ម្ដាយរបស់ព្រះភិក្ខុ ជា វុទ្ធី ទទូចឲ្យតុលាការនិងរដ្ឋាភិបាលដោះលែងកូនប្រុសរបស់លោកស្រីឲ្យមានសេរីភាពវិញ ដោយថា ការចាប់កូនប្រុសដាក់ពន្ធនាគារនេះគឺជាការដាក់សម្ពាធ និងធ្វើទុក្ខបុកម្នេញផ្លូវចិត្តលោកស្រី ខណៈបច្ចុប្បន្នលោកស្រីរស់នៅរំពឹងលើកូនប្រុស។ សង្គមស៊ីវិល ថា តុលាការ និងរដ្ឋាភិបាល គួរពិចារណាដោះលែងព្រះភិក្ខុ ជា វុទ្ធី ឲ្យនៅក្រៅឃុំ ដើម្បីបានជួបជុំម្ដាយចាស់ជរាវិញ។
ម្ដាយរបស់ព្រះភិក្ខុ ជា វុទ្ធី លើកឡើងថា ទោះបីជាលោកស្រីមានវ័យចាស់ភ្លេចភ្លាំងស្មារតី ក៏លោកស្រីនៅតែទៅស៊ីឈ្នួលដាំត្រាវឲ្យគេ ដើម្បីបានប្រាក់ទិញអាហារ និងឡើងមកភ្នំពេញមើលកូនប្រុសនៅពន្ធនាគារ។
ម្ដាយរបស់ព្រះភិក្ខុ ជា វុទ្ធី គឺលោកស្រី ចាន់ ម៉ៅ ប្រាប់ទូរទស្សន៍អាស៊ីសេរីនៅ ថ្ងៃទី២២ ខែមេសាថា ចាប់តាំងពីកូនប្រុសជាប់ពន្ធនាគារមក ស្មារតីលោកស្រីភ្លេចភ្លាំង ដោយនឹកអាណិត និងបារម្ភពីកូន។ លោកស្រីបន្តថា កន្លងមក លោកស្រី បានកូនប្រុសជួយដោះស្រាយបញ្ហាជីវភាពខ្លះទោះបីតិចតួចក្ដី ប៉ុន្តែធ្វើឲ្យលោកស្រីកក់ក្ដៅ។
លោកស្រីទទូចឲ្យតុលាការ និងរដ្ឋាភិបាលដោះលែងកូនប្រុសរបស់លោកស្រីឲ្យមានសេរីភាពវិញ ដោយថា ការចាប់កូនប្រុសដាក់ពន្ធនាគារនេះ គឺជាការដាក់សម្ពាធ និងធ្វើទុក្ខបុកម្នេញផ្លូវចិត្តលោកស្រី ដែលមានវ័យចាស់ជរាទៅហើយ។
លោកស្រី ចាន់ ម៉ៅ៖ «ខ្ញុំជាប់បាន ខ្ញុំទៅប្ដូរជាមួយកូនខ្ញុំហើយ ឲ្យគេដាក់គុកខ្ញុំចុះ កុំឲ្យដាក់គុកកូនខ្ញុំ ខ្ញុំអាណិតកូន។ ខ្ញុំក៏មិនដឹងដែរ បើសិនជាគេផ្ទេរបាន ខ្ញុំសុខចិត្តចូលគុក ឲ្យកូនខ្ញុំចេញហើយ។ ខ្ញុំបាយមិនដឹងបាយទឹកមិនដឹងទឹក ទៅជាវង្វេងបាត់ខោបាត់ អាវអស់ហើយ។មួយយប់ៗ ខ្ញុំដេកមិនលក់ទេបារម្ភពីកូនក៏គិតបារម្ភពីសុខភាពក៏គិតពេលណាគេជួយលុយបន្តិចបន្តួចអត់ហ៊ានចាយទេ យកទៅភ្នំពេញទិញនេះ ទិញនោះឲ្យកូនហូប»។
ទូរទស្សន៍អាស៊ីសេរីមិនអាចសុំការអត្ថាធិប្បាយពីអ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ បានទេ នៅថ្ងៃទី២២ ខែមេសា ។
ព្រះភិក្ខុ ជា វុទ្ធី ត្រូវបានសមត្ថកិច្ចខេត្តបាត់ដំបង ស្លៀកពាក់ស៊ីវិល ចុះទៅចាប់ផ្សឹកនៅព្រឹកថ្ងៃទី០១ ខែមេសា និងបានបញ្ជូនទៅកាន់សាលាដំបូងរាជធានីភ្នំពេញ នៅថ្ងៃបន្ទាប់ នឹងត្រូវបានចោទប្រកាន់ ពីបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបញ្ជូនទៅឃុំខ្លួនបណ្ដោះអាសន្ន នៅពន្ធនាគាររាជធានីភ្នំពេញ ដោយសារព្រះអង្គបង្ហោះសារនិយាយពីបញ្ហាព្រំដែនកម្ពុជា-ថៃនៅលើបណ្តាញសង្គមហ្វេសប៊ុក (Facebook)។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក លោក យិន ម៉េងលី លើកឡើងថា តុលាការ និងរដ្ឋាភិបាល គួរពិចារណាដោះលែងលោក ជា វុទ្ធី ឲ្យនៅក្រៅឃុំ ដើម្បីលោកបានជួបជុំម្ដាយវិញ។ លោកទទូចឲ្យរដ្ឋាភិបាលបើកលំហសេរីភាពឲ្យ ពលរដ្ឋ បញ្ចេញមតិ ពីព្រោះការចាប់ខ្លួនពលរដ្ឋដាក់ពន្ធនាគារនេះ មិនបានផ្ដល់ផលចំណេញដល់រដ្ឋាភិបាលឡើយ។
លោក យិន ម៉េងលី៖ «គាត់នៅនឹកស្រណោះ ហើយគាត់ជាមនុស្សចាស់ហាក់បីដូចជា មានភាពពិការផ្លូវចិត្ត កូនប្រុសជាប់ពន្ធនាគារទៀត នេះជារឿងមួយគួរឲ្យអាណិត អាសូរណាស់បើសិនជាយើងនិយាយផ្លូវច្បាប់។ យើងចង់និយាយផ្លូវលោកវិញ គប្បីពិចារណាដែលបញ្ហានេះ ព្រោះថា ការធ្វើបុណ្យធ្វើទានក៏វាជារឿងល្អដែរ សម្រាប់ខ្មែរ សម្រាប់ថ្នាក់ដឹកនាំ គួរតែពិចារណា ហើយអ្វីដែលសំខាន់បទល្មើស របស់លោក វុទ្ធី នេះមិនមែនជាបទល្មើសមនុស្សឃាត បទល្មើសអនឡាញ ពួកចាប់ ជំរិតអីទេ មិនមែនជាបទល្មើសប្លន់ សម្លាប់អីទេ គឺវាពាក់ព័ន្ធទៅនឹងការបញ្ចេញមតិ ។ អ៊ីចឹងយើងនៅតែសោកស្ដាយណាស់ យើងនៅតែទទូចដល់រដ្ឋាភិបាល ដល់ តុលាការ ដោះលែងលោកឲ្យនៅក្រៅឃុំជាបណ្ដោះអាសន្នទៅ»។
ពលរដ្ឋចាត់ទុកការឃុំខ្លួនព្រះអង្គ ជា វុទ្ធី គឺជាការបំបិទសំឡេងអ្នកហ៊ានរិះគន់ទៅលើរដ្ឋាភិបាល ដើម្បីបំបាក់ស្មារតីដល់ពលរដ្ឋផ្សេងទៀត មិនឲ្យបញ្ចេញមតិរិះគន់របបត្រកូលហ៊ុន ពាក់ព័ន្ធនឹងបញ្ហាព្រំដែនកម្ពុជា-ថៃ ដែលកម្ពុជាបាត់បង់ទឹកដីទៅប្រទេសថៃ ជាច្រើនទីតាំង។ គិតមកដល់បច្ចុប្បន្ន សមត្ថកិច្ចនៃរដ្ឋាភិបាល លោក ហ៊ុន ម៉ាណែត នៅតែបន្ត ចាប់ខ្លួនពលរដ្ឋដាក់ពន្ធនាគារដោយសារតែ ការបញ្ចេញមតិឈឺឆ្អាលពីបញ្ហាសង្គមនិងទឹកដី ដែលគិតមកដល់ពេលនេះមានជិត ១០០នាក់ហើយ រួមមាន ព្រះសង្ឃ កម្មករ សកម្មជនសង្គម សកម្មជននយោបាយ និងអ្នកសារព័ត៌មានជាដើម៕
