ប្រធានព្រឹទ្ធសភា លោក ហ៊ុន សែន អំពាវនាវ ឱ្យអាជ្ញាធរជួយការពារសុវត្ថិភាពពលរដ្ឋថៃដែលរស់នៅកម្ពុជា បើទោះបីជាយោធាថៃវាយប្រហារឈ្លានពាន និងទម្លាក់គ្រាប់បែកមិនរើសគោលដៅលើពលរដ្ឋស៊ីវិលជាច្រើនក្តី។
ការអំពាវនាវរបស់លោក ហ៊ុន សែន នៅរសៀលថ្ងៃទី១៣ ធ្នូ ខណៈយោធាថៃវាយប្រហារចូលទឹកដីកម្ពុជាកាន់តែខ្លាំង និងឃោរឃៅដើម្បីបំផ្លាញហេដ្ឋារចនាសម្ព័ន្ធកម្ពុជាគ្រប់បែបយ៉ាង បន្ទាប់ពីមេដឹកនាំប្រទេសថៃ ប្រកាសប្រយុទ្ធបំផ្លាញកម្ពុជារហូតខ្លួនអស់ចិត្ត និងលែងខ្វល់ខ្វាយការអន្តរាគមន៍ពីមេដឹកនាំអាមេរិក។
លោក ហ៊ុន សែន អះអាងថា វិធានការនេះ ដើម្បីធានាសុវត្ថិភាពប្រជាជនកម្ពុជា និងថៃកុំឲ្យមានគ្រោះថ្នាក់ពេលធ្វើដំណើរពិសេសពេលធ្វើដំណើរឆ្លងកាត់ព្រំដែន។ លោកក៏ស្នើដល់ពលរដ្ឋខ្មែរឱ្យយោគយល់ដល់ពលរដ្ឋថៃ ព្រមទាំងស្នើរដ្ឋាភិបាលជួយការពារសុវត្ថិភាពប្រជាជនថៃដែលកំពុងរស់នៅកម្ពុជា កុំឲ្យពួកគេរងគ្រោះដោយសារគ្រាប់កាំភ្លើង ឬគ្រាប់បែកឬផ្សែងពុលរបស់ថៃ។
គិតត្រឹមរសៀលថ្ងៃទី១៣ ធ្នូ ពលរដ្ឋកម្ពុជា ចំនួន ១១នាក់ហើយបានស្លាប់ និងរងរបួសធ្ងន់ជិត ១០០នាក់ ដោយសារយោធាថៃផ្លោងគ្រាប់ធុនធ្ងន់ និងទម្លាក់ពីយន្តហោះចម្បាំងលើផ្ទះពលរដ្ឋស៊ីវិល និងហេដ្ឋារចនាសម្ព័ន្ធ ផ្ទះសម្បែង វត្តអារាម មន្ទីរពេទ្យ និងសាលារៀន ដោយឃោរឃៅ និងអមនុស្សធម៌៕
