ក្រសួងដែនដី នៅថ្ងៃទី១០ កញ្ញា ចេញមុខពន្យល់ពីដំណើរការដោះស្រាយ ជូនអតិថិជនរងគ្រោះដោយសារគម្រោងសង់ផ្ទះ និងដីឡូត៍ផ្លូវជាតិលេខ ៦អា និងគម្រោងជ្រៃមួយរយក្នុងខេត្តកណ្តាលរបស់ក្រុមហ៊ុនលោក ឡេង ណាវ៉ាត្រា។ ការចេញមុខឆ្លើយតបមិនធ្លាប់មាននេះធ្វើឡើងបន្ទាប់ពីអ្នកឧកញ៉ា ឡេង ណាវ៉ាត្រា និងបក្ខពួកដែលចាប់តាំងពីយប់ថ្ងៃទី០៨ ដល់ថ្ងៃទី០៩ ខែកញ្ញាបានសរសេរសារ នៅ លើបណ្ដាញសង្គមប្រកាសថា ក្រុមហ៊ុនក្ស័យធន ដោយបានប្រគល់ទ្រព្យុសម្បត្តិទាំងអស់របស់ខ្លួនរាប់តាំងពីកង់ និងដីផ្នូរម្តាយទៅឱ្យក្រសួងលក់ ដោះស្រាយឱ្យពលរដ្ឋជាអតិថិជន។
ទោះជាយ៉ាងណា នៅក្នុងសារទាំងនោះ ក្រុម លោក ឡេង ណាវ៉ាត្រា ហាក់ចង់បង្ហាញការមិនពេញ ចិត្តរបស់ខ្លួនចំពោះក្រសួង ដែលនៅមុននោះ បានចេញលិខិតប្រាប់ពីការបង្កកទ្រព្យសម្បត្តិរបស់ ក្រុមហ៊ុន បើទោះបីជាក្រុមហ៊ុនបានផ្តល់សមត្ថកិច្ចឱ្យក្រសួងបន្តនីតិវិធីដោះស្រាយបញ្ហា រួចហើយក៏ដោយ។ ក្រសួងព្រមានចាត់វិធានការផ្លូវច្បាប់ទៅលើក្រុមលោក ឡេង ណាវ៉ាត្រា ជាច្រើនករណីផងដែរ។
សេចក្ដីប្រកាសព័ត៌មានរបស់ក្រសួងដែនដី នគរូបនីយកម្មនិងសំណង់ នៅថ្ងៃទី១០ ខែកញ្ញានេះ និយាយថា ការលើកឡើងនៅលើបណ្ដាញសង្គមហ្វេសប៊ុក (Facebook) របស់អ្នកឧកញ៉ា ឡេង ណាវ៉ាត្រា អ្នកចម្រៀង តន់ ចន្ទសីម៉ា និង ឧកញ៉ា ឡេង និមល គឺជាការបំភាន់ព័ត៌មាន បំភ្លៃការពិត និង បំពុលបរិយាកាសសង្គមដែលអាចជាចេតនាញុះញង់បង្កចលាចល។ ក្រសួង ចាត់ទុកទង្វើរបស់អ្នកទាំងបី ថា ជាការបំពានច្បាប់ និង សីលធម៌វិជ្ជាជីវៈ ដែលបានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងកិច្ចខិតខំប្រឹងប្រែងរបស់ថ្នាក់ដឹកនាំនិងមន្ត្រីរាជការក្រសួង។
ក្រសួងព្រមានថា អ្នកឧកញ៉ា ឡេង ណាវ៉ាត្រា និង បក្ខពួកទាំងនេះ អាចប្រឈមនឹងកាចោទប្រកាន់ជាច្រើនករណី ក្នុងក្រមព្រហ្មទណ្ឌ ដូចជា «បទបរិហារកេរ្តិ៍ជាសាធារណៈ» «ការញុះញង់» «បទញុះញង់ឱ្យប្រព្រឹត្តបទឧក្រិដ្ឋជាអាទិ៍» «បទប្រមាថ»និង «បទញុះញង់ឱ្យប្រព្រឹត្ត អំពើប្រឆាំងនឹងអ្នករាជការសាធារណៈ» ជាដើម។
ការព្រមានធ្ងន់ៗបែបនេះ របស់ក្រសួងរៀបចំដែនដី នគរូបនីយកម្ម និងសំណង់ ធ្វើឡើងបន្ទាប់ពីអ្នកឧកញ៉ា ឡេង ណាវ៉ាត្រា និង បក្ខពួកខ្លះ បានប្រើប្រាស់បណ្ដាញសង្គមហ្វេសប៊ុក វាយបកលើដំណោះស្រាយ និង ចំណាត់ការរបស់ក្រសួង ដែលស្នើឲ្យមន្ទីរក្រោមចំណុះនៅទូទាំងប្រទេស បង្កកទ្រព្យសម្បត្តិរបស់ ក្រុមហ៊ុន ហ្កាឡាក់ស៊ី ណាវ៉ាត្រា គ្រុប ឯ.ក.។
ក្នុងវីដេអូមួយ ដែលបង្ហាញពីការជួបជុំទាំងយប់ របស់អ្នកឧកញ៉ា ឡេង ណាវ៉ាត្រា និង បក្ខពួក និងផុសលើហ្វេសប៊ុក របស់ឈ្មោះ ឡេង ប្រុស អ្នកឧកញ៉ា ឡេង ណាវ៉ាត្រា កាលពីថ្ងៃទី៩ ខែកញ្ញា បាននិយាយស្ដីបន្ទោសក្រសួងថា ចំណាត់ការ របស់ក្រសួង ធ្វើប្រៀបដូចក្រុមលោកជាអ្នកក្បត់ជាតិ។
អ្នកឧកញ៉ា ឡេង ណាវ៉ាត្រា៖ «ក្រុមការងារតស៊ូជាង ១០០០ នាក់ ដែលខ្ញុំខិតខំក្នុងការចិញ្ចឹមគ្នា ដោះស្រាយជីវភាព ប្រឹងបិទច្រកបិទដង្ហើម។ តើជីវិតមួយនេះ តស៊ូ ដើម្បីអី ឬក៏ត្រូវគេរៀបចំផែនការ ដើម្បីឲ្យក្លាយជាជនក្បត់ជាតិមួយពូជ»។
អ្នកចម្រៀង តន់ ចន្ទសីម៉ា វិញ បានរិះគន់ក្រសួងថា ការបង្កកទ្រព្យសម្បត្តិក្រុមហ៊ុន មិនឲ្យធ្វើអ្វីទាំងអស់ ខណៈមានមនុស្សធ្វើការ ជាង ១០០០នាក់នោះ ស្មើនឹងច្របាច់ក ហើយបិទច្រមុះ។ អ្នកចម្រៀងរូបនេះ លើកឡើងវាយបកដែរថា ដីតំបន់សេដ្ឋកិច្ចពិសេស ១២៤១ហិកតារ ដែលព្រះឥន្ទ្រតូច គឺទំនងជាសំដៅដល់ លោកនាយរដ្ឋមន្ត្រី ហ៊ុន ម៉ាណែត ផ្តល់អាជ្ញាប័ណ្ណឲ្យក្រុមហ៊ុនកន្លងមក ត្រូវបានរដ្ឋមន្ត្រីក្រសួងដែនដីលោក សាយ សំអាល់ យកទៅលក់ឡាយឡុងតម្លៃ ៣៥០០ ដុល្លារ ក្នុងមួយហិកតារ។
ចំណែក ប្អូនប្រុសអ្នកឧកញ៉ា ឡេង ណាវ៉ាត្រា គឺឧកញ៉ា ឡេង និមល សួរលោក សាយ សំអាល់ ថា កាលណាឧបនាយករដ្ឋមន្ត្រី យកដីតំបន់សេដ្ឋកិច្ចពិសេស ១២៤១ហិកតារទៅលក់ឡៃឡុង តើឲ្យបងប្រុសលោក ដោះស្រាយបំណុល យ៉ាងម៉េច? ឡេង និមល សួរលោក សាយ សំអាល់ ទៀតថា តើមានគោលបំណងអ្វី?
ទោះជាយ៉ាងណាក៏ដោយ ក្រសួងរៀបចំដែនដី នគរូបនីយកម្ម និងសំណង់ បំភ្លឺនៅ ក្នុងសេចក្ដីប្រកាសព័ត៌មានរបស់ខ្លួន នៅថ្ងៃទី១០ ខែកញ្ញានេះ ថា អ្នកឧកញ៉ា ឡេង ណាវ៉ាត្រា បានបញ្ជាក់ថា ក្រុមហ៊ុនពុំមានលទ្ធភាពក្នុង ការសាងសង់បញ្ចប់ ជូនអតិថិជនទេ ហើយបានប្រគល់សិទ្ធិឲ្យក្រសួងដឹកនាំដោះស្រាយ តាមស្មារតី កិច្ចប្រជុំសម្របសម្រួល កាលពីថ្ងៃទី២៨ ខែមករា ឆ្នាំ២០២៦ រួមទាំងបានឯកភាព គ្នា ក្នុងការលក់ឡាយឡុងនូវអចលនទ្រព្យរបស់ក្រុមហ៊ុន និងរបស់ឈ្មោះ ឡេង ភត្រា ឬ ឡេង ណាវ៉ាត្រា ផង។ ក្រសួងថា រាល់ការលក់ឡាយឡុងទ្រព្យណាមួយ សុទ្ធតែមានការពិគ្រោះយោបល់ និង មានការឯកភាពពីគ្រប់ភាគីពាក់ព័ន្ធ លើ តម្លៃដែលអាចលក់បាន។
ក្រសួងឲ្យដឹងថា គម្រោងផ្ទះ និងដីឡូត៍របស់បុរី ឡេង ណាវ៉ាត្រា ផ្លូវជាតិលេខ ៦អា និងគម្រោងជ្រៃមួយរយ របស់ក្រុមហ៊ុន ហ្គាឡាក់ស៊ី ណាវ៉ាត្រា គ្រុប បានជាប់គាំងជាច្រើនឆ្នាំមកហើយ ហើយបណ្តាលឱ្យមានការតវ៉ាតាមរូបភាពផ្សេងៗ រួមទាំងបណ្ដឹងតវ៉ាជាផ្លូវការពីអតិថិជន ទៅកាន់ក្រសួង។ ក្រសួងឲ្យដឹងដែរថា ខ្លួនបានជួយសម្របសម្រួល ឱ្យក្រុមហ៊ុនមានឱកាសក្នុងការបន្តដោះស្រាយជូនអតិថិជន ប៉ុន្តែ ក្រុមហ៊ុននៅតែមិនអាចផ្តល់ដំណោះស្រាយសមស្រប និងទាន់ពេលវេលា ឡើយ។
ក្រសួងរៀបចំដែនដី នគរូបនីយកម្ម និងសំណង់ បញ្ជាក់ថា គិតត្រឹមថ្ងៃទី៩ ខែកញ្ញា ឆ្នាំ២០២៦ ក្រសួង បានចុះបញ្ជីចេញវិញ្ញាបនបត្រសម្គាល់ម្ចាស់អចលនវត្ថុ ជូនអតិថិជនដែលបានបង់ប្រាក់គ្រប់ចំនួន១០០% ចំនួន ៥ ៩៧០ ប័ណ្ណ។ ប៉ុន្តែ ក្រសួង ទើបតែបានប្រគល់ផ្ទះជូនអតិថិជន ត្រឹមតែចំនួន ៥៩៨ផ្ទះប៉ុណ្ណោះ ខណៈ អតិថិជន រហូតដល់ជាង ៣៨ ០០០គ្រួសារទៀត នៅមិនទាន់មាន ដំណោះស្រាយ ត្រឹមត្រូវនៅឡើយ រីឯការបានចាក់បំពេញដីបន្ថែម នៅគម្រោងជ្រែមួយ រយ ក៏ទើបតែសម្រេចបានប្រមាណ ៦០%។
អតិថិជន ឈ្មោះ ញឹម ពិទូ (Pitou Nhem) បានសរសេរលើហ្វេសប៊ុកថា ប្រជាពលរដ្ឋជាង ៣៨០០០ គ្រួសារ អ្នកខ្លះប្រឹងអត់បាយក្រហាយទឹក សន្សំកាក់សេន ដើម្បីបានលុយទិញទ្រនំជ្រក ឱ្យបានសមរម្យ ប៉ុន្តែ បែរមកត្រូវរងគ្រោះទៅវិញ។ ញឹម ពិទូ ជំរុញឱ្យបង្កកទ្រព្យ លក់យកលុយមកដោះស្រាយ ឱ្យទាន់សភាពការណ៍ ព្រោះបើទុកយូរ នឹងក្លាយជាជំងឺរាំរ៉ៃមើលមិនជា។
អតិថិជន ឈ្មោះ ឈុំ សុភា (Chhun Sophea) ឱ្យដឹងថា ប្រជាពលរដ្ឋរងគ្រោះ មិនមែនតែនៅគម្រោង ៦អា និងជ្រែ១០០ទេ សូមក្រសួងជួយស្វែងរក ដំណោះស្រាយសម្រាប់គម្រោងដីឡូតិ៍ ឡេង ណាវ៉ាត្រា ព្រៃប្រសប់ ស្រុកស្រីសន្ធរ កំពង់ចាមផង។ រីឯ អតិថិជន ឈ្មោះ សោមតារា វិឆ័យ (SormDara Vichhay) ថា គម្រោង ឡេង ណាវ៉ាត្រា នៅបាត់ដំបង ក៏មានបញ្ហាតាំងពីឆ្នាំ២០២១ សូមក្រសួងជួយដោះស្រាយផង៕
