អ្នកស្លាប់កើនដល់១៦នាក់ និងរបួសចំនួន២៤នាក់ក្នុងហេតុការណ៍គ្រោះថ្នាក់ចរាចរណ៍ក្រឡាប់ឡានក្រុងធ្លាក់ចូលទឹក ស្ថិតនៅចំណុចស្ពានអូរប្រសាទ ក្នុងឃុំកកោះ ស្រុកសន្ទុក ខេត្តកំពង់ធំ កាលពីថ្ងៃ២០ វិច្ឆិកា។
អភិបាលរង និងជាអ្នកនាំពាក្យនៃរដ្ឋបាលខេត្តកំពង់ធំ លោក អ៊ុន បុត បានប្រាប់ កាសែតក្នុងស្រុកនៅព្រឹកថ្ងៃទី២១ វិច្ឆិកាថា សមត្ថកិច្ចបានមុជទឹករាវរកឃើញ សាកសពជនរងគ្រោះចំនួន៣នាក់បន្ថែមទៀត ក្នុងនោះមានម្នាក់ជាសាកសពតៃកុងរថយន្ត។ ដូច្នេះមកដល់ពេលនេះ មានអ្នកស្លាប់សរុបចំនួន១៦នាក់ និងរបួស២៤នាក់ ខណៈរថយន្តផ្ទុកអ្នកដំណើរសរុបចំនួន៤០នាក់។ សមត្ថកិច្ច ក៏បានឃាត់ខ្លួនអ្នកបើករថយន្តជំនួស ឬហៅថា ព្រូឡានម្នាក់ផងដែរ។
សមត្ថកិច្ចអះអាងថា អ្នកស្លាប់ភាគច្រើន គឺជាកម្មករសំណង់ ។ រថយន្តក្រុងដែលជួបគ្រោះថ្នាក់នេះគឺជារបស់ក្រុមហ៊ុន វីរៈ រិទ្ធី (Virak Rithy Transport ) ហើយតំណាងក្រុមហ៊ុនបានចូលបុណ្យសពម្នាក់១លានរៀល និងបានសន្យាដោះស្រាយសំណងតាមរយៈក្រុមហ៊ុនធានារ៉ាប់រង។
ទោះជាយ៉ាងណា មន្ត្រីសង្គមស៊ីវិល យល់ថា សមត្ថកិច្ច គួរតែស្រាវជ្រាវរឿងនេះឲ្យបានច្បាស់លាស់ ដើម្បីដាក់ឲ្យអ្នកបើកបរ និងម្ចាស់ក្រុមហ៊ុន ទទួលរងទណ្ឌកម្មតាមផ្លូវច្បាប់ ដោយមិនត្រូវបញ្ចប់រឿងត្រឹមលុយចូលបុណ្យ ឬការបង់សំណងតាមរយៈក្រុមហ៊ុនធានារ៉ាប់រងឡើយ៕
