ក្រុមអង្គការសមាគមខ្មែរកម្ពុជាក្រោម រង់ចាំការឆ្លើយតបពីរដ្ឋាភិបាលវៀតណាមបន្ទាប់ពីដាក់ញត្តិតាមរយៈស្ថានទូតវៀតណាមនៅក្រុងភ្នំពេញ នៅមុនដំណើរទស្សនកិច្ចរបស់អគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តវៀតណាម លោក តូ ឡឺម (To Lam) នៅកម្ពុជានៅថ្ងៃទី៦ ខែកុម្ភៈ។ រីឯអ្នកជំនាញកិច្ចការអន្តរជាតិ ទាមទារឲ្យមេដឹកនាំកម្ពុជា ហ៊ានលើកយក ទុក្ខវេទនារបស់ខ្មែរក្រោមប្រាប់មេដឹកនាំកំពូលរបស់វៀតណាមឲ្យផ្ដល់ដំណោះស្រាយ។
ក្រុមអង្គការសមាគមខ្មែរកម្ពុជាក្រោម និងអ្នកជំនាញកិច្ចការអន្តរជាតិទទូចឲ្យរដ្ឋាភិបាលវៀតណាមគោរពសិទ្ធិប្រជាពលរដ្ឋខ្មែរក្រោម ជាពិសេសត្រូវដោះលែងព្រះសង្ឃ និងសកម្មជនខ្មែរក្រោមទាំង ១២ អង្គនិងរូបកំពុងជាប់ពន្ធនាគារយ៉ាងអយុត្តិធម៌ឱ្យមានសេរីភាពឡើងវិញ។
អនុប្រធានសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោកបណ្ឌិត សឺន ជុំជួន ប្រាប់ទូរទស្សន៍អាស៊ីសេរីថា បញ្ហាឈឺចាប់ ដែលបានកើតឡើងចំពោះ ពលរដ្ឋខ្មែរក្រោម មានច្រើនលើសលប់។ ដូច្នេះ លោកថា អង្គការសមាគមខ្មែរកម្ពុជាក្រោមបានដាក់ញត្តិ ប្រាប់ថ្នាក់ដឹកនាំកំពូលវៀតណាម នូវទង្វើរបស់សមត្ថកិច្ចអាជ្ញាធរវៀតណាម ដែលបានប្រព្រឹត្តទៅលើពលរដ្ឋខ្មែរកម្ពុជាក្រោម ជាម្ចាស់ទឹកដីកម្ពុជាក្រោម នៅក្រោមការគ្រប់គ្រងរបស់វៀតណាមសព្វថ្ងៃ។
លោកបណ្ឌិត សឺន ជុំជួន សង្ឃឹមថា ញត្តិរបស់អង្គការសមាគមខ្មែរកម្ពុជាក្រោមនឹងដល់ដៃប្រមុខដឹកនាំកំពូលនៃប្រទេសវៀតណាម ឲ្យផ្ដល់ដំណោះស្រាយ។
បណ្ឌិត សឺន ជុំជួន៖ «អគ្គលេខាធិការបក្សកុម្មុយនិស្តវៀតណាម គាត់មកធ្វើទស្សន ច្ចជា ផ្លូវការនៅកម្ពុជា។ គាត់ជារដ្ឋតំណែងដ៏កំពូលនៅក្នុងប្រទេសវៀតណាម។ អ៊ីចឹងគាត់អាចមានឥទ្ធិពល នៅក្នុងការដឹងឮរាល់បញ្ហារបស់យើង ដែលជាទុក្ខកង្វល់របស់យើង។ គាត់ជាបុគ្គលដែលមានឥទ្ធិពលអាច លើកយកទៅដល់ថ្នាក់ដឹកនាំរដ្ឋាភិបាលវៀតណាម ដើម្បីឲ្យឃើញថា អ្វីដែលជាបញ្ហាដែលខ្មែរក្រោមលើកឡើង មិនមែនជាបញ្ហា ដែលកើតឡើងថ្មីៗនោះទេ គឺមានជាច្រើនទសវត្សរ៍មកហើយដែលកើតឡើងជារឿយៗ ហើយអំពើ និងទង្វើដែលកើតឡើងមានចំនួនតិចតួចបំផុត ដែលត្រូវបានដោះស្រាយ»។
ទូរទស្សន៍អាស៊ីសេរី មិនទាន់អាចសុំការឆ្លើយតបជុំវិញរឿងនេះ ពីស្ថានទូតវៀតណាម ប្រចាំនៅប្រទេសកម្ពុជា បានទេ នៅថ្ងៃទី៥ ខែកុម្ភៈ។
លេខាធិការដ្ឋាន នៃអង្គការសមាគមខ្មែរកម្ពុជាក្រោម ដែលមានសមាជិកចំនួន៩ បានដាក់ញត្តិតាមសារអេឡិចត្រូនិក (អ៊ីមែល) ទៅកាន់ស្ថានទូតវៀតណាមប្រចាំទីក្រុងភ្នំពេញ កាលពីថ្ងៃទី០៣ ខែកុម្ភៈ ដើម្បីទាមទារឱ្យរដ្ឋាភិបាលវៀតណាម បញ្ឈប់នូវរាល់ការរំលោភសិទ្ធិមនុស្ស សិទ្ធិជនជាតិដើមខ្មែរក្រោម និងត្រូវតែដោះលែងព្រះសង្ឃ និងសកម្មជនខ្មែរក្រោមទាំងអស់ ដែលកំពុងជាប់ឃុំឃាំង។ ញត្តិរបស់អង្គការសមាគមខ្មែរកម្ពុជាក្រោមនេះ ធ្វើឡើងស្របពេលដែលអគ្គលេខាធិការបក្សកុម្មុយនីស្តវៀតណាមលោក តូ ឡឹម ត្រៀមនឹងបំពេញទស្សនកិច្ចផ្លូវរដ្ឋនៅប្រទេសកម្ពុជា នៅថ្ងៃទី៦ ខែកុម្ភៈ។ អង្គការសមាគមខ្មែរកម្ពុជាក្រោម ស្នើឲ្យវៀតណាមអនុវត្តឱ្យបានត្រឹមត្រូវនូវនីតិវិធីពេលមានសវនាការ ចំពោះជនត្រូវចោទ ជាពិសេស លើជនត្រូវចោទជាខ្មែរក្រោម ពោលគឺត្រូវអនុញ្ញាតឱ្យជនត្រូវចោទមានសិទ្ធិគ្រប់គ្រាន់ក្នុងការស្វែងរកមេធាវី ដើម្បីការពារក្ដី។
អង្គការសមាគមខ្មែរកម្ពុជាក្រោម បានស្នើយ៉ាងទទូចដល់រដ្ឋអំណាច វៀតណាមត្រូវតែអនុញ្ញាតដល់គណៈពុទ្ធសាសនាថេរវាទខ្មែរក្រោម មានសមាគមដាច់ដោយឡែកពីសមាគមព្រះពុទ្ធសាសនាវៀតណាម ដើម្បីមានឱកាសក្នុងការប្រណិប័តន៍ធម៌វិន័យរបស់ខ្លួនឱ្យបានត្រឹមត្រូវ ស្របទៅតាមគោលការណ៍ នៃសេរីភាពសាសនារបស់អង្គការសហប្រជាជាតិ។
អង្គការសមាគមខ្មែរកម្ពុជាក្រោម ក៏បានស្នើឱ្យរដ្ឋសភាវៀតណាម ធ្វើវិសោធនកម្មមាត្រា ៣៣១ នៃក្រមព្រហ្មទណ្ឌរបស់វៀតណាម ឱ្យសមស្របទៅតាមរដ្ឋធម្មនុញ្ញ នៃសាធារណរដ្ឋសង្គមនិយមវៀតណាម សេចក្ដីប្រកាស និងកតិកាសញ្ញានានាស្ដីពីសិទ្ធិមនុស្សរបស់អង្គការសហប្រជាជាតិ ដែលប្រទេសវៀតណាមជាហត្ថលេខី។ បន្ថែមលើនេះទៀត អង្គការសមាគមខ្មែរកម្ពុជាក្រោម ទាមទារឲ្យរដ្ឋអំណាចវៀតណាម ទទួលស្គាល់ជាផ្លូវការជនជាតិខ្មែរក្រោម ដែលកំពុងរស់នៅក្រោមការគ្រប់គ្រងរបស់វៀតណាម ជាជនជាតិដើមពេញសិទ្ធិ។
ជុំវិញរឿងនេះ អ្នកជំនាញកិច្ចការអន្តរជាតិ លោក សេង វណ្ណលី ប្រាប់ទូរទស្សន៍អាស៊ីសេរីថា ញត្តិរបស់អង្គការសមាគមខ្មែរកម្ពុជាក្រោម ឆ្លុះបញ្ចាំងអំពីសាមគ្គីភាពរបស់ខ្មែរ ដែលមានឈាមជ័រតែមួយ។ លោកបន្ថែមថា ញត្តិនេះ ក៏រំឭកឲ្យរដ្ឋអំណាចកុម្មុយនីស្តវៀតណាម មានកាតព្វកិច្ចគោរពសិទ្ធិខ្មែរក្រោមជាជនជាតិដើម។
លោក សេង វណ្ណលី លើកឡើងថា ក្រុមអ្នកដឹកនាំនៅកម្ពុជា គួរចាត់ទុកជំនួបជាមួយលោក តូ ឡឺម ជាឱកាសមាស ដើម្បីជំរុញឲ្យមេដឹកនាំកំពូលរបស់វៀតណាម ដោះស្រាយបញ្ហារងគ្រោះរបស់ប្រជាពលរដ្ឋខ្មែរក្រោម តាមខ្លឹមសារញត្តិរបស់អង្គការសមាគមខ្មែរកម្ពុជាក្រោម។ លោកថា រដ្ឋាភិបាលកម្ពុជាត្រូវបង្ហាញការទទួលខុសត្រូវ ចំពោះពូជសាសន៍ខ្លួន ទោះរស់នៅទីណាក៏ដោយ ដោយប្រើយន្តការការទូតស្មើមុខ។
លោក សេង វណ្ណលី៖ «ការទាមទារឲ្យបញ្ចប់រាល់ការរំលោភសិទ្ធិមនុស្ស និងការដោះលែងព្រះសង្ឃព្រមទាំងសកម្មជន ដែលត្រូវបានឃុំខ្លួនដោយដ៏អយុត្តិធម៌ គឺជាជំហានមួយដ៏ត្រឹមត្រូវនៅក្នុងការស្វែងរកយុត្តិធម៌សង្គម និងការថែរក្សា នូវអត្តសញ្ញាណជំនឿសាសនា និងវប្បធម៌ខ្មែរ នៅលើទឹកដីកម្ពុជាក្រោម មិនឲ្យរលាយបាត់បង់។ ចំពោះផលប៉ះពាល់ដល់ទំនាក់ទំនងរវាងប្រទេសទាំងពីរវិញ សកម្មភាពនេះ មិនគួរត្រូវបានមើលឃើញថា ការរំខានដល់ចំណងមិត្តភាពរវាងកម្ពុជា និងវៀតណាមនោះទេ ប៉ុន្តែវាគឺជាការឆ្លុះបញ្ចាំងពីរតថភាពសង្គម ដែលភាគីពាក់ព័ន្ធ ត្រូវតែទទួលស្គាល់ និងដោះស្រាយដោយតម្លាភាព»។
ចាប់តាំងពីឆ្នាំ២០២៣ មកដល់បច្ចុប្បន្ន មានព្រះសង្ឃ និងសកម្មជនសិទ្ធិមនុស្សខ្មែរក្រោមចំនួន១៧អង្គនិងរូប ត្រូវអាជ្ញាធរវៀតណាម ចាប់ផ្សឹក និងដាក់ពន្ធនាគារ ដោយសារតែពួកគេទាមទារសិទ្ធិជនជាតិដើមនិងសិទ្ធិប្រតិបត្តិជំនឿសាសនានៅដែនដីកម្ពុជាក្រោម។
ក្រៅពីដាក់ញត្តិទៅកាន់ថ្នាក់ដឹកនាំកំពូលរបស់វៀតណាមពលរដ្ឋខ្មែរក្រោមមួយចំនួនបានធ្វើយុទ្ធនាការ ONE DAY ONE POST នៅលើបណ្ដាញសង្គម ដើម្បីបន្តទាមទារសេរីភាពសម្រាប់ព្រះសង្ឃ និងសកម្មជនខ្មែរក្រោមដែលកំពុងជាប់ពន្ធនាគារនៅលើទឹកដីកំណើតរបស់ខ្លួន ដោយសារការគាបសង្កត់របស់រដ្ឋាភិបាលនៃបក្សកុម្មុយនិស្តវៀតណាម។
អ្នកឃ្លាំមើលបារម្ភថា លោក ហ៊ុន សែន ដែលឡើងកាន់អំណាចដោយសារការលើកបន្តុបរបស់វៀតណាម អាចមិនហ៊ានលើកយកបញ្ហាខ្មែរកម្ពុជាក្រោម ទៅជជែកជាមួយវៀតណាមឡើយ គឺផ្ទុយស្រឡះពីមេដឹកនាំរបស់វៀតណាមដែលតែងប្រាប់លោក ហ៊ុន សែន ឱ្យជួយមើលថែទាំជនជាតិវៀតណាមនៅកម្ពុជា៕
