លោកនាយករដ្ឋមន្ត្រី ហ៊ុន ម៉ាណែត បញ្ជាឱ្យរដ្ឋមន្ត្រីក្រសួងសុខាភិបាល និងក្រសួងអប់រំពង្រឹងគុណភាពចំណេះជំនាញ និងវិជ្ជាជីវៈវេជ្ជបណ្ឌិត ដើម្បីធានាថា គ្រូពេទ្យនីមួយៗមានសមត្ថភាព និងស្តង់ដារវិជ្ជាជីវៈគ្រប់គ្រាន់សម្រាប់ផ្តល់ការព្យាបាលប្រកបដោយគុណភាព និងសុវត្ថិភាពដល់អ្នកជំងឺ។ ទន្ទឹមនឹងនេះ អ្នកជំនាញសុខាភិបាល និងអ្នកឃ្លាំមើលលើកឡើងថា ករណីបុគ្គលមួយចំនួនអាចក្លែងបន្លំ ឬប្រើប្រាស់សញ្ញាប័ត្រក្លែងក្លាយ ដើម្បីប្រកបវិជ្ជាជីវៈបើកគ្លីនិក ឬឱសថស្ថាន ដោយគ្មានជំនាញវេជ្ជសាស្ត្រពិតប្រាកដ គឺដោយសារតែបញ្ហាអំពើពុករលួយ និងកត្តាដឹកនាំរបស់រដ្ឋាភិបាលខ្លួនឯងអសមត្ថភាព។
លោកនាយករដ្ឋមន្ត្រី ហ៊ុន ម៉ាណែត ព្រមានថា និស្សិត ឬគ្រូពេទ្យដែលរៀន ដើម្បីទទួលបានសញ្ញាបត្រ ដើម្បីបើកឱសថស្ថានទទួលបានចំណូល ប៉ុន្តែគ្មានវិជ្ជាជីវៈ និងជំនាញវេជ្ជសាស្ត្រគ្រប់គ្រាន់ គឺជាគ្រោះថ្នាក់ធ្ងន់ធ្ងរដល់អ្នកជំងឺ និងសង្គមជាតិទាំងមូល។
លោក ហ៊ុន ម៉ាណែត ក៏ព្រមានដល់រដ្ឋមន្ត្រីក្រសួងសុខាភិបាល និងក្រសួងអប់រំ យុវជន និងកីឡា មិនត្រូវចេញសញ្ញាបត្រ ឬអនុញ្ញាតឱ្យនិស្សិតពេទ្យចូលប្រកបវិជ្ជាជីវៈវេជ្ជសាស្ត្រ ឬបើកគ្លីនិកទទួលព្យាបាលអ្នកជំងឺឡើយ ប្រសិនបើពួកគេមិនទាន់ទទួលបានការអប់រំ និងការបណ្ដុះបណ្ដាលជំនាញវេជ្ជសាស្ត្រគ្រប់គ្រាន់។
ជាមួយគ្នានេះ លោកក៏ស្នើឱ្យក្រសួងពាក់ព័ន្ធផ្ដល់ការគាំពារ ផ្ដល់ការអប់រំ និងវគ្គបណ្ដុះបណ្ដាល ប្រកបដោយស្តង់ដារ និងជំនាញពិតប្រាកដដល់និស្សិតពេទ្យទាំងក្នុង និងក្រៅប្រទេស ដើម្បីអាចផ្ដល់ការព្យាបាលដល់អ្នកជំងឺប្រកបដោយគុណភាព និងសុវត្ថិភាពខ្ពស់។
លោក ហ៊ុន ម៉ាណែត ថ្លែងបែបនេះនៅក្នុងពិធីអបអរសាទរខួប ៨០ឆ្នាំ នៃការបង្កើតសាកលវិទ្យាល័យវិទ្យាសាស្ត្រសុខាភិបាល និងសម្ពោធអគារសិក្សាថ្មីចំនួន ២ខ្នង នៅថ្ងៃទី០៧ ខែតុលា។
លោក ហ៊ុន ម៉ាណែត៖ «អ៊ីចឹងបានខ្ញុំសូមថា ពេទ្យរៀនកុំឱ្យតែចប់ ឱ្យចេះ! កុំរៀនបានតែសញ្ញាបត្រ ដើម្បីយកទៅបើកគ្លីនិកបានចំណូល អត់ទេ ត្រូវតែចេះ វ៉ៃថ្នាំឱ្យគេឱ្យច្បាស់! ព្រោះខ្ញុំឈឺ ខ្ញុំទៅរកពេទ្យ ប៉ុន្តែបើពេទ្យវ៉ៃថ្នាំឱ្យខ្ញុំអត់ច្បាស់ ខ្ញុំមានជឿពីណាទៀត ខ្ញុំជឿតែពេទ្យ។ កន្លែងខ្លះចង់ឱ្យឆាប់បាត់ជាពេក ស្រាប់តែវ៉ៃអាខ្លាំង អាហ្នឹងសូមឱ្យប្រយ័ត្ន»។
ទាក់ទងនឹងការលើកឡើងរបស់លោក ហ៊ុន ម៉ាណែត នេះ ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី ជឿជាក់ថា ករណីគ្រូពេទ្យដែលខ្វះជំនាញពិតប្រាកដ ប៉ុន្តែបើកគ្លីនិកទទួលព្យាបាលអ្នកជំងឺ និងគ្រូពេទ្យមួយចំនួនប្រព្រឹត្តផ្ទុយពីក្រមសីលធម៌វិជ្ជាជីវៈ រើសអើងអ្នកជំងឺក្រីក្រនៅតែបន្តកើតមាននៅក្នុងសង្គមកម្ពុជា។
អ្នកជំនាញផ្នែកវេជ្ជសាស្ត្ររូបនេះសង្កត់ធ្ងន់ថា ការប្រកបវិជ្ជាជីវៈជាគ្រូពេទ្យ មិនមែនគ្រាន់តែរៀនសូត្រចំណេះជំនាញ និងទទួលសញ្ញាបត្រពីសាលាប៉ុណ្ណោះទេ ប៉ុន្តែតម្រូវឱ្យអ្នកប្រកបវិជ្ជាជីវៈបន្តដុសខាតសមត្ថភាព បន្តស្រាវជ្រាវ និងធ្វើបច្ចុប្បន្នភាពចំណេះដឹងជាប្រចាំ ជាពិសេសពាក់ព័ន្ធនឹងជំងឺ និងមេរោគថ្មីៗ ដើម្បីធានាថា អាចជួយសង្គ្រោះ និងព្យាបាលអ្នកជំងឺគ្រប់ស្រទាប់វណ្ណៈ ប្រកបដោយគុណភាព និងសុវត្ថិភាព។
លោក អ៊ូច វុទ្ធី៖ «ការណ៍ដែលព្យាបាលអ្នកជំងឺ យើងត្រូវតែយកចំណេះជំនាញរបស់យើងពិតប្រាកដ ទើបអាចព្យាបាលបងប្អូនប្រជាពលរដ្ឋឱ្យគាត់ផុតពីមច្ចុរាជ ផុតពីការស្លាប់។ ហើយមួយទៀត ក្នុងនាមជាគ្រូពេទ្យ ប្រជាពលរដ្ឋទាំងអស់ ទាំងអ្នកមាន អ្នកក្រ អ្នកកំព្រា អ្នកពិការ ខ្ញុំតែងតែលើកជានិច្ច ជាជីវិតមួយដូចខ្ញុំដែរ។ ខ្ញុំមិនគិតថា សាសន៍នេះ សាសន៍នោះទេ ចំពោះពេទ្យទាំងអស់ដូចគ្នា។ អ្នកក្រក៏មានសិទ្ធិរស់ដូចអ្នកមានដែរ អត់មានថា គាត់ក្រ ចូលមកដល់ ហើយយើង យើងដេញគាត់ចេញ យើងអត់មើលគាត់ យើងបណ្ដែតបណ្ដោយឱ្យគាត់ដង្ហើមចុងក្រោយ កន្លែងហ្នឹងហើយ យើងខុសនូវវិជ្ជាជីវៈរបស់យើង»។
ទាក់ទងនឹងបញ្ហាលោក ហ៊ុន ម៉ាណែត និយាយថា រៀនពេទ្យ កុំរៀនឲ្យតែបានសញ្ញាបត្រ ឬរៀនចប់ ដើម្បីទៅបើកគ្លីនិកទាំងគ្មានចំណេះពិតប្រាកដនេះដែរ ប្រធានអង្គការវេទិកាអនាគត លោក អ៊ូ វីរៈ បានបង្ហោះសារលើហ្វេសប៊ុកថា នាយករដ្ឋមន្ត្រី ខុសពីគ្រូជោគជ័យ។ លោក យល់ថា គួរតែចាត់វិធានការច្បាប់ចំពោះសាលារៀនទាំងឡាយ ដែលអនុញ្ញាតឲ្យសិស្សប្រឡងជាប់ដោយគ្មានចំណេះដឹងពិតប្រាកដ។
ទាក់ទងនឹងបញ្ហាគ្រូពេទ្យដែលខ្វះជំនាញវិជ្ជាជីវៈនេះ កាលពីចុងឆ្នាំ២០២៤ កន្លងទៅ ម្ចាស់គ្លីនិក មន្ទីរសម្រាកព្យាបាល និងសម្ភព សុង ហាក់ ម៉ារីណា ត្រូវបានចោទប្រកាន់ថា បានចាក់ថ្នាំបណ្ដាលឱ្យស្ត្រីវ័យ ៤១ឆ្នាំម្នាក់មានប្រតិកម្មធ្ងន់រហូតបាត់បង់ជីវិត។
ក្រោយកើតហេតុ ទើបសមត្ថកិច្ចបានរកឃើញថា ម្ចាស់គ្លីនិក សុង ហាក់ ម៉ារីណា បានបើកអាជីវកម្មឱសថស្ថានដោយគ្មានច្បាប់អនុញ្ញាត។ ជាមួយគ្នានេះ កន្លងមកក៏មានករណីម្ចាស់គ្លីនិកមួយចំនួនផ្សេងទៀតត្រូវបានរិះគន់ថា បានព្យាបាលអ្នកមានជំងឺឈឺស្រាលៗ រហូតធ្វើឱ្យស្ថានភាពជំងឺកាន់តែធ្ងន់ធ្ងរ ហើយអ្នកជំងឺខ្លះថែមទាំងធ្លាក់ខ្លួនពិការ ឬបាត់បង់ជីវិតថែមទៀតផង។
ជុំវិញរឿងនេះ ទីប្រឹក្សាសមាគមគ្រូបង្រៀនកម្ពុជាឯករាជ្យ (CITA) លោក រ៉ុង ឈុន យល់ថា គ្រូពេទ្យដែលគ្មានវិជ្ជាជីវៈ ហើយអាចក្លែងបន្លំសញ្ញាបត្រ ដើម្បីបើកគ្លីនិកប្រកបអាជីវកម្មដោយខុសច្បាប់ គឺបណ្ដាលមកពីបញ្ហាអំពើពុករលួយ។ លោកបន្ត ថា រដ្ឋាភិបាលគួរតែចាត់វិធានការស៊ើបអង្កេតលើបញ្ហានេះ មិនមែនត្រឹមតែចេញសារអំពាវនាវទេ ព្រោះលោកថា គ្រូពេទ្យប្រៀបបីដូចជាអាវុធមុខពីរ ហើយក៏អាចក្លាយជាឃាតកបានដែរ ប្រសិនបើមិនទទួលបានការបណ្ដុះបណ្ដាលចំណេះជំនាញផ្នែកវេជ្ជសាស្ត្រពិតប្រាកដ។
ចំណែកគុណភាពប្រព័ន្ធសុខាភិបាល និងក្រមសីលធម៌របស់ក្រុមគ្រូពេទ្យវិញ លោក រ៉ុង ឈុន វាយតម្លៃថា នៅមានកម្រិត និងគុណភាពទាបនៅឡើយ ដោយសារតែគ្រូពេទ្យមួយចំនួនគ្មានសីលធម៌ និងនៅតែរើសអើងលើអ្នកជំងឺក្រីក្រមកពីជនបទ។
លោក រ៉ុង ឈុន៖ «គ្រូពេទ្យយើងមួយចំនួននៅតាមមណ្ឌលសុខភាព ឬមន្ទីរពេទ្យនានាហ្នឹង និយាយអំពីសុជីវធម៌ សីលធម៌ គឺនៅមានកម្រិត។ ត្រង់ចំណុចហ្នឹង ក៏ត្រូវពង្រឹង យកចិត្តទុកដាក់ដល់អ្នកជំងឺ កុំឱ្យមានការរើសអើង ទោះបីគាត់មកពីស្រែ ពីស្រុក ក្រីក្រយ៉ាងណាក៏ដោយ ត្រូវតែមកដល់ ត្រូវតែទទួលរាក់ទាក់ យកចិត្តទុកដាក់ កុំសម្លឹងមើលឃើញតែលុយ អាហ្នឹងក៏ជាចំណោទបញ្ហានៅក្នុងមណ្ឌលសុខភាព ក៏ដូចជាមន្ទីរពេទ្យដែរ»។
កម្ពុជាក្រោមការដឹកនាំរបស់រដ្ឋាភិបាលឪកូនលោក ហ៊ុន សែន និងលោក ហ៊ុន ម៉ាណែត ជាង ៤០ឆ្នាំ រងការរិះគន់ថា បរាជ័យក្នុងការពង្រឹង និងកែលម្អប្រព័ន្ធសុខាភិបាលប្រកបដោយគុណភាព ដើម្បីឱ្យប្រជាពលរដ្ឋដែលមានជីវភាពក្រីក្រទូទៅទទួលសេវាព្យាបាលទទួលបានភាពកក់ក្ដៅឡើយ។ ជានិច្ចកាលក្រុមគ្រួសាររបស់ត្រកូល ហ៊ុន និងបក្ខពួកដែលជាមន្ត្រីគ្រាក់ៗក៏មិនទុកចិត្តលើប្រព័ន្ធសុខាភិបាលក្រោមការដឹកនាំរបស់រដ្ឋាភិបាលត្រកូល ហ៊ុន ដែរ ហើយជារឿយៗពួកគេតែងតែនាំគ្នាវេចលុយរាប់សិបម៉ឺនដុល្លារ ដើម្បីទៅព្យាបាលជំងឺនៅក្រៅប្រទេស៕
