ក្រុមការងារអន្តរកាលនៃគណបក្សសង្គ្រោះជាតិ បានប្រកាសបញ្ចប់ការទទួលស្គាល់លោក កឹម សុខា ជាប្រធានគណបក្សចាប់តាំងពីថ្ងៃទី៨ ខែកញ្ញា តទៅ។ ការប្រកាសបញ្ចប់ការទទួលស្គាល់លោក កឹម សុខា ជាប្រធានបក្សសង្គ្រោះជាតិនេះ គឺក្រោយពីរយ:ពេល៧ថ្ងៃនៃឱសានវាទដែលបានកំណត់ក្នុងញត្តិស្នើសុំឲ្យលោក កឹម សុខា លាលែងពីតំណែងប្រធានគណបក្សសង្គ្រោះជាតិបានកន្លងផុតទៅដោយគ្មានការឆ្លើយតបពីលោក កឹម សុខា នោះឡើយ។
សេចក្តីប្រកាសព័ត៌មានចុះថ្ងៃទី៨ ខែកញ្ញា ដែលចុះហត្ថលេខាដោយក្រុមការងារអន្តរកាលនៃគណបក្សសង្គ្រោះជាតិនិងជាអតីតប្រធានសន្និសីទអាត្លង់តា ឆ្នាំ២០១៨ លោក ស៊ុយ សេងហុង បង្ហាញថា ក្នុងនាមជាតំណាងក្រុមសមាជិក សកម្មជន និងអ្នកគាំទ្រគណបក្សសង្គ្រោះជាតិ ប្រកាសជាសាធារណ:ជូនដល់សាធារណជនខ្មែរ សហគមន៍ខ្មែរនៅក្រៅប្រទេស អង្គទូត និងស្ថាប័ននយោបាយអន្តរជាតិថា លោក កឹម សុខា បានបោះបង់តួនាទីជាប្រធាន និងជាតំណាងនៃឆន្ទ:នយោបាយរបស់គណបក្សសង្គ្រោះជាតិដោយស្វ័យប្រវត្តិចាប់ពីថ្ងៃប្រកាសព័ត៌មាននេះតទៅ។
លោក ស៊ុយ សេងហុង លើកឡើងក្នុងសេចក្តីប្រកាសព័ត៌មានទៀតថា ពួកលោក នឹងរៀបចំបង្កើត”ក្រុមប្រឹក្សាភិបាលនៃគណបក្សសង្គ្រោះជាតិ”ដើម្បីសម្របសម្រួលការងារ រៀបចំរចនាសម្ព័ន្ធ និងបង្កើតលក្ខខណ្ឌ សម្រាប់ការចូលរួមពីភាគីពាក់ព័ន្ធ។ សមាសភាព តួនាទី ភារកិច្ច និងគោលការណ៍ប្រតិបត្តិរបស់ក្រុមប្រឹក្សាភិបាលអន្តរកាល នឹងត្រូវប្រកាសជូនសាធារណជនជាផ្លូវការក្នុងពេលដ៏ខ្លីខាងមុខនេះ។
កាលពីថ្ងៃទី១ ខែកញ្ញា មានមន្ត្រី សមាជិក និងអ្នកគាំទ្រគណបក្សសង្គ្រោះជាតិចំនួន៥នាក់ បានដាក់ញត្តិស្នើសុំឲ្យលោក កឹម សុខា លាលែងពីប្រធានគណបក្សសង្រោះជាតិក្នុងរយៈពេល៧ថ្ងៃ។ ការទាមទារឲ្យលោក កឹម សុខា លាលែងពីតំណែងនេះ ធ្វើឡើងក្រោមហេតុផលថា ពួកគាត់លែងមានជំនឿទុកចិត្តលើការដឹកនាំរបស់លោក ក្រោយពីគ្រួសារ លោក កឹម សុខា និងគ្រួសារលោក ហ៊ុន សែន បានជួបជុំគ្នាជាលក្ខណៈនយោបាយ ហើយកូនស្រីច្បងរបស់លោក កឹម សុខា គឺកញ្ញា កឹម មនោវិទ្យា ដែលជាមន្ត្រីជាន់ខ្ពស់ គណបក្សសង្រោះជាតិ បានទទួលយកតួនាទីក្នុងជួររដ្ឋាភិបាលដែលដឹកនាំដោយគ្រួសារលោក ហ៊ុន សែន។ ពួកគាត់ថា ទង្វើនេះ បានបន្ថែមការឈឺចាប់ហើយធ្វើឲ្យស្មារតីនៃការតស៊ូដើម្បីយុត្តិធម៌ សេរីភាព និងប្រជាធិបតេយ្យ កាន់តែរងការបែកបាក់ និងខូចខាតកាន់តែធ្ងន់ធ្ងរ។
ទោះជាយ៉ាងណា មកទល់ពេលនេះ មិនទាន់មានការឆ្លើយតបជាផ្លូវការណាមួយពីលោក កឹម សុខា និងកូនស្រីរបស់លោក នៅឡើយនោះទេ ជុំវិញការប្រកាសលែងទទួលស្គាល់រូបលោកជាប្រធានគណបក្សសង្គ្រោះជាតិនៅពេលនេះ៕
