ក្រុមអ្នកឃ្លាំមើលសង្គមនិងមន្ត្រីបក្សប្រឆាំង អំពាវនាវទៅដល់រដ្ឋាភិបាលលោក ហ៊ុន ម៉ាណែត និងលោក ហ៊ុន សែន បញ្ឈប់ការលាក់បាំងព័ត៌មានទាក់ទងទៅនឹងកងទ័ពកម្ពុជាដែលស្លាប់ និងបាត់ខ្លួន ដើម្បីបង្ហាញការទទួលខុសត្រូវទៅលើគ្រួសារកងទ័ពនិងពលរដ្ឋកម្ពុជា។ ការអំពាវនាវនេះ គឺបន្ទាប់ពីយោធាថៃបញ្ជូនទាហានកម្ពុជាម្នាក់ ដែលក្រុមគ្រួសារគិតថា ពលី និងបានធ្វើបុណ្យតាមប្រពៃណីរួចហើយ មកមាតុភូមិវិញ។
អ្នកនាំពាក្យរដ្ឋាភិបាលកម្ពុជាឯករាជ្យ២៣ តុលា លោក គឹម សុខ លើកឡើងថា រដ្ឋាភិបាលលោកហ៊ុន ម៉ាណែត និងលោក ហ៊ុន សែន បានដឹងយ៉ាងច្បាស់អំពីចំនួនទាហានខ្មែរដែលស្លាប់ របួស និងបាត់ខ្លួន ប៉ុន្តែរដ្ឋាភិបាលឪកូននេះ តែងតែលាក់បាំងព័ត៌មាន។ លោកថា សូម្បីតែទាហានថៃចាប់ខ្លួនទាហានខ្មែរក្នុងសង្គ្រាមឈ្លានពានលើកទី២ក៏រដ្ឋាភិបាលរបស់លោក ហ៊ុន ម៉ាណែត ព្យាយាមលាក់បាំង ហើយទើបតែបញ្ចេញព័ត៌មាននៅពេលភាគីថៃបញ្ជូនទាហានខ្មែរមកវិញ។
លោក គឹម សុខ បន្ថែមទៀតថា នៅក្នុងសង្គ្រាមឈ្លានពានរបស់យោធាថៃលើកទី២ មកលើកម្ពុជានេះគឺប្រាកដណាស់ថា ភាគីថៃចាប់ខ្លួនទាហានខ្មែរ ប៉ុន្តែរដ្ឋាភិបាលលោក ហ៊ុន ម៉ាណែត ព្យាយាមលាក់បាំង។
លោក គឹម សុខ៖ «ការដោះលែងទាហាន១៨នាក់នៅលើកទី១ មានមន្ត្រីធំៗចាំទទួល ពីព្រោះពួកគេមិនអាចលាក់ពលរដ្ឋបាន ប៉ុន្តែការដោះលែងកងទ័ពខ្មែរម្នាក់មកវិញបន្ទាប់ពីសង្គ្រាមលើកទី២នេះ ដោយពុំមានពិធីស្វាគមន៍ធំដុំដូចមុនពីព្រោះរដ្ឋាភិបាលឪកូនបានលាក់ពលរដ្ឋកម្ពុជារួចទៅហើយ ដូច្នេះមិនហ៊ានធ្វើអ្វីធំដុំនោះទេ»។
ការលើកឡើងរបស់លោក គឹម សុខ នេះ ធ្វើឡើងក្រោយពីសារព័ត៌មានក្នុងស្រុកបានចុះផ្សាយថា លោកអនុសេនីយ៍ត្រី គៀត ស៊ីម៉ាក់ នាយរងប៉ុស្តិ៍នគរបាលរដ្ឋបាលគោកកឋិន នៃអធិការដ្ឋាននគរបាលស្រុកថ្មពួក ខេត្តបន្ទាយមានជ័យ ដែលរងរបួសក្នុងសមរភូមិ និងត្រូវបានទាហានថៃចាប់បាន កាលពីថ្ងៃទី២៤ ខែធ្នូ ឆ្នាំ២០២៥ កន្លងទៅ ត្រូវបានយោធាថៃបញ្ជូនមកមាតុភូមិវិញនៅថ្ងៃទី២០ ខែមករា ឆ្នាំ២០២៦ ហើយនៅពេលនេះ គាត់កំពុងសម្រាកព្យាបាលជំងឺនៅមន្ទីរពេទ្យមិត្តភាពកម្ពុជា-ជប៉ុន។
សេចក្តីរាយការណ៍ខាងលើអះអាងថា ក្រុមគ្រួសារបានគិតថា លោក គៀត ស៊ីម៉ាក់ បានពលីហើយ ព្រមទាំងបានធ្វើបុណ្យ តាមប្រពៃណីរួចហើយដែរ ស្រាប់តែនៅរសៀលថ្ងៃទី២០ ខែមករា ឆ្នាំ២០២៦ លោក គៀត ស៊ីម៉ាក់ បានមកដល់ទឹកដីកម្ពុជា វិញ ក្រោយពីបាត់ដំណឹងរយៈពេលជាង ១ខែកន្លងមក ដែលធ្វើឱ្យក្រុមគ្រួសារមានការភ្ញាក់ផ្អើល។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក សឹង សែនករុណា បានលើកឡើងថា ករណីនេះបង្ហាញថា រដ្ឋាភិបាលមិនបានគិតគូរទៅដល់ការស្លាប់រស់របស់កងទ័ពនោះទេ ហើយក៏បញ្ជាក់ថា មេបញ្ជាការកងទ័ពអសមត្ថភាពក្នុងការគ្រប់គ្រងកងទ័ពរបស់ខ្លួន ដែលធ្វើឲ្យកងទ័ពបាក់ទឹកចិត្តផងដែរ។
លោក ស៊ឹង សែនករុណា អំពាវនាវទៅដល់រដ្ឋាភិបាលបញ្ឈប់លាក់បាំងព័ត៌មានទាក់ទងទៅនឹងកងទ័ពពីព្រោះក្រុមគ្រួសាររបស់កងទ័ពទន្ទឹងរង់ចាំផ្លូវសាច់ញាតិរបស់ពួកគេនៅពេលដែលសង្គ្រាមចប់។ លោកថា រដ្ឋាភិបាលត្រូវសហការជាមួយភាគីថៃដើម្បីសួរនាំព័ត៌មានទាក់ទងទៅនឹងកងទ័ពកម្ពុជាដើម្បីឲ្យដឹងច្បាស់ថា តើភាគីថៃចាប់កងទ័ពកម្ពុជាចំនួនប៉ុន្មាននាក់។
លោក ស៊ឹង សែនករុណា៖ «ផ្ទុយទៅវិញយើងសូមថ្កោលទោសផងដែរចំពោះមេដឹកនាំក្នុងវិស័យការពារជាតិ រឺក៏ស្ថាប័នពាក់ព័ន្ធនិងកិច្ចការងារនេះដែលគ្មានការយកចិត្តទុកដាក់ឲ្យមានភាពច្បាស់លាស់ និងពិតប្រាកដ ក្នុងការធានាទៅលើការផ្តល់នូវផលប្រយោជន៍ ការគិតគូរ នូវការការពារអាយុជីវិត និងសុខមាលភាពរបស់កងទ័ពនៅជួរមុខ»។
ទាហានខ្មែរម្នាក់ឈរជើងនៅតំបន់ព្រំដែនខេត្តឧត្តរមានជ័យបានអះអាងប្រាប់ទូរទស្សន៍អាស៊ីសេរីកាលពីពេលថ្មីៗនេះថា កងទ័ពកម្ពុជា ដែលពលីនៅលើសមរភូមិប្រយុទ្ធក្នុងសង្គ្រាមជាមួយថៃ នៅតំបន់ព្រំដែន មានចំនួនយ៉ាងតិច ១៤០នាក់។ ប្រភពដដែលបានអះអាងទៀតថា ចំនួននេះ គឺបានមកពីការស្រង់ទិន្នន័យនៅតាមអង្គភាព និងកងពល ក៏ប៉ុន្តែទិន្នន័យទាំងនេះ ត្រូវបានថ្នាក់លើបិទមិនឱ្យបញ្ចេញជាសាធារណៈនោះឡើយ។ ចំណែករដ្ឋាភិបាលកម្ពុជាក៏មិនទាន់បានបញ្ចេញតួលេខជាផ្លូវការនៅឡើយនោះដែរ។ អ្នកឃ្លាំមើលលើកឡើងថា រដ្ឋាភិបាលគួរបញ្ចេញតួលេខផ្លូវការពីចំនួនយោធាកម្ពុជាដែលបាត់បង់ជីវិត ឬបាត់ខ្លួនដើម្បីកុំឱ្យពលរដ្ឋនៅមានមន្ទិលសង្ស័យ និងជាពិសេសដើម្បីកុំឱ្យក្រុមគ្រួសារបន្តទន្ទឹងរង់ចាំដំណឹងពីកងទ័ពដោយក្តីអស់សង្ឃឹម៕
