សភាស៊ើបសួរសាលាឧទ្ធរណ៍ភ្នំពេញ បានបដិសេធសំណើសុំនៅក្រៅឃុំ របស់អ្នកសារព័ត៌មានពលរដ្ឋ និងជាអតីតព្រះសង្ឃលោក ជា វុទ្ធី។ ម្ដាយលោក ជា វុទ្ធី រន្ធត់ចិត្ត បន្ទាប់ពីតុលាការនៅតែមិនដោះលែងកូនប្រុស ឲ្យបានជួបម្ដាយ ដែលកំពុងទន្ទឹងចាំមើលផ្លូវកូន។
ម្ដាយរបស់អតីតព្រះភិក្ខុសង្ឃ លោក ជា វុទ្ធី គឺលោកស្រី ចាន់ ម៉ៅ ខកចិត្ត ចំពោះសេចក្ដីសម្រេចរបស់សាលាឧទ្ធរណ៍ភ្នំពេញ ដែលមិនព្រមដោះលែង កូនប្រុស ឲ្យនៅក្រៅឃុំ។ លោកស្រី មានប្រសាសន៍ថា តុលាការកំពុងធ្វើបាបកូនប្រុស និងដាក់សម្ពាធផ្លូវចិត្តលោកស្រីដែលមានវ័យកាន់តែចាស់ជរា និងមានសុខភាពទ្រុឌទ្រោម។
លោកស្រី និយាយផង យំផង ប្រាប់ទូរទស្សន៍អាស៊ីសេរី នៅថ្ងៃទី២៤ ខែមិថុនា នេះថា ជីវិតលោកស្រីពឹងផ្អែកលើកូនប្រុសដោយសារតែបច្ចុប្បន្ន លោកស្រីមានតែពីរនាក់ម្ដាយនិងកូន។ លោកស្រីថា ចាប់តាំងពីកូនជាប់ឃុំនៅក្នុងពន្ធនាគារមក លោកស្រីបាត់បង់សា្មរតី និង វង្វេង ព្រោះតែតក់ស្លុត និងចេះតែគិតស្រណោះអាណិតកូន។
លោកស្រី ចាន់ ម៉ៅ៖ «បើខ្ញុំប្ដូរបាន ខ្ញុំសុខចិត្តដើរទៅចូលគុកខ្លួនឯង ឲ្យតែកូនខ្ញុំរួចខ្លួន គិតថាម៉េចទេ វង្វេងទៀតហើយខ្ញុំ។ ខ្ញុំសុំថា រដ្ឋាភិបាលលោកតុលាការ អាណិត ខ្ញុំជួយដោះលែងកូនខ្ញុំផង មានតែពីរនាក់ម្ដាយនិងកូន ជួបការលំបាកណាស់»។
អង្គការលីការដូ (LICADHO) ចេញផ្សាយអត្ថបទខ្លី នៅថ្ងៃទី២៤ ខែមិថុនានេះ ឲ្យដឹងថា កាលពីថ្ងៃទី២៣ ខែមិថុនា សភាស៊ើបសួរសាលាឧទ្ធរណ៍ភ្នំពេញ បានបដិសេធសំណើសុំនៅក្រៅឃុំរបស់លោក ជា វុទ្ធី ដែលជាអ្នកសារព័ត៌មានពលរដ្ឋ និងជាអតីតព្រះសង្ឃ។
លោក ជា វុទ្ធី ត្រូវបានចាប់ខ្លួន កាលពីខែមេសា ឆ្នាំ២០២៦ និងត្រូវបានសាលាដំបូងរាជធានីភ្នំពេញ ចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរ ដល់សន្តិសុខសង្គម តាមមាត្រា ៤៩៤ និង ៤៩៥ នៃក្រមព្រហ្មទណ្ឌ។ បទចោទ ប្រកាន់អតីតព្រះសង្ឃរូបនេះ ធ្វើឡើងបន្ទាប់ពីលោកប្រើប្រាស់បណ្ដាញសង្គមធ្វើ ការរិះគន់អំពីរឿងព្រំដែនកម្ពុជា-ថៃ និងបញ្ហាជនភៀសសឹក។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្ស លីកាដូ (LICADHO) លោក អំ សំអាត ប្រាប់ទូរទស្សន៍អាស៊ីសេរី នៅថ្ងៃទី២៤ ខែមិថុនា ថា លោក ជា វុទ្ធី កាលនៅជាព្រះសង្ឃ មានភាពសកម្មក្នុងកិច្ចការសង្គម បរិស្ថាន ព្រៃឈើ និងការងារការពារសិទ្ធិមនុស្សជាដើម ហើយអ្នកសារព័ត៌មាន ពលរដ្ឋរូបនេះ តែងតែប្រើប្រាស់បណ្ដាញសង្គម ដើម្បីចែករំលែកព័ត៌មាន។ លោកបន្តថា ការបន្តឃុំខ្លួនលោក ជា វុទ្ធី មិនចំណេញអ្វីដល់សង្គមជាតិឡើយ ផ្ទុយទៅវិញ អាចនឹងមានការរិះគន់បន្ថែមទៀត ទៅលើរដ្ឋាភិបាល ដែលកំពុងដឹកនាំប្រទេស។
លោក អំ សំអាត៖ «ការឃុំខ្លួនបន្តរបស់លោក ជា វុទ្ធី មិនមានអ្វីជាចំណេញទេ តែផ្ទុយទៅវិញ យើងដឹងហើយ ការឃុំខ្លួននេះ វាប៉ះពាល់ទី១ គ្រួសាររបស់គាត់ ដែលពឹងផ្អែកលើកូន ទី២ វាប៉ះពាល់ទៅដល់ការបន្តការសិក្សារបស់គាត់ ។ គាត់ត្រូវបន្តការសិក្សាជាបន្តទៅទៀត។ ការនៅក្រៅឃុំបណ្ដោះអាសន្ន មិនមែនថា បញ្ចប់នីតិវិធី នៅតុលាការទេ គឺនីតិវិធីនៅតែដើរអ៊ីចឹង នៅពេលដែលតុលាការរកឃើញថា មានកំហុស អាហ្នឹងយើងអនុវត្តច្បាប់មកវិញ ក៏វាអត់មានបញ្ហាដែរ។ អ៊ីចឹង ការឃុំខ្លួនហ្នឹង វាអត់មានអីចំណេញ ផ្ទុយទៅវិញ វាអាចមានការរិះគន់ បន្ថែមតទៅទៀត»។
អ្នកឃ្លាំមើល និង ពលរដ្ឋទូទៅចាត់ទុកការឃុំខ្លួនអតីតព្រះសង្ឃ ជា វុទ្ធី គឺជាការបំបិទសំឡេងអ្នកដែលហ៊ានរិះគន់រដ្ឋាភិបាល។ ពួកគាត់ថា រដ្ឋាភិបាលគ្រួសារ ត្រកូលហ៊ុន បង្ហាញចេតនាអនុវត្តផែនការបំបាក់ស្មារតីពលរដ្ឋផ្សេងទៀតមិនឲ្យ និយាយអំពីកំហុសដឹកនាំរបស់គ្រួសារហ៊ុន ទាក់ទងនឹងវិបត្តិសង្គមនានា ជាពិសេស បញ្ហាពាក់ព័ន្ធនឹងរឿងព្រំដែនកម្ពុជា-ថៃ ដែលកម្ពុជាបាត់បង់ទឹកដីទៅ ក្រោមការកាន់កាប់របស់ភាគីថៃ កាន់តែច្រើនទីតាំង។
គិតមកដល់ពេលនេះ មានពលរដ្ឋ ជាង១០០នាក់ហើយ រួមមាន ព្រះសង្ឃ កម្មករ សកម្មជនសង្គម សកម្មជននយោបាយ និងអ្នកសារព័ត៌មានជាដើម ត្រូវបានរដ្ឋាភិបាល គ្រួសារត្រកូលហ៊ុនឃុំខ្លួនដោយសារតែការប្រើប្រាស់សិទ្ធិនិយាយពីបញ្ហាសង្គម៕
