ពលរដ្ឋរងគ្រោះដីធ្លីនៅសហគមន៍សំពុងឃុំកោះខ្ញែរ ស្រុកសំបូរ ខេត្តក្រចេះ អះអាងថា ក្រុមហ៊ុនវៀតណាម លួចឈូសឆាយដីព្រៃសហគមន៍ និងដីស្រែចម្ការពលរដ្ឋសាជាថ្មី ដោយមិនមានការផ្សព្វផ្សាយ និងពិគ្រោះយោបល់ជាមួយពលរដ្ឋ និងអ្នកពាក់ព័ន្ធជាមុននោះទេ។ សង្គមស៊ីវិលថា អាជ្ញាធរត្រូវតែត្រួតពិនិត្យឲ្យបានច្បាស់លាស់ជៀសវាង ការឈូសឆាយរំលោភបំពានដល់ពលរដ្ឋជាម្ចាស់ស្រុក។
ក្រោយក្រុមហ៊ុនវៀតណាមឈ្មោះ កសិកម្ម យុវជនស្វាយរៀង ចាប់ផ្ដើមលួចឈូសឆាយដីព្រៃបម្រុងទុករបស់សហគមន៍ និងដីស្រែចម្ការរបស់ពលរដ្ឋសាជាថ្មីទៀត ពលរដ្ឋថា អាជ្ញាធរមូលដ្ឋានហាក់គ្មានអំណាចរកដំណោះស្រាយ និងទប់ស្កាត់សកម្មភាពខុសច្បាប់របស់ក្រុមហ៊ុនមួយនេះនោះឡើយ។
តំណាងពលរដ្ឋរងគ្រោះដីធ្លីនៅស្រុកសំបូរ លោកស្រី អ៊ែល រ៉ូស្សា អះអាងប្រាប់ទូរទស្សន៍អាស៊ីសេរី នៅថ្ងៃទី០២ ខែមិថុនា ថា ពលរដ្ឋមិនដឹងថា ក្រុមហ៊ុនវៀតណាមទទួលបានដីសម្បទានបន្ថែមទៀត ឬយ៉ាងណានោះទេ ប៉ុន្តែគ្រឿងចក្ររបស់ក្រុមហ៊ុនកំពុងសម្រុកឈូសឆាយដីព្រៃសហគមន៍បម្រុងទុក និងដីស្រែចម្ការរបស់ពលរដ្ឋរស់នៅតំបន់នោះ។ លោកស្រីថា រហូតមកដល់ពេលនេះអាជ្ញាធរមិនបានផ្សព្វផ្សាយឲ្យពលរដ្ឋបានដឹងនោះទេ ថាការឈូសឆាយនេះនៅក្នុងបរិវេណក្រុមហ៊ុនឬក្រៅក្រុមហ៊ុន។ លោកស្រីបន្ថែមថា កន្លងទៅក្រុមហ៊ុនវៀតណាមកសិកម្មយុវជនស្វាយរៀងតែងតែឈូសឆាយបំពានយកដីស្រែចម្ការ និងដីព្រៃសហគមន៍ ហើយអាជ្ញាធរមិនមានវិធានការទប់ស្កាត់ ឬការពារផលប្រយោជន៍ពលរដ្ឋម្ដងណាឡើយ។
លោកស្រី អ៊ែល រ៉ូស្សា៖ «ប្រជាពលរដ្ឋនៅឃុំកោះខ្ញែរនេះពិបាកហើយវេទនាណាស់គួរតែទុកអត្ថិភាពឲ្យគាត់ខ្លះ ឬឲ្យគាត់អាស្រ័យផលទៅឬឲ្យតម្លៃគាត់ខ្លះ ដល់ពេលអ៊ីចឹងទៅមកធ្វើអ្វីស្ងាត់ៗ ហើយមកបំពានអ៊ីចឹងធ្វើឲ្យប្រជាពលរដ្ឋមិនសប្បាយចិត្ត»។
លោកស្រី អ៊ែល រ៉ូស្សា ទទូចឲ្យអាជ្ញាធរពាក់ព័ន្ធហាមឃាតគ្រឿងចក្រ និងត្រួតពិនិត្យឲ្យបានត្រឹមត្រូវនិងយុត្តិធម៌ ហើយត្រូវជូនដំណឹងដល់ពលរដ្ឋជាមុនសិន មុនអនុញ្ញាតឲ្យក្រុមឈូសឆាយនៅក្នុងតំបន់នោះ។
ជុំវិញរឿងនេះ ទូរទស្សន៍អាស៊ីសេរី មិនអាចទាក់ទងអភិបាលខេត្តក្រចេះ លោក វ៉ា ថន និងប្រធានមន្ទីរបរិស្ថាន ខេត្តក្រចេះ លោក គា ប៊ូ ដើម្បីសុំការអត្ថាធិប្បាយបានទេ នៅថ្ងៃទី២ ខែមិថុនា។
ទោះជាយ៉ាងណា រាល់សកម្មភាពរបស់ក្រុមហ៊ុនវៀតណាម កសិកម្ម យុវជនស្វាយរៀង រំលោភយកដីព្រៃ និងដីស្រែចម្ការរបស់ពលរដ្ឋ អាជ្ញាធរស្រុកសំបូរ និងអាជ្ញាធរខេត្តក្រចេះ តែងតែចេញសេចក្ដីបំភ្លឺ ការពារក្រុមហ៊ុន ដោយសំអាងថា ក្រុមហ៊ុនធ្វើត្រឹមត្រូវទៅតាមច្បាប់ ខណៈក្រុមហ៊ុននេះ ឈូសឆាយបំផ្លាញផលដំណាំ និងផ្ទះសម្បែងរបស់ពលរដ្ឋរាប់រយគ្រួសារ នៅឃុំកោះខ្ញែរ ស្រុកសំបូរ ខេត្តក្រចេះ។
ជុំវិញរឿងនេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី នៅតែជំរុញឲ្យអាជ្ញាធររកដំណោះស្រាយឲ្យបានសមរម្យ ដោយកាត់ឆ្វៀលដីធ្លី ដែលពលរដ្ឋអាស្រ័យផលជាក់ស្ដែងប្រគល់ឲ្យទៅពលរដ្ឋ ដើម្បីបញ្ចប់បញ្ហាដីធ្លីរ៉ាំរ៉ៃមួយនេះ។ លោកថា អាជ្ញាធរគួរតែស្ដាប់ការចង់បានរបស់ប្រជាពលរដ្ឋ និងរកដំណោះស្រាយឲ្យពួកគាត់ ប្រសើរជាងប្រើប្រាស់រូបភាពគំរាមកំហែងនាំឲ្យប៉ះពាល់ដល់សិទ្ធិមនុស្ស និងខូចមុខមាត់របស់រដ្ឋាភិបាល។
លោក យិន ម៉េងលី៖ «សំខាន់គឺរឿងការអនុវត្តន៍ច្បាប់ឲ្យមានតម្លាភាព គ្រប់ភាគគីទាំងអស់ គ្រប់ភាគគីពាក់ព័ន្ធនេះបាទ ទើបអាចធ្វើការដោះស្រាយបាន ចុះពិនិត្យមើលទ្បើងវិញទៅលើការអនុវត្តច្បាប់ ពិនិត្យមើលទ្បើងវិញទៅលើលិខិតបទដ្ឋានគតិយុត្តផ្សេងៗ ពិនិត្យមើលទ្បើងវិញទៅលើមន្ត្រីទាំងអស់ដែរពាក់ព័ន្ធ ថាតើអនុវត្តន៍ច្បាប់ត្រឹមត្រូវទេ បើមិនអ៊ីចឹងទេ យើងដោះបញ្ហាតែយើងដោះអត់ចំឫសគល់បញ្ហារងកើតមានយើងទៅដោះរឿងនឹង ប៉ុន្តែថាតើអ្វីដែរជាមូលហេតុសំខាន់ដែរបង្កឲ្យមានបញ្ហានេះកើតទ្បើង»។
ក្រុមហ៊ុនវៀតណាម កាម៉ាដេនូ វេនឈ័រ និងក្រុមហ៊ុន កសិកម្ម យុវជន ស្វាយរៀង ក្រៅពីឈូសឆាយព័ទ្ធយកដីព្រៃសហគមន៍សំពុងហើយនោះ ក្រុមហ៊ុនទាំងពីរនេះ ក៏បានឈូសឆាយបំផ្លាញផលដំណាំ ដុតផ្ទះសម្បែង និងហ៊ុមព័ទ្ធយកដីស្រែចម្ការរបស់ពលរដ្ឋនៅឃុំកោះខ្ញែរ ស្រុកសំបូរ ខេត្តក្រចេះ ជាង៣០០គ្រួសារ។ លើសពីនោះ មេការដែលជាជនជាតិវៀតណាម បានគំរាមកំហែង ដោយបញ្ជាឲ្យអាជ្ញាធរខេត្ត និងមន្ត្រីបរិស្ថានខេត្តក្រចេះ កែសំណុំរឿងធ្វើយ៉ាងណាចាប់តំណាងពលរដ្ឋបន្ថែមទៀតដាក់ពន្ធនាគារ ដោយមេការរូបនោះចោទពលរដ្ឋថា តែងតែចេញមុខតវ៉ាប្រឆាំងទៅនឹងក្រុមហ៊ុន៕
