អ្នកឃ្លាំមើលថា ថៃនឹងបន្តប្រើលេសបង្ក្រាបឧក្រិដ្ឋកម្មអនឡាញ ដើម្បីចូលកាន់កាប់ទឹកដីកម្ពុជាបើរដ្ឋាភិបាលមិនចាប់មេខ្លោងធំៗ

អ្នកឃ្លាំមើលលើកឡើងថា យោធាថៃនឹងនៅតែបន្តប្រើលេសរឿងប្រឆាំងឧក្រិដ្ឋកម្មឆបោកតាមអនឡាញ ដើម្បីឈ្លានពានទឹកដីខ្មែរបន្ថែមទៀត ប្រសិនបើរដ្ឋាភិបាលត្រកូល ហ៊ុន គ្មានឆន្ទៈចាប់ខ្លួនមេខ្លោងឆបោកអនឡាញធំៗដែលកំពុងនៅជុំវិញខ្លួន។ ការលើកឡើងនេះ បន្ទាប់ពីយោធាថៃបានដឹកនាំក្រុមអ្នកសារព័ត៌មានអន្តរជាតិចូលទឹកដីខ្មែរ ដោយខុសច្បាប់ ដើម្បីលាតត្រដាងពីទីតាំងនៃមជ្ឈមណ្ឌលឆបោកតាមអនឡាញនៅតំបន់អូរស្មាច់ខេត្តឧត្តរមានជ័យ។