អង្គការលីកាដូបានផ្សព្វផ្សាយព័ត៌មានថា នាយករងសាលាម្នាក់ និងចុងភៅម្ហូបការម្នាក់ ត្រូវបានតុលាការផ្ដន្ទាទោសឲ្យជាប់ពន្ធនាគារចន្លោះ១ ឆ្នាំ ដល់ ២ ឆ្នាំ ពីបទ«ញុះញង់»ជុំវិញការចែករំលែកព័ត៌មាន និងរិះគន់ពីបញ្ហាព្រំដែន ។ សង្គមស៊ីវិល និងអ្នកនយោបាយ យល់ថា ការកាត់ទោសអ្នកបញ្ចេញមតិ រឿងព្រំដែន និងបញ្ហាសង្គមនេះ នឹងធ្វើឲ្យរដ្ឋាភិបាលរងការរិះគន់បន្ថែមទៀត ខណៈពលរដ្ឋមានសិទ្ធិបញ្ចេញមតិ និងឈឺឆ្អាលពីបញ្ហាបូរណភាពទឹកដី ធានាដោយរដ្ឋធម្មនុញ្ញ និងច្បាប់អន្តរជាតិ។
រដ្ឋាភិបាលលោក ហ៊ុន ម៉ាណែត នៅតែបន្តប្រើប្រាស់ប្រព័ន្ធតុលាការ ដើម្បីចាប់ខ្លួន ចោទប្រកាន់ និងកាត់ទោសអ្នកបញ្ចេញមតិរិះគន់រដ្ឋាភិបាលរបស់លោក ពាក់ព័ន្ធនឹងបញ្ហាជម្លោះព្រំដែនបន្តបន្ទាប់។
សាលាដំបូងរាជធានីភ្នំពេញ នៅថ្ងៃទី១១ ខែមិថុនា បានផ្ដន្ទាទោសនាយករងសាលាបឋមសិក្សាមួយគឺ លោក ម៉ា ចន្ទតារា ឲ្យជាប់ពន្ធនាគាររយៈពេល ២ឆ្នាំ និងពិន័យជាប្រាក់ចំនួន ២ លានរៀលឬប្រមាណ ៥០០ ដុល្លារពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ«ប្រមាថ» ពាក់ព័ន្ធនឹងការបញ្ចេញមតិរឿងព្រំដែន។
អង្គការលីកាដូបានចេញផ្សាយនូវអត្ថបទខ្លីនៅថ្ងៃទី១២ ខែមិថុនានេះ ថា នាយករងសាលាបឋមសិក្សារូបនេះ ត្រូវបានសមត្ថកិច្ចចាប់ខ្លួនភ្លាមៗ នៅថ្ងៃទី១៩ ខែកុម្ភៈ ឆ្នាំ២០២៦ នៅផ្ទះរបស់លោកក្នុងឃុំពួក ស្រុកពួក ខេត្តសៀមរាប ក្រោយលោក ចែករំលែក និងបង្ហោះសាររិះគន់លើបញ្ហាព្រំដែនកម្ពុជា-ថៃ និងការចាប់ខ្លួន អ្នកសារព័ត៌មានអនឡាញម្នាក់ដែលលើកឡើងពីបញ្ហាកង្វះទឹកចំពោះទាហានកម្ពុជានៅលើបណ្តាញសង្គមហ្វេសប៊ុករបស់លោក។
លោក ម៉ា ចន្ទតារា តែងតែសកម្ម ក្នុងការចែករំលែកព័ត៌មាន និងបញ្ចេញមតិនៅ លើបណ្ដាញសង្គមហ្វេសប៊ុករបស់លោក ពាក់ព័ន្ធនឹងបញ្ហាសង្គមនិង រឿងជម្លោះ ព្រំដែន។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត លើកឡើងថា អំឡុងពេលមានជម្លោះព្រំដែនកម្ពុជា-ថៃនេះ លោក ម៉ា ចន្ទតារា បានបង្ហោះសាររិះគន់ផ្សេងនៅ លើបណ្ដាញសង្គមរបស់ លោក ខណៈលោកស្ថិតនៅក្នុងចំណោមមនុស្ស ១០៩ នាក់ ដែលត្រូវបានចាប់ខ្លួន ចោទប្រកាន់ និងផ្ដន្ទាទោស។
លោក អំ សំអាត៖ «លោក ម៉ា ចន្ទតារា ស្ថិតនៅក្នុងចំណោមមនុស្ស ១០៩ នាក់ ដែលត្រូវបានចាប់ខ្លួន ឃុំខ្លួន ឬក៏មានការផ្ដន្ទាទោសទាក់ទងនឹងការលើកឡើង និងការរិះគន់ពីបញ្ហាជម្លោះព្រំដែន និងរិះគន់បញ្ហាផ្សេងៗទៀតនៅក្នុងសង្គម»។
ក្រៅពីនាយករងបឋមសិក្សានៅខេត្តសៀមរាបនោះ តុលាការក្រុងភ្នំពេញ កាលពី ថ្ងៃទី ២៩ ខែឧសភា បានផ្ដន្ទាទោស ចុងភៅម្ហូបការ និងជា អ្នកបញ្ចេញមតិតាម បណ្ដាញសង្គម លោក គង់ សុភាព ឲ្យជាប់ពន្ធនាគារ ១ ឆ្នាំកន្លះ និងពិន័យជាប្រាក់ ២ លានរៀលឬប្រមាណ ៥០០ ដុល្លារពីបទ «ញុះញង់បង្កឲ្យមាន ភាពវឹកវរធ្ងន់ធ្ងរដល់សន្តិសុខសង្គម» ពាក់ព័ន្ធនឹងការចែករំលែកមតិរិះគន់នៅលើគណនីហ្វេសប៊ុករបស់លោក ជុំវិញបញ្ហាជម្លោះព្រំដែនកម្ពុជា-ថៃដែរ។
អង្គការលីកាដូបានចេញផ្សាយនូវអត្ថបទខ្លីនៅថ្ងៃទី១១ ខែមិថុនា ឲ្យដឹងថា លោក គង់ សុភាព ត្រូវបានសមត្ថកិច្ចចាប់ខ្លួន កាលពីថ្ងៃទី២៣ ខែកុម្ភៈ ឆ្នាំ២០២៦ ដោយក្រុមគ្រួសាររបស់លោក ពុំដឹងពីការចាប់ខ្លួនរបស់លោកនោះទេ រហូតដល់ លោកត្រូវបានបញ្ជូនទៅឃុំខ្លួននៅពន្ធនាគារនៅថ្ងៃបន្ទាប់។
អ្នកសិក្សាសង្គមនយោបាយ និងជាអ្នកនាំពាក្យគណបក្សប្រជាធិបតេយ្យជឿន លឿន លោក ប៉ោ មករា យល់ថា បញ្ហាព្រំដែន នៅតែជារឿងរសើបសម្រាប់ពលរដ្ឋ នៅក្នុងបញ្ចេញមតិ បើទោះបីជា ជារឿងព្រំដែន ក៏ផ្នែកមួយដែលប្រជាពលរដ្ឋ មាន សិទ្ធិក្នុងការចូលរួមដឹងឮពីព្រោះពាក់ព័ន្ធនឹងបូរណភាពទឹកដីរបស់ប្រទេសជាតិ។
លោកប្រាប់ទូរទស្សន៍អាស៊ីសេរីនៅថ្ងៃទី១២ ខែមិថុនា ថា រដ្ឋាភិបាល គួរបែងចែកឲ្យច្បាស់ថា ព័ត៌មានព្រំដែនកម្រិតណា ដែលពលរដ្ឋអាចនិយាយបាន និងព័ត៌មានបែបណា ដែលធ្វើឲ្យប៉ះពាល់ដល់សន្តិសុខជាតិ ហើយពលរដ្ឋមិនអាចនិយាយ ឬចែករំលែកបាននោះ។
លោក ប៉ោ មករា ទទូចឲ្យរដ្ឋាភិបាលបើកលំហសេរីភាពដល់ពលរដ្ឋក្នុងការជជែក បញ្ហាពាក់ព័ន្ធនឹងរឿងព្រំដែន ដែលបង្ហាញពីសាមគ្គីភាពរបស់ប្រជាពលរដ្ឋខ្មែរផង និងអាចបង្ហាញពីការបើកលំហលទ្ធិប្រជាធិបតេយ្យផងដែរ។
លោក ប៉ោ មករា៖ «យើងដឹងហើយ ក្នុងរយៈពេលចុងក្រោយនេះ កម្ពុជាហាក់បីដូច ជារងការរិះគន់ ពាក់ព័ន្ធទៅនឹងបញ្ហាសិទ្ធិសេរីភាព លំហលទ្ធិប្រជាធិបតេយ្យ។ អ៊ីចឹងបើសិនជារដ្ឋាភិបាលគាត់បើកលំហផ្នែកហ្នឹង ឲ្យពលរដ្ឋចូលយ៉ាងសកម្ម ឲ្យ ពលរដ្ឋចូលរួមដោយមិនមានការភ័យខ្លាច បញ្ចេញមតិដោយមិនមានការភ័យខ្លាច។ ខ្ញុំគិតថា វាជាការភ្ជាប់រដ្ឋាភិបាលទៅនឹងពិភពលោក ពិសេសគឺបណ្ដាល ប្រទេសសេរីមួយចំនួន ដើម្បីឲ្យមាននយោបាយការទូតមួយភ្ជាប់ជាមួយនឹងប្រទេសមហា អំណាចដែរ ដែលជាបង្អែករបស់កម្ពុជា នៅក្នុងការចរចាពាក់ព័ន្ធនឹងជម្លោះព្រំដែន កម្ពុជា-ថៃហ្នឹងតែម្ដង ព្រោះយើងដឹងថា អ្វីដែលជាបង្អែកដ៏របស់ កម្ពុជា ពាក់ព័ន្ធទៅនឹងជម្លោះហ្នឹង គឺយើងពឹងទៅលើនយោបាយការទូត យើងពឹង ទៅលើឆាកអន្តរជាតិ យើងពឹងទៅលើប្រព័ន្ធច្បាប់»។
អ្នកឃ្លាំមើលលើកឡើងពីការសង្ស័យលើភាពមិនស្មោះត្រង់របស់រដ្ឋាភិបាលគ្រួសារត្រកូលហ៊ុន ទាក់ទងបញ្ហាការពារបូរណភាពទឹកដីកម្ពុជា ពីព្រោះ មកដល់ ពេល នេះកម្លាំងយោធាថៃកំពុងត្រួតត្រាទឹកដីកម្ពុជាជាច្រើនតំបន់តូចធំ នៅតាមព្រំដែន ប៉ុន្តែ រដ្ឋាភិបាលលោក ហ៊ុន ម៉ាណែត មិនព្រមប្រើកិច្ចព្រមព្រៀងសន្តិភាពទី ក្រុងប៉ារីស ហើយក៏មិនប្ដឹងថៃទៅតុលាការអន្តរជាតិ ដើម្បីដោះស្រាយបញ្ហាឡើយ។ ជាការឆ្លើយតប អាជ្ញាធរនៃរដ្ឋាភិបាលលោក ហ៊ុន ម៉ាណែត បែរជាចាំតាម ដានឃ្លាំមើលធ្វើបាបពលរដ្ឋខ្មែរ ដែលឈឺឆ្អាលនឹងបញ្ហាទឹកដីទៅវិញ៕
