តុលាការខេត្តកណ្ដាលចោទប្រកាន់គ្រូបង្រៀនម្នាក់ពីបទញុះញង់ ដោយសារនិយាយរឿងព្រំដែនកម្ពុជាថៃ ដែលរដ្ឋាភិបាលកម្ពុជាកំពុងចាញ់ប្រៀប និងបាត់បង់ទឹកដីជាច្រើនកន្លែង។
អង្គការលីកាដូ (Licadho) ផ្សព្វផ្សាយនៅថ្ងៃទី៤ កុម្ភៈ ថា គ្រូបង្រៀនម្នាក់នៅខេត្តកណ្ដាល គឺលោក នូ ភារម្យ អាយុ ៤៧ឆ្នាំ ត្រូវបានចាប់ខ្លួនកាលពីយប់ថ្ងៃទី២ ខែកុម្ភៈ ឆ្នាំ២០២៦ នៅផ្ទះរបស់លោកក្នុងខេត្ត កណ្តាល បន្ទាប់ពីលោកបានបង្ហោះវីដេអូនៅទំព័រហ្វេសប៊ុករបស់លោក បញ្ចេញមតិជុំវិញករណីនៃជម្លោះព្រំដែនកម្ពុជា-ថៃ។
លោក នូ ភារម្យ ជាគ្រូបង្រៀនសាលាឯកជនមួយក្នុងខេត្តកណ្តាល ។ លោកត្រូវបានបញ្ជូនទៅសាកសួរនៅស្នងការដ្ឋាននគរបាលខេត្តកណ្តាល និងក្រោយមកត្រូវបានបញ្ជូនទៅកាន់សាលាដំបូងខេត្តកណ្តាល ដើម្បីសាកសួរបន្ត។
អង្គការលីកាដូបន្តថា នៅថ្ងៃទី៤ កុម្ភៈ តុលាការសម្រេចចោទប្រកាន់លោក នូ ភារម្យ ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមបញ្ញត្តិមាត្រា ៤៩៤ និង ៤៩៥ នៃក្រមព្រហ្មទណ្ឌ ។ លោក នូ ភារម្យ អាចប្រឈមនឹងជាប់ទោសពន្ធនាគាររហូតដល់ ២ ឆ្នាំ ប្រសិនបើត្រូវបានផ្ដន្ទាទោស ។ បច្ចុប្បន្ននេះ សមត្ថកិច្ចបានឃុំខ្លួន លោក នូ ភារម្យ បណ្ដោះអាសន្ននៅពន្ធនាគារខេត្តកណ្តាល។
យោងតាមរបាយការណ៍អង្គការលីកាដូ មានពលរដ្ឋប្រើប្រាស់បណ្ដាញសង្គម ២៤នាក់ហើយ កំពុងជាប់ឃុំដោយសារតុលាការចោទប្រកាន់ និងផ្ដន្ទាទោសពីបទញុះញង់ បន្ទាប់ពីពួកគេបញ្ចេញមតិរិះគន់ការដឹកនាំបែបផ្ដាច់ការរបស់គណបក្សប្រជាជនកម្ពុជា៕
