ធនាគារជាតិនៃកម្ពុជានៅថ្ងៃទី១០ ខែធ្នូ ប្រកាសប្រាប់គ្រឹះស្ថានធនាគារ និងហិរញ្ញវត្ថុ ឬម្ចាស់បំណុលនានា ឱ្យផ្ដល់ការអនុគ្រោះមួយចំនួនដល់អ្នកខ្ចីប្រាក់ ឬកូនបំណុលជាគ្រួសារយោធិន និងអ្នកភៀសសឹក។
ក្នុងនោះមានដូចជា ការលើកលែងរាល់កម្រៃ និងការផាកពិន័យចាប់ពីថ្ងៃនេះ ដល់ថ្ងៃទី៣១ ខែមីនា ឆ្នាំ២០២៦ និងការលើកលែងការទូទាត់សងការប្រាក់ និងពន្យារពេលទូទាត់សងប្រាក់ដើម ចាប់ពីថ្ងៃនេះ ដល់ថ្ងៃទី៣១ ខែមីនា ឆ្នាំ២០២៦ ទៅដល់ជនភៀសសឹក និងយោធិន ដែលជាប់ដៃនៅសមរភូមិប្រយុទ្ធ។
ជាមួយគ្នានេះធនាគារជាតិនៃកម្ពុជានាំឱ្យម្ចាស់បំណុលលុបចោលឥណទានរហូតដល់៨០លានរៀលរបស់អតិថិជន ឬអ្នករួមខ្ចីជាយោធិនពលី។ រីឯយោធិនពិការក្នុងការប្រយុទ្ធអាចទទួលបានការលុបចោលបំណុលរហូតដល់ ១០លានរៀល (២,៤៩៥ដុល្លារ)។
ធនាគារជាតិនៃកម្ពុជាក៏លើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុផ្តល់ការអនុគ្រោះពិសេសបន្ថែមទៀត តាមលទ្ធភាពជាក់ស្តែងដល់ប្រជាពលរដ្ឋ ដែលរងផលប៉ះពាល់ពីជម្លោះព្រំដែនកម្ពុជា-ថៃ និងយោធិន ដែលធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធ។
របាយការណ៍របស់ Credit Bureau Cambodia (CBC) ឱ្យដឹងថា គិតត្រឹមចុងឆ្នាំ២០២៤ មានពលរដ្ឋខ្មែរ ជាង៥លាននាក់ជំពាក់បំណុលធនាគារ និងគ្រឹះស្ថានហិរញ្ញវត្ថុ ក្នុងទំហំទឹកប្រាក់ជិត ៦០ពាន់លានដុល្លារ៕
