សាលាឧទ្ធរណ៍បាត់ដំបងបានប្រកាសសាលដីកាតម្កល់សាលក្រមផ្ដន្ទាទោសរបស់សាលាដំបូងខេត្តសៀមរាប ទៅលើអ្នកសារព័ត៌មានអនឡាញគឺ លោក ផន សុភាព និងលោក ភាព ភារ៉ា ឲ្យជាប់ពន្ធនាគារម្នាក់ៗ ១៤ ឆ្នាំ ពីបទ« ប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចធ្វើឱ្យអន្តរាយការការពារជាតិ» ។ អ្នកជំនាញសារព័ត៌មាន និងសង្គមស៊ីវិល សោកស្ដាយ ដែលការសម្រេចនេះ គឺជាការរារាំង និងគំរាមកំហែងដល់អ្នកសារព័ត៌មានដទៃ។
អ្នកជំនាញសារព័ត៌មាន និងសង្គមស៊ីវិល ចាត់ទុកការផ្ដន្ទាទោសលើអ្នកសារព័ត៌ មានពីររូបឲ្យជាប់ពន្ធនាគារម្នាក់ៗ ១៤ឆ្នាំ របស់សាលាឧទ្ធរណ៍ប្រចាំតំបន់ដែល តាំងនៅខេត្តបាត់ដំបង ថា ជាការកាត់ទោសធ្ងន់ធ្ងរហួសហេតុ។
ការលើកឡើងនេះ បន្ទាប់ពីចៅក្រមសាលាឧទ្ធរណ៍បាត់ដំបងនៅថ្ងៃទី២៦ ខែមីនា បានផ្ដន្ទាទោសអ្នកសារព័ត៌មានបាត់ដំបងប៉ុស្តិ៍ លោក ផន សុភាព និងអ្នកសារព័ត៌មាន TSP68 TV Online លោក ភាព ភារ៉ា ឲ្យជាប់ពន្ធនាគារម្នាក់ៗ ១៤ឆ្នាំ ដូចការសម្រេចរបស់សាលាដំបូងខេត្តសៀមរាបដដែល។
នាយកប្រតិបត្តិ នៃសមាគមសម្ព័ន្ធអ្នកសារព័ត៌មានកម្ពុជា ហៅកាត់ ខេមបូចា លោក ណុប វី សោកស្ដាយចំពោះការសម្រេចរបស់សាលាឧទ្ធរណ៍ខេត្តបាត់ដំបង ។ លោកបន្តថា តុលាការមិនបានពិចារណា ការលើកឡើងរបស់អ្នកសារព័ត៌មានទាំងពីររូប អំឡុងពេលសវនាការកន្លងមក ដែលអះអាងនៅចំពោះមុខចៅក្រមថា ពួកគាត់គ្មានចេតនាក្នុងការផ្ដល់ព័ត៌មានទៅឲ្យរដ្ឋផ្សេង និងបញ្ចេញព័ត៌មានទាក់ទងនឹងការសម្ងាត់របស់យោធាដូចការចោទប្រកាន់ឡើយ។
លោក ណុប វី យល់ថា ការសម្រេចរបស់តុលាការនេះ គឺជាការគំរាមកំហែង និងបំភិតបំភ័យអ្នកសារព័ត៌មានផ្សេងៗ ដែលចង់រាយការណ៍រឿងវីរភាពកងទ័ព និងទឹកដី ហើយករណីនេះ នឹងធ្វើឲ្យប៉ះពាល់ដល់កម្ពុជាទៅវិញទេ។
លោក ណុប វី៖ «មែនទែនទៅជាការឈឺឆ្អាល ចំពោះជាតិរបស់គាត់ ការចង់ផ្សព្វផ្សាយ ការចង់បង្ហាញ អំពីវីរភាពរបស់កងទ័ពកម្ពុជាទៅវិញ។ បើនៅក្នុងស្ថានភាពបែបនេះ តុលាការលោកមិនបានយកមកពិចារណា សម្រាប់ខ្ញុំ ខ្ញុំថា វាជាការគំរាមកំហែងទៅដល់អ្នកសារព័ត៌មានផ្សេងៗទៀតដែរ ដែលគាត់ចង់ចូលរួមចង់ផ្សព្វផ្សាយអំពីវីរភាពកងទ័ព អំពីការស្រឡាញ់ទឹកដីរបស់យើងហ្នឹង គឺថាពួកគាត់ត្រូវរួញរាមានការភ័យខ្លាច ខ្លាចមានការប្ដឹងផ្ដល់ ការចោទប្រកាន់ ហើយ ការដាក់ទោសនេះ ដូចយើងដឹងហើយ ការដាក់ទោសរហូតទៅដល់កម្រិត ដែលគេហៅថា ខ្ពស់បំផុតនៃទោសទៅហើយ។ អ៊ីចឹងមានន័យថា ធ្ងន់ធ្ងរណាស់»។
អ្នកសារព័ត៌មានលោក ផន សុភាព និងលោក ភាព ភារ៉ា ត្រូវបានសមត្ថកិច្ចចាប់ខ្លួន ដាច់ដោយឡែកពីគ្នានៅក្នុងខែកក្កដា ឆ្នាំ២០២៥ បន្ទាប់ពីវិលត្រឡប់ពីរាយការណ៍ព័ត៌មាន នៅខេត្តឧត្តរមានជ័យ។ ពួកគាត់ ត្រូវបានតុលាការខេត្តសៀមរាប ផ្ដន្ទាទោសឲ្យជាប់ពន្ធនាគារម្នាក់ៗ ១៤ ឆ្នាំ ពីបទ«ប្រគល់ឱ្យរដ្ឋបរទេសនូវព័ត៌មាន ជាអាទិ៍ ដែលអាចធ្វើឱ្យអន្តរាយការការពារជាតិ» កាលពីថ្ងៃទី១៧ ខែធ្នូ ឆ្នាំ២០២៥។
តាមមាត្រា ៤៤៥ នៃក្រមព្រហ្មទណ្ឌ ដែលជាកម្រិតទោសខ្ពស់ជិតដល់កម្រិតអតិបរមានៃទោសសម្រាប់បទល្មើសនេះ គឺ ១៥ ឆ្នាំ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (LICAHDO) លោក អំ សំអាត យល់ថា ការផ្ដន្ទាទោសលើអ្នកសារព័ត៌មានធ្ងន់ធ្ងរនេះ នឹងប៉ះពាល់ដល់សេរីសារព័ត៌មាន និងសេរីភាពក្នុងការបញ្ចេញមតិ ហើយក៏ជាការរឹតត្បិតលំហសេរីភាពសារព័ត៌មាន។
លោកបន្តថា អ្នកសារព័ត៌មានដែលបំពេញការងារវិជ្ជាជីវៈសារព័ត៌មានបើមានកំហុសឆ្គង ត្រូវប្រើប្រាស់ច្បាប់ស្ដីពីរបបសារព័ត៌មាន ដោយមិនគួរប្រើប្រាស់ច្បាប់ក្រមព្រហ្មទណ្ឌសម្រាប់ចោទប្រកាន់ និងផ្ដន្ទាទោសនោះទេ។
ស្រដៀងគ្នានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃ សមាគមការពារសិទ្ធិមនុស្សអាដហុក លោក យិន ម៉េងលី សោកស្ដាយ និងទទូច ឲ្យតុលាការប្រើច្បាប់ស្ដីពីរបបសារព័ត៌មាន ពីព្រោះច្បាប់នេះ គឺជាច្បាប់ពិសេស ដែលត្រូវយកមកអនុវត្តលើអ្នកសារព័ត៌មាន បើពួកគេធ្វើខុស ខណៈច្បាប់ក្រម ព្រហ្មទណ្ឌជាច្បាប់ធម្មតា។ ប៉ុន្តែ ប្រសិនបើតុលាការបន្តយកច្បាប់ក្រមព្រហ្មទណ្ឌមកចោទប្រកាន់លើអ្នកសារព័ត៌មាននោះ លោកស្នើឲ្យយកមាត្រា ៤៧៩ មកអនុវត្ត។
លោក យិន ម៉េងលី៖ «តុលាការ បើសិនជាយកក្រមព្រហ្មទណ្ឌសូមឲ្យយកទៅលើមាត្រា ៤៧៩ ដែលជួយដល់អ្នកសារព័ត៌មាននេះ។ មាត្រា ៤៧៩ និយាយពីរឿងប៉ះពាល់ដល់ការសម្ងាត់របស់ប្រទេសជាតិដែរ តែនៅក្នុងវាក្យខណ្ឌទី២ នៃមាត្រា ៤៧៩ ហ្នឹង និយាយអំពីការខ្ជះខ្ជាយ ការធ្វេសប្រហែសដែលធ្វើឲ្យប៉ះពាល់ហ្នឹង។ អ៊ីចឹងនេះ ជាបទមជ្ឈិម អាចជួយដល់អ្នកសារព័ត៌មាន ហើយអាចបន្ធូរបន្ថយគាត់»។
ក្រៅពីសំណុំរឿងអ្នកសារព័ត៌មានលោក ផន សុភាព និង លោក ភាព ភារ៉ា នៅថ្ងៃទី២៦ ខែមីនា សាលាឧទ្ធរណ៍បាត់ដំបង បានបើកវនាការបណ្ដឹងសុំនៅក្រៅឃុំរបស់អ្នកកាសែត HVNN លោក ហែម វណ្ណា ពាក់ព័ន្ធនឹងការផ្សាយរឿងឆបោកអនឡាញ។ លោកត្រូវបានតុលាការខេត្តបន្ទាយមានជ័យឃុំខ្លួននៅពន្ធនាគារ កាលពីថ្ងៃទី០៤ ខែកុម្ភៈ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋ»និងបទ «ស្តាប់ ឫ ថតពាក្យសម្ងាត់ឯកជន» បន្ទាប់ពីលោកចុះផ្សាយព័ត៌មានថា ជនជាតិបរទេស ៤ ទៅ៥នាក់ រងនូវអំពើហិង្សាពីសំណាក់មនុស្សមួយ ក្រុមផ្សេងទៀត ដែលគេដឹងថា ជាអ្នកបម្រើការនៅក្នុងបរិវេណអាគារបិទខ្ទប់ជាទីអាថ៌កំបាំង នៅខាងក្រោយបន្ទាយកងរាជអាវុធហត្ថ ក្រុងប៉ោយប៉ែត។
បន្ទាប់ពីបញ្ចប់សវនាការ តុលាការសម្រេចប្រកាសដីកាបណ្ដឹងសុំនៅក្រៅឃុំរបស់អ្នកសារព័ត៌មានលោក ហែម វណ្ណា នៅថ្ងៃទី០២ ខែមេសា ខាងមុខ។
របាយការណ៍ប្រចាំត្រីមាស របស់សមាគមសម្ព័ន្ធអ្នកសារព័ត៌មានកម្ពុជា ហៅកាត់ ខេមបូចាដែលទើប ចេញផ្សាយនៅថ្ងៃទី១៩កុម្ភៈ បានរកឃើញថា ចន្លោះពីខែតុលាដល់ខែធ្នូ ឆ្នាំ២០២៥ មានអ្នកសារព័ត៌មាន ចំនួន ១៤នាក់ បានរងការធ្វើទុក្ខបុកម្នេញ និងចាប់ខ្លួន។ ទន្ទឹមគ្នានេះ ការបៀតបៀន និងបំពានសិទ្ធិ អ្នកសារព័ត៌មានភាគច្រើន កើតមាននៅក្នុងខេត្តឧត្តរមានជ័យ នៅពេលចុះរាយការណ៍ ស្ដីពីបញ្ហាព្រំដែនកម្ពុជា-ថៃ៕
