គណបក្សប្រឆាំង និងសង្គមស៊ីវិលជំរុញឲ្យរដ្ឋាភិបាលលោក ហ៊ុន ម៉ាណែត ផ្លាស់ប្ដូរចេញនូវសារធាតុកុម្មុយនីស្តផ្ដាច់ការ ក្នុងប្រព័ន្ធដឹកនាំកម្ពុជាសព្វថ្ងៃ ទើបអាចរកប្រយោជន៍សម្រាប់ប្រទេសកម្ពុជា ក្នុងនាមជាសមាជិករបស់ក្រុមប្រឹក្សាសន្តិភាព។ ការលើកឡើងនេះ បន្ទាប់ពីរដ្ឋាភិបាលលោក ហ៊ុន ម៉ាណែត បានប្រកាសចូលជាសមាជិកក្រុមប្រឹក្សាសន្តិភាព ដែលផ្ដួចផ្ដើមបង្កើតឡើងដោយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។
គណបក្សប្រឆាំងនៅក្រៅប្រទេស និងសង្គមស៊ីវិល លើកឡើងថា ប្រទេសកម្ពុជានៅក្រោមការដឹកនាំរបស់លោក ហ៊ុន ម៉ាណែត នឹងរងការសើចចំអកនៅពេលប្រកាសចូលរួមក្រុមប្រឹក្សាសន្តិភាពដឹកនាំដោយសហរដ្ឋអាមេរិក ខណៈកម្ពុជាកំពុងចាក់ស្រេះដោយវិបត្តិនយោបាយ និងបញ្ហាអយុត្តិធម៌ផ្ទៃក្នុងជាច្រើនដោះស្រាយមិនទាន់បាន។
មន្ត្រីជាន់ខ្ពស់ទទួលបន្ទុកកិច្ចការសម្របសម្រួលរដ្ឋាភិបាលកម្ពុជាឯករាជ្យ២៣តុលា លោក ម៉ែន សុថាវរិន្ទ្រ ប្រាប់ទូរទស្សន៍អាស៊ីសេរី នៅថ្ងៃទី២៧ ខែមករាថា បើលោក ហ៊ុន ម៉ាណែត ចង់ធ្វើការជាមួយសហរដ្ឋអាមេរិក ក្នុងក្រុមប្រឹក្សាសន្តិភាព ដើម្បីទាញប្រយោជន៍ឲ្យប្រទេសកម្ពុជា លោក ហ៊ុន ម៉ាណែត ត្រូវដូរសារធាតុកុម្មុយនីស្តចេញពីប្រព័ន្ធដឹកនាំរដ្ឋជាមុនសិន។ លោកថា ការរក្សាសារធាតុកុម្មុយនីស្តផ្ដាច់ការពីឪពុក ដើម្បីបន្តអំណាចដូចសព្វថ្ងៃ មិនអាចធ្វើឲ្យសហរដ្ឋអាមេរិក ជឿជាក់លើរដ្ឋាភិបាលលោក ហ៊ុន ម៉ាណែត ឡើយ។
លោក ម៉ែន សុថាវរិន្ទ្រ ថា ដើម្បីបង្ហាញឲ្យជាក់ស្ដែងថា រដ្ឋាភិបាលលោក ហ៊ុន ម៉ាណែត ចូលរួមក្នុងក្រុមប្រឹក្សាសន្តិភាព មានគោលដៅនាំយកសន្តិភាពឲ្យកម្ពុជានោះ លោក ហ៊ុន ម៉ាណែត ត្រូវហ៊ានកម្ចាត់ក្រុមមេបណ្ដាញឧក្រិដ្ឋកម្មឆ្លងដែន យកទៅផ្ដន្ទាទោស ដោយគ្មានការលើកលែង ពីព្រោះឧក្រិដ្ឋកម្មឆ្លងដែន ការជួញដូរមនុស្ស និងការឆបោកតាមអនឡាញជាដើម គឺជាប្រភពធំមួយនៃការបំផ្លាញសន្តិភាព។
ក្រៅពីនោះ លោកថា លោក ហ៊ុន ម៉ាណែត ត្រូវកែប្រព័ន្ធដឹកនាំឡើងវិញដោយត្រូវធានានូវយុត្តិធម៌សង្គម ការគោរពសិទ្ធិមនុស្ស និង ការស្ដារលទ្ធិប្រជាធិបតេយ្យ ដោយចាប់ផ្ដើមដោះលែងអ្នកទោសនយោបាយ និងអ្នកទោសមនសិការទាំងអស់។
លោក ម៉ែន សុថាវរិន្ទ្រ៖ «ដើម្បីឲ្យគេជឿងបាន ទាល់តែគាត់ប្ដូរឥរិយាបថ ត្រូវតែដោះលែងអ្នកទោសនយោបាយទាំងអស់ ហើយអ្នកទោសននយោបាយនៅស្រុក ខ្មែរថា ១ រយនាក់ចុះហើយនឹងអ្នកទោសអីផ្សេងទៀត រឿងដីធ្លីប្រហែលថា ៥រយ ចុះ យើងមើលប្រទេសភូមា គេដោះលែង ៦ពាន់នាក់ ហើយនៅខាងវេណេហ្ស៊ុយអេឡា គេដោះលែងទាំងអស់។ លោក ម៉ាណែត ដើម្បីធ្វើអ៊ីចឹងបាន ទាល់តែគាត់ ដោះលែង បង្ហាញគេឲ្យគេមានជំនឿទៅហើយកម្ចាត់ឧក្រិដ្ឋកម្មអនឡាញទាំងអស់ ទៅ អាហ្នឹងគេអាចជឿបានហើយ។ ប្រជាពលរដ្ឋនឹងសាទរទាំងអស់គ្នា បើអាចធ្វើ អ៊ីចឹងបានគឺល្អមែនទែន បើមិនអ៊ីចឹងទេគឺ គ្រាន់តែកុហក»។
ការលើកឡើងនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែត នៅថ្ងៃទី២៧ ខែមករា បានអះអាងថា កម្ពុជាសម្រេចចូលរួមជាសមាជិកស្ថាបនិកនៃក្រុមប្រឹក្សាសន្តិភាព (The Board of Peace) តាមការអញ្ជើញរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald J. Trump) កាលពីថ្ងៃទី១៦ ខែមករា ។ លោកថា ការចូលរួមនេះ គឺដើម្បីបង្ហាញពីឆន្ទៈរបស់កម្ពុជា ក្នុងការគាំទ្រ និងរួមចំណែកដល់ការលើកកម្ពស់ការរក្សាសន្តិភាពសកល។
លោក ហ៊ុន ម៉ាណែត សរសេរនៅលើហ្វេសប៊ុករបស់លោកថា សុច្ឆន្ទៈស្រឡាញ់សន្តិភាព ការគាំទ្រ និងរួមចំណែកដល់ការកសាងនិងរក្សាសន្តិភាព គឺជាគោលការណ៍ដែលកម្ពុជាតែងតែប្រកាន់ខ្ជាប់ជារៀងរហូតមក ជាពិសេសតាមរយៈការបញ្ជូនកងកម្លាំងរក្សាសន្តិភាព ក្រោមឆត្រអង្គការសហប្រជាជាតិ ទៅបំពេញបេសកកម្មនៅតាមបណ្តាប្រទេសមួយចំនួន ដែលរងគ្រោះដោយសារសង្គ្រាម។
ចំពោះកាតព្វកិច្ចហិរញ្ញវត្ថុរបស់កម្ពុជា ក្នុងការចូលរួមក្នុងក្រុមប្រឹក្សាសន្តិភាពនេះ វិញ លោក ហ៊ុន ម៉ាណែត បញ្ជាក់ថា ការចូលរួមជាសមាជិកស្ថាបនិកនៃក្រុមប្រឹក្សាសន្តិភាព សម្រាប់អាណត្តិ៣ឆ្នាំ មិនតម្រូវឱ្យបង់ថវិកាទេ រីឯការបង់ថវិកា ១ពាន់លានដុល្លារអាមេរិកនោះ គឺសម្រាប់ករណីចូលជាសមាជិករយៈពេលវែង (អចិន្ត្រៃយ៍)តែប៉ុណ្ណោះ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ប្រាប់ទូរទស្សន៍ អាស៊ីសេរីនៅថ្ងៃទី២៧ ខែមករាថា ការចូលជាសមាជិកក្រុម ប្រឹក្សាសន្តិភាព មានផលវិជ្ជមានខ្លះ និងក៏មានបញ្ហាប្រឈមសម្រាប់កម្ពុជានៅថ្ងៃអនាគតដែរ។ លោកថា ផលវិជ្ជមាន គឺក្រុមប្រឹក្សាសន្តិភាពនេះ ដែលមានឥទ្ធិពលរបស់សហរដ្ឋអាមេរិក អាចចូលរួមថែរក្សាសន្តិភាពនៅក្នុងតំបន់ ជាពិសេស ខណៈប្រទេសកម្ពុជា កំពុងតែរងការឈ្លានពានរបស់ភាគីថៃ ។ លោកថា គឺជារឿងល្អ ប្រសិនបើរដ្ឋាភិបាលព្យាយាមរកជំនួយពីក្រុមប្រឹក្សាសន្តិភាពនេះ ដើម្បីរកដំណោះស្រាយវិបត្តិថៃឈ្លានពានកម្ពុជា។
យ៉ាងណា លោក នី សុខា លើកឡើងថា កម្ពុជាប្រឈមនឹងការលំបាកមួយចំនួន ដែលជាឧបសគ្គក្នុងការទាញយកប្រយោជន៍ពីក្រុមប្រឹក្សាសន្តិភាព ដូចជា ចំណងមិត្តភាពដែកថែបកម្ពុជា-ចិន នៅចំកាលៈទេសៈដែលប្រទេសចិន និងសហរដ្ឋអាមេរិក មិនសូវស៊ីសង្វាក់គ្នា លើបញ្ហាកោះតៃវ៉ាន់ និងតំបន់សមុទ្រចិនខាងត្បូង។ លោកថា ទោះបីជាសហរដ្ឋអាមេរិកក្រោមការដឹកនាំរបស់លោក ដូណាល់ ត្រាំ មានការរិះគន់ខ្លះពីការប្រើកណ្ដាប់ដៃក្នុងការដោះស្រាយបញ្ហាខ្លះប៉ុន្តែ មហាអំណាចទី១នៃពិភពលោកនេះ មិនបោះបង់វប្បធម៌ការពារសិទ្ធិមនុស្ស និងលទ្ធិប្រជាធិបតេយ្យឡើយ ដូច្នេះលោកថា រដ្ឋាភិបាលលោក ហ៊ុន ម៉ាណែត ត្រូវសម្រួលបញ្ហាសិទ្ធិមនុស្ស និង លទ្ធិប្រជាធិបតេយ្យ ឲ្យប្រសើរឡើង បើចង់បានមុខមាត់នៅក្នុងក្រុមប្រឹក្សាសន្តិភាព។
លោក នី សុខា៖ «ប្រសិនបើយើង នៅតែមានការរំលោភសិទ្ធិមនុស្ស ហើយយើងចូលទៅក្រុមប្រឹក្សាសន្តិភាព ហាក់បីដូចយើងមិនសក្ដិសមដែរ ប៉ុន្តែបើយើងកែ សម្រួល បើយើងមានតួនាទី មានមុខមានមាត់នៅក្នុងសមាជិកក្រុមប្រឹក្សាសន្តិភាព ហើយដូច្នេះ យើងគប្បីធ្វើឲ្យប្រទេសយើងទទួលបាននូវសុខសន្តិភាពឲ្យបានពេញលេញដែរ។ យើងដឹងកន្លងមក ធ្វើម៉េចឲ្យកម្ពុជាយើង ដោះស្រាយបញ្ហានៃការលើកកម្ពស់សិទ្ធិមនុស្ស និងប្រជាធិបតេយ្យ»។
អ្នកឃ្លាំមើលលើកឡើងថា អនាគតនៃក្រុមប្រឹក្សាសន្តិភាពនេះ មិនទាន់ច្បាស់លាស់នៅឡើយទេ និង ស្ថិតក្នុងភាពចម្រូងចម្រាស បើទោះបីជាលោកប្រធានាធិបតី ដូណាល់ ត្រាំ អះអាងពីសក្ដានុពលរបស់វាក៏ដោយ។ ពួកគាត់កត់សម្គាល់ថា ក្រុមមេដឹកនាំអឺរ៉ុបដែលមានឥទ្ធិពល ហាក់ដូចជាចាត់ទុកក្រុមប្រឹក្សានេះ ជាស្ថាប័នធ្វើឲ្យយន្តការអង្គការសហប្រជាជាតិកាន់តែខ្សោយ ហើយសណ្ដាប់ធ្នាប់ពិភពលោក កាន់តែអន់ថយទៅវិញ។ ចំណែក រដ្ឋាភិបាលលោក ហ៊ុន ម៉ាណែត ដែលសម្រេចចិត្តដាក់ឈ្មោះកម្ពុជាឲ្យចូលជាសមាជិក គឺគ្រាន់តែដើម្បីបង្កើតព្រឹត្តិការណ៍ថ្មី ក្នុងគោលដៅសម្រាលការរិះគន់លើវិបត្តិឧក្រិដ្ឋកម្មឆ្លងដែន និង អសមត្ថភាពការពារទឹកដីកម្ពុជា ពីការឈ្លានពានរបស់ថៃប៉ុណ្ណោះ៕
