តុលាការកំពូល​បដិសេធសំណើសុំស្រូបទោសរបស់​សកម្មជន​សង្គ្រោះជាតិ លោក វឿង សំណាង

សកម្មជនគណបក្សសង្គ្រោះជាតិ គឺលោក វឿង សំណាង នៅតែត្រូវជាប់​ពន្ធនាគារ ១១ឆ្នាំដដែល បន្ទាប់ពីតុលាការកំពូល​បានច្រានចោលសំណើស្រូបទោសរបស់លោក។ សង្គមស៊ីវិល​ថា តុលាការសម្រេចសេចក្ដីបែបនយោបាយ គឺ​ពុំមែនផ្អែកលើអង្គហេតុ និង អង្គច្បាប់នោះឡើយ។

ទីបំផុតតុលាការកំពូល នៅថ្ងៃទី១៤ ខែតុលា បានប្រកាសសាលដីកា ដោយ សម្រេច​ឱ្យអតីត​ចៅសង្កាត់រងទី២ របស់គណបក្សសង្គ្រោះជាតិ នៅរាជធានីភ្នំពេញ លោក វឿង សំណាង អនុវត្ត​ទោសក្នុងពន្ធនាគាររយៈពេល ១១ឆ្នាំដូចការ សម្រេច​របស់តុលាការថ្នាក់ក្រោមដែរ។ យ៉ាងណា សមត្ថកិច្ចពន្ធនាគារមិនបាន ដឹកលោក វឿងសំណាងទៅតុលាការ ដើម្បីឲ្យលោកបាន​ស្ដាប់ការ​ប្រកាសសាលក្រម​ឡើយ។

ប្រពន្ធលោក វឿង សំណាង គឺលោកស្រី ទៀង ចិន្តា ចាត់ទុកសេចក្ដីសម្រេច​របស់​តុលាការ​កំពូល ថាជារឿងអយុត្តិធម៌។

លោកស្រី ទៀង ចិន្ដា មានប្រសាសន៍ថា ប្ដីលោកស្រី ជាប់ពន្ធនាគារអស់​រយៈពេល ៥ឆ្នាំហើយ ដោយគ្រាន់តែលោកអនុវត្តសិទ្ធិនយោបាយជាមូលដ្ឋាន ស្របតាមរដ្ឋធម្មនុញ្ញ ។ ដូច្នេះ លោកស្រី​ថា ខណៈនេះ ជាពេលសមល្មមហើយ ដែល​តុលាការត្រូវដោះលែង និង ផ្ដល់សេរីភាព​ដល់ប្ដីលោកស្រីវិញ ដោយមិនគួរបន្ដធ្វើ​ឲ្យមានការឈឺចាប់កាន់តែខ្លាំង ដល់គ្រួសារ​លោកស្រី​ទៀតនោះទេ ។

កូនស្រីរបស់លោក វឿង សំណាង ដែលមានជំងឺអូទីហ្សឹម និយាយថា នាងនឹក ឪពុក និង ចង់ជួបឪពុកដូចក្មេងៗដទៃទៀតដែរ។ ក្មេងស្រីរូបនេះ រៀបរាប់ជាច្រើន ប្រាប់ទូរទស្សន៍អាស៊ីសេរី អំពីផ្លូវចិត្ត ដែលខ្វះភាពកក់ក្ដៅ ខណៈអ្នកស្រីរស់នៅ យ៉ាងលំបាកជាមួយម្ដាយ ក្នុងពេលឪពុករបស់នាង ត្រូវអ្នកមានអំណាចចាប់ដាក់ ពន្ធនាគារ​យ៉ាងអយុត្តិធម៌ ដែលជាការព្រាត់ប្រាស់ភ្នែកស្រស់។

លោក វឿង សំណាង ធ្លាប់បានភៀសខ្លួនទៅរស់នៅទីក្រុង​បាងកកប្រទេសថៃ ក្នុង​ឋានៈជា​ជនភៀស​ខ្លួននយោបាយ ដែលទទួលស្គាល់ដោយអង្គការសហប្រជាជាតិ ទទួលបន្ទុកផ្នែក​សិទ្ធិ​មនុស្ស UNHCR។ ប៉ុន្តែ លោកត្រូវបានអាជ្ញាធរថៃ ចាប់ខ្លួន និងបញ្ជូនមក​កម្ពុជាវិញកាលពីខែ​វិច្ឆិកា ឆ្នាំ២០២១។

បន្ទាប់មកក្នុងខែធ្នូ ឆ្នាំ២០២២ លោក វឿង សំណាង និង​អតីតសកម្មជន​គណបក្ស​សង្គ្រោះជាតិ ចំនួន ៣៦នាក់ផ្សេងទៀត ត្រូវ​បាន​សាលាដំបូង រាជធានីភ្នំពេញ ផ្តន្ទាទោសឱ្យជាប់ពន្ធនាគារ​ម្នាក់ៗ  រយៈពេល៥ឆ្នាំពីបទ«រួមគំនិតក្បត់» ដែល ពាក់ព័ន្ធនឹងការគាំទ្រគម្រោង​វិលចូលស្រុក​របស់​ថ្នាក់ដឹកនាំគណបក្សសង្គ្រោះជាតិ។ 

ក្រោយ​មក​ទៀត  អំឡុងចុងឆ្នាំ ២០២៣ លោក វឿង សំណាង ក៏ត្រូវបានចៅក្រម សាលាដំបូង​រាជធានី ផ្តន្ទាទោសឱ្យជាប់​ពន្ធនាគារចំនួន ៦ ឆ្នាំបន្ថែមទៀត ពីបទ «រួមគំនិតក្បត់» ក្នុងសំណុំ​រឿង​មួយផ្សេងទៀត ពាក់ព័ន្ធនឹងការបង្ហោះសារក្នុង​បណ្តាញសង្គមហ្វេសប៊ុក។ មកដល់​ពេល​នេះ លោក វឿង សំណាង មានទោស​សរុបក្នុងពន្ធនាគារ រយៈពេល ១១ឆ្នាំ តែលោក ទើបតែ​អនុវត្តទោស​បាន ៥ឆ្នាំ ប៉ុណ្ណោះ។

នាយកទទួលបន្ទុកកិច្ចការទូទៅ នៃអង្គការ​ការពារសិទ្ធិមនុស្ស​លីកាដូ លោក អំ សំអាត យល់ថា ការសម្រេចក្ដីរបស់តុលាការ ដែលផ្ដន្ទាទោសលោក វឿង សំណាង ក្នុងសំណុំរឿងទាំងពីរ មាន​ស្ថានភាពធ្ងន់ធ្ងរ។ លោកលើកឡើងថា ទាំងអង្គការសិទ្ធិមនុស្សក្នុងស្រុក និង​ទាំង​សហគមន៍​អន្តរជាតិ​ចង់ឃើញមាន ការដោះលែងអ្នកទោសនយោបាយ និង អ្នកទោសមនសិការ ដើម្បីបង្ក​បរិយាកាស ល្អ​មុនការបោះឆ្នោត ឆ្នាំ២០២៧ និង ឆ្នាំ២០២៨ ។

លោក វឿង សំណាង ជាអ្នកនយោបាយថ្នាក់មូលដ្ឋានដ៏សកម្មនិងស្មោះត្រង់ ចំពោះឆន្ទៈម្ចាស់​ឆ្នោត។ ក្នុងឆ្នាំ២០១៣ លោក វឿង សំណាង ដែលកាលនោះ ជា​ព្រះសង្ឃ​បានចូលរួមធ្វើ​បាតុកម្ម​ទាមទារដំឡើងប្រាក់ឈ្នួលកម្មកររោងចក្រ ហើយ​ក្នុងគ្រានោះ លោក​រួមទាំងកម្មករផ្សេងទៀត ត្រូវ​កងទ័ពឆ័ត្រ​យោង​វាយ​បង្ក្រាប ស្ទើរ​ស្លាប់បាត់បង់ជីវិត និង​បន្សល់ទុក នូវស្នាមរបួស និង​ការឈឺចាប់រហូតមក​ដល់​សព្វថ្ងៃ។

ក្នុង​ឆ្នាំ​២០១៧ លោក វឿង សំណាង បានជាប់ឆ្នោតជាចៅសង្កាត់រងទី២ របស់​គណបក្ស សង្គ្រោះជាតិ នៅ​រាជធានីភ្នំពេញ។ បន្ទាប់ពីរដ្ឋាភិបាលលោក ហ៊ុន សែន បានប្ដឹងរំលាយ​គណបក្ស​សង្គ្រោះជាតិ ក្នុងខែវិច្ឆិកា ឆ្នាំ២០១៧ លោក វឿង សំណាង បានបង្ខំចិត្តរត់ភៀសខ្លួន ទៅរស់នៅ​ប្រទេស​ថៃ ដើម្បី​គេច​ពី​ការ​បង្ខំ​ឱ្យ​ចូលរួមជាមួយគណបក្សកាន់អំណាច។

អង្គការលីកាដូ​ឱ្យដឹងថា លោក វឿង សំណាង បានជាប់ក្នុងពន្ធនាគារអស់ រយៈពេលជាង​១​ពាន់៨០០ ថ្ងៃហើយ គិតត្រឹមថ្ងៃទី១៤ ខែតុលា ឆ្នាំ២០២៦នេះ។ លោក សំណាង ស្ថិត​ក្នុង​ចំណោម​អ្នក​ជាប់​ពន្ធនាគារជាង ១០០នាក់ ដោយសារ​ភាព​សកម្មនិយម ក្នុងសង្គម ឬ ការ​ប្រើសិទ្ធិបញ្ចេញមតិ៕