ខណៈទាហានថៃកាន់តែបង្កើនល្បឿនវាយប្រហារមកលើកម្ពុជា ដោយប្រើយន្ដហោះចំបាំងទម្លាក់គ្រាប់បែក អ្នកឃ្លាំមើល និងពលរដ្ឋជំរុញឱ្យលោក ហ៊ុន សែន និងលោក ហ៊ុន ម៉ាណែត ដោះលែងអ្នកទោសមនសិការ និងផ្សះផ្សាជាតិ ដើម្បីប្រមូលកម្លាំងតទល់ការឈ្លានពានរបស់កងទ័ពថៃ។
លោកនាយករដ្ឋមន្ត្រី ហ៊ុន ម៉ាណែត បានសម្ដែងនូវមោទនភាព ដែលបានឃើញនូវកម្លាំងដ៏រឹងមាំនៃមហាសាមគ្គីជាតិខ្មែរ ក្នុងកាលៈទេសៈដែលប្រទេសកម្ពុជា កំពុងជួបប្រទះនឹងការលំបាក ដោយសារការឈ្លានពានពីប្រទេសជិតខាង។ ខណៈលោក ហ៊ុន ម៉ាណែត បង្ហាញមោទនភាពបែបនេះ តុលាការក្រោមឥទ្ធិពលនៃរដ្ឋាភិបាលរបស់លោកកំពុងបន្តឃុំឃាំងអ្នកទោសនយោបាយ និង អ្នកទោសមនសិការ ជិត ១០០នាក់ ដែលធ្វើការដើម្បីការពារធនធានជាតិ យុត្តិធម៌សង្គម និងទឹកដីកម្ពុជា។
ទោះជាយ៉ាងណា អ្នកច្បាប់ និងជាអ្នកវិភាគឯករាជ្យ លោក វ៉ន ចាន់ឡូត បានសរសេរលើទំព័រហ្វេសប៊ុករបស់លោកថា «ពលរដ្ឋខ្មែរគ្រប់ទិសទី បានដាក់ចុះ និន្នាការនយោបាយហើយ នៅឡើយមេដឹកនាំកម្ពុជា បង្ហាញជាសកម្មភាពជាក់ស្ដែងវិញម្ដង តាមរយៈការដោះលែងអ្នកទោសនយោបាយ និងលើកលែងការចោទប្រកាន់ទាំងអស់» ។
រីឯ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងស្រាវជ្រាវ លោកបណ្ឌិត សេក សុជាតិ បានលើកឡើងថា ពលរដ្ឋខ្មែររួបរួមគ្នាហើយ នៅឡើយតែអ្នកនយោបាយខ្មែរប៉ុណ្ណោះ ដែលមិនទាន់អាចបង្រួបបង្រួមជាតិបាន។
លោកបណ្ឌិត សេក សុជាតិ ប្រាប់ទូរទស្សន៍អាស៊ីសេរី នៅថ្ងៃទី១៥ ខែធ្នូ ថា ប្រជាពលរដ្ឋខ្មែរគ្រប់ទិសទី បានបង្កើតវប្បធម៌រួបរួមជាតិ និងធ្វើជាគំរូដល់អ្នកនយោបាយរួចហើយ ដូច្នេះអ្នកនយោបាយគ្រប់និន្នាការទាំងអស់ គួររៀនសូត្រ និងធ្វើតាមរាស្ត្រខ្មែរ ដើម្បីឱ្យខ្មែររឹងមាំ និងអាចរួមដៃគ្នាតស៊ូប្រឆាំង បរទេសឈ្លានពានមកលើកម្ពុជា។
បណ្ឌិត សេក សុជាតិ៖ «មករៀបចំវប្បធម៌បង្រួបបង្រួមជាតិផ្សះផ្សាជាតិមួយដោយឈរលើគោលការជាតិជាធំ រដ្ឋហើយនិងរាស្ត្រ ហើយនឹងសង្គមរបស់យើងជាធំ នៅក្នុងការប្រយុទ្ធប្រឆាំងជាមួយពួកបរទេសឈ្លានពាន ទើបជាវិធីសាស្ត្រល្អ»។
ទូរទស្សន៍អាស៊ីសេរី មិនអាចសុំការអត្ថាធិប្បាយពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេ នៅថ្ងៃទី១៥ ខែធ្នូនេះ។
ចំណែកប្រធានស្ថាប័នរៀបចំដីធ្លី និងជួយពលរដ្ឋក្រីក្រ នៃរដ្ឋាភិបាលកម្ពុជាឯករាជ្យ ២៣តុលា លោក សៅ រ៉ាស៊ី ស្នើឲ្យលោក ហ៊ុន សែន ទម្លាក់ចោលអស្មិមានះបុគ្គល ហើយងាកមកសម្រុះសម្រួលជាមួយខ្មែរអ្នកប្រជាធិបតេយ្យ ទាំងក្នុងនិងក្រៅប្រទេស។ លោកប្រាប់ទូរទស្សន៍អាស៊ីសេរី នៅថ្ងៃទី១៥ ខែធ្នូ ថា ទាល់តែរួមកម្លាំងគ្នា ទើបអាចតតាំងនឹងការឈ្លានពានរបស់បរទេសបាន ហើយបើមិនដូច្នោះទេ បរទេសឈ្លានពានមើលងាយខ្មែរ និងវាយខ្មែរមិនញញើត ដែលធ្វើឲ្យប្រជាពលរដ្ឋខ្មែរវេទនា ប្រទេសជាតិខាតបង់ច្រើន។
លោក សៅ រ៉ាស៊ី៖ «អ៊ីចឹងអំពាវនាវឲ្យរដ្ឋាភិបាល ហ៊ុន សែន ត្រឡប់មកវិញ គិតបក្សមួយជំហ៊ានថយក្រោយ ដើម្បីផលប្រយោជន៍ជាតិ យើងត្រូវរួមកម្លាំងសាមគ្គីគ្នា ជាពិសេសទៅទៀត គឺសុំឲ្យរដ្ឋាភិបាលលោក ហ៊ុន សែន យកគោលការណ៍អន្តរជាតិ យកមកប្រើគឺវិធានការអន្តរជាតិនេះហើយ ជាពិសេសគឺកិច្ចព្រមព្រៀងទីក្រុងប៉ារីស ដើម្បីជាអាវុធដ៏មុតស្រួចការពារទឹកដីកម្ពុជា ក៏ដូចជាការពារអាយុជីវិតប្រជាពលរដ្ឋ»។
អង្គការលីកាដូ ឲ្យដឹងថា រយៈពេលតែ៥ថ្ងៃ ក្នុងសប្ដាហ៍នេះ តុលាការនឹងបើកសវនាការ និង ប្រកាសសាលក្រម លើសំណុំរឿងចំនួន៥ផ្សេងគ្នា ដូចជា ករណីសកម្មជនសង្គម សហជីព ពលរដ្ឋ និងក្ដីក្ដាំប្រធានគណបក្សសង្គ្រោះជាតិ លោក កឹម សុខា។ ថ្ងៃទី១៥ ខែធ្នូ មានសវនាការសាលាឧទ្ធរណ៍ភ្នំពេញ លើសកម្មជនកិច្ចព្រមព្រៀងទីក្រុងប៉ារីស៍ កញ្ញា ភឹង សោភា លោក សាន សិទ្ធ និង លោក ស្រ៊ុន ស្រ៊ន ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ រីឯនៅថ្ងៃទី១៧ ខែធ្នូ ក៏នឹងមានសវនាការតុលាការកំពូល លើសហជីព លោក ម៉ម រិទ្ធី ពីបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងបទ«ធ្វើឱ្យបាត់បង់ជំនឿលើសេចក្តីសម្រេចរបស់តុលាការ» ។
ចំណែកនៅថ្ងៃទី១៨ ខែធ្នូ មានសវនាការសាលាឧទ្ធរណ៍ភ្នំពេញ លើសំណុំរឿងលោក កឹម សុខា ពីបទ«ក្បត់ជាតិ» និង«សន្ទិដ្ឋិភាពជាមួយបរទេស»។ ថ្ងៃទី១៩ ខែធ្នូ សាលាដំបូងរាជធានីភ្នំពេញ ប្រកាសសាលក្រមលើសកម្មជននយោបាយ លោក ឃុន ថងឌី ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ថ្ងៃទី១៩ ខែធ្នូ ដដែលនោះ សាលាដំបូងរាជធានីភ្នំពេញ ប្រកាសសាលក្រមលើអ្នកប្រើប្រាស់បណ្ដាញសង្គម លោក កុល គីម ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»និងបទ »ប្រមាថ» ។
ពលរដ្ឋលោក ឆៃ វិត ប្រាប់ទូរទស្សន៍អាស៊ីសេរី ថា ប្រជាពលរដ្ឋទូទៅ មានការឈឺចាប់ ហើយនៅតែឆ្ងល់ថា ហេតុអ្វីបានជាមេដឹកនាំប្រទេស មិនព្រមដោះលែងអ្នកទោសមនសិការនិងអ្នកទោសនយោបាយ ហើយចាប់ដៃគ្នាជាមួយអ្នកនយោបាយប្រឆាំង និងអ្នកនយោបាយក្រៅប្រទេស ខណៈ ប្រទេសជាតិត្រូវបរទេសឈ្លានពាន? លោកថា វិបត្តិជាតិធំណាស់ ពីព្រោះបន្ថែមលើការឈ្លានពានរបស់បរទេស បញ្ហាសេដ្ឋកិច្ចការងារពលរដ្ឋបំណុលវ័ណ្ឌក និងភាពក្រីក្រ សុទ្ធតែជាបញ្ហាប្រឈម ដែលត្រូវដោះស្រាយជាបន្ទាន់។
លោក ឆៃ វិត៖ «មេដឹកនាំខ្មែរ គួរតែផ្សះផ្សាគ្នា ដោយចាប់ផ្ដើមដោះលែងអ្នកទោសនយោបាយទាំងអស់ ទាំងលោកប្រធាន កឹម សុខា អតីតប្រធានគណបក្សសង្គ្រោះជាតិ ហើយអ្នកទោសនយោបាយជាច្រើនរូបទៀត ដែលកំពុងជាប់ពន្ធនាគារទាំងអយុត្តិធម៌។ ម្យ៉ាងវិញទៀត គួរតែបន្ទន់ឥរិយាបថបង្ហាញទៅអន្តរជាតិទៅ ហើយមានការបង្រួបបង្រួមអ្នកនៅក្រៅប្រទេសដែលពួកគាត់កំពុងឈឺឆ្អាលរឿងប្រទេសជាតិ ចង់ជួយជាតិឲ្យពួកគាត់វិលចូលស្រុកវិញមក ហើយចាប់ដៃគ្នារួបរួមគ្នា កសាងប្រទេសជាតិទប់ទល់ការឈ្លានពានរបស់សៀមនៅពេលនេះ»។
ចំណែកពលរដ្ឋម្នាក់ទៀតគឺលោក មិន ពៅ លើកឡើងនៅថ្ងៃទី១៥ ខែធ្នូ ថា ក្នុង ស្ថានភាពប្រទេសជាតិវឹកវរបែបនេះ រដ្ឋាភិបាលគួរតែដោះលែងអ្នកជាប់ឃុំដោយសារការបញ្ចេញមតិយោបល់ រួមមានអ្នកទោសនយោបាយ និងយុវជនបរិស្ថានជាដើមពីព្រោះ ពួកគាត់បារម្ភពីបញ្ហាជាតិកន្លងមក ទើបពួកគាត់ហ៊ានធ្វើសកម្មភាពទាំងដឹងថា ប្រឈម។ លោកថា ពួកគាត់ជាមនុស្សមានសមត្ថភាពអាចជួយការងារច្រើនថែមទៀតដល់សង្គម។ លោក មិន ពៅ ថា ថៃមិនយល់ពីខ្មែរទៅហើយ ចំណែកខ្មែរគ្នាឯងគួរណាស់តែយល់គ្នាឯង៕
