អង្គការសិទ្ធិមនុស្សលីកាដូបានបង្ហោះសារលើទំព័រហ្វេសប៊ុក (Facebook) នៅថ្ងៃទី៩ ខែមេសា ដោយទាមទារឲ្យរដ្ឋាភិបាលដោះលែងអ្នកការពារសិទ្ធិមនុស្ស និងសកម្មជនការពារបរិស្ថាន៧រូប ដើម្បីឲ្យពួកគេ មានឱកាសជួបជុំគ្រួសារក្នុងពិធីបុណ្យចូលឆ្នាំប្រពៃណីជាតិខ្មែរ។
អ្នកការពារសិទ្ធិមនុស្សទាំង ៧ រូបនោះ រួមមាន លោក កើត សារ៉ាយ និង លោក ធី ថន ប្រធាន និងអនុប្រធាននៃសមាគមសម្ពន្ធនិស្សិតបញ្ញវន្តខ្មែរ (KSILA) និង សកម្មជននៃចលនាមាតាធម្មជាតិចំនួន៥ រូបទៀត រួមមានកញ្ញា ឡុង គន្ធា លោក លី ចាន់ដារ៉ាវុត លោក ថុន រដ្ឋា កញ្ញា ភួន កែវរស្មី និង លោក យីម លាងហ៊ី។
អង្គការសិទ្ធិមនុស្សលីកាដូ រៀបរាប់ថា នៅខណៈដែលប្រជាពលរដ្ឋខ្មែរទាំងក្នុង និងក្រៅប្រទេស កំពុងតែរៀបចំពិធីបុណ្យចូលឆ្នាំថ្មីប្រពៃណីជាតិ និងជួបជុំគ្រួសារយ៉ាងសប្បាយរីករាយ និងមានភាពកក់ក្តៅ អ្នកការពារសិទិ្ធមនុស្ស និងសកម្មជនការពារបរិស្ថាន ចំនួន ៧ រូបនេះ នៅបន្តជាប់ឃុំក្នុងពន្ធនាគារតាមបណ្តាខេត្តនៅទូទាំងប្រទេស ចាកឆ្ងាយពីក្រុមគ្រួសារដ៏កក់ក្តៅរបស់ពួកគេ ។ អង្គការលីកាដូ សង្កត់ធ្ងន់ថា អ្នកការពារសិទិ្ធមនុស្ស និងសកម្មជនការពារបរិស្ថានទាំង ៧ នាក់ ត្រូវបានចាប់ខ្លួន និងចោទប្រកាន់ ដោយសារភាពសកម្មនិយមរបស់ពួកគេ ទៅលើកិច្ចការងារសិទិ្ធមនុស្ស បរិស្ថាន និងធនធានធម្មជាតិនៅក្នុងប្រទេស។
នៅក្នុងឱកាសនៃពិធីបុណ្យចូលឆ្នាំប្រពៃណីជាតិនេះ អង្គការលីកាដូ ក៏ប្រកាសថា នឹងបន្តធ្វើការចេញផ្សាយនូវវីដេអូខ្លីចំនួន ៧ លើបណ្ដាញសង្គម ចាប់ពីថ្ងៃទី១០ ដល់ថ្ងៃទី១៦ ខែមេសា ឆ្នាំ២០២៦ ដោយពិពណ៌នាអំពីអារម្មណ៍របស់សាច់ញាតិដែលមានក្តីសង្ឃឹមថា តុលាការនឹងដោះលែងអ្នកការពារសិទ្ធិមនុស្សទាំង៧រូបនេះ ។ អង្គការលីកាដូ សង្ឃឹមថា តុលាការ នឹងពិចារណាក្នុងការទម្លាក់ចោលបទចោទ និងដោះលែងអ្នកការពារសិទ្ធិមនុស្ស និងសកម្មជនការពារបរិស្ថានទាំង ៧រូប ដោយឥតលក្ខខណ្ឌ ដើម្បីឱ្យពួកគាត់បានជួបជុំក្រុមគ្រួសារក្នុងឱកាសបុណ្យចូលឆ្នាំប្រពៃណីជាតិខាងមុខនេះ និងបន្តភាពសកម្មនិយមក្នុងកិច្ចការពារសិទ្ធិមនុស្ស បរិស្ថាន ធនធានធម្មជាតិដីធ្លីវិញ៕
