កម្ពុជាក្រោមការដឹកនាំដោយរដ្ឋាភិបាលនៃក្រុមគ្រួសារត្រកូល ហ៊ុន បានប្រកាសលុបចោលការប្រារព្ធពិធីបុណ្យរបស់ជាតិដ៏សំខាន់មួយគឺព្រះរាជពិធីបុណ្យច្រត់ព្រះនង្គ័លនៅឆ្នាំនេះ។ មូលហេតុនៃការលុបចោលព្រះរាជពិធីបុណ្យជាតិមួយនេះគឺដោយសារតែព្រះមហាក្សត្រទ្រង់ប្រឈួនកំពុងសម្រាកទទួលការព្យាបាលពីក្រុមគ្រូពេទ្យនៅទីក្រុងប៉េកាំង ប្រទេសចិន។
នេះបើតាមការផ្សព្វផ្សាយរបស់សារព័ត៌មាន ហ្វ្រែសញូវ (Fresh News) ដែលជាប្រព័ន្ធឃោសនាគាំទ្ររដ្ឋាភិបាល។ ទោះជាយ៉ាងណា គេមិនឃើញរដ្ឋាភិបាលចេញសេចក្ដីប្រកាសផ្លូវការចំពោះការផ្អាកប្រារព្ធពិធីនៅក្នុងឆ្នាំនេះឡើយ។
ព្រះរាជពិធីបុណ្យច្រត់ព្រះនង្គ័លគឺជាអត្តសញ្ញាណជាតិដ៏សំខាន់មួយដែលបង្ហាញពីជំនឿ និងប្រពៃណីរបស់ប្រជាជនខ្មែរពាក់ព័ន្ធនឹងវិស័យកសិកម្ម និងសុភមង្គលជាតិ។ ពិធីនេះត្រូវបានប្រារព្ធជារៀងរាល់ដើមរដូវវស្សាតាំងពីសម័យបុរាណមក ដើម្បីបួងសួងឱ្យមានភ្លៀងធ្លាក់ច្រើនសម្រាប់ការដាំដុះដំណាំរបស់កសិករ និងទស្សន៍ទាយពីទិន្នផលកសិកម្មនៅរដូវខាងមុខ។
ទាក់ទងកសិកម្មនេះ ប្រជាកសិករនាឆ្នាំខ្លះក៏អាចទទួលបានទិន្នផលខ្ពស់ ប៉ុន្តែពួកគាត់នៅតែប្រឈមបញ្ហាគ្មានទីផ្សារ និងមិនអាចលក់ដូរបានក្នុងតម្លៃសមរម្យ ដោយសារតែរដ្ឋាភិបាលត្រកូល ហ៊ុន មិនអាចធានាពីចំណូលប្រជាកសិករឱ្យមានស្ថិរភាព និងមិនអើពើជួយរកទីផ្សារជូនពួកគាត់ឱ្យបានត្រឹមត្រូវ។
ក្នុងពេលរដ្ឋាភិបាលផ្អាកការប្រារព្ធព្រះរាជពិធីបុណ្យច្រត់ព្រះនង្គ័លក៏មានមតិខ្លះរិះគន់ដែរថា កូនប្រុសពៅរបស់លោក ហ៊ុន សែន គឺលោក ហ៊ុន ម៉ានី បែរជាអាចរៀបចំកម្មវិធី និងព្រឹត្តិការណ៍កម្សាន្តធំៗតាមតែអំពើចិត្ត ដោយគេមើលឃើញថា ដើម្បីលើកមុខមាត់លោក ហ៊ុន ម៉ានី ផ្ទាល់ផង និងពេលខ្លះដើម្បីបង្វែរស្ថានការណ៍ដែលយោធាថៃកំពុងបន្តឈ្លានពានកម្ពុជា និងការលំបាករបស់ពលរដ្ឋខ្មែរជាជនភៀសសឹកដែលកំពុងរស់នៅបាត់បង់ផ្ទះសម្បែង និងដីធ្លីផង៕
