ក្រោយជាប់ពន្ធនាគាររយៈពេល១០ថ្ងៃ ម្ដាយរបស់ព្រះសង្ឃ ដែលសកម្មក្នុងកិច្ចការសង្គមជាតិមួយអង្គ ព្រះនាម ជា វុទ្ធី ត្រូវបានមន្ត្រីពន្ធនាគាររាជធានីភ្នំពេញ មិនអនុញ្ញាតឲ្យចូលជួបសួរសុខទុក កូនរបស់គាត់នោះឡើយ។ មន្ត្រីសង្គមស៊ីវិលថា នៅកម្ពុជា មិនមានច្បាប់ហាមឃាត់សាច់ញាតិរបស់អ្នកជាប់ឃុំចូលជួបសុខទុកនោះទេ។
ក្រោយកូនជាប់ពន្ធនាគារអស់រយៈពេល១០ថ្ងៃ ម្ដាយព្រះសង្ឃ ជា វុទ្ធី គឺ លោកស្រី ចាន់ ម៉ៅ ខំស្កាត់ពីខេត្តពោធិ៍សាត់ មករាជធានីភ្នំពេញ ដើម្បីជួបសួរសុខទុក និងផ្ញើម្ហូបអាហារមួយចំនួនទុកឲ្យកូនបានហូបនៅក្នុងពន្ធនាគារ។ ប៉ុន្តែជាអកុសល ត្រូវបានមន្ត្រីពន្ធនាគាររាជធានីភ្នំពេញ មិនឲ្យចូលជួបមុខកូន ដើម្បីសួរសុខទុកនោះឡើយ។
ម្ដាយព្រះភិក្ខុ ជា វុទ្ធី គឺលោកស្រី ចាន់ ម៉ៅ អះអាងប្រាប់ទូរទស្សន៍អាស៊ីសេរី នៅថ្ងៃទី១០ ខែមេសាថា មន្ត្រីពន្ធនាគាររាជធានីភ្នំពេញ មិនឲ្យលោកស្រីចូលជួបកូន ដើម្បីសួរសុខទុកនោះទេ។ លោកស្រីថា អស់រយៈពេល ៧ទៅ៨ថ្ងៃហើយ ដែលលោកស្រីគេងមិនលក់ និងមិនបានហូបបាយគ្រប់គ្រាន់ ដោយសារបារម្ភពីកូន កំពុងជាប់ពន្ធនាគារ។ លោកស្រីបន្ថែមថា ជីវភាពគ្រួសាររបស់លោកស្រីជួបការលំបាកខ្លាំង ក្រោយព្រះភិក្ខុជាប់ពន្ធនាគារ ពីព្រោះកាលព្រះអង្គមិនទាន់ជាប់ពន្ធនាគារ គឺព្រះអង្គតែងតែជួយទំនុកបម្រុងជីវភាពគ្រួសារបានមួយចំនួនធំ។
លោកស្រី ចាន់ ម៉ៅ៖ «គេមិនឲ្យមនុស្សចូលទេ គេឲ្យអីវ៉ាន់យើងចូលទាល់បានមួយខែបានគេឲ្យយើងចូល បារម្ភនោះចេះតែបារម្ភហើយរឿងកូន ទោះខ្ញុំក្រជាអីបានកូនជួយផ្តល់ឲ្យ ហើយឥឡូវអត់ពីកូនទៀត មានតែគាត់ជួយខ្ញុំ អស់ពីកូនខ្ញុំមិនដឹងបានអីជាទីពឹង ថាមកជួបកូនឲ្យបានព្រលឹងព្រលះ តែមិនបានជួបកូនទៅវិញមិនដឹងយ៉ាងមិច»។
លោកស្រីទាមទារឲ្យអាជ្ញាធរ និងប្រមុខរដ្ឋាភិបាល ជួយដោះលែងកូនរបស់លោកស្រីឲ្យមានសេរីភាពឡើងវិញ ដើម្បីជួយមើលថែឪពុកពិការ និងម្ដាយចាស់ដែលមានជីវភាពក្រីក្រ។
ទាក់ទិននឹងបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារ សិទ្ធិ មនុស្សអាដហុក (Adhoc) លោក យិន ម៉េងលី មានប្រសាសន៍ថា នៅកម្ពុជា មិនមានច្បាប់ហាមឃាត់សាច់ញាតិរបស់អ្នកជាប់ឃុំមិនឲ្យចូលជួប ដើម្បីសួរសុខទុកនោះឡើយ ហើយអាជ្ញាធរគួរតែដឹងពីមនោសញ្ចេតនា រវាងឱពុកម្ដាយដែលបារម្ភពីកូន។ លោកថា អាជ្ញាធរគួរតែអនុញ្ញាតឲ្យពួកគាត់បានជួបសួរសុខទុក និងដឹងពីស្ថានភាពរបស់កូនគាត់ ដើម្បីជៀសវាងកុំឲ្យមានបញ្ហាផ្លូវចិត្តកើតឡើងលើរូបគាត់។
លោក យិន ម៉េងលី៖ «បុណ្យប្រពៃណីចូលឆ្នាំខ្មែរនេះគប្បីផ្តល់ឱកាសឲ្យគាត់ទោះបីពេលវេលាតិចក្តី ច្រើនក្តីពីព្រោះទឹកចិត្តម្តាយចំពោះកូនគឺធំធេងណាស់គប្បីយោគយល់ខ្លះផ្តល់ឱកាសដល់អ្នកទៅសួរសុខទុក្ខនៅក្នុងរដូវនេះ រដូវចូលឆ្នាំខ្មែរនេះ ហើយបញ្ឈប់ទៅអត់មានទេ ជារឿងដាច់ដោយទ្បែក អត់មានច្បាប់ចែងពាក់ព័ន្ធរឿងនេះទេ»។
ព្រះភិក្ខុ ជា វុទ្ធី គង់នៅវត្តធម្មនិមិត្តរាជបុប្ផារាម ហៅវត្តប៉ាឆា ក្នុងក្រុងបាត់ដំបង ។ ព្រះអង្គត្រូវបានសមត្ថកិច្ចខេត្តបាត់ដំបង ស្លៀកពាក់ស៊ីវិល ចុះទៅចាប់ផ្សឹកនៅព្រឹកថ្ងៃទី០១ ខែមេសា និងបានបញ្ជូនទៅកាន់សាលាដំបូងរាជធានីភ្នំពេញ នៅថ្ងៃបន្ទាប់ នឹងត្រូវបានចោទប្រកាន់ ពីបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា ៤៩៤ និង ៤៩៥ នៃក្រមព្រហ្មទណ្ឌ និងបញ្ជូនទៅឃុំខ្លួនបណ្ដោះអាសន្ន នៅពន្ធនាគាររាជធានីភ្នំពេញ ដោយសារព្រះអង្គបង្ហោះសារនិយាយពីបញ្ហាព្រំដែនកម្ពុជា-ថៃនៅលើបណ្តាញសង្គមហ្វេសប៊ុក។
ពលរដ្ឋចាត់ទុកការឃុំខ្លួនព្រះអង្គ គឺជាការបំបិទសំឡេងអ្នកហ៊ានរិះគន់ទៅលើរដ្ឋាភិបាល ដើម្បីបំបាក់ស្មារតីដល់ពលរដ្ឋផ្សេងទៀត មិនឲ្យបញ្ចេញមតិរិះគន់របបត្រកូលហ៊ុន ពាក់ព័ន្ធនឹងបញ្ហាព្រំដែនកម្ពុជា-ថៃ ដែលកម្ពុជាបាត់បង់ទឹកដីទៅប្រទេសថៃ ជាច្រើនទីតាំង៕
