អ្នកតាមដានសង្គមអះអាងថា វៀតណាមមានការព្រួយបារម្ភខ្លាច ពលរដ្ឋខ្មែរកម្ពុជាក្រោម រត់មកជ្រកកោននៅក្នុងប្រទេសកម្ពុជា ធ្វើសកម្មភាពតស៊ូមតិជុំវិញ បញ្ហាសិទ្ធិសេរីភាព សិទ្ធិសាសនា ឬសិទ្ធិស្វ័យសម្រេចរបស់ខ្មែរកម្ពុជាក្រោម ទើបវៀតណាមស្នើ ប្រធានព្រឹទ្ធសភាកម្ពុជា លោក ហ៊ុន សែន ឱ្យកម្ពុជារួមសាមគ្គីគ្នាជាមួយវៀតណាមក្នុងការការពារសន្តិសុខ និងទប់ស្កាត់ការប្រើប្រាស់ទឹកដីរបស់ប្រទេសមួយ ដើម្បីធ្វើសកម្មភាពប្រឆាំងនឹងប្រទេសមួយទៀត។
ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍ នៃរដ្ឋាភិបាលកម្ពុជាឯករាជ្យ ២៣តុលា លោក អ៊ុំ សំអាន ប្រាប់ទូរទស្សន៍អាស៊ីសេរីថា វៀតណាមព្រួយបារម្ភខ្លាចពលរដ្ឋខ្មែរកម្ពុជាក្រោម ដែលតស៊ូមតិជុំវិញ បញ្ហាសិទ្ធិសេរីភាព សិទ្ធិសាសនា ឬក៏សិទ្ធិស្វ័យសម្រេច របស់ខ្មែរក្រោម រត់មកកម្ពុជា ដូច្នេះហើយបានជាវៀតណាមចង់ ឲ្យកម្ពុជាសហការដើម្បីចាប់បញ្ជូនពួកគេទៅវៀតណាម។
ការលើកឡើងរបស់ប្រមុខដឹកនាំស្ថាប័នអធិបតេយ្យជាតិព្រំដែន និងអន្តោប្រវេសន៍រូបនេះ គឺបន្ទាប់ពី រដ្ឋមន្ត្រីក្រសួងនគរបាលនៃសាធារណរដ្ឋសង្គមនិយមវៀតណាម លោក លឿង តាមក្វាង (LUONG TAM QUANG) លើកឡើងនៅក្នុងជំនួបជាមួយលោក ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជានៅថ្ងៃទី៣០មិថុនា ថា កម្ពុជា និងវៀតណាម បានរួមសាមគ្គីគ្នាក្នុងការធ្វើកិច្ចការងារការពារសន្តិសុខ ដោយធ្វើយ៉ាងណាប្រយុទ្ធប្រឆាំងកម្លាំងណាមួយដែលប្រើប្រាស់ទឹកដីម្ខាង ហើយប្រឆាំងទៅនឹងប្រទេសមួយទៀត។
នៅក្នុងជំនួបនោះ លោក ហ៊ុន សែន បានសម្តែងការពេញចិត្ត និងគាំទ្រ ដោយបន្ថែមថា ចំណុចដែលជៀសវាងឱ្យបាននោះ គឺជៀសវាងកុំឲ្យមានការប្រើប្រាស់កម្លាំងនៅក្នុងប្រទេសណាមួយប្រឆាំងប្រទេសមួយផ្សេងទៀត ឧទាហរណ៍ដូចជាការប្រើប្រាស់កម្លាំងលើទឹកដីនៅក្នុងប្រទេសវៀតណាម ហើយប្រឆាំងទៅនឹងកម្ពុជា ឬក៏ប្រើប្រាស់ទឹកដីកម្ពុជាប្រឆាំងទៅនឹងវៀតណាម ដែលចំណុចនេះភាគីទាំងពីរត្រូវសហការគ្នាធ្វើយ៉ាងណាកុំឲ្យមានករណីបែបនេះកើតឡើង។
លោក អ៊ុំ សំអាន យល់ថា ប្រទេសវៀតណាមជាប្រទេសកុម្មុយនិស្តផ្ដាច់ការ ដូច្នេះវៀតណាមនឹងមិនផ្តល់សិទ្ធិជ្រកកោន ឬផ្តល់ភាពសុខស្រួលចំពោះអ្នកប្រជាធិបតេយ្យ និងអ្នកតស៊ូមតិនោះទេ។
លោក អ៊ុំ សំអាន៖ «ខ្លាចពួកម៉ុងតាញ៉ាអី រត់មក ជ្រកកោននៅកម្ពុជា កន្លងមកក៏កម្ពុជាចាប់បញ្ជូនទៅវិញដែរ អាហ្នឹងយើងឃើញអ៊ីចឹង ខ្មែរក្រោម ភាគច្រើនហើយដែល មកស្នាក់នៅកម្ពុជា ត្រូវបានលោក ហ៊ុន សែន ចាប់បញ្ជូនទៅវិញ ដូចជាព្រះអង្គ ទឹម សាខន ព្រះចៅអធិការនៅ ភ្នំដិន នៅខេត្តតាកែវ កាលប្រមាណឆ្នាំមុននោះ ក៏ធ្លាប់ចាប់បញ្ជូនទៅ ដាក់គុកនៅប្រទេសវៀតណាមវិញដែរ»។
ជុំវិញបញ្ហានេះ អ្នកនាំពាក្យរដ្ឋាភិបាលកម្ពុជាឯករាជ្យ ២៣តុលា លោក គឹម សុខ បានប្រាប់វិទ្យុអាស៊ីសេរីថា គន្លឹះអនុវត្តរបស់វៀតណាម និងគណបក្សប្រជាជនកម្ពុជានៃក្រុមគ្រួសារហ៊ុន មិនឲ្យភាគីណាមួយ ប្រើប្រាស់ទឹកដី របស់ខ្លួនដើម្បីប្រឆាំងភាគីមួយផ្សេងទៀត គឺសំដៅមិនឲ្យអ្នកប្រជាធិបតេយ្យខ្មែរ អាចប្រើប្រាស់ទឹកដីកម្ពុជាក្រោម ដែលស្ថិតនៅក្រោមការត្រួតត្រារបស់វៀតណាម ចូលទៅក្នុងប្រទេសកម្ពុជា ធ្វើឲ្យដួលរលំអំណាចគណបក្សប្រជាជនកម្ពុជា។
លោក គឹម សុខ បន្ថែមទៀតថា ក្នុងករណីចាំបាច់ ដែលគណបក្សប្រជាជនកម្ពុជា មិនអាចទប់ស្កាត់នូវចលនាប្រជាធិបតេយ្យ ដែលអាចធ្វើឲ្យគណបក្សប្រជាជនកម្ពុជារលំអំណាចនោះ គឺវៀតណាម គេប្រើរូបភាពក្នុងកិច្ចសហប្រតិបត្តិការសន្តិសុខ បញ្ជូនកងទ័ពវៀតណាម ចូលទឹកដីកម្ពុជា ដើម្បីការពារអំណាចគណបក្សប្រជាជនកម្ពុជាតែម្តង។
លោក គឹម សុខ៖ «ហើយបើនិយាយឱ្យចំ កិច្ចសហប្រតិបត្តិការសន្តិសុខរវាងវៀតណាម ហើយនិងគណបក្សប្រជាជនកម្ពុជាដែលកំពុងតែត្រួតត្រាកម្ពុជានោះ គឺជាគំរូ បម្រុងឈ្លានពានជាលើកទីពីរដោយកងទ័ពវៀតណាមចូលទឹកដីកម្ពុជា ដូចគំរូនៃថ្ងៃ៧មករា១៩៧៩អញ្ចឹងដែរ»។
ទាក់ទងនឹងការចាប់បញ្ជូនមនុស្សទៅប្រទេសវៀតណាមវិញនេះ កន្លងមក លោក ហ៊ុន សែន ព្រមានបិទអង្គការអន្តរជាតិនៅកម្ពុជា បើពួកគេហ៊ានជួយជនជាតិម៉ុងតាញ៉ា ដែលរត់ ឬកំពុងភៀសខ្លួននៅកម្ពុជា ដោយលោកចោទថា ក្រុមជនជាតិម៉ុងតាញ៉ា នេះជាអ្នកបាញ់សម្លាប់អាជ្ញាធរ និងមន្ត្រីនៅក្នុងប្រទេសវៀតណាម។
សកម្មជនសិទ្ធិមនុស្ស មានការព្រួយបារម្ភ ថាជនជាតិភាគតិចម៉ុងតាញ៉ា ដែលភាគច្រើនកាន់សាសនាគ្រិស្តមកពីតំបន់ភ្នំក្នុងប្រទេសវៀតណាមអាចប្រឈមនឹងការធ្វើទុក្ខបុកម្នេញ ក្រោយពីពួកគេត្រឡប់ទៅប្រទេសកំណើតវិញ។ ការធ្វើទុក្ខបុកម្នេញនេះកើតឡើងដោយសារតែក្រុមជនជាតិភាគតិចនេះមានប្រវត្តិចងសម្ព័ន្ធមិត្តជាមួយនឹងយោធាអាមេរិកក្នុងអំឡុងសង្គ្រាមវៀតណាម ដែលក្រុមនេះប្រយុទ្ធដើម្បីសិទ្ធិដីធ្លីនិងធ្វើការតវ៉ាប្រឆាំងនឹងការដឹកនាំបែបកុម្មុយនិស្ត និងជំនឿសាសនារបស់ខ្លួន មិនខុសគ្នានឹងពលរដ្ឋកម្ពុជាក្រោមដែលតែងតែងើបតវ៉ាដើម្បីការពារវប្បធម៌និងប្រពៃណីរបស់ខ្លួន៕
