ទីប្រឹក្សាគណបក្សកម្លាំងជាតិ លោក រ៉ុង ឈុន សម្រេចប្ដឹងទៅតុលាការកំពូល ដើម្បីរកយុត្តិធម៌ ពាក់ព័ន្ធនឹងបទចោទ «ញុះញង់» ក្រោយបរាជ័យនៅសាលាឧទ្ធរណ៍ ដោយលោកចាត់ទុកការសម្រេចរបស់សាលាឧទ្ធរណ៍ ជារឿងអយុត្តិធម៍សម្រាប់លោក និងសង្គមជាតិ។ សង្គមស៊ីវិលថា រដ្ឋាភិបាលត្រកូលហ៊ុនគួរក្លាហាន បើកសិទ្ធិឲ្យគូប្រជែង ចូលរួមប្រកួតការបោះឆ្នោតដោយត្រឹមត្រូវ និងយុត្តិធម៌។
ក្រោយបរាជ័យនៅសាលាឧទ្ធរណ៍ កាលពីចុងខែមីនា ទីប្រឹក្សាគណបក្សកម្លាំងជាតិ លោក រ៉ុង ឈុន នៅថ្ងៃទី២២ ខែមេសា បានសម្រេចប្ដឹងជំទាស់ទៅតុលាការកំពូល ដោយលោកអះអាងថា ដើម្បីរកយុត្តិធម៌ឲ្យខ្លួនលោក និងសង្គមជាតិ ពីព្រោះការកាត់ក្ដី និងការសម្រេចរបស់តុលាការថ្នាក់ទាប ពាក់ព័ន្ធបទចោទ «ញុះញង់» ធ្វើឲ្យសកម្មជន សិទ្ធិមនុស្ស បរិស្ថាន និងសកម្មជនសង្គម រងនូវភាពអយុត្តិធម៌ ក្នុងសង្គមប្រជាធិបតេយ្យ។
ទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់ទូរទស្សន៍អាស៊ីសេរី នៅថ្ងៃទី២២ ខែមេសាថា ការសម្រេចប្ដឹងជំទាស់ទៅតុលាការកំពូលនេះ គឺដោយសារការសម្រេចរបស់សាលាឧទ្ធរណ៍ មិនបានបង្ហាញពីវិជ្ជាជីវៈ និងឆន្ទៈនៃច្បាប់កំពូលរបស់កម្ពុជា។ លោកថា ប្រសិនបើតុលាការមានវិជ្ជាជីវៈ និងអង្គហេតុនៃច្បាប់ត្រឹមត្រូវ នោះរូបលោកនឹងទទួលបានយុត្តិធម៌ ពីព្រោះសកម្មភាពជួយសង្គមជាតិ និងការបញ្ចេញមតិរបស់លោក មិនបានបង្កឱ្យមានភាពវឹកវរដល់សន្តិសុខសង្គមជាតិនោះឡើយ ផ្ទុយទៅវិញ ការធ្វើទុក្ខបុកម្នេញទៅលើរូបលោក នឹងធ្វើឲ្យអន្តរជាតិចាត់ទុកកម្ពុជា ថា ជាប្រទេសរំលោភបំពានសិទ្ធិមនុស្ស និងរឹតត្បិតសិទ្ធិសេរីភាពរបស់ពលរដ្ឋខ្លួនឯង ដែលផ្ទុយពីច្បាប់ជាតិ និងច្បាប់អន្តរជាតិ។
លោក រ៉ុង ឈុន៖ «ចំពោះខ្ញុំមិនដាក់ក្តីបារម្ភទេ ពីព្រោះយើងមើលឃើញថា ជារឿងអយុត្តិធម៌សម្រាប់ខ្ញុំហើយ បង្ហាញថាច្បាប់នៅកម្ពុជាមិនអាចការពារយុត្តិធម៌ឲ្យពួកយើងជាអ្នកប្រឆាំងបាន ប៉ុន្តែអ្វីៗយើងគួរដាក់សំណួរថា តើរាល់ការសម្រេចតម្កល់របស់សាលាដំបូង សាលាឧទ្ធរណ៍ បានផលចំណេញអ្វីដល់សង្គមកម្ពុជាយើង»។
ទូរទស្សន៍អាស៊ីសេរី មិនអាចទាក់ទងអ្នកនាំពាក្យតុលាការកំពូល អ្នកស្រី ម៉ៅ ធីតា និងអ្នកនាំពាក្យក្រសួងយុត្តិធម៌ លោក សេង ឌីណា ដើម្បីសុំការអត្ថាធិប្បាយបានទេ នៅថ្ងៃទី២២ ខែមេសា។ ទោះជាយ៉ាងណា តាមរយៈការបង្ហោះសារនៅលើបណ្ដាញសង្គមរបស់លោក រ៉ុង ឈុន តុលាការកំពូល បានទទួលពាក្យបណ្ដឹងសាទុក្ខ ប្រឆាំងនឹងការសម្រេចរបស់សាលាឧទ្ធរណ៍រួចហើយ នៅថ្ងៃទី២២ ខែមេសានេះ។
កាលពីថ្ងៃទី៣១ ខែមីនា សាលាឧទ្ធរណ៍ភ្នំពេញបានសម្រេចតម្កល់សាលក្រមរបស់សាលាដំបូងរាជធានីភ្នំពេញ ដោយផ្ដន្ទាទោសលោក រ៉ុង ឈុន ឲ្យជាប់ពន្ធនាគាររយៈពេល៤ឆ្នាំ ពិន័យជាប្រាក់៤លានរៀល និងដកហូតសិទ្ធិធ្វើនយោបាយ ពាក់ព័ន្ធការចោទប្រកាន់ពីបទ «មិនរាងចាល» ក្នុងសំណុំរឿង «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» កាលពីខែឧសភា ឆ្នាំ២០២៥ ដោយសារលោកបានធ្វើអត្ថាធិប្បាយពាក់ព័ន្ធនឹងបញ្ហាព្រំដែនកម្ពុជា-វៀតណាម។ បន្ថែមពីនោះសាលាឧទ្ធរណ៍ភ្នំពេញក៏បានផ្ដន្ទាទោសលោក រ៉ុង ឈុន ដោយដកហូតសិទ្ធិនយោបាយជាអចិន្ត្រៃយ៍ តាមបញ្ញត្តមាត្រា៤៩៨នៃក្រមព្រហ្មទណ្ឌ។
ទាក់ទិននឹងរឿងនេះ ប្រធានអង្គការសម្ធ័ន្ធខ្មែរដើម្បីកិច្ចព្រមព្រៀងសន្តិភាពទីក្រុងប៉ារីស និងដើម្បីកម្ពុជា នៅប្រទេសអូស្ត្រាលី (Australia ) លោក អ៊ិន ណាត យល់ឃើញថា រដ្ឋាភិបាលត្រកូលហ៊ុនគួរក្លាហាន បើកសិទ្ធិឲ្យគូប្រជែង ចូលរួមប្រកួតការបោះឆ្នោតដោយត្រឹមត្រូវ និងយុត្តិធម៌ ស្របទៅតាមសង្គមប្រជាធិបតេយ្យ មិនគួរបិទសិទ្ធិគូប្រកួតបែបនេះឡើយ ពីព្រោះការបិទសិទ្ធិគូប្រកួតបែបនេះ នឹងធ្វើឲ្យខូចដល់មុខមាត់កម្ពុជានៅលើឆាកអន្តរជាតិ។
លោក អ៊ិន ណាត៖ «បានធ្វើឲ្យប្រទេសកម្ពុជាមានឈ្មោះអាក្រក់ផ្នែកការរំលោភសិទ្ធិមនុស្សដូច្នេះខ្ញុំគិតថាការកាត់ក្តីលើលោក រ៉ុង ឈុន នេះគឺជាអំពើមួយដែរមានភាពអវិជ្ជមានខ្លាំង ហើយធ្វើឲ្យប្រទេសកម្ពុជារងការរើសអើង និងរងការថ្កោលទោសពិសេសលើប្រទេសកាន់លទ្ធិប្រជាធិបតេយ្យ»។
លោក រ៉ុង ឈុន ផ្ដាំទៅអ្នកគាំទ្រគណបក្សកម្លាំងជាតិ កុំឱ្យបាក់ទឹកចិត្ត ហើយត្រូវរឹងមាំឡើង ដើម្បីឆ្ពោះទៅគោលដៅគឺការបោះឆ្នោតនៅឆ្នាំ២០២៧ និងឆ្នាំ២០២៨ ។ លោកបញ្ជាក់ថា បើទោះបីលោកត្រូវបានតុលាការកំពូលសម្រេចក្ដីយ៉ាងណាក៏ដោយ ប្រជាពលរដ្ឋគឺជាម្ចាស់ប្រទេស និងជាអ្នកសម្រេចជោគវាសនារបស់ជាតិទៅថ្ងៃខាងមុខ៕
