៩នាក់នោះឡើយ។ ការិយាល័យសារព័ត៌មានរបស់ប៉ូលិសអន្តរជាតិ (Interpol) ប្រាប់ទូរទស្សន៍អាស៊ីសេរីតាមអ៊ីមែល (Email) ថា រាល់ព័ត៌មានពាក់ព័ន្ធនឹងការស៊ើបអង្កេត និងសំណើសុំចេញនិវេទក្រហម រួមទាំងព័ត៌មានអំពីបុគ្គលដែលពាក់ព័ន្ធ គឺស្ថិតក្រោមការគ្រប់គ្រងរបស់កម្ពុជា ឬប្រទេសជាសមាជិកដែលបានផ្ដល់ព័ត៌មាន។ Interpol បញ្ជាក់ថា ខ្លួនអាចផ្ដល់ព័ត៌មានក្នុងកាលៈទេសៈពិសេស ឬនៅពេលមានការយល់ព្រមពីប្រទេសពាក់ព័ន្ធ ឬជាសមាជិកតែប៉ុណ្ណោះ។
ភ្នាក់ងារប៉ូលិសអាំងទែប៉ូល (Interpol) ក៏បានជំរុញឱ្យទូរទស្សន៍អាស៊ីសេរីទាក់ទងអាជ្ញាធរកម្ពុជាដោយផ្ទាល់ ដើម្បីសាកសួរព័ត៌មានបញ្ជាក់ពាក់ព័ន្ធនឹងសំណើសុំចេញនិវេទក្រហមតាមចាប់ខ្លួនជនសង្ស័យ ២៩នាក់ ក្នុងសំណុំរឿងព្រីនស៍ គ្រុប។
ទូរទស្សន៍អាស៊ីសេរីមិនអាចទាក់ទងលោក ឆៃ ស៊ីណារិទ្ធ ដើម្បីសាកសួរជុំវិញរឿងនេះបានទេនៅថ្ងៃទី២២ ខែតុលា។
ទោះបីជាមន្ត្រីជាន់ខ្ពស់កម្ពុជាប្រកាសពីចំណាត់ការបង្កកទ្រព្យសម្បត្តិមេខ្លោង ចេន ហ្ស៊ី និងបង្ហាញតួលេខទីតាំងនៃក្រុមហ៊ុនជិត ១រយក្រុមហ៊ុនដែលរកស៊ីពាក់ព័ន្ធនឹងអំពើឆបោកតាមអនឡាញ ក៏លោកមិនបានបង្ហាញពីឈ្មោះក្រុមហ៊ុនទាំងនោះទេ។ ជាមួយគ្នានេះ អាជ្ញាធរក៏គ្មានវិធានការម៉ឺងម៉ាត់ ឬស៊ើបអង្កេតឱ្យដល់ឫសគល់ចំពោះអ្នកពាក់ព័ន្ធ អ្នកទទួលផលប្រយោជន៍ផ្នែកហិរញ្ញវត្ថុ និងអ្នកកាងការពារក្រុមហ៊ុនពាក់ព័ន្ធអំពើឧក្រិដ្ឋកម្មទាំងនោះឡើយ។
ជុំវិញរឿងនេះ ប្រធានអង្គការចលនាខ្មែរ ដើម្បីប្រជាធិបតេយ្យអ្នកស្រី មូរ សុខហួរ មានប្រសាសន៍ថា កម្ពុជាគួរតែបង្ហាញរបាយការណ៍ស៊ើបអង្កេតដោយតម្លាភាពជាងនេះ និងត្រូវបង្ហាញអត្តសញ្ញាណមេខ្លោងសំខាន់ៗ និងការអនុវត្តច្បាប់ជាក់ស្ដែង។ អ្នកស្រីជឿជាក់ថា ក្នុងចំណោមអ្នករងការចោទប្រកាន់ និងម្ចាស់ក្រុមហ៊ុនរកស៊ីពាក់ព័ន្ធនឹងឧក្រិដ្ឋកម្មទាំងនេះទំនងគ្មានឈ្មោះសមាជិកព្រឹទ្ធសភា លោក លី យ៉ុងផាត់ លោក កុក អាន និងក្មួយបង្កើតលោក ហ៊ុន សែន គឺលោក ហ៊ុន តូ ឡើយ។
អ្នកស្រី មូរ សុខហួរ បន្តថា ការបង្ហាញលទ្ធផលស៊ើបអង្កេតរបស់មន្ត្រីជាន់ខ្ពស់កម្ពុជាក៏មិនអាចធ្វើឱ្យសហគមន៍អន្តរជាតិជឿជាក់បានឡើយ ដោយសារតែការស៊ើបអង្កេតគ្មានតម្លាភាព និងគ្មានការអនុញ្ញាតឱ្យអ្នកជំនាញស្ថាប័នអន្តរជាតិពាក់ព័ន្ធ អាចចូលរួមត្រួតពិនិត្យដោយឯករាជ្យ ដើម្បីផ្ទៀងផ្ទាត់ភស្តុតាង។
អ្នកស្រី មូរ សុខហួរ៖ «បើសិនជាមិនចាត់វិធានការនៅលើមេខ្លោងកំពូលនោះទេ ជំងឺហ្នឹងវានៅតែមាន ជំងឺពុករលួយ ជំងឺដែលធ្វើឱ្យប្រទេសកម្ពុជាក្លាយទៅជា (Scambodia) រហូតដល់ពេលនេះ។ និយាយឱ្យខ្លីទៅ នៅពេលណា ដែលយើងមិនឃើញមានចាត់វិធានការទៅលើ កុក អាន និងលើ លី យ៉ុងផាត់ ទេ នៅពេលនោះមហាជននៅតែមិនទាន់មានទំនុកចិត្តថា លោក ហ៊ុន ម៉ាណែត មានសេចក្ដីក្លាហានគ្រប់គ្រាន់នៅក្នុងការចាត់វិធានការទៅលើមន្ត្រីខ្ពស់ៗដែលជាសមាជិករដ្ឋាភិបាលផង ជាសមាជិកនៃគណបក្សប្រជាជនកម្ពុជាជាន់ខ្ពស់នោះទេ»។
ទាក់ទងនឹងការបង្កកទ្រព្យសម្បត្តិនេះដែរ អាជ្ញាធរតៃវ៉ាន់ (Taiwan) ថ្មីៗនេះក៏បានពង្រីកចំណាត់ការរបស់ខ្លួនប្រឆាំងនឹងមេខ្លោងឧក្រិដ្ឋកម្ម ចេន ហ្ស៊ី និងបានរឹបអូសទ្រព្យសម្បត្តិពាក់ព័ន្ធនឹងបណ្ដាញក្រុមហ៊ុន ព្រីនស៍ គ្រុប ដែលមានមូលដ្ឋាននៅកម្ពុជាក្នុងទំហំទឹកប្រាក់ជិត ១រយ ៨០លានដុល្លារ។ អាជ្ញាធរតៃវ៉ាន់បញ្ជាក់ថា បណ្ដាញក្រុមហ៊ុន ចេន ហ្ស៊ី បានលាងលុយកខ្វក់ប្រមាណជាង ៣រយលានដុល្លារនៅកោះតៃវ៉ាន់តាមរយៈការបង្កើតប្រព័ន្ធធនាគារ និងក្រុមហ៊ុនកំបាំងមុខ ដើម្បីលាក់បាំងប្រភព ឬអ្នកទទួលលុយពិតប្រាកដ។
សហរដ្ឋអាមេរិកឱ្យដឹងថា កាលពីឆ្នាំ២០២៥ ពលរដ្ឋសហរដ្ឋអាមេរិកបានបាត់បង់លុយជាង ២១ពាន់លានដុល្លារពីអំពើឆបោកតាមអនឡាញរបស់បណ្ដាញឧក្រិដ្ឋកម្មមានមូលដ្ឋាននៅកម្ពុជា និងក្នុងតំបន់អាស៊ីអាគ្នេយ៍។ ក្នុងឆ្នាំ២០២៥ ដដែលអង្គការសហប្រជាជាតិរកឃើញថា ប្រជាជននៅអាស៊ីបូព៌ា អាស៊ីអាគ្នេយ៍ អូស្ត្រាលី (Australia) និងនូវែលហ្សេឡង់ (New Zealand) ក៏បានខាតបង់លុយជាង ១១៤ពាន់លានដុល្លារ ពីការឆបោកតាមអនឡាញរបស់ក្រុមឧក្រិដ្ឋជននៅតំបន់អាស៊ីអាគ្នេយ៍។
សហរដ្ឋអាមេរិកកាលពីចុងឆ្នាំ២០២៥ បានប្រកាសបង្កកទ្រព្យសម្បត្តិមេខ្លោង ចេន ហ្ស៊ី ក្នុងទំហំទឹកប្រាក់ជាង ១៥ពាន់លានដុល្លារ និងបានចោទថា មេខ្លោង ចេន ហ្ស៊ី ជាមេខ្លោងអង្គការឧក្រិដ្ឋកម្មឆ្លងដែនប្រើប្រាស់ទឹកដីកម្ពុជា ដើម្បីបង្កើតជាមជ្ឈមណ្ឌលឆបោក ព្រមទាំងបង្ខាំងមនុស្ស និងធ្វើទារុណកម្មបង្ខំឱ្យធ្វើការឆបោកលុយពីជនរងគ្រោះជុំវិញពិភពលោក។ ក្រោយសហរដ្ឋអាមេរិកនាំមុខប្រឆាំងនឹងឧក្រិដ្ឋកម្មនេះ ចក្រភពអង់គ្លេស សហភាពអឺរ៉ុប តៃវ៉ាន់ សិង្ហបុរី កូរ៉េខាងត្បូង ហ្វីលីពីន និងប្រទេសថៃជាដើម ក៏បានបន្តពង្រីកដាក់ទណ្ឌកម្មលើបណ្ដាញក្រុមហ៊ុនពាក់ព័ន្ធនឹងក្រុមហ៊ុន ព្រីនស៍ គ្រុប និងប្រកាសបង្កកទ្រព្យសម្បត្តិមេខ្លោងលោក ចេន ហ្ស៊ី ក្នុងទំហំទឹកប្រាក់រាប់រយពាន់លានដុល្លារ៕
