អ្នកឃ្លាំមើលសង្គមថា អត្ថន័យនៃការរួបរួមរបស់ប្រធានគណបក្សប្រជាជនលោក ហ៊ុន សែន ដែលបានអំពាវនាវម្តងហើយម្តងទៀត ឲ្យមានការរួបរួមគ្នាទើបធ្វើឲ្យកម្ពុជាមានកម្លាំងខ្លាំង អាចការពារទឹកដីខ្មែរបាន គឺចង់សំដៅឲ្យអ្នកដែលមានទស្សនៈផ្ទុយទាំងអស់ ទៅជ្រកក្រោមគណបក្សប្រជាជនកម្ពុជា។ ការលើកឡើងនេះ បន្ទាប់ពីលោក ហ៊ុន សែន បានថ្លែងក្នុងសារលិខិត នៅថ្ងៃទី២៨ ខែមិថុនា ដែលជាខួប៧៥ឆ្នាំនៃថ្ងៃបង្កើតគណបក្សប្រជាជនកម្ពុជា ដោយអំពាវនាវឲ្យមានការរួបរួមគ្នា ទើបអាចការពារបូរណភាពទឹកដី និងអត្តសញ្ញាណជាតិខ្មែរបាន។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា បានប្រាប់ទូរទស្សន៍អាស៊ីសេរីថា អត្ថន័យនៃការរួបរួមរបស់លោក ហ៊ុន សែន គឺ ចង់សំដៅទៅលើ អ្នកដែលមានទស្សនៈផ្ទុយទាំងអស់ទៅជ្រកក្រោមគណបក្សប្រជាជន ឬក៏ទៅជ្រកក្រោមការដឹកនាំរបស់ គណបក្សកាន់អំណាចទើបហៅថាការរួបរួម។ ប៉ុន្តែបើអ្នកណាមានគំនិតផ្ទុយ ទស្សនៈផ្ទុយ ហើយប្រឆាំងនឹងការដឹកនាំ ដែលមិនរណប មិនចូលរួមជាមួយនឹងគណបក្សកាន់អំណាច គឺលោកចាត់ទុកថាមិនមែនជាការរួបរួមជាតិនោះទេ។
លោក ស៊ឹង សែនករុណា បន្ថែមទៀតថា តាមការសង្កេតរបស់លោកកន្លងមកឃើញមាន ដូចជាគណបក្សដែលរណបគណបក្សប្រជាជន គឺមានតែគណបក្ស ហើយមិនធ្វើសកម្មភាពរិះគន់ចំណុចខ្វះខាត់របស់រដ្ឋាភិបាល មិនរិះគន់ការដឹកនាំរបស់គណបក្សកាន់អំណាច នោះទើបអាចរស់នៅបានសុខ។
លោក ស៊ឹង សែនករុណា៖ «ក៏ប៉ុន្តែ បើសិនជាគណបក្សណា សកម្មជននយោបាយណា មេដឹកនាំនយោបាយណាដែលហ៊ានរិះគន់ ចំៗទៅលើការដឹកនាំមិនត្រឹមត្រូវ មិនច្បាស់លាស់របស់លោក ហ៊ុន សែន ឬក៏គណបក្សកាន់អំណាចបច្ចុប្បន្នហ្នឹង ច្បាស់ណាស់ ច្បាស់ជាមិនអាចទៅចូលរួមធ្វើនយោបាយក្នុងប្រទេសបានទេ ឬក៏ធ្វើនយោបាយនៅក្នុងប្រទេស គឺត្រូវរងការធ្វើទុក្ខបុកម្នេញអញ្ចឹងទៅ។ ប្រើប្រព័ន្ធតុលាការចោទ ចាប់ដាក់ឃុំអញ្ចឹងទេ»។
ការអះអាងរបស់ប្រធានអង្គការប្រជាធិបតេយ្យខ្មែររូបនេះ បន្ទាប់ពីក្នុងសារលិខិតរបស់គណបក្សប្រជាជនកម្ពុជាដែលចុះហត្ថលេខាដោយ លោក ហ៊ុន សែន នៅថ្ងៃទី២៨ ខែមិថុនា ប្រមុខបក្សកាន់អំណាចរូបនេះបានបញ្ជាក់ថា មានតែការរួបរួមគ្នា ខិតខំធ្វើឲ្យកម្ពុជាមានកម្លាំងខ្លាំង ទាំងសេដ្ឋកិច្ច យោធា និងនយោបាយប៉ុណ្ណោះ ទើបអាចការពារបូរណភាពទឹកដី និងអត្តសញ្ញាណជាតិខ្មែរបាន។
នៅក្នុងសារលិខិតដដែលថា គណបក្សប្រជាជនកម្ពុជានៅប្រឈមការលំបាក និងឧបសគ្គជាច្រើនដែលបណ្តាលមកពីកត្តាខាងក្នុងផង និងកត្តាខាងក្រៅផង។ ការប្រឈមពីកត្តាខាងក្រៅគឺពិបាកប៉ាន់ស្មានបំផុត។ ប៉ុន្តែគណបក្សកាន់អំណាច ប្តូរផ្តាច់ការពារបូរណភាពទឹកដី អធិបតេយ្យភាពជាតិ និងសន្តិភាពឲ្យបានគង់វង្ស។
ជុំវិញបញ្ហានេះ អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលា លោក គឹម សុខ បានប្រាប់វិទ្យុអាស៊ីសេរីថា ការធ្វើឲ្យកម្ពុជាខ្លាំង ដោយការរួបរួមគ្នា ការពង្រឹងកម្លាំងនយោបាយ កម្លាំងយោធា មិនមែនអាចសម្រេចបានដោយការសូត្រទ្រឹស្ដី ដូចលោក ហ៊ុន សែនទេ គឺទាល់តែធ្វើជាក់ស្ដែង គឺអនុវត្តតាមស្មារតីនិងខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស និងរដ្ឋធម្មនុញ្ញកម្ពុជា ដោយបើកឲ្យមានការផ្សះផ្សា បង្រួបបង្រួមជាតិ បើកឲ្យមានការប្រកួតប្រជែងនយោបាយ ត្រឹមត្រូវ។
ទាក់ទងទៅនឹងបញ្ហានេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី បានប្រាប់ទូរទស្សន៍អាស៊ីសេរី ថា លោកយល់ឃើញថា ការអះអាង របស់លោក ហ៊ុន សែន ផ្ទុយពីតថភាពសង្គម និងនយោបាយជាក់ស្តែងនៅពេលបច្ចុប្បន្ន។ លោក សេង វណ្ណលី កត់សម្គាល់ថា លោក ហ៊ុន សែន តែងតែលើកឡើងពីសុខសន្តិភាព និងការអភិវឌ្ឍ ដែលនេះលោក ថាគ្រាន់តែជាសន្តិភាពផ្នែករូបវន្ត ឬក៏ជាស្ថិរភាពដែលកើតចេញពីការគាបសង្កត់ប៉ុណ្ណោះ ប៉ុន្តែវាមិនមែនជាសន្តិភាពសង្គមពិតប្រាកដដែលប្រជាពលរដ្ឋចង់បានទេ។
លោក សេង វណ្ណលី៖ «សន្តិភាពនយោបាយបច្ចុប្បន្នបានបង្ហាញឱ្យកាន់តែច្បាស់ពីការបំផ្លិចបំផ្លាញប្រព័ន្ធប្រជាធិបតេយ្យ សេរីពហុបក្ស ដែលការរំលាយគណបក្សប្រឆាំង ការចាប់ខ្លួនសកម្មជននយោបាយ សកម្មជនដីធ្លី និងសកម្មជនបរិស្ថានជាបន្តបន្ទាប់ ដែលទង្វើទាំងនេះបានធ្វើឱ្យលំហសេរីភាពរបស់ប្រជាពលរដ្ឋរួមតូច រហូតដល់ថ្នាក់ មិនហ៊ានបញ្ចេញមតិ រិះគន់រដ្ឋាភិបាល»។
អ្នកតាមដានភូមិសាស្ត្រនយោបាយរូបនេះបន្ថែមថា ស្ថិរភាពនយោបាយដែលលោក ហ៊ុន សែន តែងតែ លើកយកមកធ្វើជាខ្នងបង្អែក ការពារអំណាចរបស់បក្ស គឺជារូបភាពនៃការរក្សាអំណាចដាច់មុខរបស់គ្រួសារនិយម និងបក្ខពួកនិយមដែលផ្ទុយស្រឡះពីស្មារតីនៃរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស។
អ្នកឃ្លាំមើលសង្គមលើកឡើងថា នយោបាយអាទិភាពរបស់រដ្ឋាភិបាលលោក ហ៊ុន ម៉ាណែត ផ្ដោតតែលើការរក្សាអំណាចគ្រួសារ ជាជាងផលប្រយោជន៍ជាតិ ហើយតុលាការគ្រាន់តែជាឧបករណ៍បំបិទសិទ្ធិគូប្រជែង និង អ្នកបញ្ចេញមតិរិះគន់រដ្ឋាភិបាលប៉ុណ្ណោះ៕
