អ្នកឃ្លាំមើលរិះគន់ថា ការតែងតាំងកូនប្រសារបស់ លោក អូន ព័ន្ធមុនីរ័ត្ន ជាទីប្រឹក្សាក្រសួងសេដ្ឋកិច្ច និងហិរញ្ញវត្ថុ នឹងធ្វើឲ្យមានអំពើពុករលួយ និងបក្ខពួកនិយម កាន់តែច្រើនឡើង។ ការលើកឡើងនេះ គឺបន្ទាប់ពី លោក ហ៊ុន ម៉ាណែត ស្នើព្រះមហាក្សត្រតែងតាំងកូនប្រសារបស់ ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជាទីប្រឹក្សាអមរបស់ក្រសួងសេដ្ឋកិច្ច និងហិរញ្ញវត្ថុ។
ការតែងតាំងកូនចៅ ឬសាច់ញាតិរបស់អ្នកធំ ឱ្យធ្វើការនៅក្នុងស្ថាប័នតែមួយជាមួយឪពុកម្ដាយជារដ្ឋមន្ត្រី ឬមានតួនាទីខ្ពស់ សឹងក្លាយជារឿងធម្មតាទៅហើយនៅកម្ពុជា បើទោះបីជារងការរិះគន់យ៉ាងណាក្តី។
ជាក់ស្ដែងអ្នកឃ្លាំមើលលើកឡើងថា ការតែងតាំង លោក ឡាំ ជុងហាវ ដែលជាកូនប្រសារបស់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជាទីប្រឹក្សាអមរបស់ក្រសួងសេដ្ឋកិច្ច នឹងធ្វើឲ្យប៉ះពាល់ដល់សុចរិតភាព និងធនធានមនុស្សសម្រាប់ការអភិវឌ្ឍជាតិ និងប្រទេសជាតិដើរថយក្រោយផ្នែកលទ្ធិប្រជាធិបតេយ្យ។
អ្នកនាំពាក្យគណបក្សប្រជាធិបតេយ្យជឿនលឿន និងជាអ្នកវិភាគ លោក ប៉ោ មករា ប្រាប់ទូរទស្សន៍អាស៊ីសេរី នៅថ្ងៃទី៦ ខែកុម្ភៈថា ការតែងតាំងដោយផ្តោតទៅលើកូនចៅ និងសែស្រឡាយ ដោយមិនមានឆ្លងកាត់ការប្រកួតប្រជែងសមត្ថភាពបទពិសោធន៍ នៅតាមក្រសួងស្ថាប័នជាតិ នឹងធ្វើឲ្យប៉ះពាល់ដល់សុចរិតភាព និងធនធានមនុស្សសម្រាប់ការអភិវឌ្ឍជាតិ។ លើសពីនោះ នឹងធ្វើឲ្យកូនចៅរបស់កសិករ និងអ្នកដែលមានសមត្ថភាព តែគ្មានអំណាច ឬបក្ខពួក សែស្រឡាយ មិនមានឱកាសក្នុងការបម្រើជាតិ។ លោកថា ការតែងតាំងតែសាច់ញាតិរបស់ខ្លួនឯងឱ្យធ្វើការនេះ គឺជាឧបសគ្គរារាំងដល់ការលុបបំបាត់អំពើ បក្ខពួកនិយម និងអំពើពុករលួយនៅកម្ពុជា។
លោក ប៉ោ មករា៖ «អ្វីដែលរដ្ឋាភិបាលគួរតែបោះបង់ចោលនោះ គឺវប្បធម៌តែងតាំង សាច់ញាតិ ឬក៏បក្ខពួករបស់ខ្លួន គួរតែបោះចោល គួរតែមកមើលការតែងតាំងមួយដែលមានការប្រកួតប្រជែងពិតប្រាកដ ការប្រកួតប្រជែងមួយដែលប្រើសមត្ថភាព មិនប្រើបក្ខពួក ជាកត្តាមួយសំខាន់ ជាកត្តាមួយរុញឲ្យស្ថាប័នរដ្ឋ ដែលរស់ដោយជាតិទាំងមូលមានភាពរឹងមាំ មានសុខដុមរមនាប្រជាជាតិទាំងមូល»។
កាលពីចុងឆ្នាំ២០២៥ លោក ហ៊ុន ម៉ាណែត បានស្នើឲ្យព្រះមហាក្សត្រតែងតាំង លោក ឡាំ ជុងហាវ ដែលជាកូនប្រសារបស់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ជាទីប្រឹក្សាអមក្រសួងសេដ្ឋកិច្ច និងហិរញ្ញវត្ថុ ដែលមានឋានៈស្មើអគ្គនាយក។ នេះបើតាមព្រះរាជក្រឹត្យ ដែលទូរទស្សន៍អាស៊ីសេរីទទួលបាននៅថ្ងៃទី៦ ខែកុម្ភៈ។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យនាយករដ្ឋមន្ត្រី លោក មាស សោភ័ណ្ឌ និងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការអត្ថាធិប្បាយបានទេ នៅថ្ងៃទី០៦ ខែកុម្ភៈនេះ។
ការតែងតាំងកូនចៅ ឬសាច់ញាតិខ្លួនឱ្យធ្វើការ ឬកាន់តួនាទីធំៗ បានកើតឡើងសឹងគ្រប់កន្លែងនៅតាមស្ថាប័នរដ្ឋ តាំងពីថ្នាក់ក្រោមរហូតដល់ថ្នាក់កំពូលរបស់ជាតិ រាប់ទាំងកូនចៅ និងសាច់ញាតិរបស់ក្រុមគ្រួសារត្រកូល ហ៊ុន ផង។ ទង្វើទាំងនេះ បានបង្កើតជាគំរូអាក្រក់នៅក្នុងសង្គម និងបំផ្លាញប្រសិទ្ធភាពការងារនៅតាមក្រសួងស្ថាប័នរដ្ឋ និងប្រព័ន្ធដឹកនាំរដ្ឋតាមបែបប្រជាធិបតេយ្យនៅកម្ពុជា។
ទាក់ទិននឹងបញ្ហានេះ អ្នកជំនាញផ្នែកភូមិសាស្ត្រ នយោបាយ លោក សេង វណ្ណលី លើកឡើងថា សង្គមប្រជាធិបតេយ្យរបស់កម្ពុជា កំពុងដើរថយក្រោយ និងធ្វើឲ្យជះឥទ្ធិពលអាក្រក់ដល់សង្គមជាតិមួយនេះ។ លោកបន្ថែមថា ស្ថាប័នរដ្ឋដែលជាទ្រព្យសម្បត្តិសាធារណៈរបស់ជាតិ ត្រូវរដ្ឋាភិបាលត្រកូលហ៊ុន ប្រែក្លាយជាទ្រព្យសម្បត្តិឯកជន ឬយកធ្វើជាអាជីវកម្មគ្រួសារ ដោយធ្វើឲ្យអំពើពុករលួយរីករាលដាល។
លោក សេង វណ្ណលី៖ «ពីព្រោះគ្មាននរណាហ៊ានរិះគន់ និងដាក់ទោសទណ្ឌទៅលើសមាជិកគ្រួសាររបស់ខ្លួនឯងនោះទេ នេះគឺជាសកម្មភាពដ៏អាក្រក់ ដែលធ្វើឲ្យប្រសិទ្ធភាពការងាររដ្ឋបាលសាធារណៈធ្លាប់ចុះដុនដាប ធ្វើឲ្យមានគម្លាតសង្គមកាន់តែខ្លាំង នឹងអាចដឹកនាំប្រទេសទៅរកភាពវឹកវរ ប្រសិនបើការចាត់ចែងអំណាចធ្វើឡើងតាមផលប្រយោជន៍ ឬក៏ការពារក្រុមគ្រួសារ»។
អ្នកឃ្លាំមើលព្រមានថា អំពើបក្ខពួកនិយម អាចជះផលវិបាកធ្ងន់ធ្ងរ និងយូរអង្វែង ដល់អភិបាលកិច្ច និងប្រសិទ្ធភាពការងារនៅក្នុងស្ថាប័នរដ្ឋ និងធ្វើឱ្យចុះខ្សោយនូវការទទួលខុសត្រូវរបស់មន្ត្រី ជំរុញឱ្យមានអំពើពុករលួយ និងធ្វើឱ្យខូចដល់ប្រព័ន្ធនីតិរដ្ឋនៅកម្ពុជាជាដើម៕
