ក្រសួងការពារជាតិកម្ពុជាច្រានចោលការផ្សព្វផ្សាយរបស់សារព័ត៌មានថៃដែលចោទប្រកាន់កម្ពុជាថា បានប្រើប្រាស់ទាហានស៊ីឈ្នួលបរទេសមកជួយបង្ហោះដ្រូនអត្តឃាត ក្នុងជម្លោះព្រំដែនកម្ពុជា-ថៃ។
ក្រសួងការពារជាតិកម្ពុជាចេញផ្សាយនៅរសៀលថ្ងៃទី១១ ធ្នូ ដោយហៅការផ្សព្វផ្សាយរបស់សារព័ត៌មាន Thai Tribune និងផេកហ្វេសប៊ុក Army Military Force បានចោទលាបពណ៌តែប៉ុណ្ណោះ។
ក្រសួងការពារជាតិកម្ពុជាទាត់ចោលខ្លឹមសារដែលបានចុះផ្សាយនេះ និងអះអាងថា ជាព័ត៌មានភូតកុហក និងជាព័ត៌មានប្រឌិត ក្លែងក្លាយ។
ក្រសួងបន្តថា កម្ពុជាទាមទារឱ្យភាគីថៃបញ្ឈប់រាល់ការផ្សព្វផ្សាយព័ត៌មានមិនពិតដោយចេតនា ក្នុងគោលដៅបង្វែរការចាប់អារម្មណ៍អំពីការរំលោភបំពានច្បាប់អន្តរជាតិរបស់ខ្លួនដោយលាបពណ៌កម្ពុជា ដើម្បីយកលេសប្រើប្រាស់អាវុធកាន់តែសាហាវមកលើកម្ពុជា៕
