គ្រួសារអះអាងថា ការចាប់ខ្លួនថ្នាក់ដឹកនាំសង្កាត់ នៃគណបក្សកម្លាំងជាតិ រាជធានីភ្នំពេញ លោក សុខ ហុន និង លោក សន រ៉េត គឺជារឿងនយោបាយ។ គណបក្សប្រឆាំងនិង សង្គមស៊ីវិល លើកឡើងថា អាជ្ញាធររដ្ឋាភិបាល ធ្វើឱ្យបរិយាកាសប្រកួតប្រជែង មិនមានភាពស្មើគ្នា នៅមុនការបោះឆ្នោតក្រុមប្រឹក្សាឃុំ-សង្កាត់ ឆ្នាំ២០២៧។
អាជ្ញាធរគណបក្សកាន់អំណាចនៃលោក ហ៊ុន ម៉ាណែត នៅបន្ដយុទ្ធនាការចាប់សកម្មជន និងមន្ត្រីនៃគណបក្សក្រៅរដ្ឋាភិបាល ដែលមានឥទ្ធិពលប្រកួតប្រជែង នយោបាយបច្ចុប្បន្ន។
ប្រធានប្រតិបត្តិសង្កាត់ស្ទឹងមានជ័យ១ នៃគណបក្សកម្លាំងជាតិ លោក សុខ ហុន ត្រូវបានសមត្ថកិច្ចចាប់ខ្លួនដល់ផ្ទះក្នុងខណ្ឌដង្កោ និងលេខារបស់លោក គឺលោក សន រ៉េត ត្រូវសមត្ថកិច្ចចាប់ខ្លួនដល់ផ្ទះ ក្នុងសង្កាត់ស្ទឹងមានជ័យ២ នៅល្ងាចថ្ងៃទី២៨ ខែសីហា។ សមត្ថកិច្ចបានបញ្ជូនអ្នកទាំងពីរទៅដាក់ពន្ធនាគារព្រៃសនៅល្ងាចថ្ងៃទី២៩ ខែសីហា។
យោងតាមអង្គហេតុនៃដីកាបង្គាប់ឱ្យចូលខ្លួន ចុះថ្ងៃទី៤ ខែសីហា ចៅក្រម ស៊ើបសួរនៃសាលាដំបូងរាជធានីភ្នំពេញលោក ហុក ពៅ តម្រូវឱ្យថ្នាក់ដឹកនាំសង្កាត់ទាំងពីររូប នៃ គណបក្សកម្លាំងជាតិ ឱ្យចូលខ្លួនផ្ដល់ចម្លើយ នៅព្រឹកថ្ងៃទី២៦ ខែសីហា ឆ្នាំ២០២៦។ អ្នកទាំងពីរត្រូវបានចោទប្រកាន់ពីបទ «ក្លែងបន្លំ» និងបទ «ប្រើប្រាស់លិខិតក្លែង»តាម មាត្រា ៦២៦ ៦២៧ និងមាត្រា ៦២៨ នៃក្រមព្រហ្មទណ្ឌ ដែលប្រព្រឹត្តនៅរាជធានីភ្នំពេញ កាលពីអំឡុងខែមេសា និងខែឧសភា ឆ្នាំ២០២៥។
សាច់ញាតិលោក សុខ ហុន សុំមិនបញ្ចេញឈ្មោះ ប្រាប់ទូរទស្សន៍អាស៊ីសេរីនៅថ្ងៃទី៣១ ខែសីហាថា លោក សុខ ហុន ត្រូវបានចាប់ខ្លួន បន្ទាប់ពីលោកមិនបានចូលបំភ្លឺទៅតាមដីកាកោះឱ្យចូលខ្លួនរបស់តុលាការ ដោយសារលោកយល់ថា ជារឿងតូចតាចយូរហើយ ដែលមិនគួរមានបញ្ហាធំឡើយ។
សាច់ញាតិរូបនេះ បាននិយាយថា មកដល់ពេលនេះ សមត្ថកិច្ចមិនទាន់អនុញ្ញាតឱ្យគ្រួសារ ជួបលោក សុខ ហុន នៅឡើយទេ ខណៈលោកមានជំងឺត្បៀតសសៃឈាម និងស្វិតដៃមួយចំហៀង ដែលត្រូវការការថែទាំជាប្រចាំ។ លោកថា ការចាប់ខ្លួន លោក សុខ ហុន គឺជារឿងនយោបាយ ហើយសមាជិកគណបក្សកាន់អំណាច ជាអ្នកប្ដឹងឱ្យចាប់ខ្លួនថ្នាក់ដឹកនាំសង្កាត់នៃគណបក្សកម្លាំងជាតិរូបនេះ។
សាច់ញាតិលោក សុខ ហុន ៖ «រឿងនយោបាយ រឿងនយោបាយផ្ទៃក្នុងរបស់គាត់ ព្រោះថា រឿងហ្នឹង រឿងផ្ទៃក្នុងបក្សរបស់គាត់ រឿងគេប្ដឹងរឿងបន្លំឯកសារហ្នឹង។ រឿងនឹងហួសយូរហើយ តែអ្នកដែលយកដាក់ស្នើសុំដល់ក្រសួងមហាផ្ទៃហ្នឹង គាត់បានលាលែងពីបក្សនេះ ចូលបក្សកាន់អំណាចរាល់ថ្ងៃនេះ វាចូលហើយ ប៉ុន្តែសំខាន់រឿងហ្នឹង វាហួសយូរហើយ មិនពាក់ព័ន្ធនឹងគាត់ទៀត ខ្ញុំអត់យល់ ខ្ញុំអត់យល់ថា ម៉េចបានគេមកចាប់ខ្លួនគាត់ រឿងក្លែងបន្លំហ្នឹង»។
ប្រធានប្រតិបត្តិសង្កាត់ស្ទឹងមានជ័យ១ នៃខណ្ឌមានជ័យ រាជធានីភ្នំពេញរបស់គណបក្សកម្លាំងជាតិ លោក សុខ ហុន ក៏ជាអ្នកជំនាញពេទ្យសត្វដែរ។
គណបក្សកម្លាំងជាតិ និងសង្គមស៊ីវិល អះអាងថា អាជ្ញាធររដ្ឋាភិបាលនៃ គណបក្សប្រជាជនកម្ពុជា បង្កភាពស្មុគស្មាញកាន់តែខ្លាំង ជាពិសេសការប្រើវិធីចាប់ និងឃុំខ្លួនសកម្មជន និងអ្នកនយោបាយ នៃគណបក្សប្រឆាំង នៅមុនការបោះឆ្នោត ឆ្នាំ២០២៧ ដែលនឹងខិតជិតមកដល់។
អ្នកនាំពាក្យគណបក្សកម្លាំងជាតិ លោក សុខ គឹមសេង ប្រាប់ទូរទស្សន៍អាស៊ីសេរី ថា ការចាប់ខ្លួនថ្នាក់ដឹកនាំសង្កាត់ នៃគណបក្សកម្លាំងជាតិ លោក សុខ ហុន និង លោក សន រ៉េត ជាការរើសអើងនយោបាយនិងរឹតត្បិតលំហប្រកួតប្រជែងនយោបាយ ដោយសេរី និង យុត្តិធម៌។ លោកថា ការពង្រីករឿងតូចតាច ឱ្យក្លាយជាបញ្ហាធំ ដើម្បីចាប់ខ្លួន សកម្មជន និងសមាជិកគណបក្សនយោបាយក្រៅរដ្ឋាភិបាល គឺជាការធ្វើទុក្ខបុកម្នេញ សេរីភាពនយោបាយ ដែលប៉ះពាល់ដល់ការបោះឆ្នោត។
លោក សុខ គឹមសេង៖ «រាល់បញ្ហាទាំងអស់ បញ្ហាសូម្បីតែរឿងខ្លះ មិនសមជារឿងបញ្ហា ក៏តែងតែមានបញ្ហា ជាពិសេស គឺឱ្យតែសមាជិក សមាជិកាអ្នកដែលចូលរួមគាត់ជាមួយគណបក្សកម្លាំងជាតិ គឺថា ពីមុនបញ្ហាហ្នឹងតូចតាចទេ ហើយមិនទាន់មានការសម្រេចអ្វីមួយ ប៉ុន្តែនៅពេលគាត់ចេញវត្តមានធ្វើសកម្មភាពជាមួយគណបក្សកម្លាំងជាតិ តែងរងការចោទប្រកាន់ជានិច្ច»។
មកដល់ពេលនេះ សកម្មជន និងសមាជិក នៃគណបក្សកម្លាំងជាតិ ចំនួន ១៨នាក់ កំពុងជាប់ក្នុងពន្ធនាគារ។ គណបក្សប្រឆាំងចំនួន៣គឺគណបក្សកម្លាំងជាតិ គណបក្សភ្លើងទៀន និងគណបក្សឆន្ទៈខ្មែរ រងការធ្វើទុក្ខបុកម្នេញជាងគេ ក្នុងដំណើរការនយោបាយកម្ពុជាបច្ចុប្បន្ន។
ប្រធានសមាគមការពារសិទ្ធិមនុស្សអាដហុក លោក នី សុខា ប្រាប់ទូរទស្សន៍អាស៊ីសេរី ថា រដ្ឋាភិបាលគួរតែមើលមេរៀនចាស់ និង ជាគំរូដ៏ល្អសម្រាប់ការបោះឆ្នោត នៅកម្ពុជា កាលពីឆ្នាំ១៩៩៣ ដែលនៅពេលនោះគឺមានការដោះលែងអ្នកទោស នយោបាយ និង អ្នកទោសមនសិការទាំងអស់តាមស្មារតីនៃកិច្ចព្រមព្រៀងសន្តិភាពទីក្រុងប៉ារីស។
លោក នី សុខា មានប្រសាសន៍ថា ការបន្តចាប់ ខ្លួនសកម្មជនគណបក្សក្រៅរដ្ឋាភិបាល ជះឥទ្ធិពលមិនល្អទេ ដល់ដំណើរការនៃការបោះឆ្នោត នៅក្នុងក្រសែភ្នែករបស់ប្រជាពលរដ្ឋខ្មែរ គណបក្សនយោបាយ នានា និងសហគមន៍អន្តរជាតិ។
លោក នី សុខា៖ «ទោះបីជាសមត្ថកិច្ចក៏ដូចជា រដ្ឋាភិបាលគាត់តែងតែងលើកឡើង មានអំណះអំណាងថា ការចាប់ខ្លួននឹងវាបទល្មើសព្រហ្មទណ្ឌ អ្នកដែលត្រូវបានចាប់ខ្លួន នឹងបានប្រព្រឹត្តបទល្មើសអីក៏ដោយ។ ក៏ប៉ុន្តែយើងដឹងហើយថា មតិជាតិ អន្តរជាតិ គេយល់ ថារឿងទាំងអស់ហ្នឹង វាមិនមែនជារឿងការអនុវត្តច្បាប់ទេ គឺវាទាក់ទងនឹងការបំភិតបំភ័យ ឬក៏ការគំរាមកំហែងឬ ក៏ការរឹតត្បិតខាងសេរីភាពពិសេសដូចសេរីភាពនយោបាយ សេរីភាពបញ្ចេញមតិអីនេះ ដែលវាជាមូលដ្ឋានគ្រឹះនៃដំណើរការនៃការកសាងលទ្ធិប្រជាធិបតេយ្យសេរីពហុបក្ស»។
គណបក្សកម្លាំងជាតិបានអំពាវនាវក្នុងសេចក្ដីថ្លែងការណ៍របស់ខ្លួន កាលពីថ្ងៃទី២៨ ខែសីហា ដល់អាជ្ញាធររដ្ឋាភិបាលលោក ហ៊ុន ម៉ាណែត ឱ្យបញ្ឈប់ការចាប់ខ្លួន ថ្នាក់ដឹកនាំ និងសកម្មជនគណបក្សប្រឆាំង និងត្រូវដោះលែងលោក សុខ ហុន និង លោក សន រ៉េត ព្រមទាំងអ្នកជាប់ឃុំនយោបាយទាំងអស់ ឱ្យមានសេរីភាពឡើងវិញដើម្បីធានាបាននូវបរិយាកាសនយោបាយល្អ ស្របតាមរដ្ឋធម្មនុញ្ញ និងច្បាប់ស្ដីពីគណបក្សនយោបាយ។
គណបក្សកម្លាំងជាតិយល់ឃើញថា នៅក្នុងកាល:ទេស:ដែលប្រទេសកម្ពុជាកំពុង រងការឈ្លានពានពីភាគីថៃ អាជ្ញាធរកម្ពុជាពុំគួរធ្វើទុក្ខម្នេញអ្នក ដែលមាននិន្នាការ នយោបាយផ្ទុយពីគណបក្សកាន់អំណាចនោះទេ ប៉ុន្តែ ត្រូវចាប់ផ្តើមផ្សះផ្សាបង្រួបបង្រួមជាតិ ឈានទៅពង្រឹងសាមគ្គីភាព ឯកភាពផ្ទៃក្នុងជាតិ ដើម្បីទប់ទល់នឹងបរទេសឈ្លានពានទឹកដីកម្ពុជា៕
