មេដឹកនាំនៃរបបត្រកូល «ហ៊ុន» រងការរិះគន់ថា ជួយលាក់បាំង និងផ្ដល់ទីជម្រកទឹកដីកម្ពុជាឱ្យអ្នកជំនួញឧក្រិដ្ឋជនតៃវ៉ាន់ (Taiwan) ដែលត្រូវឃាតករបាញ់សម្លាប់នៅខេត្តព្រះសីហនុ។ ការរិះគន់នេះ គឺដោយសារតែបុរសជនជាតិតៃវ៉ាន់រូបនោះគឺជាអ្នកជំនួញដែលពាក់ព័ន្ធនឹងអំពើលាងលុយកខ្វក់ និងបើកបនល្បែងស៊ីសងខុសច្បាប់ និងត្រូវបានតុលាការតៃវ៉ាន់ចេញដីកាចាប់ខ្លួនតាំងពីឆ្នាំ២០២៤ មុនពេលគេត្រូវបាញ់សម្លាប់លើទឹកដីកម្ពុជា។
អ្នកឃ្លាំមើលយល់ថា ករណីបាញ់ប្រហារអ្នកជំនួញតៃវ៉ាន់នៅខេត្តព្រះសីហនុថ្មីៗនេះអាចជា ជម្លោះផ្ទៃក្នុងរវាងបណ្ដាញឧក្រិដ្ឋជនពាក់ព័ន្ធនឹងការលាងលុយកខ្វក់ និងទំនាស់ផលប្រយោជន៍ក្នុងការប្រកួតប្រជែងគ្នាលើអាជីវកម្មខុសច្បាប់ផ្សេងៗដែលកំពុងដំណើរការនៅកម្ពុជា។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី លើកឡើងថា វត្តមានឧក្រិដ្ឋជនឆ្លងដែនដែលមានដីកាចាប់ខ្លួន ប៉ុន្តែអាចចូលមកជ្រកកោន និងបន្តអាជីវកម្មបនល្បែងស៊ីសងនៅកម្ពុជាដោយសេរី ជាពិសេសរហូតឈានដល់មានករណីបាញ់សម្លាប់គ្នានេះបង្ហាញថា កម្ពុជាកំពុងមានវិបត្តិសន្តិសុខជាតិយ៉ាងធ្ងន់ធ្ងរ។ លោកបន្តថា ករណីនេះឆ្លុះបញ្ចាំងថា ប្រព័ន្ធច្បាប់នៅកម្ពុជាគឺត្រូវបានបំផ្លាញដោយឧក្រិដ្ឋជន ដោយសារតែពួកគេបានប្រើប្រាស់ឥទ្ធិពលលុយកខ្វក់ទិញសិទ្ធិជ្រកកោនលើទឹកដីខ្មែរ និងដើម្បីទទួលបានការការពារពីមន្ត្រីជាន់ខ្ពស់មួយចំនួនក្នុងជួររដ្ឋាភិបាល។
លោក សេង វណ្ណលី៖ «នៅពេលដែលឧក្រិដ្ឋជនកម្រិតធ្ងន់អាចជ្រកកោនក្រោមរូបភាពជាវិនិយោគិន ឬមានខ្នងបង្អែករឹងមាំ វាមិនត្រឹមតែជាការបរាជ័យនៃផ្នែកចារកម្ម និងនគរបាលយុត្តិធម៌ប៉ុណ្ណោះទេ ប៉ុន្តែវាគឺជាការដាក់សញ្ញាសួរទៅលើឆន្ទៈនយោបាយពិតប្រាកដរបស់លោក ហ៊ុន ម៉ាណែត សម្អាតផ្ទះខ្លួនឯង។ ស្ថានភាពនេះបានប្រែក្លាយកម្ពុជាឱ្យទៅជាជម្រកប្រកបដោយសុវត្ថិភាពសម្រាប់មេខ្លោងឧក្រិដ្ឋកម្ម ដែលវាមិនមែនជារឿងចៃដន្យឡើយ ប៉ុន្តែវាគឺជាលទ្ធផលនៃប្រព័ន្ធគ្រប់គ្រងដែលផ្ដល់អាទិភាពលើផលប្រយោជន៍សេដ្ឋកិច្ចកខ្វក់ និងបណ្ដាញបក្ខពួកនិយម ជាងការរឹតបន្តឹងយន្តការត្រួតពិនិត្យជនបរទេស និងការអនុវត្តច្បាប់អន្តរជាតិ ជាពិសេសពាក់ព័ន្ធអន្តោប្រវេសន៍»។
ប្រតិកម្មរបស់អ្នកឃ្លាំមើលនេះកើតឡើងបន្ទាប់ពីរឿងរ៉ាវអ្នកជំនួញជនជាតិតៃវ៉ាន់ឈ្មោះ លីន ពីងវិន (Lin Ping Wen) បន្តអាជីវកម្មពាក់ព័ន្ធនឹងសកម្មភាពឧក្រិដ្ឋកម្មលាងលុយកខ្វក់ និងបើកបនល្បែងខុសច្បាប់ ត្រូវបានលាតត្រដាងសាជាថ្មី បន្ទាប់ពីបានរត់គេចខ្លួនពីតៃវ៉ាន់ចូលមកទឹកដីកម្ពុជា។ ភាពល្បីល្បាញនៃរឿងអាស្រូវរបស់លោក លីន ពីងវិន ដែលរកស៊ីបែបឧក្រិដ្ឋកម្មផ្ទុះឡើងវិញនេះនៅក្នុងអំឡុងពេលដែលក្រុមឃាតករជាច្រើននាក់ប្រើកាំភ្លើងបាញ់រះបណ្ដាលឱ្យលោកស្លាប់ភ្លាមៗនៅក្នុងថ្លុកឈាមក្នុងខេត្តព្រះសីហនុ កាលពីថ្ងៃទី២៤ ខែមីនា។
វិទ្យុសហគមន៍អន្តរជាតិតៃប៉ិ (International Community Radio Taipei) រាយការណ៍ថា មុនពេលខ្មាន់កាំភ្លើងបាញ់សម្លាប់នៅលើទឹកដីកម្ពុជាលោក លីន ពីងវិន ត្រូវបានតុលាការតៃវ៉ាន់ចោទប្រកាន់ពាក់ព័ន្ធនឹងអំពើលាងលុយកខ្វក់ និងបើកដំណើរការបនល្បែងស៊ីសងខុសច្បាប់កាលពីឆ្នាំ២០២៣។ ក្រោយមកលោកបានគេចវេះមិនចូលសវនាការនោះទេ និងបានរត់គេចខ្លួនចូលទឹកដីកម្ពុជា ដើម្បីបន្តរកស៊ីលើវិស័យកាស៊ីណូ។ កាលពីឆ្នាំ២០២៤ រដ្ឋអាជ្ញានៃតុលាការតៃវ៉ាន់ក៏បានចេញដីកាចាប់ខ្លួន លោក លីន ពីងវិន និងស្នើឱ្យប៉ូលិសអន្តរជាតិជួយតាមចាប់ខ្លួនថែមទៀតផង។
ប្រព័ន្ធផ្សព្វផ្សាយតៃវ៉ាន់ជាច្រើនបានរាយការណ៍ថា ពេលមកដល់ទឹកដីកម្ពុជា លោក លីន ពីងវិន បានក្លាយជាមេជើងកាងដ៏មានឥទ្ធិពលមួយរូប និងជាតួអង្គស្នូលសំខាន់ម្នាក់នៃក្រុមបណ្ដាញឧក្រិដ្ឋជនដែលធ្វើប្រតិបត្តិការលាងលុយកខ្វក់ និងរកស៊ីលើវិស័យបនល្បែងខុសច្បាប់នៅកម្ពុជា។
ទូរទស្សន៍អាស៊ីសេរីមិនអាចទាក់ទងស្នងការនគរបាលខេត្តព្រះសីហនុ លោក ស រដ្ឋា ដើម្បីសាកសួរបន្ថែមជុំវិញរឿងនេះបានទេនៅថ្ងៃទី២៥ ខែមីនា។
ក្រៅពី លោក លីន ពីងវិន ក៏មានឧក្រិដ្ឋជនចិនមួយចំនួនទៀតដែលបានរត់គេចពីការទទួលទោសនៅប្រទេសចិនមកសម្ងំជ្រកកោនក្បែរលោក ហ៊ុន សែន ព្រមទាំងប្រើប្រាស់លុយរាប់ម៉ឺនដុល្លារទិញសញ្ជាតិខ្មែរពីរដ្ឋាភិបាលត្រកូល ហ៊ុន ដើម្បីបន្តរកស៊ីលើអាជីវកម្មបនល្បែងសងស៊ី និងបង្កើតជាមជ្ឈមណ្ឌលឆបោកតាមអនឡាញនៅលើទឹកដីកម្ពុជា។ ក្នុងនោះរួមមាន ម្ចាស់កាស៊ីណូ ហ្គោលឌិន សាន់ស្កាយ (Golden Sun Sky Casino) លោក តុង លីឆឹង (Dong Lecheng) និងម្ចាស់កាស៊ីណូ ខេ ប៊ី (K.B Casino) នៅខេត្តព្រះសីហនុគឺឧក្រិដ្ឋជន ស៊ូ អៃមីន (Xu Aimin) ជាដើម។ ក្រៅពីឧក្រិដ្ឋជនទាំងនេះ ក៏មានក្រុមឧកញ៉ាគ្រាក់ៗស្និទ្ធនឹងក្រុមគ្រួសារត្រកូល ហ៊ុន មួយចំនួនទៀតរងការចោទប្រកាន់ពាក់ព័ន្ធដោយផ្ទាល់នឹងដំណើរការបើកមជ្ឈមណ្ឌលឆបោកតាមអនឡាញនៅកម្ពុជាផងដែរ។
អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី លើកឡើងថា ប្រសិនបើរដ្ឋាភិបាលលោក ហ៊ុន ម៉ាណែត នៅតែបន្តដឹកនាំបែបធូររលុង និងកាងការពារឧក្រិដ្ឋជននោះសង្គមកម្ពុជានឹងត្រូវបានគ្រប់គ្រងដោយក្រុមម៉ាហ្វីយ៉ា (Mafia)៕
