ចាងហ្វាងសារព័ត៌មានអនឡាញ Koh Kong Hot News អះអាងថា លោកនឹងចូលបំភ្លឺនៅសប្ដាហ៍ក្រោយនេះ តាមការកោះហៅរបស់ស្នងការដ្ឋាន នគរបាល ខេត្តកោះកុង។ សង្គមស៊ីវិល រំពឹងថា ករណី ចាងហ្វាងសារព័ត៌មានអនឡាញ លោក យួន ឈីវ នឹងត្រូវដោះស្រាយបញ្ចប់ដោយការសម្របសម្រួលគ្នា។
ចាងហ្វាងសារព័ត៌មានអនឡាញ Koh Kong Hot News លោក យួន ឈីវ សង្ឃឹមថា រឿងរ៉ាវនៅខេត្តកោះកុង នឹងត្រូវបញ្ចប់ត្រឹមការសម្របសម្រួល គ្នានៅ ស្នងការដ្ឋានខេត្តនេះ ដូចការសម្របសម្រួលបញ្ចប់ករណីប្តឹងផ្តល់ លោកនៅខេត្តពោធិ៍សាត់ដែរ។
ការអះអាងនេះ ធ្វើឡើងបន្ទាប់ពីស្នងការដ្ឋាននគរបាលខេត្តកោះកុង បានកោះហៅ ចាងហ្វាងសារព័ត៌មានអនឡាញ Koh Kong Hot News លោក យួន ឈីវ ឲ្យចូលបំភ្លឺនៅថ្ងៃទី០២ ខែមេសា ពាក់ព័ន្ធនឹងការផ្សាយព័ត៌មាន ពីភាពមិនប្រក្រតី នៃលំហូរជនជាតិចិន ដែលប្ដឹងដោយរដ្ឋបាលខេត្តកោះកុង។
លោក យួន ឈីវ ប្រាប់ទូរទស្សន៍ អាស៊ីសេរីនៅថ្ងៃទី៣១ ខែមីនា ថា លោកព្រួយបារម្ភ ចំពោះការកោះហៅនេះ ប៉ុន្តែមិនភ័យខ្លាចនោះទេ ពីព្រោះលោកជឿជាក់ថា ការផ្សាយព័ត៌មានរបស់លោក គឺយោងតាមប្រភពច្បាស់លាស់។ លោកសង្ឃឹមថា រ៉ាវរឿងនេះ នឹងត្រូវបញ្ចប់ នៅត្រឹមស្នងការដ្ឋាននគរបាលខេត្តកោះកុង។
លោក យួន ឈីវ៖ «ការសម្របសម្រួលខ្ញុំអាចទទួលយកបាន គឺថាគេ [ស្នងការដ្ឋាន នគរបាល ខេត្តពោធិ៍សាត់] ដោះស្រាយបានសមរម្យល្អដែរ សម្រាប់ខ្ញុំ អ្នកសារព័ត៌មាន។ នៅខេត្តកោះកុង ខ្ញុំសង្ឃឹមថា ស្នងការដ្ឋាននគរបាល ខេត្តកោះកុង នឹងសម្របសម្រួលដោះស្រាយបញ្ចប់វិវាទល្អ ដូចគ្នានៅ ខេត្តពោធិ៍សាត់ អ៊ីចឹង ចំពោះអ្នកសារព័ត៌មានចុះផ្សាយកន្លងមកនេះ»។
ទូរទស្សន៍អាស៊ីសេរី មិនអាចសុំការអត្ថាធិប្បាយ ជុំវិញរឿងនេះពីស្នងការនគរបាលខេត្តកោះកុងលោក គង់ មនោ និងស្នងការរងផែនការងារនគរបាល ព្រហ្មទណ្ឌ លោក ស៊ឹម វ៉ារី បានទេ នៅថ្ងៃទី៣១ ខែមីនា។
ចាងហ្វាងសារព័ត៌មាន Koh Kong Hot News លោក យួន ឈីវ ត្រូវបានស្នងការដ្ឋាននគរបាល ខេត្តពោធិ៍សាត់កោះហៅ ឲ្យចូលបំភ្លឺ នៅថ្ងៃទី៣១ ខែមីនា ពាក់ព័ន្ធនឹងករណី បរិហារកេរ្តិ៍ជាសាធារណតាមបណ្តាលសង្គម ប៉ុន្តែ លោក យួន ឈីវ បញ្ជាក់ថា រឿងរ៉ាវនៅខេត្តពោធិ៍សាត់ លោកបានចូលបំភ្លឺ នៅថ្ងៃទី៣០ខែ មីនារួចហើយ ហើយករណីនេះក៏បានសម្របសម្រួលគ្នាបញ្ចប់នៅត្រឹមស្នងការ។ ចំណែកនៅថ្ងៃទី០២ ខែមេសា លោកត្រូវបានស្នងការដ្ឋាននគរបាលខេត្តកោះកុង កោះហៅឲ្យ ចូលបំភ្លឺ ដំណើររឿងផ្ទាល់ខ្លួន និងបក្ខពួក ដែលប្ដឹងដោយ រដ្ឋបាល ខេត្តកោះកុង។
សមាគមការពារសិទ្ធិមនុស្សអាដហុកឲ្យដឹងថា ការកោះហៅរបស់ស្នងការដ្ឋាន នគរបាលខេត្តទាំងពីរខាងលើនេះ គឺពាក់ព័ន្ធនឹងសេចក្តីរាយការណ៍របស់លោក យួន ឈីវ អំពីជនជាតិចិននៅកម្ពុជា។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារ សិទ្ធិមនុស្សអាដហុក លោក យិន ម៉េងលី ចាត់ទុកការជជែកសម្របសម្រួល បញ្ចប់រឿងរ៉ាវដោយមិនប្ដឹងផ្ដល់បន្តទៀតថា ជារឿងល្អ។ លោកសង្ឃឹមថា ស្នងការដ្ឋាននគរបាលខេត្តកោះកុង នឹងដោះស្រាយបញ្ចប់ ដូចករណីនៅខេត្តពោធិ៍សាត់ដែរ ពីព្រោះការបន្តប្ដឹងអ្នកសារព័ត៌មានទៅតុលាការ មិនបានចំណេញអ្វីទេ ផ្ទុយទៅវិញ គឺមានតែធ្វើឲ្យប៉ះពាល់ដល់អាជ្ញាធរ និងរដ្ឋាភិបាល។
លោក យួន ឈីវ៖ «បញ្ហាទាំងពីរនេះ វាប្រហាក់ប្រហែលគ្នា អ៊ីចឹងយើងសង្ឃឹមថា នៅខាងខេត្តកោះកុង នឹងធ្វើការសម្របសម្រួលបញ្ហាទាំងអស់ហ្នឹង ឲ្យបានដូចគ្នា ដើម្បីបញ្ចប់បញ្ហានឹងទៅ កុំឲ្យបញ្ហាហ្នឹង វានៅបន្តវែងឆ្ងាយទៀត ពាក់ព័ន្ធនឹងភារកិច្ចអ្នកសារព័ត៌មានហ្នឹង។ អ៊ីចឹងការអង្គុយជជែកគ្នា ការយល់គ្នា វាជារឿងល្អ ជៀសវាងការបន្តប្ដឹងផ្ដល់ជាមួយអ្នកសារព័ត៌មាន យើងមើលឃើញថា វាអត់ចំណេញអីទេ ហើយក៏សារព័ត៌មានក៏ជាចំណុចសំខាន់មួយដែរ នៅក្នុងការដល់ ជួយអាជ្ញាធរដូចជា រដ្ឋាភិបាល»។
អង្គការសង្គមស៊ីវិល លើកឡើងថា ចាប់ពីខែមករា ដល់ខែកុម្ភៈ ឆ្នាំ២០២៦ មានអ្នកសារព័ត៌មានយ៉ាងតិចចំនួន ៦នាក់ត្រូវបានអាជ្ញាធរចាប់ខ្លួន ចោទប្រកាន់ និងឃុំខ្លួន ក្រោយពួកគេបានរាយការណ៍ពីជម្លោះព្រំដែនរវាងកម្ពុជា-ថៃ និងបទល្មើស ឆបោកតាមអនឡាញនៅកម្ពុជា៕
