រដ្ឋលេខាធិការដ្ឋានព្រំដែនកម្ពុជា នៅសប្ដាហ៍នេះ បានដាក់លិខិតជាថ្មី ស្នើឱ្យភាគីថៃចូលតុចរចា រកដំណោះស្រាយ បញ្ហាព្រំដែន តាមរយៈកិច្ចប្រជុំពិសេសគណៈកម្មការJCBរវាងប្រទេសទាំងពីរ ក្រោយពីភាគីថៃ មានរដ្ឋាភិបាលថ្មី។ អ្នកឃ្លាំមើលថា កម្ពុជា នៅតែពិបាកក្នុងការហៅភាគីថៃ ឱ្យចូលតុចរចា បើទោះមានរដ្ឋាភិបាលថ្មីក្ដី ព្រោះភាគីថៃ មិនចង់ដោះស្រាយបញ្ហាព្រំដែនជាមួយកម្ពុជា ដែលពួកគេ វាយដណ្ដើមយកបាននោះឡើយ។
ក្រោយពីភាគីថៃបានបើកការវាយប្រហារឈ្លានពានទឹកដីខ្មែរបានជាច្រើនកន្លែង និងសម្លាប់ទាហានខ្មែរ រួមនឹងបំផ្លិចបំផ្លាញ លំនៅឋានរបស់ជនស៊ីវិលខ្មែរ អស់ជាច្រើនពាន់ខ្នង រួចមក ភាគីថៃតែងតែគេចវេះ មិនចូលតុចរចាជាមួយកម្ពុជា ដើម្បីដោះស្រាយបញ្ហាព្រំដែននោះឡើយ ខណៈដែលកម្ពុជាវិញក៏ពុំប្ដឹងថៃទៅកាន់តុលាការអន្តរជាតិ ដែលធ្វើឱ្យភាគីថៃ ចេះតែមិនខ្វល់ហើយរកលេសមិនចេះឈប់ និងមិនឱ្យតម្លៃ មកលើកម្ពុជា។
រដ្ឋលេខាធិការដ្ឋានព្រំដែនកម្ពុជា នៅថ្ងៃទី០៧ ខែមេសា បានផ្សព្វផ្សាយសេចក្ដីប្រកាសព័ត៌មាននៅលើគណនីហ្វេសប៊ុក ដោយមានខ្លឹមសារថា កន្លងមក គណៈកម្មការចម្រុះខណ្ឌសីមាព្រំដែនគោក (JBC) ភាគីកម្ពុជា បានបញ្ជូនកំណត់ទូតជាច្រើនលើកទៅគណៈកម្មការ JBC ភាគីថៃ ដើម្បីស្នើរៀបចំកិច្ចប្រជុំពិសេសពាក់ព័ន្ធបញ្ហាព្រំដែនប៉ុន្តែភាគីថៃបានឆ្លើយតបដោយស្នើលើកពេលជាបន្តបន្ទាប់ ក្រោមហេតុផលរង់ចាំ នីតិវិធីផ្ទៃក្នុងដើម្បីតែងតាំង សមាសភាព JBC ថ្មីរបស់ខ្លួន ក្រោយពីគណៈរដ្ឋមន្ត្រីថៃថ្មី ត្រូវបានបង្កើតឡើង។
ទោះយ៉ាងណាណា នៅថ្ងៃទី៧ ខែមេសានេះគណៈកម្មការ IBC ភាគីកម្ពុជា ក៏បានស្នើសាជាថ្មីទៀតទៅគណៈកម្មការ IBC ភាគីថៃ ដើម្បីរៀបចំកិច្ចប្រជុំពិសេសបន្ទាន់ JBC និងជំរុញឱ្យបន្តអនុវត្តការងារ នៅលើដីជាក់ស្ដែងដែលភាគីទាំងពីរបានឯកភាពគ្នានាពេលកន្លងមក។ សំណើទាំងនោះរួមមាន កម្ពុជាស្នើឱ្យរៀបចំកិច្ចប្រជុំពិសេសរបស់គណៈកម្មការ JBC កម្ពុជា-ថៃ នៅចន្លោះពីថ្ងៃទី១៧ ដល់២២ ខែមេសា ស្ថិតនៅខេត្តសៀមរាប។
សំណើមួយទៀតស្នើចាត់បញ្ជូនក្រុមវាស់វែងចម្រុះ (JSTs) នៃភាគីទាំងពីរចុះវាស់វែង លើដីជាក់ស្ដែង នៅចន្លោះពីថ្ងៃទី២០ ដល់២៤ ខែមេសា ដើម្បីបន្តអនុវត្តការងារវាស់វែង និង បោះបង្គោលបណ្ដោះអាសន្ននៅកំណាត់ខ្សែព្រំដែនចន្លោះបង្គោលព្រំដែនលេខ ៤២-៤៧ ស្ថិតក្នុងភូមិសាស្ត្រភូមិជោគជ័យ និងភូមិព្រៃចាន់ ស្រុកអូរជ្រៅ ខេត្តបន្ទាយមានជ័យ និងនៅកំណាត់ខ្សែព្រំដែនចន្លោះ បង្គោល លេខ ៥២-៥៩ ស្ថិតក្នុងភូមិសាស្ត្រ ស្រុកកំរៀង ខេត្តបាត់ដំបង ជាដើម។
បន្ថែមពីលើសនោះ រដ្ឋលេខាធិការដ្ឋានកិច្ចការព្រំដែន ក៏បានបញ្ជាក់ថា គណៈកម្មការ JBCភាគីកម្ពុជា ប្រកាន់ជំហរយ៉ាងម៉ឺងម៉ាត់ ក្នុងការតវ៉ាប្រឆាំងយ៉ាងដាច់អហង្ការ ទៅនឹងសកម្មភាពឈ្លានពាន កាន់កាប់ទឹកដីកម្ពុជា ដោយខុសច្បាប់ របស់យោធាថៃ និង ការបន្តធ្វើសកម្មភាពរំលោភ បំពានលើបូរណភាពទឹកដី និង អធិបតេយ្យកម្ពុជា។ ទន្ទឹមគ្នានោះ គណៈកម្មការ JBC ភាគីកម្ពុជា ក៏ ប្រកាសមិន ទទួលស្គាល់ ជាដាច់ខាតនូវការកែប្រែខ្សែព្រំដែន ណាមួយដែលកើតចេញពីការប្រើប្រាស់កម្លាំង ទាំងពេលកន្លងមក ទាំងបច្ចុប្បន្ន និងអនាគត។
ទោះជាយ៉ាងណា មកទល់ពេលនេះ គេនៅមិនទាន់ឃើញ ភាគីថៃឆ្លើយតប លិខិតអញ្ជើញរបស់ភាគីកម្ពុជា នៅឡើយទេ។ ប៉ុន្តែ តាមរយៈសារ ដាច់ដោយឡែក នៅថ្ងៃទី០៧ ខែមេសានេះដែរ រដ្ឋមន្ត្រីក្រសួងការពារជាតិថៃ អឌុល ប៊ុនធម្មចម្រើន (Adul Boonthamcharoen) បានប្រាប់សារព័ត៌មានថៃ The Nationថា ភាគីថៃបានត្រៀមលក្ខណៈ ផ្ទុះសង្គ្រាមជាមួយកម្ពុជា ជុំទី៣ គ្រប់ពេលវេលា ក៏ប៉ុន្តែលោកថា លទ្ធភាព ដែលអាចផ្ទុះឡើង ស្ថិតក្នុងកម្រិតទាបបំផុត។
បន្ថែមពីលើនោះ លោកនិយាយបែបឌឺដងថា ប្រសិនបើសង្គ្រាមបានកើតឡើងម្ដងទៀតថា តើ សត្រូវ គឺកម្ពុជាបានត្រៀមខ្លួនរួចរាល់ ដើម្បីប្រយុទ្ធជាមួយប្រទេសថៃហើយ ឬនៅ។
ចាប់តាំងពីយោធាថៃបានចូលកាន់កាប់ទឹកដីខ្មែរ ជាង៥០ទីតាំងមក ភាគីថៃ ពុំសូវឃើញនិយាយរឿង ចូលទុកចរចា ដោះស្រាយបញ្ហាព្រំដែន ជាមួយកម្ពុជានោះទេ ក្រៅតែពី និយាយសារគំរាមកំហែង និងការបើកកកាយ អំពីឧក្រិដ្ឋកម្មឆបោកតាមអនឡាញ ដែលមានមូលដ្ឋាននៅកម្ពុជា ដើម្បីលាក់បាំងនូវកំហុសរបស់ខ្លួនដែលឈ្លានពានទឹកដីកម្ពុជា និងបំផ្លិចបំផ្លាញផ្ទះសម្បែងជនស៊ីវិលខ្មែរអស់រាប់ពាន់ខ្នង បើទោះបីជាកម្ពុជាព្យាយាមស្នើឱ្យថៃចូលតុចរចាជាច្រើនដងក្ដី។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ឃើញថា ការដែលភាគីកម្ពុជាពិបាកហៅថៃចូលតុចរចា ពុំមែនពាក់ព័ន្ធបញ្ហាផ្ទៃក្នុងថៃនោះទេ ការពិត គឺភាគីថៃ មិនចង់ដោះស្រាយបញ្ហា ព្រំដែនជាមួយកម្ពុជាតាមរយៈគណៈកម្មការJBCនោះឡើយ ព្រោះភាគីថៃបានកំណត់រួចទៅហើយថា ពួកគេនឹងមិនប្រគល់ទឹកដីដែលវាយដណ្ដើមបាន ឱ្យកម្ពុជាវិញនោះឡើយ។ ទន្ទឹមគ្នានោះ លោកថា ប្រសិនបើភាគីថៃចូលរួមកិច្ចប្រជុំគណៈកម្មការ JBC ជាមួយក្ដី ក៏ភាគីថៃមិនយល់ព្រមវាស់វែង បោះបង្គោលព្រំដែន ស្របតាម សន្ធិសញ្ញាបារាំង-សៀម ដែលកម្ពុជាទាមទារនោះដែរ។ លោកថា ជម្រើសតែមួយគត់ ដែលកម្ពុជា អាចដាក់សម្ពាធថៃបាន គឺប្ដឹងថៃទៅកាន់តុលាការយុត្តិធម៌អន្តរជាតិ ICJ និង បង្កើនសកម្មភាពការទូតឱ្យសកម្មបំផុតលើឆាកអន្តរជាតិ។
លោក ម៉ែន ណាត៖ «ពិនិត្យឱ្យមែនទែនទៅរដ្ឋាភិបាលខ្សោយ។ មិនត្រឹមតែខ្សោយផ្នែកវិស័យការពារជាតិទេ ខ្សោយក្នុងការសម្រេចចិត្តទៀត រួមនឹងខ្សោយក្នុងការការពារបូរណភាពទឹកដីខ្មែរស្របតាមច្បាប់អន្តរជាតិ។ ខ្សោយនេះនៅត្រង់ខ្លាចបាត់បង់អំណាចបច្ចុប្បន្នហ្នឹង អ៊ីចឹងហើយបានខំការពារអំណាចជាជាងការពារទឹកដីជាតិ»។
ស្របពេលភាគីថៃព្យាយាមអូសបន្លាយមិនចូលតុចរចាជាមួយកម្ពុជា យោធា ព្រះសង្ឃ និងពលរដ្ឋថៃ កំពុងញាប់ដៃញាប់ជើង ក្នុងការធ្វើលេណដ្ឋាន ផ្លូវបេតុង និងរូបព្រះពុទ្ធបដិមា នៅលើដីខ្មែរយ៉ាងអនាធិបតេយ្យ ដែលពួកគេ ចង់បង្ហាញថា នេះជាទឹកដីរបស់ថៃអចិន្ត្រៃយ៍។ បន្ថែមពីលើនោះ អ្នកឃ្លាំមើល ថា ភាគីថៃបានដឹងច្បាស់ ពីចំណុចខ្សោយរបស់កម្ពុជាថា មិនអាចប្រើកម្លាំងយោធា ទាមទារទឹកដី ដែលបាត់បង់ទាំងនោះបានទេ ខណៈ កិច្ចការទូតរបស់កម្ពុជានៅលើឆាកអន្តរជាតិ ក៏គ្មានប្រសិទ្ធភាព ដូច្នេះហើយ ធ្វើឱ្យភាគីថៃបន្តពង្រីក សកម្មភាពឈ្លានពាន តាមរយៈការដើររាយលួសបន្លា និងកសាងផ្លូវបេតុង ជាច្រើន ចូលក្នុងទឹកដីខ្មែរ កាន់តែជ្រៅ៕
