បក្សប្រឆាំង និងអ្នកឃ្លាំមើលលើកឡើងថា មេដឹកនាំកម្ពុជា គួរពិចារណាឡើងវិញពីទំនាក់ទំនងរវាងកម្ពុជា-វៀតណាម ដោយថា ប្រទេសកម្ពុជានឹងបាត់បង់ទឹកដីបន្ថែមទៀត បើនៅបន្តពឹងវៀតណាមឲ្យជួយ ប៉ុន្តែមិនងាកមកផ្សះផ្សា បង្រួបបង្រួមជាតិ និងធ្វើទំនើបកម្មកម្លាំងយោធាការពារជាតិដោយខ្លួនឯង។
ការលើកឡើងនេះ បន្ទាប់ពីអគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តវៀតណាម លោក តូ ឡឹម បានហៅដំណើរទស្សនកិច្ចរបស់អនុប្រធានគណបក្សប្រជាជនកម្ពុជា អ្នកស្រី ម៉ែន សំអន ទៅវៀតណាមថ្មីៗនេះ ថា ជាការបង្ហាញយ៉ាងច្បាស់ នូវមិត្តភាពប្រពៃណីនៃសាមគ្គីភាពរវាងគណបក្សកាន់អំណាចទាំងពីរ។
បក្សប្រឆាំង និងអ្នកឃ្លាំមើលអះអាងថា វៀតណាមគិតតែពីផលប្រយោជន៍របស់ខ្លួនប៉ុណ្ណោះ ដោយពួកគេកត់សម្គាល់ថា ពេលថៃឈ្លានពានទឹកដីកម្ពុជា វៀតណាមមិនបានចេញលិខិតថ្កោលទោសថៃឡើយ ហើយវៀតណាមថែមទាំងបង្កើនកិច្ចសហប្រតិបត្តិការយោធាជាមួយថៃ បន្លាចកម្ពុជាថែមទៀត។
ប្រមុខដឹកនាំស្ថាប័នអធិបតេយ្យជាតិ ព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន លើកឡើងថា ទំនាក់ទំនងល្អរវាងគណបក្សប្រជាជនកម្ពុជា និង បក្សកុម្មុយនីស្តវៀតណាម គឺជាយុទ្ធវិធីហុតទឹកសំឡឹងកាករបស់វៀតណាមតែប៉ុណ្ណោះ។ លោកថា ពេលវៀតណាមប្រើកងទ័ពឈ្លានពានកម្ពុជានៅឆ្នាំ១៩៧៩ ហើយឃោសនាថា ជួយកម្ពុជានោះ វៀតណាមបានលើកបន្តុបលោក ហ៊ុន សែន ឲ្យដឹកនាំកម្ពុជា ហើយប្រើដៃលោក ហ៊ុន សែន ឲ្យចុះសន្ធិសញ្ញា និង កិច្ចព្រមព្រៀងខុសច្បាប់ជាច្រើន កាលពីដើមទសវត្សទី៨០ រួមទាំងធ្វើសន្ធិសញ្ញាបំពេញបន្ថែមឆ្នាំ២០០៥ ដែលកាត់ទឹកដីកម្ពុជាឲ្យវៀតណាម ទាំងដីគោក ទាំងដែនសមុទ្រ និងកោះត្រល់ជាដើម។
លោក អ៊ុំ សំអាន ប្រាប់ទូរទស្សន៍អាស៊ីសេរី នៅថ្ងៃទី២៨ ខែមករា ថា ប្រសិនបើវៀតណាមធ្វើជាប្រើល្បិចជួយកម្ពុជាម្ដងទៀត នោះប្រាកដណាស់ថា កម្ពុជានឹងអាចបាត់បង់ទឹកដីបន្ថែម នៅពេលបោះបង្គោលព្រំដែនដែលនៅសល់ ១៦ ភាគរយ។ លោកថា វៀតណាមនៅតែចិញ្ចឹមមហិច្ឆតាលេបយកប្រទេសកម្ពុជា ដូចយកកម្ពុជាក្រោមដែរ ខណៈវៀតណាមតែងតែបង្ហូរជនជាតិរបស់ខ្លួនកាន់តែច្រើន ចូលមករស់នៅលើទឹកដីកម្ពុជា ហើយរដ្ឋាភិបាលគ្រួសារត្រកូលហ៊ុន ផ្ដល់ភាពស្របច្បាប់ដល់ជនអន្តោប្រវេសន៍វៀតណាមខុសច្បាប់ទាំងនោះងាយៗ ទោះបីជាក្នុងកាលៈទេសៈដែលថៃកំពុងឈ្លានពានកម្ពុជាក៏ដោយ។
លោក អ៊ុំ សំអាន៖ «ខ្ញុំយល់ថា យល់ល្អមិនបាច់ពឹងវៀតណាមល្អជាង ធ្វើម៉េចពង្រឹង សមត្ថភាពខ្លួនឯង ហើយធ្វើម៉េចពង្រឹងការឯកភាពជាតិ ដោះលែងលោក កឹម សុខា អ្នកទោសនយោបាយទៅ បង្រួបបង្រួមខ្មែរទៅ លុបបំបាត់អំពើពុករលួយទៅ យើងអាចពង្រឹងវិស័យយោធាយើងទៅ។ យើងអាចការពារជាតិយើងបាន ទប់ទល់ ជាមួយថៃបានហើយ ជាជាងពឹងវៀតណាមដែលតែងតែហុតទឹកសំឡឹងកាក វាអាចធ្វើឲ្យប៉ះពាល់ដល់បូរណភាពទឹកដីយើង អាចកាត់ទឹកដីយើងបន្ថែមទៀត ទៅឲ្យវៀតណាម ដើម្បីសងគុណវៀតណាម ហើយវៀតណាមគេនឹងស្នើសុំឲ្យផ្ដល់ សញ្ជាតិ ប័ណ្ណស្នាក់នៅអចិន្ត្រៃយ៍ទៅដល់ជនជាតិវៀតណាមនៅកម្ពុជា ដែលជា មហន្តរាយទៅដល់បូរណភាពទឹកដីយើងដូចការបាត់បង់កម្ពុជាក្រោម»។
ការលើកឡើងនេះ ធ្វើឡើងបន្ទាប់ពីអនុប្រធានគណបក្សប្រជាជនកម្ពុជាអ្នកស្រី ម៉ែន សំអន តំណាងលោក ហ៊ុន សែន កាលពីថ្ងៃទី២៦ ខែមករា បានដឹកនាំគណប្រតិភូគណបក្សប្រជាជនកម្ពុជាទៅបំពេញទស្សនកិច្ចនៅប្រទេសវៀតណាម ដើម្បីអបអរសាទរលោក តូ ឡឹម ដែលត្រូវបានតែងតាំងបន្តតំណែងកំពូល ជាអគ្គលេខាធិការនៃគណៈកម្មាធិការមជ្ឈិមគណបក្សកុម្មុយនីស្តវៀតណាម ក្នុងនីតិកាលទី១៤។
អ្នកស្រី ម៉ែន សំអន សរសេរនៅលើហ្វេសប៊ុកនៅថ្ងៃទី ២៦ ខែមករាថា ក្នុងជំនួបនោះ លោក តូ ឡឹម បានហៅដំណើរទស្សនកិច្ចរបស់អ្នកស្រីទៅវៀតណាម ថាជាការបង្ហាញយ៉ាងច្បាស់នៃមិត្តភាពប្រពៃណី និង សាមគ្គីភាពជិតស្និទ្ធរវាងគណបក្សកាន់អំណាចទាំងពីរ និងប្រទេសទាំងពីរ។
ជុំវិញរឿងនេះ អ្នកជំនាញផ្នែកភូមិសាស្ត្រនយោបាយ លោក សេង វណ្ណលី ប្រាប់ទូរទស្សន៍អាស៊ីសេរីនៅថ្ងៃទី២៨ ខែមករា ថា ដំណើរទស្សនកិច្ចរបស់អ្នកស្រី ម៉ែន សំអន និងឥស្សរជនបក្សប្រជាជនកម្ពុជាទៅវៀតណាម គឺជាប្រពៃណីទៅសម្ដែងការអបអរផង និងបង្ហាញភក្ដីភាពផង នៅចំពោះមុខមេដឹកនាំវៀតណាម ដែលជ្រោមជ្រែងឲ្យគណបក្សប្រជាជនកម្ពុជា ដឹកនាំប្រទេសកម្ពុជា។ យ៉ាងណា លោកថា រដ្ឋាភិបាលក្រុងភ្នំពេញនិងគណបក្សកាន់អំណាចនៅកម្ពុជា គួរតែពិនិត្យឡើងវិញ អំពីទំនាក់ទំនងចាក់ទឹកមិនលិចនេះ ព្រោះឃើញតែភាគីវៀតណាម មានប្រៀបនិងបានផលចំណេញ ដែលប្រជាពលរដ្ឋខ្មែរមិនពេញចិត្តឡើយ។
លោក សេង វណ្ណលី លើកឡើងថា ពេលមេដឹកនាំវៀតណាមមកកម្ពុជាម្ដងៗ ពួកគេតែងតែប្រាប់ភាគីកាន់អំណាច ឲ្យជួយយកចិត្តទុកដាក់ដល់ការរស់នៅរបស់ប្រជាជនវៀតណាម និង អាជីវកម្មវៀតណាម នៅលើទឹកដីកម្ពុជា ដូច្នេះលោកថា ក្នុងកាលៈទេសៈដែលថៃឈ្លានពានប្រទេសកម្ពុជា នោះអ្នកស្រី ម៉ែន សំអន ជាអ្នកតំណាងលោក ហ៊ុន សែន ដែលបានទៅជួបមេដឹកនាំវៀតណាមហើយ គួរតែស្នើឲ្យភាគីវៀតណាមបញ្ចេញសារថ្កោលទោសថៃ និង គាំទ្រឲ្យកម្ពុជាប្ដឹងថៃទៅតុលាការយុត្តិធម៌អន្តរជាតិ (ICJ)។
លោក សេង វណ្ណលី៖ «យើងឃើញថា ទំនាក់ទំនងប្រទេសទាំងពីរ គឺចាក់ទឹកមិនលិច មានភាពស៊ីជម្រៅណាស់ ប៉ុន្តែដោយឡែកនៅពេលដែលកម្ពុជាមានបញ្ហា ជាមួយថៃយើងឃើញថា វៀតណាមហាក់បង្ហាញពីជំហរអព្យាក្រឹត មិនសូវបានបញ្ចេញនៅសារជាលក្ខណៈប្រទេស ថ្កោលទោសទៅលើការឈ្លានពានរបស់ថៃនោះទេ។ យើងឃើញពេលខ្លះ ក្រសួងការបរទេសវៀតណាមបានបញ្ចេញសារ មួយចំនួនក្នុងនាមប្រទេសជាសមាជិកអាស៊ាន ប៉ុន្តែដោយឡែកនៅក្នុងជំហរផ្ទាល់ ជាប្រទេសដែលមានទំនាក់ទំនងជិតដិតជាមួយកម្ពុជាហ្នឹង មិនទាន់បានបង្ហាញ អំពីសេចក្ដីថ្លែងការណ៍ណាមួយ ដែលបង្ហាញសារគាំទ្រដល់រដ្ឋាភិបាល ដែលដឹកនាំ ដោយគណបក្សប្រជាជន ក៏ដូចជាថ្កោលទោសទង្វើឈ្លានពានរបស់ថៃ លើដែនអធិបតេយ្យកម្ពុជានៅឡើយទេ»។
អ្នកឃ្លាំមើលលើកឡើងថា ប្រពៃណីនៃទំនាក់ទំនងគណបក្សប្រជាជនកម្ពុជា និងបក្សកុម្មុយនីស្តវៀតណាម គឺជាប្រពៃណីដែលខ្មែរឈឺចាប់ និងបាត់បង់ទឹកដី។ ពួកគាត់ព្រមានថា កាលណាគណបក្សប្រជាជនកម្ពុជានៅតែបន្តកាន់អំណាចនៅកម្ពុជា លទ្ធផលនៃទំនាក់ទំនងជាប្រពៃណីនេះនឹងធ្វើឲ្យប្រទេសកម្ពុជាកាន់តែខ្សោយដុនដាប ដែលធ្វើឲ្យប្រជាពលរដ្ឋខ្មែរ មានកង្វល់រាល់ថ្ងៃអំពីគ្រោះមហន្តរាយបាត់បង់ប្រទេសកម្ពុជា ទៅក្រោមមហិច្ឆតាហែកដីចែកគ្នារវាងវៀតណាម និងថៃ៕
