យោធាថៃបានគំរាមបំផ្ទុះស្ពានស្ទឹងមេទឹករបស់កម្ពុជា ដែលមានទីតាំងស្ថិតនៅ ឃុំថ្មដា ស្រុកវាលវែង ខេត្តពោធិ៍សាត់ និងព្រមានឱ្យពលរដ្ឋខ្មែរជម្លៀសចេញ។
បញ្ជាការដ្ឋានការពារព្រំដែនថៃ ប្រចាំខេត្ត ចាន់បុរី (Chanthaburi) និងខេត្តត្រាត (Trat) របស់ថៃ បានចេញសេចក្ដីប្រកាស កាលពីព្រឹក ថ្ងៃទី១០ ខែធ្នូ នេះ ដោយបានព្រមានឱ្យពលរដ្ឋខ្មែរ ដែលរស់នៅក្បែរស្ពានស្ទឹងមេទឹកទាំងអស់ ត្រូវចាកចេញជាបន្ទាន់ ក្នុងរយៈពេលបីម៉ោង និងឆ្ងាយពីទីតាំង ជាង ១គីឡូម៉ែត្រ ដើម្បីបង្ការគ្រោះថ្នាក់ នៅពេលមានការវាយប្រហារ។
យោធាថៃបានចោទថា មូលហេតុនៃការកម្ទេចស្ពានស្ទឹងមេទឹក នេះ គឺដោយសារកងទ័ពខ្មែរ កំពុងប្រើប្រាស់ស្ពាននេះជាផ្លូវសម្រាប់ដឹកជញ្ជូនកាំភ្លើងធំ សម្រាប់វាយប្រហារមកលើកងទ័ពថៃ។
ទូរទស្សន៍អាស៊ីសេរី មិនអាចទាក់ទងអាជ្ញាធរស្រុកវាលវែង ខេត្តពោធិ៍សាត់ ដើម្បីសុំការបញ្ជាក់ពីបច្ចុប្បន្នភាពបានទេ នៅថ្ងៃទី១០ ខែធ្នូ នេះ។
ទោះជាយ៉ាងណា មកដល់ពេលនេះមិនទាន់មានការចុះផ្សាយណាមួយ បង្ហាញអំពីការវាយប្រហាររបស់យោធាថៃ ទៅលើស្ពានស្ទឹងមេទឹក នេះនៅឡើយ។
