កូនប្រុសពៅរបស់ប្រធានគណបក្សកាន់អំណាច លោក ហ៊ុន សែន គឺលោក ហ៊ុន ម៉ានី ដែលមានរឿងអាស្រូវទាក់ទងទៅនឹងការធ្វើទារុណកម្មផ្លូវភេទដែលពុំមានសមត្ថកិច្ចណាហ៊ានចាត់វិធានការផ្លូវច្បាប់នោះ បានរៀបការភរិយាថ្មីនៅថ្ងៃទី២៦ ខែវិច្ឆិកា ជាមួយអតីតប្រធានគ្រប់គ្រងផ្នែកអភិវឌ្ឍន៍ធុរកិច្ចប្រចាំគម្រោងខុនដូ ហ្គាដិន វ័ន (Garden One)។ អតីតភរិយារបស់លោក ហ៊ុន ម៉ានី គឺ អ្នកស្រី យឹម ឆៃលីន ជាកូនស្រីរបស់អតីតឧបនាយករដ្ឋមន្ត្រី យឹម ឆៃលី។
នៅក្នុងថ្ងៃរៀបមង្គលការដ៏ស្ងៀមស្ងាត់ ប៉ុន្តែត្រូវបានបែកធ្លាយតាមរយៈការបង្ហោះ លើគណនីហ្វេសប៊ុករបស់លោក ខៀវ កាញារីទ្ធ អតីតរដ្ឋមន្ត្រីក្រសួងព័ត៌មាន កាលពីព្រឹកថ្ងៃទី២៦ ខែវិច្ឆិកា បានធ្វើឱ្យមហាជនផ្ទុះការចាប់អារម្មណ៍ខ្លាំង ដោយរូបភាពវត្តមានកូនកំលោះ គឺលោក ហ៊ុន ម៉ានី និងកូនក្រមុំសំពះក្នុងពិធីមង្គលការ។
តាមរយៈរូបភាពបង្ហោះនេះ លោក ខៀវ កាញារីទ្ធ បានសរសេរភ្ជាប់មកជាមួយចំណងជើងខ្លីថា ៖ «ពិធីពិសាស្លាកំណត់ ចម្ការមន ២៦ វិច្ឆិកា ២០២៥» ដែលមានរូបថតលោក ហ៊ុន ម៉ានី កំពុងសំពះផ្ទឹម ជាមួយនឹងកូនក្រមុំ ឈ្មោះ ឆាយ ថងឌី ដែលធ្លាប់ជាប្រធានគ្រប់គ្រងផ្នែកអភិវឌ្ឍន៍ធុរកិច្ចប្រចាំគម្រោងខុនដូ ហ្គាដិន វ័ន កាលពីឆ្នាំ២០២១។
លោក ហ៊ុន ម៉ានី ជាកូនប្រុសពៅរបស់លោក ហ៊ុន សែន ក្នុងចំណោមកូន៥នាក់ ត្រូវបានឪពុករុញឲ្យចូលវិស័យនយោបាយ កាលពីមានអាយុ៣០ឆ្នាំ ដែលជាតំណាងរាស្ត្រវ័យក្មេងជាងគេនៅក្នុងសភា កាលពីឆ្នាំ២០១៣។ នៅក្នុងតំណែងជាអ្នកនយោបាយវ័យក្មេង ៥ឆ្នាំក្រោយមក លោក ហ៊ុន ម៉ានី ត្រូវបានជនអនាមិក ឬហែកគ័រ (Hacker) បានលួចចូលគ្រប់គ្រងគណនីហ្វេសប៊ុករបស់លោក ដោយបង្ហាញពីសារឆ្លងឆ្លើយគ្នាជាមួយតារាៗមួយចំនួនពាក់ព័ន្ធការជួញដូរផ្លូវភេទ និងការរួមភេទហិង្សា ក្នុងនោះមានតារាស្រីម្នាក់ ឈ្មោះ អាយីងបានអារដៃសម្រក់ឈាមដើម្បីសម្លាប់ខ្លួន និងបានរៀបរាប់ពីការឈឺចាប់ក្រោយពេល លោក ហ៊ុន ម៉ានី បោះបង់រូបនាងចោលនៅពេលដឹងថា នាងមានផ្ទៃពោះជាមួយ លោក ហ៊ុន ម៉ានី។
ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ ដែលមានជំនាញ ខាំ ក្រញៅ ទៅលើនារីដែលលោកយកទៅកំដរផ្លូវភេទ ដែលគេចាត់ទុកថា ជាអំពើហិង្សាផ្លូវភេទនេះ ទោះជាមានសំឡេងនិងរូបថតជនរងគ្រោះយ៉ាងណាក្ដី ក៏គ្មានអាជ្ញាធរមានសមត្ថកិច្ចណាស៊ើបអង្កេត ឬចាត់ការលោក ហ៊ុន ម៉ានី ពីរឿងជួញដូរ និងទារុណកម្មផ្លូវភេទនេះតាមផ្លូវច្បាប់ឡើយ។
មុនពេលមានពិធីមង្គលការនេះ លោក ហ៊ុន ម៉ានី និងភរិយាមុន មិនសូវឃើញបង្ហាញមុខជាមួយលោក ហ៊ុន ម៉ានី ជាសាធារណៈទេ លើកលែងតែព្រឹត្តិការណ៍បុណ្យជាតិធំៗដែលតម្រូវឲ្យភរិយាចូលរួមទើប ភរិយារបស់លោកបង្ហាញមុខ។
អតីតភរិយា លោក ហ៊ុន ម៉ានី គឺអ្នកស្រី យឹម ឆៃលីន តែងតែចេញទៅស្វែងរកការសប្បាយ រួចបានបង្ហាញជីវិតហឺហាហាយសូ (High so) នៅក្រៅប្រទេសជាមួយគូកននាង។ នាងគឺជាស្ត្រីខ្មែរទី១ ដែលបានទៅចូលរួមក្នុងកម្មវិធីបង្ហាញម៉ូដកាបូបម៉ាកល្បីលំដាប់ពិភពលោកគឺ យីហោ ហ៊ឺម៉េស (Hermes) កាលពីឆ្នាំ២០២២ នៅទីក្រុងប៉ារីស ហើយថែមទាំងមានអង្គរក្សបើកឡានជូនដើម្បីសម្ញែងឫក មិនខុសពីព្រះមហាក្សត្រិយានីឡើយ។ ក្រៅពីការទៅចូលរួមកម្មវិធីបង្ហាញម៉ូដកាបូបយីហោល្បីនោះហើយ នាងក៏ជាអតិថិជនដ៏សំខាន់របស់ក្រុមហ៊ុនកាបូបយីហោ ហ៊ឺម៉េស នេះថែមទៀតផង។ នាងបានប្រើហ៊ឺម៉េសជាច្រើនប្រភេទ ដែលកាបូបម៉ាកនេះ មានតម្លៃថោកបំផុត ចាប់ពី ១០ម៉ឺនដុល្លារទៅ ១លានដុល្លារអាមេរិក។
លោក ហ៊ុន ម៉ានី បានសិក្សានៅប្រទេសបារាំងតាំងពីអាយុ៩ឆ្នាំ។ បន្ទាប់មក បានទៅបន្តការសិក្សានៅសហរដ្ឋអាមេរិក ដោយទទួលបានសញ្ញាប័ត្រអនុបណ្ឌិតយោធា ជំនាញសន្តិសុខជាយុទ្ធសាស្ត្រដែលផ្ដោតលើការប្រឆាំងអំពើភេរវកម្មនៅសហរដ្ឋអាមេរិក។ លោកក៏បានសិក្សាថ្នាក់អនុបណ្ឌិតផ្នែកទំនាក់ទំនងអន្តរជាតិនៅទីក្រុងម៉ែលប៊ន (Melbourne) ប្រទេសអូស្ត្រាលីផងដែរ។
ទោះបីជាធ្លាប់បានរៀននៅប្រទេសប្រជាធិបតេយ្យក៏ដោយ លោក ហ៊ុន ម៉ានី ហាក់មិនសូវមានចរិតជាអ្នកប្រជាធិបតេយ្យលើកកំពស់សិទ្ធិសេរីភាពពលរដ្ឋឡើយ។ លោកហាក់ចូលចិត្តនិយាយមេក្រូ ឬថ្លែងសុន្ទរកថា ហើយជារឿយៗ គេតែងបានឮលោកថ្លែងសារបែបហិង្សាគំរាមបង្ក្រាបទៅលើពលរដ្ឋដែលមានបំណងចេញផ្លូវតវ៉ាប្រឆាំងទៅនឹងការដឹកនាំឪពុករបស់លោកគឺលោក ហ៊ុន សែន៕
