អគ្គនាយកដ្ឋានពន្ធនាគារនៃក្រសួងមហាផ្ទៃបានបញ្ជូន និងផ្លាស់ប្ដូរការឃុំខ្លួន «ក្មេងទំនើង» ជិត ៨រយនាក់ទៅកាន់ពន្ធនាគារនៅតាមខេត្តជាប់ព្រំដែនកម្ពុជា-ថៃ បន្ទាប់ពីមានការណែនាំរបស់លោកនាយករដ្ឋមន្ត្រី ហ៊ុន ម៉ាណែត និងរដ្ឋមន្ត្រីក្រសួងមហាផ្ទៃ លោក ស សុខា។
សេចក្ដីប្រកាសព័ត៌មានរបស់អគ្គនាយកដ្ឋានពន្ធនាគារនៃក្រសួងមហាផ្ទៃនៅថ្ងៃទី២១ ខែមេសា ឱ្យដឹងថា ក្រុមអ្នកទោសជា «ក្មេងទំនើង» ដែលជាយុវជនសរុបចំនួន ៧៩០នាក់ នៅតាមបណ្ដាមជ្ឈមណ្ឌលអប់រំកែប្រែ និងពន្ធនាគាររាជធានី-ខេត្តនឹងត្រូវបញ្ជូនទៅកាន់មជ្ឈមណ្ឌល និងពន្ធនាគារគោលដៅមជ្ឈមណ្ឌលអប់រំកែប្រែទី៤ ស្ថិតក្នុងខេត្តពោធិ៍សាត់ និងពន្ធនាគារខេត្តឧត្តរមានជ័យ។
អគ្គនាយកដ្ឋានពន្ធនាគារបញ្ជាក់ថា ការផ្ទេរទណ្ឌិតក្មេងទំនើងនេះ គឺក្នុងគោលបំណង ដើម្បីបង្កើនការអប់រំកែប្រែស្ដារនីតិសម្បទាតាមរយៈការចូលរួមកម្មវិធីបណ្ដុះបណ្ដាលវិជ្ជាជីវៈដើម្បីកសាងសមត្ថភាពជំនាន់ផ្ទាល់ខ្លួនផង ដើម្បីបម្រើបុព្វហេតុជាតិ និងការស្រលាញ់ជាតិមាតុភូមិផង។អគ្គនាយកដ្ឋានពន្ធនាគារបន្ថែមថា កម្មវិធីបណ្ដុះបណ្ដាលនោះ រួមមានជំនាញកសិកម្ម ដូចជា ការដាំដុះបន្លែបង្ការ ការចិញ្ចឹមសត្វ និងជំនាញសំណង់ ដូចជាការចាក់គម្របលេណដ្ឋាន និងសំណងបេតុងផ្សេងៗ ដើម្បីគាំទ្រដល់កងកម្លាំងជួរមុខដែលកំពុងឈរជើងការពារអធិបតេយ្យជាតិ។
ទោះជាយ៉ាងណា អ្នកឃ្លាំមើលបារម្ភថា ការបញ្ជូនក្រុមក្មេងទំនើងទៅកាន់ពន្ធនាគារនៅតាមខេត្តជាប់ព្រំដែនភ្លាមៗ ដើម្បីបំពេញចិត្តមេដឹកនាំដោយមិនបានសិក្សាច្បាស់លាស់នេះ នឹងបង្កលំបាក ព្រមទាំងអាចរំលោភសិទ្ធិជនជាប់ឃុំជាដើម។ ផលលំបាកទាំងនោះរួមមានសាច់ញាតិកាន់តែជួបការលំបាក និងត្រូវចំណាយធនធានកាន់តែច្រើន ដើម្បីធ្វើដំណើរទៅសួរសុខទុក្ខកូនចៅរបស់ខ្លួន។ លើសពីនេះ អ្នកឃ្លាំមើល បារម្ភថា ការបញ្ជូនក្មេងទំនើងទៅកាន់ពន្ធនាគារ និងបម្រើការងារតាមព្រំដែននេះ អាចរំលោភសិទ្ធិជនជាប់ឃុំទាំងនោះតាមរយៈការប្រើប្រាស់កម្លាំងពលកម្មដោយបង្ខំ និងហួសហេតុព្រមទាំងការធ្វើទារុណកម្មផ្លូវកាយ និងផ្លូវចិត្តរបស់ពួកគេ។ អ្នកឃ្លាំមើលយល់ថា ក្រុមក្មេងទំនើងគួរតែត្រូវបានស្ដារនីតិសម្បទាដោយយកចិត្តទុកដាក់បំផុត ព្រោះពួកគេ គឺជាជនរងគ្រោះពីសង្គម ដោយសារប្រព័ន្ធអប់រំគ្មានប្រសិទ្ធភាព បញ្ហាគ្រួសារមានជីវភាពក្រីក្រ ការរើសអើង និងការធ្លាក់ក្នុងអន្ទាក់នៃគ្រឿងញៀន និងគ្រឿងស្រវឹងជាដើម៕
