ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា លោក ម៉ម រិទ្ធី អះអាងថា លោកនឹងបង់ប្រាក់ពិន័យទៅតាមការកំណត់របស់តុលាការ បន្ទាប់ពីលោកបានបង្ហោះសារអំពាវនាវសុំជំនួយពីសមាជិកសហជីព និងមហាជន ដោយទទួលលុយបានជិតគ្រប់ចំនួនកំណត់។ សាលាដំបូងរាជធានីភ្នំពេញ បានចេញលិខិតជូនដំណឹងឲ្យលោកបង់ប្រាក់ពិន័យឲ្យបានមុនថ្ងៃទី០៨ ខែមិថុនា បន្ទាប់ពីលោកបានអនុវត្តទោសជាប់ពន្ធនាគាររួចរាល់។
ប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា លោក ម៉ម រិទ្ធី កាលពីថ្ងៃទី១៥ ខែឧសភា បានបង្ហោះសារនៅលើបណ្ដាញសង្គមហ្វេសប៊ុករបស់លោក ដោយភ្ជាប់នូវលិខិតជូនដំណឹងរបស់សាលាដំបូងរាជធានីភ្នំពេញ ដោយក្នុងនោះលោកបានអំពាវនាវដល់សាធារណជនឱ្យជួយឧបត្ថម្ភរូបលោក ដើម្បីបានប្រាក់បង់ពិន័យតាមការបង្គាប់ពីតុលាការ។
លោក ម៉ម រិទ្ធី បានសរសេរថា បន្ទាប់ពីជាប់ពន្ធនាគាររយ:ពេល១៨ខែ លោកត្រូវបង់ប្រាក់ពិន័យ២លានរៀល ជូនតុលាការ តាមដីកាសម្រេច។ នៅពេលនេះលោកបានទទួលលិខិតជូនដំណឹងពីតុលាការអោយបងប្រាក់ពិន័យ២លានរៀលហើយបើលោកមិនបង់ប្រាក់តាមការជូនដំណឹងនេះទេតុលាការ នឹងចេញដីកាបញ្ជាឲ្យបង្ខំ និងឲ្យឃុំខ្លួនតាមនីតិវិធី។ លោកថា ដោយសារជីវភាពរបស់លោក ខ្វះខាតលោកស្នើសុំសហជីព និងមហាជនជួយតាមទឹកចិត្ត ដើម្បីលោកបានប្រាក់យកទៅបង់ជូនតុលាការ។
លោក ម៉ម រិទ្ធី បានឲ្យដឹងថា បន្ទាប់ពីលោកបានបង្ហោះសារដើម្បីសុំជំនួយពីសមាជិកសហជីព និងមហាជន លោកទទួលបានលុយឧបត្ថម្ភ ជិតគ្រប់ចំនួនហើយ។ លោកនឹងធ្វើដំណើរមកភ្នំពេញ ដើម្បីបង់ប្រាក់ពិន័យទៅតាមការកំណត់របស់តុលាការ ព្រោះលោកខ្លាចតុលាការ ចាត់ចែងតាមនីតិវិធីច្បាប់ ដែលអាចធ្វើឱ្យលោកជាប់ពន្ធនាគារជាថ្មីទៀត។
ទាក់ទងទៅនឹងការអំពាវនាវនេះ ប្រធានអង្គការប្រជាធិបតេយ្យខ្មែរ ដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា យល់ថា ប្រជាពលរដ្ឋទូទៅ កម្មករនិយោជិត ឬអង្គការដៃគូដែលពាក់ព័ន្ធ អាចចូលរួមចំណែកជួយលោកទៅតាមលទ្ធភាព ក្នុងការបង់លុយពិន័យទៅតុលាការ ពីព្រោះអ្នកដែលធ្វើការងារសង្គមពុំមែនជាអ្នកមានទ្រព្យសម្បត្តិដូចមន្ត្រីដែលពុករលួយនោះទេ។
លោក ស៊ឹង សែនករុណា បន្ថែមថា អ្នកដែលហ៊ានលះបង់ពេលវេលា លះបង់ធនធានរបស់ខ្លួនដើម្បីកម្មករ ហើយត្រូវបានឃុំខ្លួនទាំងអយុត្តិធម៌នេះ គួរតែត្រូវបានលើកទឹកចិត្ត ដើម្បីឲ្យអ្នកដែលធ្វើកិច្ចការងារជួយសង្គមបន្តខិតខំពុះពារដើម្បីការពារផលប្រយោជន៍របស់កម្មករបន្តទៀត។
លោក ស៊ឹង សែនករុណា៖ «ការអំពាវនាវនេះយើងឃើញថាវាមិនជាចំនួនច្រើនទេ បើសិនជាប្រជាពលរដ្ឋឬក៏កម្មករគ្រប់រូបយល់ថា វាជាអំពើអយុត្តិធម៌គួរតែនាំគ្នាលើកទឹកចិត្តទៅដល់លោកម៉ម រិទ្ធី ហើយផ្តល់នូវការឧបត្ថម្ភសមរម្យណាមួយ តាមលទ្ធភាពដែលពួកគាត់អាចធ្វើទៅបានខ្ញុំគិតថា វាជាដំណោះស្រាយមួយល្អ»។
សាលាដំបូងរាជធានីភ្នំពេញ កាលពីថ្ងៃទី៧ ខែឧសភា បានចេញលិខិតជូនដំណឹងដល់ លោក ម៉ម រិទ្ធី ឱ្យមកបង់ប្រាក់ពិន័យចំនួន២លាន រៀល នៅការិយាល័យកិច្ចការគណនេយ្យរបស់សាលាដំបូងរាជធានីភ្នំពេញឱ្យបាន មុនថ្ងៃទី០៨ ខែមិថុនា ឆ្នាំ២០២៦ រៀងរាល់ម៉ោងធ្វើការជាកំណត់។ ក្នុងករណីមិនអនុវត្តតាមការជូនដំណឹងអំពីការបង់ប្រាកពិន័យនេះ តុលាការនឹងចេញដីកាបញ្ជាឱ្យបង្ខំ និងឱ្យឃុំខ្លួនតាមនីតិវិធី។
លោក រិទ្ធី កាលពីថ្ងៃទី៧ ខែឧសភា ឆ្នាំ២០២៤ ត្រូវបានសាលាដំបូងរាជធានីភ្នំពេញកាត់ទោសកំបាំងមុខ តាមមាត្រា ៤៩៤ ៤៩៥ និង ៥២៣ នៃក្រមព្រហ្មទណ្ឌ ក្រោយពីមានបណ្តឹងពីក្រុមហ៊ុន ជីនប៉ី គ្រុប ដែលជាកម្មសិទ្ធិរបស់ជនជាតិចិន។ លោកត្រូវបានតុលាការផ្ដន្ទាទោសឲ្យជាប់ពន្ធនាគាររយៈពេល១៨ខែពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទធ្វើឲ្យបាត់បង់ជំនឿលើសេចក្តីសម្រេចរបស់តុលាការ និងពិន័យជាប្រាក់ពីរលានរៀល (៥០០ដុល្លារ) ពាក់ព័ន្ធនឹងការបញ្ចេញមតិនៅលើបណ្ដាញសង្គម នៅក្នុងឆ្នាំ ២០២២ រិះគន់កាស៊ីណូ ជីនប៉ី ២ នៅក្នុងវិវាទការងារជាមួយបុគ្គលិកម្នាក់ និងរិះគន់ចំណាត់ការរបស់តុលាការទៅលើបុគ្គលម្នាក់នោះ។ លោកត្រូវបានតុលាការដោះលែងចេញពីពន្ធនាគារបន្ទាប់ពីអនុវត្តទោសរួចរាល់ ប៉ុន្តែត្រូវបានតុលាការបង្ខំឱ្យលោកបង់ប្រាក់ពិន័យជូនតុលាការនៅពេលនេះ។
ទោះជាយ៉ាងណា កាស៊ីណូរបស់ក្រុមហ៊ុនជីនប៉ី គ្រុប នៅខេត្តព្រះសីហនុ ដែលលោក ម៉ម រិទ្ធី ធ្លាប់រិះគន់នេះ ត្រូវបានសមត្ថកិច្ចបិទទ្វារមិនឱ្យដំណើរការកាលពីខែវិច្ឆិកា ឆ្នាំ២០២៥ ក្រោយពីសមត្ថកិច្ចរកឃើញថា កាស៊ីណូមួយនេះមានជាប់ពាក់ព័ន្ធនឹងប្រតិបត្តិការឆបោកតាមអនឡាញ៕
