តុលាការកំពូលសម្រេចតម្កល់សាលដីកាសាលាឧទ្ធរណ៍ភ្នំពេញ ដែលផ្ដន្ទាទោសប្រធានសមាគមនិស្សិតបញ្ញវន្តខ្មែរ (KSILA) លោក កើត សារ៉ាយ ឲ្យជាប់ពន្ធនាគារ ៤ឆ្នាំ ក្រោមបទចោទ«ញុះញង់ និងមិនរាងចាល» ។ សង្គមស៊ីវិលខកចិត្តចំពោះសេចក្ដីសម្រេចនេះ ដោយចាត់ទុកថា នេះជាការបំបាក់ស្មារតីអ្នកធ្វើការការងារសង្គម។
ប្រធានក្រុមប្រឹក្សាជំនុំជម្រះតុលាការកំពូល នៅថ្ងៃទី០៣ ខែកក្កដា បាន ច្រានចោលសំណើរបស់មេធាវីការពារក្ដីឲ្យលោក កើត សារ៉ាយ ដោយតម្កល់ សាលដីកាសាលាឧទ្ធរណ៍ភ្នំពេញ ដែលផ្ដន្ទាទោសលោក កើត សារ៉ាយ ឲ្យជាប់ ពន្ធនាគារ ៤ ឆ្នាំ ទុកជាបានការដដែល។
អ្នកគាំទ្រលោក កើត សរ៉ាយ គឺលោក ខាន់ ចាន់ថន ចាត់ទុកការសម្រេចនេះ ថាជារឿងអយុត្តិធម៌។ លោកទទូចឲ្យតុលាការកាត់ក្ដីដោយសុភវិនិច្ឆ័យ និងការពារ ផលប្រយោជន៍ជាតិជាធំ ជាជាងយកអំណាចមកធ្វើបាបពលរដ្ឋ។
លោក ខាន់ ចាន់ថន៖ «នេះជាភាពអយុត្តិធម៌មួយ ដែលខ្ញុំមើលឃើញ។ ខ្ញុំក៏អំពាវនាវ ដល់ប្រជាពលរដ្ឋខ្មែរទាំងអស់គ្នា ឲ្យចូលរួមសកម្មភាពសង្គមទាំងអស់គ្នា ដើម្បី យុត្តិធម៌សង្គម ក៏ដូចជាអ្នករងគ្រោះដោយភាពអយុត្តិធម៌។ ខ្ញុំគិតថា ប្រជាពលរដ្ឋ យើងគួរតែមានស្មារតីជាតិតែមួយ ចេះស្រឡាញ់ និងការពារគ្នា ក៏ដូចជា យុត្តិធម៌ សង្គម។ ថ្ងៃណាមួយពេលដែលដល់ខ្លួនយើង ទើបយើងភា្ញក់រលឹក ទើបយើងចាំ ចូលរួមយឺតពេលហើយ»។
សាលាដំបូងរាជធានីភ្នំពេញ និង សាលាឧទ្ធរណ៍ភ្នំពេញ ដែលកាត់ឲ្យលោក កើត សារ៉ាយ ជាប់ពន្ធនាគារ ៤ឆ្នាំនោះ ចោទប្រកាន់ប្រធានសមាគមសម្ពន្ធនិស្សិតបញ្ញវន្តខ្មែររូបនេះ ពីបទ«មិនរាងចាលក្នុងបទមជ្ឈិមបន្ទាប់ពីការផ្ដន្ទាទោស បទមជ្ឈិម» និង បទ«ញុះញង់បង្កឲ្យមានភាពវឹកវរដល់សន្តិសុខសង្គម» ពាក់ព័ន្ធនឹងការផ្តល់ បទ សម្ភាសន៍ដល់សារព័ត៌មានអំពីករណីដែលលោក បានចុះជួបពលរដ្ឋរងគ្រោះ ដីធ្លី ពីការបណ្តេញពលរដ្ឋចេញដោយបង្ខំនៅស្រុកគូលែន ខេត្តព្រះវិហារ កាលពីដើម ឆ្នាំ ២០២៤។
មន្ត្រីជាន់ខ្ពស់ នៃសមាគមការពារសិទ្ធិមនុស្ស អាដហុក (ADHOC) លោក យី សុខសាន្ត ខកចិត្តចំពោះការសម្រេចរបស់តុលាការកំពូល និងទទូចឲ្យ រដ្ឋាភិបាល ស្នើសុំទៅអង្គព្រះមហាក្សត្រ ដើម្បីដោះលែងអ្នកធ្វើការងារសង្គមទាំងអស់ឲ្យមាន សេរីភាព វិញ ព្រោះអ្នកធ្វើការងារសង្គម គឺដើម្បីជួយបំពេញចន្លោះខ្វះខាត ឲ្យ រដ្ឋាភិបាលតែប៉ុណ្ណោះ។
លោក យី សុខសាន្ត៖ «គាត់មើលឃើញមានបញ្ហារំលោភសិទ្ធិមនុស្ស ហើយគាត់យក មកនិយាយវាមិនខុសច្បាប់ទេ ហើយសិនជាវាខុស វាគ្រាន់តែជាការសុំទោសឬ មួយក៏ជាការបំភ្លឺនូវអ្វីមួយទៅ វាជាការចប់ហើយ មិនចាំបាច់យកគាត់ទៅដាក់ ទោសទណ្ឌទេ។ ការដាក់ទោសទណ្ឌ គាត់យូរឆ្នាំនេះ មិនរាងចាលរហូតដល់ពិន័យ ៤ លាន ហើយដាក់ទោសដល់ ៤ ឆ្នាំនេះវាជាការធ្វើទុក្ខមួយ ជាការឈឺចាប់ មួយសម្រាប់ពួកគាត់ ហើយបង្កជាការព្រមានដល់អង្គការផ្សេងៗ ក៏ដូចជា យុវជន ផ្សេងៗ មិនហ៊ានឲ្យនិយាយ មើលឃើញខុសហើយ មិនហ៊ាននិយាយ។ នេះជាការគំរាមកំហែងផ្នែកស្មារតីមួយទៀតសម្រាប់អ្នកដែលហ៊ាននិយាយ»។
ស្រដៀងគ្នានេះ នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្ស លីកាដូ (LICADHO)លោក អំ សំអាត សោកស្ដាយ និងចាត់ទុកការផ្ដន្ទាទោស នេះថា នឹងប៉ះពាល់ដល់សកម្មភាពរបស់អង្គការសង្គមស៊ីវិលខណៈសកម្មភាព របស់លោក កើត សារ៉ាយ ចុះជួបពលរដ្ឋរងគ្រោះដីធ្លី គឺដើម្បីស្វែងរកការពិត និងបញ្ហា រួចដាក់ជាសំណូមពរទៅរដ្ឋាភិបាលឲ្យជួយដោះស្រាយសម្រាប់ពលរដ្ឋ តាមលក្ខន្តិកៈចុះបញ្ជី និងតម្កល់លក្ខន្តិកៈ នៅក្រសួងមហាផ្ទៃ។
លោក អំ សំអាត៖ «អ៊ីចឹងហើយបានកន្លងមក មានការលើកឡើងរិះគន់ថា លំហសេរីភាពសង្គមស៊ីវិល ត្រូវមានការរឹតត្បិតហ្នឹង គឺករណីលោក កើត សារ៉ាយ នេះ ក៏ត្រូវបានសហគមន៍អន្តរជាតិគេ លើកយកមកធ្វើជាករណីសិក្សានៅក្នុងករណី ដែល គេលើកឡើងពីលំហសង្គមស៊ីវិលត្រូវមានការរឹតត្បិតផងដែរ»។
លោក កើត សារ៉ាយ ធ្លាប់ត្រូវបានតុលាការផ្ដន្ទាទោស ដាក់ពន្ធធនាគារម្តងរួចមក ហើយ ពីបទ«ញុះញង់» កាលពីឆ្នាំ២០២១ ពាក់ព័ន្ធនឹងការតវ៉ាអហិង្សា ទាមទារឲ្យដោះលែងអតីតមេដឹកនាំសហជីព និងបច្ចុប្បន្នជាទីប្រឹក្សាគណបក្សកម្លាំងជាតិ លោក រ៉ុង ឈុន។ ចំណែកលើកទីពីរនេះលោក បានជាប់ក្នុង ពន្ធនាគារ រយៈពេលជាង ២ ឆ្នាំ មក ហើយ ក្រោមបទចោទ «ញុះញង់»ក្រោយពេល ដែលលោកបានផ្តល់បទសម្ភាសន៍ ដល់អ្នកសារព័ត៌មានដោយនិយាយអំពីជម្លោះដីធ្លីមួយ នៅក្នុងខេត្តព្រះវិហារ។
លោក កើត សារ៉ាយ គឺជាអ្នកទោសមនសិការម្នាក់ ក្នុងចំណោមអ្នកទោស មនសិការ និងអ្នកទោសនយោបាយចំនួន ១១៧ ដែលកំពុងជាប់ពន្ធនាគារ ដោយការប្រើប្រាស់សិទ្ធិសម្ដែងមតិ និងបំពេញការងារ ស្របតាមស្មារតីរដ្ឋធម្មនុញ្ញ និងសិទ្ធិមនុស្សរបស់អង្គការសហប្រជាជាតិ៕
