ពលរដ្ឋចាញ់បោកក្រុមហ៊ុនអ្នកស្រី ឡេង ចាន់ណា ថា ដំណោះស្រាយរបស់មេធាវីរដ្ឋាភិបាល និង តុលាការខេត្តសៀមរាប ៣ឆ្នាំហើយ បានលទ្ធផល ត្រឹមតែពាក្យ «រង់ចាំ»។ សង្គមស៊ីវិលថា តុលាការ គួរកំណត់ពេលឱ្យបានជាក់លាក់ ក្នុងការបញ្ចប់សំណុំរឿង ដើម្បីផ្ដល់ដំណោះស្រាយយុត្តិធម៌ជូនជនរងគ្រោះ។
ក្រុមតំណាងពលរដ្ឋ ដែលចាញ់បោកក្រុមហ៊ុនអតីតឧកញ៉ា ឡេង ចាន់ណា បានបន្ទោសតុលាការ និងមេធាវីរដ្ឋាភិបាលថា ឆ្លើយដោះសាឱ្យតែរួចខ្លួននៅពេលពលរដ្ឋរងគ្រោះ ទៅសួរនាំច្រើនដង អំពីដំណើរការរកដំណោះស្រាយ។
តំណាងពលរដ្ឋរងគ្រោះ លោកស្រីសុំមិនបញ្ចេញឈ្មោះ ប្រាប់ទូរទស្សន៍អាស៊ីសេរីថា តុលាការ ខេត្តសៀមរាប និងមេធាវីរដ្ឋាភិបាលលោក គី តិច នាំគ្នាឆ្លើយបង្វែរសាច់រឿង ដោយដោះសាថា រឿងក្ដីការឆបោករបស់ក្រុមហ៊ុន ប្រ៊ីលានស៊ីធី នៃអ្នកស្រី ឡេង ចាន់ណា ជាសំណុំរឿងធំ និងមានជនរងគ្រោះច្រើនពេក ដែលតុលាការ និងមេធាវី មិនដែលជួបប្រទះពីមុនមក។ លោកស្រីថា តុលាការបានផ្ដល់ចម្លើយ ដែលមិនផ្ដល់សេចក្ដីសង្ឃឹមដល់ជនរងគ្រោះឡើយ ពីព្រោះតុលាការប្រាប់ឱ្យរង់ចាំ រហូតដល់ជនរងគ្រោះទាំងអស់ ទៅផ្ដល់ចម្លើយគ្រប់ៗគ្នា។ បើដូច្នេះ លោកស្រីថា ទោះបីជា ១០ឆ្នាំទៀត ក៏គ្មានដំណោះស្រាយដែរ ពីព្រោះជនរងគ្រោះ មានចំនួន រាប់ពាន់នាក់ ហើយមួយចំនួន កំពុងរស់នៅក្រៅប្រទេស។
លោកស្រីនិយាយថា តាមការពន្យល់របស់តុលាការ និងមេធាវីរដ្ឋាភិបាលសំណុំរឿងឆបោករបស់ក្រុមហ៊ុនអ្នកស្រី ឡេង ចាន់ណា នេះ ពុំមានការជំរុញពីអ្នកដឹកនាំប្រទេសឱ្យចាត់ការរកដំណោះស្រាយយុត្តិធម៌ត្រឹមត្រូវជូនជនរងគ្រោះឱ្យជាក់លាក់នោះទេ។
ជនរងគ្រោះ៖ «គឺអត់មានបញ្ជាឱ្យធ្វើ បើមានបញ្ជាឱ្យម្ល៉េះ រឿងនេះមិនមានគាំងដូចរាល់ថ្ងៃហ្នឹង វាអាចនឹងជំរុញទៅមុខ ហើយខាងមេធាវី គឺ តិច ក៏មិនបានប្រាប់ថា សំណុំរឿងហ្នឹង វាអាចទៅដល់ចំណុចនេះ ចំណុចនោះ អត់ស្ងាត់ឈឹងតែម្ដង។ គាត់អត់ហ៊ានប្រាប់ជនរងគ្រោះយ៉ាងម៉េចទេ ហើយខាងតុលាការ ក៏ដូចជាគ្នាដែរ ថា ចំណាត់ការហ្នឹងដល់ចំណុចណាៗ ក៏អត់ហ៊ានប្រាប់ដែរ រហូតដល់ជនរងគ្រោះពួកខ្ញុំឆាតទៅសួរ ខលទៅសួរ គឺពួកគាត់បិទទាំងអស់ ប្រព័ន្ធទាក់ទងហ្នឹង គឺបិទទាំងអស់»។
សំណុំរឿងឆបោករបស់ក្រុមហ៊ុន ប្រ៊ីលានស៊ីធី នៃអតីតឧកញ៉ា ឡេង ចាន់ណា មានដំណើរការក្ដី ប្រមាណ ៣ឆ្នាំទៅហើយ ប៉ុន្តែយុត្តិធម៌នៅស្ងាត់ឈឹង ក្នុងដៃតុលាការខេត្តសៀមរាប រីឯពលរដ្ឋរងគ្រោះរាប់ពាន់នាក់ នៅទូទាំងប្រទេស បានត្រឹមតែដង្ហើយរកដំណោះស្រាយជាប្រចាំ។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិ នៃសមាគមការពារសិទ្ធិ មនុស្សអាដហុក(Adhoc)លោក យិន ម៉េងលី ប្រាប់ទូរទស្សន៍អាស៊ីសេរីថា ការឆ្លើយតបរបស់តុលាការ និងមេធាវីរដ្ឋាភិបាល កាន់តែបន្ថែមការខកចិត្ត និងអស់សង្ឃឹមដល់ពលរដ្ឋរងគ្រោះ។
លោក យិន ម៉េងលី បន្ថែមថា តុលាការមិនអាចចេះតែផ្អែកលើសំណុំរឿងធំ ហើយពន្យារពេលដោយគ្មានពេលកំណត់ ដោយរង់ចាំការប្ដឹង ឬការទៅបង្ហាញឯកសារ បំភ្លឺ របស់ជនរងគ្រោះនោះទេ ប៉ុន្តែលោកថា តុលាការ គួរតែកំណត់ពេលវេលា ឱ្យបានជាក់លាក់ ទាំងការដាក់ឯកសារប្ដឹងរបស់ជនរងគ្រោះ និងការរកយុត្តិធម៌បញ្ចប់សំណុំរឿង។
លោក យិន ម៉េងលី៖ «តុលាការក៏អាចកំណត់នៅពេលវេលាមួយជាក់លាក់ដែរ កំណត់រយៈពេលដែលត្រូវធ្វើការផ្សព្វផ្សាយ ហើយការផ្សព្វផ្សាយ ជាចុងក្រោយគឺ តាមបណ្ដាញព័ត៌មាននេះ ទៅតាមបណ្ដាញហ្វេសប៊ុករបស់តុលាការ អំពីការបិទបញ្ចប់ករណីនៃការទទួល ពាក្យបណ្ដឹងរបស់ជនរងគ្រោះ ពីព្រោះបើសិនជា មិនចាត់ការទេ ហើយទុកបណ្ដោយចាំថា ដល់ជនរងគ្រោះមកប្ដឹងគ្រប់គ្នា វាមិនដឹងថាប៉ុន្មាន។ អ៊ីចឹងត្រូវកំណត់រយៈពេលមួយ នៃការទទួលពាក្យបណ្ដឹង ហើយនឹង រយៈពេលនៃការចាត់ការសម្រាប់ដើមបណ្ដឹង សម្រាប់ជនរងគ្រោះ ដែលបានទៅដាក់ពាក្យបណ្ដឹង ឬក៏បង្ហាញឯកសារ ពាក់ព័ន្ធនឹងការទាមទារផលប្រយោជន៍របស់ខ្លួន ដែលខូចផលប្រយោជន៍ដោយសារតែក្រុមហ៊ុននេះ»។
នៅក្នុងសំណុំរឿងរបស់ក្រុមហ៊ុនអតីតឧកញ៉ា ឡេង ចាន់ណា ដែលបានផ្ទុះរឿង អាស្រូវឆបោក កាលពីក្នុងឆ្នាំ២០២៣ ក្រៅពីអ្នកស្រី ឡេង ចាន់ណា ដែលជា អគ្គនាយិកា និងបក្ខពួកមួយចំនួនទៀត ក៏មានមន្ត្រីជាន់ខ្ពស់នៃរដ្ឋាភិបាលជាច្រើន រូប ដែលពាក់ព័ន្ធ ដូចជា រដ្ឋលេខាធិការក្រសួងអប់រំ លោក ស៊ាន បូរ៉ាត និង អនុ រដ្ឋលេខាធិការក្រសួងការពារជាតិ លោក ស ថាវី។ អ្នកស្រី ឡេង ចាន់ណា មុនពេលត្រូវបានចាប់ខ្លួន បានប្រកាសថា ក្រុមហ៊ុនប្រ៊ីលានស៊ីធីរបស់អ្នកស្រីមានលោក ហ៊ុន ម៉ាណែត ជាខ្នងបង្អែក៕
