សារព័ត៌មានអន្តរជាតិធំៗរាយការណ៍ថា ថៃវាយប្រហារតាមអាកាសលើកម្ពុជា ខណៈយោធាថៃចោទកម្ពុជាវាយប្រហារលើខ្លួនមុន និងសម្លាប់ទាហានថៃ ១នាក់ និងរងរបួស២នាក់។ ប៉ុន្តែ ក្រសួងការពារជាតិកម្ពុជាច្រានចោលការចោទប្រកាន់នេះ និងថា កម្ពុជារក្សាភាពអត់ធ្មត់។
សារព័ត៌មានអន្តរជាតិធំៗមាន ស៊ីអិនអិន (CNN) អេភី (AP) អាល់ ចាហ្សារ៉ា (Al Jazeera) នីគី អេស៊ា (Nikkei Asia) ឆានែល ញូវអេស៊ា (Channel News Asia ) ជាដើម រាយការណ៍ដូចៗគ្នានៅព្រឹកថ្ងៃទី៨ ធ្នូ ថា កងទ័ពអាកាសថៃបានប្រើយន្តហោះចម្បាំងវាយប្រហារតាមអាកាសលើទីតាំងកងកម្លាំងកម្ពុជា។
សារព័ត៌មានស៊ីអិនអិនអះអាងថា ការវាយប្រហារនេះ កំពុងលុបបំបាត់ផែនការសន្តិភាពរវាងកម្ពុជាថៃ ដែលផ្ដួចផ្ដើមដោយប្រធានាធិបតីអាមេរិក ដូណាល់ ត្រាំ (Donald Trump) កាលពីថ្ងៃទី២៦ ខែតុលា។
សារព័ត៌មានដដែលបន្តថា ភាគីទាំងពីរបានចោទប្រកាន់គ្នាទៅវិញទៅមកថា អ្នកជាអ្នកវាយប្រហារមុន។ ភាគីថៃថា ចោទកម្ពុជាថា បានបាញ់សម្លាប់ទាហានថៃ ១នាក់ និងរបួសមួយចំនួន។ ប៉ុន្តែ ក្រសួងការពារជាតិកម្ពុជាបដិសេធការចោទប្រកាន់នេះ និងថា កម្ពុជាបន្តរក្សាភាពអត់ធ្មត់ និងកំពុងអំពាវនាវសហគមន៍អន្តរជាតិជួយអន្តរាគមន៍បញ្ឈប់ឱ្យយោធាវាយប្រហារកម្ពុជា ព្រមទាំងស្នើក្រុមអ្នកសង្កេតការណ៍អាស៊ាន (AOT) ចុះទៅទីតាំង ដើម្បីធ្វើការស្រាវជ្រាវស៊ើបអង្កេត ដើម្បីស្វែងរកការពិត និងធានាឱ្យបាននូវតម្លាភាព យុត្តិធម៌ និងភាពត្រឹមត្រូវ។
