ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) សង្ឃឹមថា លោកនៅតែអាចបញ្ឈប់សង្គ្រាមខ្មែរថៃជាលើកទី២។ លោកថ្លែងដូច្នេះពេលឆ្លើយសំណួររបស់អ្នកកាសែតកាលពីថ្ងៃទី១០ ធ្នូ។
លោក ដូណាល់ ត្រាំ អះអាង ថា លោកនឹងរៀបចំហៅទូរស័ព្ទទៅមេដឹកនាំកម្ពុជា និងថៃ នៅថ្ងៃទី១១ ធ្នូ នេះ។ លោកជឿថា គ្មានអ្នកណាក្រៅពីលោកអាចបញ្ឈប់ការវាយប្រហាររបស់ប្រទេសទាំងពីរនេះទេ។ លោកក៏សរសើរថា មេដឹកនាំទាំងពីរជាមនុស្សអស្ចារ្យដែលលោកធ្លាប់បានប្រាស្រ័យជាមួយ។
លោក ត្រាំ ហាក់បង្ហាញការយកចិត្តទុកដាក់យ៉ាងខ្លាំងលើបញ្ហាជម្លោះប្រដាប់អាវុធនៅកម្ពុជា និងថៃ។ កាលពីសង្គ្រាម៥ថ្ងៃលើកទី១ លោក ត្រាំ ក៏ជាតួអង្គសម្របសម្រួលឱ្យថៃទទួលយកបទឈប់បាញ់ រហូតព្រមចុះហត្ថលេខាកិច្ចព្រមព្រៀងសន្តិភាព ២៦ តុលា នៅប្រទេសម៉ាឡេស៊ី។
ទោះជាយ៉ាងណា ភាគីថៃនៅតែបង្កអារិភាព ដោយការធ្វើទុក្ខបុកម្នេញកម្ពុជា ដូចជា ដាក់បន្លាលួសព័ទ្ធយកផ្ទះពលរដ្ឋ និងឈូសឆាយដីស្រែចម្ការក្នុងដីខ្មែរ ព្រមទាំងបាញ់សម្លាប់ជនស៊ីវិលកម្ពុជាជាដើម។
រហូតដល់ថ្ងៃទី៧ ធ្នូ យោធាថៃបានចាប់ផ្ដើមវាយប្រហារកម្ពុជាសាជាថ្មី ទាំងដែលកម្ពុជាពុំបានតបតទេ រហូតដល់ ២៤ម៉ោងក្រោយ ទើបកម្ពុជាបង្ខំចិត្តវាយត្រឡប់ដើម្បីការពារខ្លួន ខណៈយោធាថៃបង្កើនសកម្មភាពយ៉ាងគឃ្លើនវាយប្រហារដោយអាវុធធុនធំគ្រប់ប្រទេស ទាំងតាមអាកាស ផ្លូវទឹក ដោយមិនរើសទីតាំងវាយប្រហារ រហូតបំផ្លាញផ្ទះពលរដ្ឋស៊ីវិល និងសម្លាប់ជនស៊ីវិលខ្មែរចំនួន ១០នាក់ និងរបួសជាង ៥០នាក់៕
